ESENUPANTOꞌ 36
Tamîꞌnawîrî yairî eꞌnîtoꞌ kuꞌkî
Morî yairon kuꞌnen yonpa pe eporî yuꞌse tamîꞌnawîronkon man. Mîrîrî yuꞌse Jeová man nîrî. Saꞌme wanî sîrîrîpe yairî eꞌnîtoꞌ, maasa pra tuꞌke pemonkonyamîꞌ yeseru man yairî pra. Îꞌ waniꞌ awanî yeꞌnen morî pe wanî yairî eꞌnîtoꞌ yuwatoꞌpe? (Honestidade/Honesty)
1. Îꞌ waniꞌ awanî yeꞌnen yairî uyeserukon eꞌtoꞌ yuwa eꞌpainon?
Jeová maimu yawîrî yuꞌse uurînîkon wanî ya, uyeserukon wanî yairî eraꞌma Jeováya. Seeni eraꞌmakî: îꞌ pî uurînîkon esenumenka moropai îꞌ kupî uurînîkonya, epuꞌtî Jeováya. (Hebreus 4:13) Yairî yeseru eꞌtoꞌ yuwa uurînîkonya ya, mîrîrî wanî Jeová wakîri pe. Imaimu imenukasaꞌya taa pî man: “Seruꞌye pemonkon wanî Jeová wakîri pe pra yeꞌnen, tîîse yairî tîweꞌsanon pemonkonyamîꞌ yonpa pe eꞌpai awanî.” — Provérbios 3:32.
2. Oꞌnon yeꞌka pe yairî tîweꞌsen pe eꞌnî wei kaisarî?
Jeováya taa uurînîkon pî ‘yairî eseurîmatoꞌpe tiaronkon pokonpeꞌ. (Zacarias 8:16, 17) Îꞌ taa yuꞌse mîrîrî wanî? Seruꞌ pe eseurîma eserîke pra uurînîkon wanî, uyonpakon pî, uyonpakon teesenyakaꞌmasen pî, tiaronkon Paapa poitîrîtonon pî moropai pata esanon pî. Yairî tîweꞌsanonya îꞌ marunpa rîn moropai tiaronkon yenkuꞌtî rîn. (Eraꞌmakî Provérbios 24:28 moropai Efésios 4:28.) Yairî tîweꞌsanonya itemannekon impostos (taxes) yeꞌma pata esanon pia. (Romanos 13:5-7) “Maasa pra tîwîrî rî yairon ankuꞌpai anna wanî yeꞌnen.” — Hebreus 13:18.
3. Îꞌ waniꞌ awanî yeꞌnen yairî eꞌnî wanî morî pe?
Yairî tîweꞌsen pe uurînîkon wanî ya, inna taa tiaronkonya uurînîkon pî. Mîrîrî yeꞌnen, tîmurukun pe Paapa poitîrîtonon wanî, wîttî tawonkon panpe. Moropai, ituꞌna uurînîkon esenumenkatoꞌ wanî morî pe, nura pe pra. Morî pe wanî yairî tîweꞌsen pe eꞌnî, maasa pra ‘mîrîrî wenai uurînîkon nîkupî eraꞌma tamîꞌnawîronkonya morî peꞌ, moropai mîrîrîya tiaronkon pîikaꞌtî erepannîtoꞌpe Jeová pia. — Tito 2:10.
ESENUPAKÎ INÎꞌ PANPÎꞌ
Yairî tîweꞌsen pe enî ya, yairon pe uurînîkon kupî Jeová yonpa pe. Eraꞌmakî oꞌnon yeꞌka pe yairî tîweꞌsen pe amîrî wanî eꞌpainon wei kaisarî.
4. Yairî eꞌnîtoꞌya Jeová yausinpa
Eraꞌmatî Salmo 44:21 moropai Malaquias 3:16. Tarîpai seeni itoꞌkoꞌ manni pî eseurîmatî:
-
“Îꞌ kuꞌsauꞌya eraꞌmaiya eserîke pra Jeová man” tîkai pra. Îꞌ waniꞌ awanî yeꞌnen?
-
Oꞌnon yeꞌka pe Jeová esepuꞌtî îꞌ pensa yairî eꞌnî imenka uurînîkonya saꞌme wanî tanne?
Yairî munkuyamîꞌ eseurîma yai, mîrîrî pî yuntonon atausinpa. Yairî uurînîkon eseurîma yai, Jeová aatausinpa
5. Yairî akoꞌmankî
Yairî eꞌnîn eserîke pra uurînîkon wanî, taa tiaronkonya. Eraꞌmakî îꞌ waniꞌ awanî yeꞌnen yairî tîweꞌsen pe eꞌpai uurînîkon wanî. PANTON eraꞌmatî.
Eraꞌmatî Hebreus 13:18. Mîrîrî tîpo eseurîmatî oꞌnon yeꞌka pe yairî tîweꞌsen pe eꞌnî eꞌpainon . . .
-
ayewîꞌ tawonkon pokonpe.
-
esenyakaꞌmantoꞌ ta moropai esenupantoꞌ yewîꞌ ta.
-
tiaronkon pataꞌseꞌ ya.
6. Yairî eꞌnî wanî ya, morî pe wanî
Tiaron pensa yairî tîweꞌsen pe awanî yeꞌnen, eꞌtarumaꞌtîntoꞌ iipî eꞌpainon. Tîîse, mîrîrî yeseru wanî morî pe puꞌkuru, tîrumakai pra. Eraꞌmatî Salmo 34:12-16. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe yairî eꞌnîtoꞌya apîikaꞌtî eꞌpainon morî pe aakoꞌmantoꞌpe?
-
Eꞌmaritîmaꞌsan wanî ya yairî, morî pe wanî
-
Esenyakaꞌmakoiꞌkon wanî ya yairî, toꞌ karaiwarîyamîꞌya inna taa toꞌ pî
-
Pemonkonyamîꞌ wanî ya yairî, pata esanonkon koꞌpînaya inna taa toꞌ pî
TIARONKONYA TAA: “Seruꞌyeꞌ pe mararî uurî wanî ya, îꞌ wani pra wanî.”
-
Îꞌ waniꞌ awanî yeꞌnen Jeováya seruꞌ yewanmarî tamîꞌnawîrî?
Îꞌ PÎ ESENUPA PÎ NAN?
Tonpayamîꞌ yuꞌse Jeová wanî yairî. Îꞌ taa toꞌya eꞌpai wanî yairî moropai îꞌ kupî toꞌya eꞌpai wanî yairî nîrî.
Enpanatapaiꞌnîkon
-
Oꞌnon yeꞌka pe yairî tîweꞌsen pe uurînîkon wanî eꞌpainon?
-
“Îꞌ kuꞌsauꞌya eraꞌmaiya eserîke pra Jeová man” tîkai pra. Îꞌ waniꞌ awanî yeꞌnen?
-
Îꞌ waniꞌ awanî yeꞌnen yairî tîweꞌsen pe eꞌpai awanî tamîꞌnawîrî?
INÎꞌ PANPÎꞌ ESENUPAPAI NAN?
Oꞌnon yeꞌka pe tînmukukon yenupa eꞌpainon toꞌ yuntononya yairî toꞌ eꞌtoꞌpe?
Îꞌ waniꞌ awanî yeꞌnen morî pe wanî, îꞌ taasaꞌ uurînîkonya manni yawîrî kupî?
Innape amaimu kuꞌkî, yairî eseurîmasaꞌ ya morî iipî mîrîrî wenai (9:09)
Eraꞌmakî îꞌ waniꞌ awanî yeꞌnen morî pe wanî, pata esanonkon pia yeꞌma eꞌpai uurînîkon wanî, apîratari yenkamatoꞌpe toꞌya (impostos/taxes), morî pe pra tanne wanî ya.
Îꞌ ya warayoꞌ pîikaꞌtîꞌpî yairî pra aweꞌtoꞌ iteseru moꞌtanîtoꞌpeiya?
