ESENUPANTOꞌ 37
Îꞌ taa Paapa Maimuya esenyakaꞌmantoꞌ pî moropai pîrata pî?
Tiaron pensa amîrî esewankonoꞌma apîratari pî moropai esenyakaꞌmantoꞌ pî? Saꞌme wanî taise, maasa pra mararî pra esenyakaꞌman eꞌpai uurînîkon wanî moropai Jeová yapurî eꞌpai uurînîkon wanî yairî nîrî. Tîîse, Paapaya uurînîkon pîikaꞌtî moropai uurînîkon panamaiya imaimu imenukasaꞌ wenai.
1. Îꞌ taasaꞌ Paapa Maimuya esenyakaꞌmantoꞌ pî?
Taatausinpai uurînîkon esenyakaꞌma yuꞌse Jeová man. Imaimuya taa pî man, “morî pe puꞌkuru wanî warayoꞌ pia . . . morî teesenyakaꞌmantoꞌ yaretîꞌkaiya ya”. (Eclesiastes 2:24) Jeová mîîkîrî esenyakaꞌma mararî pra. Iteseru ipataka eꞌpai uurînîkon wanî, esenyakaꞌmantoꞌ eꞌtoꞌpe morî pe. Mîrîrî kuꞌpî uurînîkonya ya, Paapa tausinpa moropai taatausinpai uurînîkon wanî nîrî.
Uurînîkon esenyakaꞌma eꞌpai wanî. Tîîse, uurînîkon esenyakaꞌmantoꞌ wanî Jeová yapurîtoꞌ yentai, mîrîrî eꞌkupî eserîke pra wanî. (João 6:27) Jeováya taa pî man îꞌ ituꞌse tîweꞌtoꞌ kuꞌtoꞌpe amîrîya eꞌmaiꞌpe. Mîrîrî kupîya ya, tamîꞌnawîrî manniꞌ ituꞌse aweꞌtoꞌkon tîrîiya morî pe akoꞌmantoꞌpe.
2. Oꞌnon yeꞌka pe pîrata yenkama eꞌpai wanî morî pe?
Paapa Maimuya taa pî man pîrataya uurînîkon pîikaꞌtî. (Eclesiastes 7:12) Tîîse, Paapa Maimuya taa pî man nîrî, pîrata wenai tausinpantoꞌ iipî eserîke pra wanî. Mîrîrî yeꞌnen, Paapa Maimuya taa pî man kureꞌne uyemannekon pînînmayaꞌnîkon pîꞌ kîsenumenka moropai “morî pe man kaꞌtî mîrîrî itesaꞌ pe aweꞌtoꞌkon pîꞌ itentai puꞌkuru ituꞌse teesekaꞌnunkai pra.” (Eraꞌmakî Hebreus 13:5.) Mîrîrî kuꞌpî uurînîkonya ya, uurînîkon esewankonoꞌma eserîke pra wanî. Tuꞌke uyemannekon ton yeꞌma eserîke pra uurînîkon wanî nîrî. (Provérbios 22:7) Mîrîrîya uurînîkon pîikaꞌtî nîrî, maasa pra tiaronkonya uurînîkon yenkuꞌtî eꞌpainon, ipîkku pe uurînîkon enatoꞌpe kaꞌneꞌ pe.
3. Oꞌnon yeꞌka pe pîrata yenyakaꞌma uurînîkonya eꞌpainon tiaronkon pîikaꞌtîtoꞌpe?
Morî tîînen mîîkîrî Jeová, ‘tîwakîrikon pe, îꞌ rî uyemannekon yonpa tîîtoꞌpeꞌ uyonpakon pia. Iteseru ipataka eꞌpai uurînîkon wanî. (1 Timóteo 6:18) Mîrîrî kuꞌpî uurînîkonya eꞌpainon Emurukuntîtoꞌ Pataꞌseꞌ ta, anîꞌkan ituꞌsankon pîikaꞌtî uurînîkonya eꞌpainon moropai uurînîkon yonpayamîꞌ nîrî. Mararî pra pîrata tîrî uurînîkonya ya, mîrîrî eraꞌma Jeováya pepîn, tîîse uyewankon ke tîîsaꞌ uurînîkonya ya, mîrîrî wanî morî pe puꞌkuru Jeová pia. Mîrîrî wenai, tausinpantoꞌ eporî uurînîkonya eꞌpainon moropai Jeová yewan kupî uurînîkonya eꞌpainon taatausinpai. — Eraꞌmakî Atos 20:35.
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe esenyakaꞌma eꞌpainon tausinpantoꞌ ke moropai taatausinpai awanî eꞌpainon ayemannekon pî.
4. Morî pe esenyakaꞌmantoꞌ yeseru wanî ya, Jeová yewan kupî eꞌpainon taatausinpai
Jeová yonpa pe uurînîkon wanî yeꞌnen, uurînîkon esenumenkatoꞌ wanî morî pe esenyakaꞌmantoꞌ pî. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Panton ya, îꞌ nai awakîri pe Jonas yeseru pî teesenyakaꞌmantoꞌ ya?
-
Îꞌ kupîꞌpîiya morî pe yairî esenyakaꞌmatoꞌpe?
Eraꞌmatî Colossenses 3:23, 24. Tarîpai seeni itoꞌkoꞌ manni pî eseurîmatî:
-
Morî pe esenyakaꞌmantoꞌ yeseru wanî ya, îꞌ eꞌkupî eꞌpainon morî pe?
Uurînîkon esenyakaꞌma eꞌpai man. Tîîse, uurînîkon esenyakaꞌmatoꞌ ena morî pe puꞌkuru uurînîkon pia Jeová yapurîtoꞌ yentai, eserîke pra wanî.
5. Morî pe man kaꞌkî ayemannekon pî
Mararî pra pîrata yuꞌse pemonkonyamîꞌ man. Tîîse, Paapa Maimuya mîrîrî taasaꞌ man tîponarî. Eraꞌmatî 1 Timóteo 6:6-8. Tarîpai seeni itoꞌkoꞌ manni pî eseurîmatî:
-
Îꞌ kuꞌtoꞌpe taasaꞌ Paapa Maimuya nai?
Mararî yemannekon esaꞌ pe uurînîkon wanî ya, taatausinpai uurînîkon wanî eꞌpainon. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Mararî yemannekon esaꞌ pe toꞌ wanîꞌpî, tîîse îꞌ ya toꞌ yausinpaꞌpî?
Tîîse kureꞌne yemannekon esaꞌ pe awanî siꞌma, inîꞌrî ituꞌse awanî? Jesus eseurîmaꞌpî mîrîrî pî, mîrîrî wanî nariꞌ pe. Eraꞌmatî Lucas 12:15-21. Tarîpai seeni itoꞌkoꞌ manni pî eseurîmatî:
-
Îꞌ pî esenupa pî nan Jesus pantoni pî? — Imenukasaꞌ 15 eraꞌmatî.
Seeni imenukasaꞌkon eraꞌmatî moropai mîrîrî pî esenumenkatî, Provérbios 10:22 moropai 1 Timóteo 6:10. Tarîpai seeni itoꞌkoꞌ manni pî eseurîmatî:
-
Îꞌ taaya, îꞌ wanî morî pe panpîꞌ: Jeová yonpa pe eꞌnî, mararî pra pîrata esaꞌ pe eꞌnî karî? Îꞌ waniꞌ awanî yeꞌnen?
-
Îꞌ eꞌtarumaꞌtîntoꞌ iipî eꞌpainon pîrata neken yuwanen pe anîꞌ wanî ya?
6. Jeováya uurînîkon pîikaꞌtî
Uurînîkon esenumenka yeꞌnen mararî pra pîrata pî moropai esenyakaꞌmantoꞌ pî, mîrîrîya uurînîkon yarima eꞌpainon Jeová piapai. PANTON eraꞌmatî inîꞌ panpîꞌ epuꞌtîpa îꞌ kupî uurînîkonya eꞌpainon, mîrîrî pî uurînîkon esenumenka ya mararî pra. Mîrîrî tîpo seeni itoꞌkoꞌ manni pî eseurîmatî:
-
Panton ya, îꞌ ya warayoꞌ tarumaꞌtîꞌpî?
-
Îꞌ kupîꞌpîiya tîweꞌtarumaꞌtîntoꞌ yapîtanîtoꞌpe?
Eraꞌmatî Mateus 6:25-34. Tarîpai seeni itoꞌkoꞌ manni pî eseurîmatî:
-
Îꞌ eꞌkupî taa Paapa Maimuya, uurînîkon wanî ya Jeová yapurînen pe eꞌmaiꞌpe?
TIARONKONYA TAA: “Mararî pra uurî esenyakaꞌma uyewîꞌ tawonkon yekkari epotoꞌpe, mîrîrî yeꞌnen suntaka (semana/week) kaisarî Emurukuntîtoꞌ Pataꞌseꞌ ya uutî eserîke pra wai”, taa toꞌya.
-
Oꞌnon imenukasaꞌ Paapa Maimu yapainonya apîikaꞌtî eꞌpainon epuꞌtîpa, Jeová yapurîtoꞌ menkasaꞌya ya eꞌmaiꞌpe, mîrîrî wanî morî pe puꞌkuru?
Îꞌ PÎ ESENUPA PÎ NAN?
Esenyakaꞌmantoꞌ moropai pîrata, mîrîrîya uurînîkon pîikaꞌtî, tîîse mîrîrîkonya uurînîkon yarima eserîke pra wanî Jeová yapurîtoꞌ piapai.
Enpanatapaiꞌnîkon
-
Îꞌ ya apîikaꞌtî eꞌpainon yairî esenumenkatoꞌpe esenyakaꞌmantoꞌ pî?
-
Îꞌ waniꞌ awanî yeꞌnen atausinpa eꞌpainon ayemanne pî, mararî ayemanne esaꞌ pe awanî ya?
-
Oꞌnon yeꞌka pe amîrî yeseru yenpoya eꞌpainon, inna taasaꞌya Jeováya tîpemonkonoyamîꞌ pîikaꞌtî?
INÎꞌ PANPÎꞌ ESENUPAPAI NAN?
Pîrata wanî imakuiꞌpî pe naka, taasaꞌ Paapa Maimuya nai?
“Imakuiꞌpî pe iipî pîrata wenai naka?” (jw.org eseurîmantoꞌ pî)
Esenupakî oꞌnon yeꞌka pe Jeová yausinpaya eꞌpainon morî tîrîya wenai.
“Îꞌ taa Paapa Maimuya tiaronkon pia antîrî pî?” (jw.org eseurîmantoꞌ pî)
Apostas (gambling), mîrîrî wanî morî pe?
Eraꞌmakî îꞌ ya warayoꞌ pîikaꞌtîꞌpî imakuiꞌpî iteseru rumakatoꞌpeiya.
