ESENUPANTOꞌ 41
Îꞌ taa Paapa Maimuya esenîtoꞌ pî?
Tuꞌke pemonkonyamîꞌ wanî esenîtoꞌ pî eseurîmapai pra. Tîîse, Paapa Maimu eseurîma mîrîrî pî. Mîrîrîya uurînîkon pîikaꞌtî, maasa pra Jeová mîîkîrî uurînîkon konekatîpon, tîmaimu wenai uurînîkon anpîikaꞌtîpai awanî mîrîrî. Mîîkîrîya taa oꞌnon yeꞌka pe itewan yausinpa uurînîkonya eꞌpainon moropai îꞌ ya uurînîkon pîikaꞌtî eꞌpainon taatausinpai koꞌmantoꞌpe.
1. Îꞌ taa Jeováya esenîtoꞌ pî?
Esenîtoꞌ mîrîrî morî Jeová piapainon. Tîîse, eꞌmaritîmaꞌsankonya neken mîrîrî kupî eꞌpainon. Mîrîrî wenai eꞌmaritîmaꞌsankonya tîmukuyamîꞌ ton eporî eꞌpainon moropai toꞌ eꞌsaꞌnama eꞌpainon mîrîrî wenai. Paapa Maimuya taa pî man: “Atausinpakî anoꞌpî yarakkîrî, maasaron pe siꞌma atausinpaꞌpî panpe.” (Provérbios 5:18, 19) Jeová man eꞌmaritîmantoꞌ yuꞌse yairî, tiaron wîriꞌ yarakkîrî teꞌkumai pra moropai tiaron warayoꞌ yarakkîrî teꞌkumai pra. — Eraꞌmakî Hebreus 13:4.
2. Îꞌ see mîrîrî nura esenîtoꞌ?
Paapa Maimuya taa pî man “inkamoro wanî seꞌ tapairî wîriꞌsanyamîꞌ yarakkîrî tîweꞌsanon pe . . . Insamoro yeꞌkakonya îꞌ yapisî pepîn tiwin kin Paapa winîpai, maasa pra Paapa wanî pepîn toꞌ esaꞌ pe.” (1 Coríntios 6:9, 10) Porneía (por·neiʹa) imenukasaꞌ man Grego (Greek) maimu ya. Îꞌ see mîrîrî? Yairî pra esenîtoꞌ, imakuiꞌpî pe, nura pe a. Mîrîrî wanî (1) tîweꞌmaritîma rawîrî toꞌ eseku, (2) warayoꞌ wanî tiaron warayoꞌ yarakkîrî toꞌ eseku moropai wîriꞌ wanî tiaron wîriꞌ yarakkîrî toꞌ eseku, moropai (3) tekînkon yeku pemonkonya ya. Mîrîrîkon yuꞌse pra Jeová wanî, imaimu yawîrî uurînîkon wanî ya, Jeová atausinpa, moropai uurînîkon koꞌmamî eꞌpainon morî pe. — 1 Tessalonicenses 4:3.
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe nura esenîtoꞌ kupîya namai moropai oꞌnon yeꞌka pe morî pe aakoꞌmamî eꞌpainon.
3. Nurakon moropai imakuiꞌpîkon esenîtoꞌ yapai epekî
Paapa Maimu imenukasaꞌ eseurîma José pî. José wanîꞌpî Paapa poitîrî pe, wîriꞌ wanîꞌpî José yarakkîrî eꞌpai, tîîse kaane taꞌpîiya ipî. Eraꞌmatî Gênesis 39:1-12. Mîrîrî tîpo seeni itoꞌkoꞌ manni pî eseurîmatî:
-
Îꞌ ya José pîikaꞌtîꞌpî nura esenîtoꞌ yapai epetoꞌpe? — Imenukasaꞌ 9 eraꞌmatî.
-
Morî kupîꞌpî Joséya? Îꞌ waniꞌ awanî yeꞌnen?
Oꞌnon yeꞌka pe maasaronkonya José yeseru pataka eꞌpainon, nura esenîtoꞌ kupî toꞌya namai? PANTON eraꞌmatî.
Nura esenîtoꞌ pî kaane taa uurînîkonya yuꞌse Jeová wanî. Eraꞌmatî 1 Coríntios 6:18. Tarîpai seeni itoꞌkoꞌ manni pî eseurîmatî:
-
Îꞌ ya pemonkon yakaꞌma eꞌpainon nura esenîtoꞌ kuꞌtoꞌpe?
-
Oꞌnon yeꞌka pe kaane taaya eꞌpainon nura esenîtoꞌ pî?
4. Kaane taaya eꞌpainon nura yeserukon pî
Îꞌ ya ayakaꞌma eꞌpainon morî kupîya namai? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Seeni panton ya, seeni warayoꞌya epuꞌtîꞌpî, imakuiꞌpî pe esenumenkatoꞌya tînoꞌpî rumakaiya emapuꞌtî eꞌpainon. Mîrîrî epuꞌtî tîuya yai, îꞌ kupîꞌpîiya?
Tiaron pensa saꞌme wanî nîrî Paapa poitîrîtonon pia, nura teesenumenkatoꞌkon rumakatoꞌpe toꞌya. Îꞌ ya apîikaꞌtî eꞌpainon nura pe esenumenka namai? Eraꞌmatî Filipenses 4:8. Tarîpai seeni itoꞌkoꞌ manni pî eseurîmatî:
-
Îꞌ kon pî uurînîkon esenumenka eꞌpai wanî?
-
Oꞌnon yeꞌka pe Paapa Maimu erenka wei kaisîrî moropai Paapa tonpe uurînîkon esenyakaꞌma, mîrîrîkonya upîikaꞌtîꞌnîkon kaane taatoꞌpe nura yeserukon pî?
5. Jeová yenupantoꞌkon wanî morî pe uurînîkon pîikaꞌtînen pe
Jeováya epuꞌtî pî man îꞌ wanî morî pe uurînîkon tonpe moropai uurînîkon yenupaiya, nura pe pra uurînîkon esenumenka namai. Provérbios 7:7-27 eraꞌmaya eꞌpainon moropai PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Seeni panton ya, oꞌnon yeꞌka pe maasaron warayoꞌya imakuiꞌpî kupî yonpaꞌpî îꞌ kupîꞌpîiya winîpai? — Eraꞌmatî Provérbios 7:8, 9.
-
Provérbios 7:23, 26 taasaꞌ manni warantî, imakuiꞌpî iipî eꞌpainon nura esenîtoꞌ winîpai. Îꞌ imakuiꞌpî pî uurînîkon esuwaꞌka pepîn nura esenîto kuꞌsaꞌ pra eꞌnî ya?
-
Nura yeserukon kuꞌsaꞌ pra awanî ya, oꞌnon yeꞌka pe mîrîrîya apîikaꞌtî eꞌpainon ipatîkarî aakoꞌmantoꞌpe?
Warayoꞌ tiaron warayoꞌ yarakkîrî tîweꞌsen, wîriꞌ tiaron wîrî yarakkîrî tîweꞌsen, mîrîrî wanî morî pe pra taa Paapa Maimuya. Tîîse tiaronkon pemonkonyamîꞌya taa wakîri pe pra îꞌ taasaꞌ manni Paapa Maimuya mîrîrî pî. Tîîse, uurînîkon saꞌnamanen mîîkîrî Jeová, uurînîkon koꞌmamî yuꞌse wanî taatausinpai. Tîîse mîrîrî eꞌkuꞌtoꞌpe, imaimu yawîrî eꞌpai uurînîkon wanî. Eraꞌmatî 1 Coríntios 6:9-11. Tarîpai seeni itoꞌkoꞌ manni pî eseurîmatî:
-
Warayoꞌ tiaron warayoꞌ yarakkîrî tîweꞌsen, wîriꞌ tiaron wîrî yarakkîrî tîweꞌsen mîrîrî neken wanî imakuiꞌpî pe taa Paapaya?
Jeová yausinpatoꞌpe uurînîkonya, uyeserukon emoꞌtanîpî eꞌpai uurînîkon wanî. Morî pe wanî mîrîrî kupî uurînîkonya ya? Eraꞌmatî Salmo 19:8, 11. Tarîpai seeni itoꞌkoꞌ manni pî eseurîmatî:
-
Îꞌ taa Jeováya îꞌ kupî eserîke uurînîkon wanî moropai îꞌ kupî eserîke pra uurînîkon wanî, mîrîrî wanî morî pe uurînîkon tonpe? Îꞌ waniꞌ awanî yeꞌnen mîrîrî warantî taaya?
Tuꞌke pemonkonyamîꞌ pîikaꞌtîꞌpî Jeováya tenupantokon yawîrî toꞌ etoꞌpe moropai nura yeserukon rumakatoꞌpe toꞌya. Amîrî pîikaꞌtîiya eꞌpainon nîrî
TIARONKONYA TAA: “Îꞌ wani pra man asakîꞌnankon pemonkonyamîꞌ eseꞌku ya, maasa pra toꞌ eꞌsaꞌnama yeꞌnen!”
-
Îꞌ taaya mîrîrî pî?
Îꞌ PÎ ESENUPA PÎ NAN?
Esenîtoꞌ wanî morî pe Jeová piapainon, warayoꞌ eꞌmaritîmasaꞌ ya wîri yarakkîkî neken.
Enpanatapaiꞌnîkon
-
Îꞌ kon pe wanî nurakon esenîtoꞌ?
-
Îꞌ ya uurînîkon pîikaꞌtî eꞌpainon nura esenîtoꞌ kupî namai?
-
Îꞌ waniꞌ awanî yeꞌnen morî pe wanî îꞌ taasaꞌ Jeováya manni esenîtoꞌ pî yawîrî eꞌnî ya?
INÎꞌ PANPÎꞌ ESENUPAPAI NAN?
Eraꞌmakî îꞌ waniꞌ awanî yeꞌnen warayoꞌ moropai wîriꞌ eꞌmaritîma yuꞌse Jeová wanî.
“Îꞌ taa Paapa Maimuya noꞌpîtasan pî eꞌmaritîmai pra?” (jw.org eseurîmantoꞌ pî)
Warayoꞌ tiaron warayoꞌ yarakkîrî tîweꞌsen, wîriꞌ tiaron wîrî yarakkîrî tîweꞌsen, mîrîrî wanî yairî pra, nura pe. Tîîse, mîrîrî kuꞌnenan toꞌ yewanmarî taasaꞌ Paapa Maimuya pra man.
Îꞌ taa Jeováya manni esenîtoꞌ pî, mîrîrîya uurînîkon pîikaꞌtî.
“Esenîtoꞌ konekatoꞌ anta kon ke, mîrîrî wanî imakuiꞌpî pe?” (jw.org eseurîmantoꞌ pî)
“Morî pe toꞌ eseurîmaꞌpî uurî yarakkîrî”, seeni yekare eraꞌmakî, îꞌ waniꞌ awanî yeꞌnen warayoꞌya tîîkoꞌmantoꞌ etinyakaꞌmaꞌpî Paapa yausinpa tîuya epuꞌtîpa.
“Paapa Maimuya Pemonkonyamîꞌ Inkaꞌma” (A Sentinela, 1 abril kapoi pî, 2011 konoꞌ pî)
a Porneía mîrîrî, nura esenîtoꞌ konekatoꞌ antakon ke, aweꞌta ke, tiaronkon pemonkon suꞌmina tenyakon ke, tiaron mere pî, tiaron piꞌpu pî.
