ESENUPANTOꞌ 43
Îꞌ taa Paapa Maimuya maiꞌ enîꞌtoꞌ pî?
Pemonkonyamîꞌ esenumenkatoꞌ wanî tîponarî maiꞌ enîtoꞌ pî. Tiaron pensa, tiaronkon wakîri pe wanî, tonpakon pokonpe toꞌ wanî ya, maiꞌ enîrî toꞌya. Tîîse, tiaronkon wakîri pe pra wanî, maiꞌ enîrî toꞌya tiwin kin. Moropai tiaronkonya maiꞌ enîrî eꞌtari pe toꞌ enatoꞌpe. Îꞌ taa Paapa Maimuya maiꞌ enîꞌtoꞌ pî?
1. Maiꞌ enîꞌtoꞌ wanî yairî pra?
Maiꞌ enîꞌtoꞌ wanî yairî pra, taasaꞌ Paapa Maimuya pra man. Imaimuya taa pî man vinho pî (wine), mîrîrîya warayoꞌ yewan yausinpa, mîrîrî wanî Paapa piapainon. (Salmo 104:14, 15) Penaron Paapa poitîrîtonon, warayoꞌkon moropai wîriꞌsanyamîꞌya maiꞌ enîrîpîtîꞌpî nîrî. — 1 Timóteo 5:23.
2. Îꞌ taa Paapa Maimuya, maiꞌ aninnîpai pemonkon wanî ya?
Eꞌtari pe ena maiꞌ enîꞌtoꞌ wenai, mîrîrî wanî yairî pra. (Gálatas 5:21) Paapa Maimuya taa pî man: “Mararî pra maiꞌ enîꞌnenkon koreꞌta eꞌpai pra eꞌkî.” (Provérbios 23:20) Maiꞌ aninnîpai uurînîkon wanî ya, tiaronkon pokonpe moropai tiwinsarî siꞌma nîrî, aka taa eꞌpai uurînîkon wanî, maasa pra kureꞌne maiꞌ enîꞌsaꞌ ya, yairî pra esenumenka, yairî pra eseurîma taise moropai imakuiꞌpîkon koneka uurînîkonya taise. Mîrîrî wenai priꞌya pra uurînîkon ena eꞌpainon nîrî. Mararî neken maiꞌ enîrî eserîke pra uurînîkon wanî ya, morî pe panpîꞌ wanî uupianîkon, maiꞌ enîꞌtoꞌpe pra tiwin kin.
3. Îꞌ imenkaꞌpî tiaronkonya manni, oꞌnon yeꞌka pe toꞌ yakoꞌmenka eserîke pra uurînîkon wanî?
Maiꞌ aninnîpai wanî ya, maiꞌ aninnîpai pra wanî ya, mîrîrî imenka eꞌpai awanî tîwinsarî. Kureꞌne maiꞌ enîꞌnen wanî pra anîꞌ wanî ya, takoꞌmenkai pra, tîwî nîsi. “Maiꞌ enîꞌkî” taa tuꞌke iteꞌka uurînîkonya tiaronkon pî eserîke pra wanî nîrî. (Romanos 14:10) Imakuiꞌpî pe uyonpakon ena namai, maiꞌ enîꞌtoꞌ rumaka eꞌpai uurînîkon wanî. (Eraꞌmatî Romanos 14:21.) Tiaronkon pî uurînîkon esenumenka nîrî, ‘toꞌ pîikaꞌtîtoꞌpe.’ — Eraꞌmakî 1 Coríntios 10:23, 24.
ESENUPAKÎ INÎꞌ PANPÎꞌ
Maiꞌ enîrî eꞌpainon? Inna, kaane karî? Paapa Maimuya apîikaꞌtî eꞌpainon morî pe ikupîpa. Maiꞌ enîꞌtoꞌ wenai eꞌtarumaꞌtîntoꞌ wanî ya aapia, eraꞌmakî îꞌ kupîya eꞌpainon.
4. Maiꞌ enîrî eꞌpai awanî? Inna, kanne karî? Morî menkakî
Oꞌnon yeꞌka pe Jesus esenumenkapîtîꞌpî maiꞌ enîꞌtoꞌ pî? Uurînîkon esenupa eꞌpainon iwinîpai, oꞌnon yeꞌka pe tîmeruntîri yenpoꞌpîiya eꞌmaiꞌpe iteꞌka. Eraꞌmatî João 2:1-11. Tarîpai seeni itoꞌkoꞌ manni pî eseurîmatî:
-
Mîrîrî wenai epuꞌtî uurînîkonya eꞌpainon, oꞌnon yeꞌka pe Jesus esenumenkaꞌpî (1) maiꞌ enîꞌtoꞌ pî moropai (2) maiꞌ enîꞌnenan pî?
-
Yairî pra wanî maiꞌ enîꞌtoꞌ taasaꞌ Jesusya pra man. Mîrîrî yeꞌnen îꞌ pî esenumenka eꞌpai uurînîkon wanî mannankan maiꞌ enîꞌnenan pî?
Îꞌ wani pra man maiꞌ enîrî, tîîse tiaron pensa mîrîrî wanî imakuiꞌpî pe. Eraꞌmatî Provérbios 22:3. Tarîpai seeni itoꞌkoꞌ manni pî eseurîmatî. Ekaranmapokî apî rî: maiꞌ enîrîuya naka?
-
Tararan yarîya ya.
-
More yan pe wanî ya.
-
Doutorya taasaꞌ ya maiꞌ enîrî eserîke pra awanî.
-
Saꞌme wanî ya aapia, mararî neken maiꞌ enîꞌtoꞌpe.
-
Pata esanonkonya taa: “Maiꞌ enîrî eserîke pra awanî.”
-
Ayarakkîrî anîꞌ wanî ya, tîîse maiꞌ enîꞌnen pepîn mîîkîrî, maasa pra kureꞌne maiꞌ enîrîꞌpîiya yeꞌnen pena.
Eꞌmaritîmantoꞌ weiyu yai, pemonkonyamîꞌ eperepîꞌsan pia, maiꞌ enîꞌtoꞌ tîrîya eꞌpainon? Îꞌ ya apîikaꞌtî eꞌpainon morî kuꞌtoꞌpe? PANTON eraꞌmatî.
Eraꞌmatî Romanos 13:13 moropai 1 Coríntios 10:31, 32. Mîrîrî imenukasaꞌkon eraꞌma tîpo, seeni itoꞌkoꞌ manni pî eseurîmatî:
-
Mîrîrî Paapa Maimu imenukasaꞌ yawîrî awanî ya, oꞌnon yeꞌka pe mîrîrîya apîikaꞌtî eꞌpainon morî imenkapa moropai Jeová yausinpatoꞌpe?
Tiwin pîꞌ siꞌma imenka eꞌpai Paapa poitîrîtonon wanî maiꞌ aninnîpai awanî ya, aninnîpai pra awanî ya. Tiwin pemonkonya maiꞌ enîrî eꞌpainon tiwin weiyu yai, tîîse tiaron weiyu rîn
5. Esenumenkakî îꞌ warapo kaisarî maiꞌ enîrîya
Maiꞌ enîrî irawîrî, enpanatakî: îꞌ wani pra wanî Jeová pia maiꞌ enîꞌsaꞌ ya, tîîse yairî pra wanî eꞌtari pe ena ya. Îꞌ waniꞌ awanî yeꞌnen? Eraꞌmatî Oseias 4:11, 18. Tarîpai seeni itoꞌkoꞌ manni pî eseurîmatî:
-
Îꞌ eꞌkupî pemonkon yarakkîrî, maiꞌ enîꞌsaiꞌya ya kureꞌne?
Îꞌ ya uurînîkon pîikaꞌtî eꞌpainon kureꞌne maiꞌ enîrî namai? Epuꞌtî eꞌpai uurînîkon wanî, îꞌ warapo kaisarî maiꞌ enîꞌtoꞌ yapîtanîpî pî uurînîkonya eꞌpainon. Eraꞌmatî Provérbios 11:2. Tarîpai seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen esenumenka eꞌpai awanî, îꞌ warapo kaisarî maiꞌ enîrîya?
6. Pîikaꞌtîntoꞌ man kureꞌne maiꞌ enîrî namaiꞌ
Eraꞌmakî îꞌ ya warayoꞌ pîikaꞌtîꞌpî meruntî ke enatoꞌpe maiꞌ enîꞌtoꞌ yentai. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî.
-
Seeni panton ya, oꞌnon yeꞌka pe maiꞌ wukuya Dmitry yeseru maꞌtanîpîꞌpî?
-
Saꞌme pra wanîꞌpî iipia maiꞌ enîꞌtoꞌ irumakatoꞌpeiya?
-
Oꞌnon yeꞌka pe maiꞌ enîꞌtoꞌ irumakaꞌpîiya?
Eraꞌmatî 1 Coríntios 6:10, 11. Tarîpai seeni itoꞌkoꞌ manni pî eseurîmatî:
-
Eꞌtari pe ena, mîrîrî wanî imakuiꞌpî pe?
-
Îꞌ ya eꞌtari pe tîweꞌsen yeseru moꞌtanîpî eꞌpainon?
Eraꞌmatî Mateus 5:30. Tarîpai seeni itoꞌkoꞌ manni pî eseurîmatî:
-
Yenya yaꞌtîkî Jesus panton ya taasaꞌ panpe, îꞌ taatoꞌpe awanî mîrîrî? Mîrîrî kuꞌtoꞌpe wanî saꞌme, tîîse meruntî ke eꞌpai uurînîkon wanî. Mîrîrîya Jeová yausinpa. Îꞌ kupîya eꞌpainon maiꞌ enîꞌtoꞌ yeseru irumakapa saꞌme mîrîrî wanî ya? a Imenukasaꞌ itoꞌko eraꞌmatî - Nota.
Eraꞌmatî 1 Coríntios 15:33. Mîrîrî tîpo seeni itoꞌkoꞌ manni pî eseurîmatî.
-
Imakuiꞌsan pemonkon koreꞌta awanî ya, moropai maiꞌ enîrî toꞌya kureꞌne, oꞌnon yeꞌka pe mîrîrîya ayakaꞌma eꞌpainon?
ANÎꞌYA EKARANMAPO YA: “Yairî pra wanî maiꞌ enîrî ya?”
-
Îꞌ taaya eꞌpainon?
Îꞌ PÎ ESENUPA PÎ NAN?
Maiꞌ enîꞌtoꞌ wanî morî Jeová piapainon, tîîse eꞌtari pe enatoꞌ, mîrîrî wanî yairî pra Jeová pia.
Enpanatapaiꞌnîkon
-
Îꞌ taasaꞌ Paapa Maiꞌmu imenukasaꞌya maiꞌ enîꞌtoꞌ pî?
-
Îꞌ waniꞌ awanî yeꞌnen nari pe wanî kureꞌne maiꞌ enîꞌsaꞌ ya?
-
Îꞌ imenkaꞌpî tiaronkonya manni, oꞌnon yeꞌka pe toꞌ yakoꞌmenka eserîke pra uurînîkon wanî?
INÎꞌ PANPÎꞌ ESENUPAPAI NAN?
Oꞌnon yeꞌka pe maasaronkonya morî imenka eꞌpainon maiꞌ enîꞌtoꞌ pî?
Eraꞌmakî îꞌ kupîya eꞌpainon, imakuiꞌpî maiꞌ enîꞌtoꞌ yeseru rumakapa.
“Meruntî ke eꞌkî maiꞌ enîꞌtoꞌ yentai” (A Sentinela, 1 janeiro kapoi pî, 2010 konoꞌ pî)
Brindar (toasting), mîrîrî naka kupî Jesus pemonkonoyamîꞌya eꞌpainon?
“Imenukasaꞌ Eraꞌmanenanya Ekaranmapo” (A Sentinela, 15 fevereiro kapoi pî, 2007 konoꞌ pî)
Seeni panton “Eꞌtari pe uurî koꞌmanpîtîꞌpî” eraꞌmakî, oꞌnon yeꞌka pe eꞌtari pe yeseru irumakaꞌpîiya.
“Paapa Maimuya Pemonkonyamîꞌ Inkaꞌma” (A Sentinela, 1 maio kapoi pî, 2012 konoꞌ pî)
a Mannankanya maiꞌ rumaka eserîke pra wanî ya, Doutor pia pîikaꞌtîntoꞌ yuwa toꞌya eꞌpainon. Kureꞌne maiꞌ enîꞌnenan eꞌtarumaꞌtî ipîra taise, mîrîrî yeꞌnen Doutoryamîꞌya taa maiꞌ enîꞌtoꞌpe pra inîꞌrî.
