ESENUPANTOꞌ 45
Oꞌnon yeꞌka pe “non po tîîkoꞌmansenon yonpa pe pra” awanî eꞌpainon?
Jesusya taꞌpî tînenupaꞌsan pî: “Sîrîrî non po tîîkoꞌmansenon . . . toꞌ yonpa pe pra awanîkon maasa pra amoꞌkaꞌpîuyaꞌnîkon toꞌ koreꞌta pai.” (João 15:19) Mîrîrî yeꞌnen pata esanon koreꞌta anna wanî eserîke pra wanî, îꞌ pensa toꞌ eseyaꞌnama ya tiaron pata ponkon yarakkîrî, toꞌ pokonpe uurînîkon epî eserîke pra wanî nîrî. Mîrîrî yeꞌnen mîrîrî wanî saꞌman pe uurînîkon pia taise. Mîrîrî wenai tiaronkon siira uurînîkon pî. Oꞌnon yeꞌka pe sîrîrî “non po tîîkoꞌmansenon yonpa pe pra” uurînîkon wanî eꞌpainon moropai Jeová maimu yawîrî uurînîkon koꞌmamî?
1. Îꞌ taa Jesus pemonkonoyamîꞌya pata esanonkon pî?
Jesus pemonkonoyamîꞌ wanî pata esanon maimu yawîrî. Jesus maimu yawîrî anna wanî; mîîkîrîya taꞌpî: “César nekaremekîꞌpî unkupîkon ton pe kuꞌtî”. Mîrîrî yeꞌnen pata esanon maimu yawîrî anna wanî moropai îꞌ esaꞌtî toꞌya ya, mîrîrî yeꞌma annaya nîrî. (Marcos 12:17) Jeováya inna taasaꞌ yeꞌnen toꞌ pî, pata esanon wanî pata poro. Moroni toꞌ wanî Paapaya toꞌ tîrîꞌpî yeꞌnen, taa Paapa Maimuya. (Romanos 13:1) Pata esaꞌ pe toꞌ wanî, tîîse inkamoro wanî pepîn Paapa yentai. Epuꞌtî pî uurînîkon man, tamîꞌnawîrî eꞌtarumaꞌtîntoꞌ eꞌtîꞌka Paapa winîpai neken.
2. Îꞌ kupî eꞌpai uurînîkon wanî pata esanon koreꞌta eꞌnî namai?
Jesus panpe, pata esanonkon koreꞌta uurînîkon wanî eserîke pra wanî. Jesusya tîmeruntîri ke pemonkonyamîꞌ yareꞌtîꞌpî yai, pata esaꞌ pe ikuꞌpai toꞌ wanîꞌpî, tîîse Jesus eppeꞌpî toꞌ piapai. (João 6:15) Îꞌ waniꞌ awanî yeꞌnen? Maasa pra Jesusya taꞌpî: “Sîrîrî non po pemonkonyamîꞌ yaipontîuya pepîn toꞌ esaꞌ pe.” (João 18:36) Jesus poitîrî pe anna wanî yeꞌnen, kureꞌnan eseyaꞌnamantoꞌ yai, anna wîtî pepîn toꞌ koreꞌta. (Eraꞌmakî Miqueias 4:3.) Pata esanonkon pî taasaꞌ pra anna wanî nîrî: “imakuiꞌsan pe toꞌ wanî!”, “morî pe toꞌ wanî!”. Toꞌ maimu yawîrî anna wanî, tîîse toꞌ yapurî eserîke pra anna wanî, toꞌ bandeira (flag) yapurî annaya pepîn nîrî. (1 João 5:21) Mîrîrîkon wenai Jeová yapurî annaya uyewankon ke moropai tîmaimu yawîrî uurînîkon wanî.
ESENUPAKÎ INÎꞌ PANPÎꞌ
Tiaron pensa, saꞌman pe wanî, sîrîrî non po tîîkoꞌmansenon yonpa pe pra uurînîkon eꞌtoꞌpe. Mîrîrî pî esenupakî moropai eraꞌmakî oꞌnon yeꞌka pe morî menkaya eꞌpainon, Jeová tausinpatoꞌpe.
3. Jesus pemonkonoyamîꞌ wanî non po tîîkoꞌmansenon yonpa pe pra
Jesus moropai tînenupaꞌsan wanîꞌpî non po tîîkoꞌmansenon yonpa pe pra. Toꞌ yeseru ipataka eꞌpai uurînîkon wanî. Eraꞌmatî Romanos 13:1, 5-7 moropai 1 Pedro 2:13, 14. Mîrîrî tîpo, PANTON eraꞌmatî moropai seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen pata esanon maimu yawîrî eꞌpai uurînîkon wanî?
-
Oꞌnon yeꞌka pe ekaremekî uurînîkonya eꞌpainon toꞌ maimu yawîrî uurînîkon wanî?
Kureꞌnan epîntoꞌ yai, tiaronkon pata esanonya taa: “Toꞌ yausinpa annaya pepîn mîrîrî kuꞌtoꞌpe toꞌya”, taa toꞌya. Tîîse, tiwinan imenka toꞌya toꞌ pîikaꞌtîtoꞌpe. Mîrîrî yai, îꞌ kupî eꞌpai Jesus pemonkonoyamîꞌ wanî? Eraꞌmatî João 17:16. Mîrîrî tîpo, PANTON eraꞌmatî moropai seeni itoꞌkoꞌ manni pî eseurîmatî:
-
Oꞌnon yeꞌka pe yenpo uurînîkonya eꞌpainon, non po tîîkoꞌmansenon yonpa pe pra uurînîkon wanî?
Paapa Maimu yawîrî uurînîkon wanî ituꞌse pra Pata esanon wanî ya, îꞌ kupî eꞌpai uurînîkon wanî? Eraꞌmatî Atos 5:28, 29. Mîrîrî tîpo, PANTON eraꞌmatî moropai seeni itoꞌkoꞌ manni pî eseurîmatî:
-
Warayoꞌkon maimu taasaꞌ ya “seeni kuꞌtî”, tîîse Paapa Maimuya taa “kîkatî”. Anîꞌ maimu yawîrî eꞌpai uurînîkon wanî?
-
Esenumenkakî: îꞌ pensa Jesus pemonkonoyamîꞌ wanî warayoꞌkon maimu yawîrî pra?
4. Non po tîîkoꞌmansenon yonpa pe pra ekî – Ayeseru wenai moropai esenumenkatoꞌ wenai.
Eraꞌmatî 1 João 5:21. Mîrîrî tîpo, PANTON eraꞌmatî moropai seeni itoꞌkoꞌ manni pî eseurîmatî:
-
Seeni panton ya, îꞌ waniꞌ awanî yeꞌnen Ayenge menkaꞌpî, pata esanon pokonpe esenyakaꞌma pepîn moropai bandeira (flag) yapurî rîn?
-
Morî naka kupîꞌpîiya? Îꞌ taaya?
Îꞌ konya inîꞌ panpîꞌ uurînîkon manenpanen non po tîîkoꞌmansenon yonpa pe pra eꞌnîtoꞌpe? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Îꞌ pensa tiaron pataꞌ ponkon suꞌmin ya uurînîkon pataꞌ ponkon winîkîi pra, îꞌ kupî eꞌpai uurînîkon wanî, non po tîîkoꞌmansenon yonpa pe pra uurînîkon eꞌnîtoꞌpe?
-
Oꞌnon yeꞌka pe non po tîîkoꞌmansenon yonpa pe pra eꞌpai uurînîkon wanî, îꞌ kupî pata esaꞌya uurînîkon pîikaꞌtî wanî ya moropai uurînîkon pîikaꞌtîsaiꞌya pra wanî ya?
-
Oꞌnon yeꞌka pe îꞌ taa tiaronkonya uurînîkon pî moropai îꞌ eraꞌma uurînîkonya manniꞌ TV wenai, mîrîrîkonya uurînîkon yakaꞌma eꞌpainon non po tîîkoꞌmansenon yonpa pe pra eꞌnîtoꞌpe?
Îꞌ kupî Paapa poitîrîtononya eꞌpainon non po tîîkoꞌmansenon yonpa pe tîwanîkon namai?
ANÎꞌYA EKARANMAPO YA: “Îꞌ waniꞌ awanî yeꞌnen bandeira (flag) yawîrî amîrînîkon eserenka pepîn, uurînîkon pata ponkon pokonpe?”
-
Oꞌnon yeꞌka pe yuukuya eꞌpainon?
Îꞌ PÎ ESENUPA PÎ NAN?
Aka taa eꞌpai Jesus pemonkonoyamîꞌ wanî, toꞌ esenumenkatoꞌkon, toꞌ eseurîmantoꞌkon moropai toꞌ yeserukon wanî namai non po tîîkoꞌmansenon panpe.
Enpanatapaiꞌnîkon
-
Îꞌ tîrî eꞌpai uurînîkon wanî pata esanon pia?
-
Îꞌ waniꞌ awanî yeꞌnen non po tîîkoꞌmansenon yonpa pe pra eꞌpai uurînîkon wanî?
-
Îꞌ konya uurînîkon manenpanen non po tîîkoꞌmansenon yonpa pe pra eꞌnîtoꞌpe?
INÎꞌ PANPÎꞌ ESENUPAPAI NAN?
Îꞌ saꞌman kupî uurînîkonya eꞌpainon, non po tîîkoꞌmansenon yonpa pe pra eꞌnîtoꞌpe?
Îꞌ kupî wîttî tawonkonya eꞌpainon teekonekai aweꞌtoꞌpe, non po tîîkoꞌmansenon yonpa pe eꞌna namai?
Tiaronkonya taa, îꞌ rî kupî toꞌya tîpataꞌsekon tonpe esenyakaꞌma, ekoreꞌma, mîrîrî wanî morî pe puꞌkuru îꞌ rî yentai, taa toꞌya. Îꞌ waniꞌ awanî yeꞌnen mîrîrî wanî yairî pra?
Eraꞌmakî oꞌnon yeꞌka pe non po tîîkoꞌmansenon yonpa pe ena namai, esenyakamantoꞌ ton yuwa yai.
