Eꞌmaritîmaꞌsan atausinpaꞌpî îꞌ pensa tîweꞌmaritîmakon yai. Mîrîrî tausinpantoꞌ eꞌtoꞌpe ipatîkarî yuꞌse toꞌ wanî. Mîrîrî eꞌkupî eꞌpainon! Mîrîrî epuꞌtî penaronkon eꞌmaritîmaꞌsan Paapa poitîrîtononya, Paapa Maimu panamatoꞌkon yawîrî toꞌ esaꞌ ya.

1. Îꞌ yeꞌka panamatoꞌkon tîrî Paapa Maimuya warayoꞌkon tînoꞌpî kenankon pî?

Jeováya inyo tîrîꞌpî itewîꞌ tawonkon puꞌpai pe aweꞌtoꞌpe. (Eraꞌmakî Efésios 5:23.) Îꞌ imenkaꞌpî inyoya manni, mîrîrî yuꞌse Jeová wanî itewîꞌ tawonkon pîikaꞌtîtoꞌpeiya. Paapa Maimuya taa pî man warayoꞌkon tînoꞌpî kenankon pî: “Anoꞌpîkon saꞌnama pîꞌ akoꞌmantî.” (Efésios 5:25) Îꞌ taa yuꞌse mîrîrî wanî? Morî pe tînoꞌpî eraꞌma inyoya eꞌpai wanî, tewîꞌ ta moropai eraꞌma tiaronkonya tanne. Inyo esenumenka îꞌ yuꞌse tînoꞌpî wanî moropai mîîkîrî esenumenka nîrî îꞌ kupî eꞌpai awanî morî pe tînoꞌpî eꞌtoꞌpe. (1 Timóteo 5:8) Moropai tînoꞌpî pîikaꞌtîiya Jeová yonpa pe aweꞌtoꞌpe inîꞌ panpîꞌ. (Mateus 4:4) Oꞌnon yeꞌka pe mîrîrî kupîiya? Paapa Maimu erenka moropai epîrema saꞌnîrî siꞌma tînoꞌpî yarakkîrî. Tînoꞌpî eraꞌmanen pe inyo tîweꞌsen, moropai saꞌnamanen pe nîrî, mîîkîrî ena Jeová yonpa pe inîꞌ panpîꞌ. — Eraꞌmakî 1 Pedro 3:7.

2. Îꞌ yeꞌka panamatoꞌkon tîrî Paapa Maimuya wîriꞌsanyamîꞌ tînyo kenankon pî?

Paapa Maimuya taa pî man wîriꞌsanyamîꞌ tînyo kenankon pî: “anyokon namayaꞌnîkon eꞌpai awanî”, taatoꞌ mîrîrî, îꞌ menka inyoya manni, mîrîrî yawîrî eꞌpai inoꞌpî wanî moropai mîîkîrî pîikaꞌtîiya nîrî. (Efésios 5:33) Oꞌnon yeꞌka pe mîrîrî kupîiya eꞌpainon? Mîîkîrî esenumenka eꞌpainon morî tînyo yeserukon pî moropai îꞌ konekaiya manni pî, mîîkîrî moropai tîmukuyamîꞌ eraꞌmatoꞌpeiya. Tînyo namaiya ya (respeitar/respect) mîîkîrî nîmenkaꞌpî pî ipîikaꞌtîiya. Moropai morî pe eeseurîma tînyo yarakkîrî, tîwîrî Paapa poitîrî pe pra awanî tanne. Imakuiꞌpî pe inoꞌpî eseurîma pepîn tînyo pî tiaronkon pemonkonyamîꞌ pokonpe.

3. Îꞌ kupî inoꞌpî moropai inyoya eꞌpainon meruntî ke toꞌ eꞌsaꞌnamatoꞌkon eꞌtoꞌpe?

Paapa Maimuya taa pî man eꞌmaritîmaꞌsan pî: “Inkamoro enasaꞌ mîrîrî, tiwinan pemonkon warantî.” (Mateus 19:5) Taa yuꞌse mîrîrî wanî, tamîꞌnawîrî kupî eꞌpai toꞌ wanî saꞌnamatoꞌ enatoꞌpe pra aꞌtuꞌmîra. Mîrîrî kupî eꞌpai toꞌ wanî saꞌnîrî siꞌma tîwanîkonpa moropai toꞌ eseurîma yairon pe tîpîꞌnîkon, oꞌnon yeꞌka pe toꞌ esepuꞌtî moropai teesenumenkatoꞌkon pî. Paapa Jeová neken wanî ipîkku pe inyo moropai noꞌpî yentai. Aka taa toꞌya tiaron pemonkon eꞌtoꞌpe pra tînoꞌpî pataꞌpî ya moropai tînyo pataꞌpî ya.

 ESENUPAKÎ INÎꞌ PANPÎꞌ

4. Tînoꞌpî saꞌnama eꞌpai inyo wanî moropai mîîkîrî eraꞌma eꞌpai inyo wanî

5. Tînyo saꞌnama eꞌpai inoꞌpî wanî moropai mîîkîrî maimu yawîrî eꞌpai awanî

Paapa Maimuya taa pî man tînyo nama eꞌpai inoꞌpî wanî, Paapa poitîrî pe wanî ya, moropai Paapa poitîrî pe pra wanî ya nîrî. Eraꞌmatî 1 Pedro 3:1, 2. Tarîpai seeni itoꞌkoꞌ manni pî eseurîmatî:

• Maasa Paapa poitîrî pe pra anyo wanî ya, mîîkîrî enatoꞌpe Paapa poitîrî pe yuꞌse awanî nîrî. Oꞌnon yeꞌka pe ipîikaꞌtîya eꞌpainon? Paapa Maimu ekaremekî ipî eꞌpai awanî wei kaisarî? Morî inoꞌpî pe awanî moropai saꞌnamanen pe awanî karî? Îꞌ waniꞌ awanî yeꞌnen?

Morî pe wanî inyo moropai noꞌpîya imenkasaꞌ ya saꞌnîrî siꞌma. Tîîse, tiaron pensa noꞌpî waakîri  pe pra wanî îꞌ imenkaꞌpî inyoya manni pî. Mîîkîrî eseurîma eꞌpainon îꞌ pî esenumenka, tîîse tîîwanmîra moropai morî pe. Epuꞌtîiya Jeováya inyo tîrîꞌpî îꞌ wanî morî pe imenkatoꞌpeiya tewîꞌ tawonkon tonpe. Mîrîrî yeꞌnen tînyo pîikaꞌtîiya eꞌpai wanî îꞌ menkasaiꞌya manni pî. Mîrîrî kuꞌsaꞌ inoꞌpîya ya tamîꞌnawîrî itewîꞌ tawonkon pîikaꞌtîiya eꞌpainon taatausinpai toꞌ eꞌtoꞌpe. Eraꞌmatî 1 Pedro 3:3-5. Tarîpai seeni itoꞌkoꞌ manni pî eseurîmatî:

• Oꞌnon yeꞌka pe Jeová esepuꞌtî tînyo nama inoꞌpîya yai?

6. Morî pe pra eꞌmaritîmantoꞌ wanî ya, morî pe ena eꞌpainon inîꞌrî

 Îꞌ PÎ ESENUPA PÎ NAN?

Inyo moropai noꞌpî koꞌmamî eꞌpainon taatausinpai îꞌ pensa toꞌ eꞌsaꞌnama ya, toꞌ eꞌnama ya moropai Paapa Maimu panamatoꞌkon yawîrî toꞌ eꞌsaꞌ ya.

Enpanatapaiꞌnîkon

• Îꞌ kupîꞌ inyoya eꞌpai wanî taatausinpai tîweꞌmaritîmantoꞌkon eꞌtoꞌpe?

• Îꞌ kupîꞌ noꞌpîya eꞌpai wanî taatausinpai tîweꞌmaritîmantoꞌkon eꞌtoꞌpe?

• Aweꞌmaritîmasaꞌ ya, îꞌ panamatoꞌkon Paapa Maimu yapai apîikaꞌtî eꞌpainon?