ESENUPANTOꞌ 51
Oꞌnon yeꞌka pe Jeová yausinpa uurînîkonya eꞌpainon îꞌ pî uurînîkon eseurîma manni wenai?
Jeováya morî puꞌkuru tîrîꞌpî: umaimukon ton tîrîꞌpîiya uurînîkon eseurîmatoꞌpe. Jeová esewankonoꞌma naka, îꞌ kaiꞌma uurînîkon eseurîma etaiya? Inna! (Eraꞌmakî Tiago 1:26.) Mîrîrî yeꞌnen, oꞌnon yeꞌka pe uurînîkon eseurîma eꞌpainon, Jeová yausinpatoꞌpe?
1. Oꞌnon yeꞌka pe eseurîma eꞌpai uurînîkon wanî?
Paapa Maimuya taa pî man: “Atausinpatî mîrîrî pîꞌ moropai tiaronkon meruntîtannîꞌtî.” (1 Tessalonicenses 5:11) Enpanatan pî nan anîꞌrî pemonkon yausinpatoꞌpe amîrîya? Îꞌ konekaya eꞌpainon morî pe puꞌkuru mîîkîrî enatoꞌpe? Yenpokî pemonkon pî, ipîinamaya. Morî pe amîrî eseurîma eꞌpainon iteserukon pî. Tiwin imenukasaꞌ Paapa Maimu winîpai yenkamaya eꞌpainon mîîkîrî yausinpapa! Tuꞌke imenukasaꞌkon man amîrîya imenkatoꞌpe. Moropai enpanatakî: oꞌnon yeꞌka pe amîrî eseurîma manni, mîrîrîya pemonkonyamîꞌ kupî eꞌpainon morî pe moropai morî pe pra karî. Mîrîrî yeꞌnen, morî pe tîîwanmîra eseurîmakî. — Provérbios 15:1.
2. Îꞌ pî eseurîma eserîke pra uurînîkon wanî?
Paapa Maimuya taa pî man: “Eeseurîmakon ya seꞌ tapairî nura mai pîꞌ eeseurîmakon eꞌpai pra man.” (Eraꞌmakî Efésios 4:29.) Taa yuꞌse mîrîrî wanî nurakon pî eseurîma eꞌpai pra uurînîkon wanî moropai oꞌmaꞌtan eꞌpai pra uurînîkon wanî nîrî tiaronkon pî uurînîkon eseurîmatoꞌ wenai, teesewankonoꞌmai toꞌ wanî namai. Imakuiꞌpî pe eseurîma eꞌpai pra uurînîkon wanî nîrî tiaronkon pî moropai seruꞌyeꞌ pe eseurîman eꞌpai pra uurînîkon wanî pemonkonyamîꞌ pî. — Eraꞌmakî Provérbios 16:28.
3. Îꞌ ya uurînîkon pîikaꞌtî morî pe eseurîmatoꞌpe?
Îꞌ pî uurînîkon eseurîma manni, mîrîrîya yenpo îꞌ wanî uurînîkon yewan ya moropai esenumenkantoꞌ ya. (Lucas 6:45) Esenumenka eꞌpai uurînîkon wanî tîkonarî morîkon pî. Imakuiꞌpî pî uurînîkon esenumenka eserîke pra wanî, morî pî neken uurînîkon esenumenka moropai îꞌ ya tiaronkon yausinpa. (Filipenses 4:8) Mîrîrî yeꞌnen, morî pe uurînîkon suꞌminatoꞌkon ton moropai morî pe uyonpakon ton imenka eꞌpai uurînîkon wanî. (Provérbios 13:20) Morî pe puꞌkuru wanî nîrî uurînîkon esenumenka, îꞌ pî uurînîkon eseurîma manni irawîrî. Esenumenkakî îꞌ pî eeseurîma manni pî: mîrîrîya tiaronkon yewankonoꞌma, toꞌ yausinpaiya karî? Paapa Maimuya taa pî man: “Eseurîma yai teesenumenkai pra, mîrîrî wanî kasupara panpe. Mîrîrîya tiaronkon yaꞌtîsaꞌ ya neꞌneꞌ pe wanî. Tîîse, epuꞌnen pe eꞌnî ya eseurîman morî pî, mîrîrîya morî pe toꞌ kupî.” — Provérbios 12:18.
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe eseurîma Jeová yausinpapa moropai eraꞌmakî nîrî oꞌnon yeꞌka pe tiaronkon yausinpaya eꞌpainon eseurîmatoꞌ wenai.
4. Aka kaꞌkî îꞌ pî amîrî eseurîma manni pî
Tiaron pensa îꞌ rî taa uurînîkonya, eseurîmanpai pra siꞌma. (Tiago 3:2) Eraꞌmakî Gálatas 5:22, 23. Tarîpai seeni itoꞌkoꞌ manni pî eseurîmatî:
-
Seeni imenukasaꞌkonya taa pî man oꞌnon yeꞌka pe uyeserukon wanî eꞌpainon morî pe uurînîkon eseurîmantoꞌpe. Oꞌnon yeꞌka yeserukon esaꞌtîya eꞌpainon Jeová pî? Oꞌnon yeꞌka pe seeni yeserukonya apîikaꞌtî eꞌpainon?
Eraꞌmakî 1 Coríntios 15:33. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe suꞌminatoꞌkon moropai ayonpakonya amîrî eseurîmatoꞌ yakaꞌma eꞌpainon?
Îꞌ ya ayakaꞌma eꞌpainon morî pe amîrî eseurîma namai?
Eraꞌmakî Eclesiastes 3:1, 7. Tarîpai seeni itoꞌkoꞌ manni pî eseurîmatî:
-
Îꞌ pensa morî pe wanî moo awanîpa moropai inîmîkîya eseurîmapa?
5. Morî pe eseurîmakî tiaronkon pî
Oꞌnon yeꞌka pe tiaronkon yewankonoꞌma uurînîkonya eꞌpainon, îꞌ kon pî uurînîkon eseurîma manni wenai? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Seeni panton ya, oꞌnon yeꞌka pe seeni yonpaya iteseru moꞌtanîpî eꞌpai wanîꞌpî, maasa pra tiaronkon yakoꞌmenkapîtîꞌpîiya?
-
Îꞌ konekaꞌpîiya iteseru moꞌtanîtoꞌpe?
Eraꞌmakî Eclesiastes 7:16. Tarîpai seeni itoꞌkoꞌ manni pî eseurîmatî:
-
Imakuiꞌpî pe eseurîmapai wanî ya tiaronkon pî, îꞌ pî enpanatan eꞌpai uurînîkon wanî?
Eraꞌmakî Eclesiastes 7:21, 22. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe seeni imenukasaꞌya apîikaꞌtî teesewankonoꞌmai wanî namai, imakuiꞌpî pe tiaronkon eseurîma ya apî?
6. Morî pe eseurîmakî ayewîꞌ tawonkon pokonpe
Morî pe uurînîkon eseurîma yuꞌse Jeová wanî uyewîꞌ tawonkon pokonpe. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Îꞌ ya apîikaꞌtî eꞌpainon morî pe eseurîmapa ayewîꞌ tawonkon pokonpe?
Eraꞌmakî Efésios 4:31, 32. Tarîpai seeni itoꞌkoꞌ manni pî eseurîmatî:
-
Morî pe eseurîma yuꞌse uurînîkon wanî uyewîꞌ tawonkon pokonpe, mîrîrî wenai eraꞌma toꞌya uurînîkonya toꞌ saꞌnama. Oꞌnon yeꞌka pe mîrîrî koneka uurînîkonya eꞌpainon?
Jeováya taꞌpî tînmu saꞌnamapîtîꞌpîiya. Eraꞌmakî Mateus 17:5. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe Jeová ipatakaya eꞌpainon, eseurîma yai ayewîꞌ tawonkon pokonpe?
Esenumenkakî îꞌ pensa morî pe eeseurîma eꞌpainon tiaronkon yarakkîrî
TIARONKONYA TAA: “Uurî eseurîma îꞌ pî uurî esenumenka manni pî. Pemonkon wakîri pe pra wanî ya, îꞌ wani pra wanî.”
-
Inna taa pî nan mîrîrî pî? Îꞌ waniꞌ awanî yeꞌnen?
Îꞌ PÎ ESENUPA PÎ NAN?
Meruntî ke umaimukon wanî. Îꞌ pî uurînîkon eseurîma aka taa eꞌpai uurînîkon wanî, moropai îꞌ pensa uurînîkon eseurîma, moropai oꞌnon yeꞌka pe uurînîkon eseurîma aka taa eꞌpai uurînîkon wanî nîrî.
Enpanatapaiꞌnîkon
-
Oꞌnon yeꞌka pe uurînîkon eseurîma eꞌpainon tiaronkon pîikaꞌtîtoꞌpe uurînîkonya?
-
Oꞌnon yeꞌka pe uurînîkon eseurîma eꞌpai pra uurînîkon wanî?
-
Îꞌ ya uurînîkon pîikaꞌtî morî pe eꞌnîtoꞌpe tiaronkon yarakkîrî moropai tiaronkon yausinpatoꞌpe uurînîkon eseurîmatoꞌkon wenai?
INÎꞌ PANPÎꞌ ESENUPAPAI NAN?
Îꞌ ya upîikaꞌtîkon eꞌpainon morî pe eseurîmantoꞌpeꞌnîkon?
Eraꞌmakî îꞌ ya apîikaꞌtî eꞌpainon nura pe eseurîma namai.
“Morî pe pra ipîra wanî naka, nura pe uurî eseurîma yai?” (jw.org eseurîmantoꞌ pî)
Eraꞌmakî oꞌnon yeꞌka pe eseurîma eserîke pra wanî imakuiꞌpî pe tiaronkon winîkîi.
Eraꞌmakî oꞌnon yeꞌka pe Jeováya warayoꞌ pîikaꞌtîꞌpî nura pe eeseurîma namai.
“Uurî esenumenkapîtîꞌpî uukoꞌmantoꞌ pî” (A Sentinela, 1 Agosto kapoi pî, 2013 konoꞌ pî)
