Tamîꞌnawîronkonya tîponkon yekaꞌma ituꞌse tîwanîkon yawîrî. Tîîse uurînîkon epontî eꞌpainon ituꞌse uurînîkon eꞌtoꞌ yawîrî, tîîse Jeová teesewankonoꞌmai pra. Mîrîrî kupî uurînîkonya, Paapa Maimu yenupantoꞌkon yawîrî uurînîkon wanî ya. Eraꞌmapaiꞌnîkon seeni yenupantoꞌkon.

1. Îꞌ ya uurînîkon pîikaꞌtî eꞌpainon uurînîkon epontîtoꞌpe?

Jeová poitîrîtonon uurînîkon. Mîrîrî yeꞌnen, nura pe eꞌpai pra uurînîkon pon wanî moropai ‘morî pe epontî eꞌpai uurînîkon wanî pon yaꞌ, mîîpankon warantî pra.’ Mîrîrî wenai, tiaronkonya epuꞌtî “Paapa yapurînenan pe” uurînîkon wanî (1 Timóteo 2:9, 10) Asakîrîrî panamatoꞌkon eraꞌmakî: (1) Morî pe uponkon eꞌpai wanî. Eraꞌmaꞌpî amîrîya taise emurukuntîntoꞌkon ta, Jeová pemonkonoyamîꞌ epontîsaꞌ tiaron pe. Tîîse, uponkon moropai uurînîkon puꞌpai siꞌpo kinasaꞌ uurînîkonya, mîrîrîya yenpo Jeová yapurînenan pe uurînîkon wanî. (2) Mîî pe pra eꞌpai uurînîkon wanî uurînîkon epontîsaꞌ yai moropai siruru pe uponkon wanî eserîke pra man, nura pe tiaronkon esenumenkatoꞌpe pra upîꞌnîkon. (3) Morî pe uurînîkon pon imenka uurînîkonya, îꞌ pensa Paapa poitîrî pe pra tîweꞌsanon ipataka pra uurînîkonya yai. (4) Uponkon wenai, pemonkonyamîꞌya epuꞌtî eꞌpai wanî Jeová yapurînenan pe uurînîkon wanî. — 1 Coríntios 10:31.

2. Îꞌ waniꞌ awanî yeꞌnen esenumenka eꞌpai uurînîkon wanî uyonpakon pî uurînîkon epontîsaꞌ yai?

Imenka uurînîkonya eꞌpainon îꞌ yekaꞌma uurînîkonya, tîîse esenumenka eꞌpai uurînîkon wanî mîrîrî pî tiaronkon wakîri pe wanî, yai pra toꞌ wakîri pe pra. Tiaronkon yewankonoꞌma yuꞌse pra uurînîkon wanî îꞌ yekaꞌma uurînîkonya manni wenai. Tîîse, “tiaronkon pîikaꞌtî eꞌpai [uurînîkon] wanî morî pe toꞌ koꞌmantoꞌpe, inîꞌ panpîꞌ innape ikuꞌtoꞌpe toꞌya.” — Eraꞌmakî Romanos 15:1, 2.

3. Oꞌnon yeꞌka pe uponkonya pemonkonyamîꞌ pîikaꞌtî eꞌpainon Jeová anepuꞌpai toꞌ eꞌtoꞌpe?

Morî pe epontî yuꞌse uurînîkon wanî oꞌnon pata uurînîkon wîtî ya, tîîse mîrîrî wanî ipîkku pe panpîꞌ emurukuntîntoꞌ ta uurînîkon wîtî yai moropai Paapa Maimu ekaremeꞌse uurînîkon wîtî yai. Paapa Maimu anepuꞌpai pra uponkonya emapuꞌtî yuꞌse pra uurînîkon wanî. Tîîse morî pe epontî yuꞌse uurînîkon wanî, “mîrîrî wenai [uurînîkon] nîkupî eraꞌma tamîꞌnawîronkonya morî pe. Mîrîrî yeꞌnen Paapa, upîikaꞌtînenkon pîꞌ yenupantoꞌ eta toꞌya nîrî morî pe”. Mîrîrî panpe, Paapa anepuꞌpai pemonkonyamîꞌ ena. — Tito 2:10.

 ESENUPAKÎ INÎꞌ PANPÎꞌ

4. Morî pe uurînîkon epontîsaꞌ ya, mîrîrîya yenpo Jeová yawîrî uurînîkon wanî

Îꞌ waniꞌ awanî yeꞌnen esenumenka eꞌpai uurînîkon wanî morî pe uurînîkon epontîtoꞌpe? Eraꞌmatî Salmo 47:2. Tarîpai seeni itoꞌkoꞌ manni pî eseurîmatî:

• Jeová poitîrîtonon pe uurînîkon wanî yeꞌnen, oꞌnon yeꞌka pe uurînîkon epontî eꞌpai wanî?

• Îꞌ taaya? Îꞌ pensa emurukuntîntoꞌ ta uurînîkon wîtîsaꞌ yai moropai Paapa Maimu ekaremeꞌse uurînîkon wîtîsaꞌ yai, esenumenka eꞌpai uurînîkon wanî îꞌ kaiꞌma uurînîkon epontî manni? Îꞌ waniꞌ awanî yeꞌnen?

 5. Oꞌnon yeꞌka pe uponkon imenka uurînîkonya eꞌpainon morî pe?

PANTON eraꞌmatî.

Epeꞌke pe uponkon wanî eꞌpai pra wanî, tîîse morî pe uponkon eꞌpai wanî nura pe pra. Oꞌnon pata uurînîkon wîtî ya, morî pe epontî eꞌpai uurînîkon wanî. Eraꞌmatî 1 Coríntios 10:24 moropai 1 Timóteo 2:9, 10. Tarîpai seeni itoꞌkoꞌ manni pî eseurîmatî:

• Îꞌ waniꞌ awanî yeꞌnen nura ponkon yekaꞌma eserîke pra uurînîkon wanî moropai seꞌ tapairî?

• Îꞌ waniꞌ awanî yeꞌnen siruru pe moropai saꞌme uponkon yekaꞌma eserîke pra uurînîkon wanî, nura pe tiaronkon esenumenka namai upîꞌnîkon?

Pena, unkupîkon ton tîrîꞌpî Jeováya tîpemonkonoyamîꞌ pia Moisés wenai. Mîrîrî yawîrî eꞌpai pra uurînîkon wanî, tîîse mîrîrîya uurînîkon yenupa îꞌ kaiꞌma Jeová esenumenka. Eraꞌmatî Deuteronômio 22:5. Tarîpai seeni itoꞌkoꞌ manni pî eseurîmatî:

• Îꞌ waniꞌ awanî yeꞌnen wîriꞌ pon yekaꞌma eserîke pra warayoꞌ wanî moropai warayoꞌ pon yekaꞌma eserîke pra wîriꞌ wanî?

Eraꞌmatî 1 Coríntios 10:32, 33 moropai 1 João 2:15, 16. Tarîpai seeni itoꞌkoꞌ manni pî eseurîmatî:

• Îꞌ waniꞌ awanî yeꞌnen esekaranmapo eꞌpai uurînîkon wanî: “uponya naka tiaronkon Paapa poitîrîtonon yakaꞌma moropai tiaronkon pemonkonyamîꞌ upataꞌseꞌkon tawonkon yakaꞌma?”

• Oꞌnon yeꞌka pe pemonkonyamîꞌ epontî apataꞌseꞌ ya?

• Mîrîrî panpe Paapa poitîrîtonon epontî eꞌpainon? Îꞌ taaya mîrîrî pî? Îꞌ waniꞌ awanî yeꞌnen?

 Îꞌ PÎ ESENUPA PÎ NAN?

Îꞌ pensa uponkon imenka uurînîkonya morî pe, mîrîrîya yenpo Jeová pia imaimu yawîrî uurînîkon wanî moropai tiaronkon pî uurînîkon esenumenka.

Enpanatapaiꞌnîkon

• Îꞌ waniꞌ awanî yeꞌnen ipîkku pe wanî Jeová pia îꞌ kaiꞌma uurînîkon epontî manni?

• Îꞌ yeꞌka panamatoꞌkonya Paapa Maimu yapai uurînîkon pîikaꞌtî, morî pe epontîtoꞌpe?

• Îꞌ waniꞌ awanî yeꞌnen Paapa Maimu anepuꞌpai pemonkonyamîꞌ ena uponkon wenai moropai toꞌ yakaꞌmaiya eꞌpainon nîrî?