Jesus wanî Paapa pemonkonoyamîꞌ puꞌpai pe. (Efésios 5:23) Sîrîrîpe, kaꞌ po Jesus wanî, moropai kaꞌ po siꞌma tînenupaꞌsan pîikaꞌtîiya “mîîkîrî tîkaraiwarî maimu yawîrî tîweꞌsen yairon moropai epuꞌnen” wenai. (Eraꞌmakî Mateus 24:45.) Mateus kaaretarî wenai, Jesusya mîîkîrî pemonkon eseꞌtîꞌpî “ipoitîrî” pe. Jesusya seeni poitîrî imenkaꞌpî moropai tîmeruntîri tîrîꞌpîiya iipia. Tîîse, mîîkîrî esenyakaꞌma Jesus tonpe moropai itonpakon tonpe nîrî. Anîꞌ “mîîkîrî tîkaraiwarî maimu yawîrî tîweꞌsen yairon moropai epuꞌnen”? Oꞌnon yeꞌka pe uurînîkon eraꞌmaiya?

1. Anîꞌ “mîîkîrî tîkaraiwarî maimu yawîrî tîweꞌsen yairon moropai epuꞌnen”?

Jeováya warayoꞌkon yenkaꞌmaꞌpî pena panamatoꞌkon tîîtoꞌpe toꞌya tîpemonkonoyamîꞌ pia. (Malaquias 2:7; Hebreus 1:1) Jesus saꞌmantaꞌpî tîpo, mîrîrî konekapîtîꞌpî Jesus naipontîꞌsanya moropai soosi esanonya Jerusalém po. (Atos 15:2) Mîrîrî panpe aweꞌkupî sîrîrîpe. Jeováya mararî soosi esanon yenkaꞌma tîpemonkonoyamîꞌ eraꞌmatoꞌpe toꞌya. Toꞌ eseꞌ wanî Jeová Pemonkonoyamîꞌ Eraꞌmanenan Pata poro. “Mîîkîrî tîkaraiwarî maimu yawîrî tîweꞌsen yairon moropai epuꞌnen” pe toꞌ wanî. “Manni mîîkîrî [Jesusya] tewîꞌ koꞌmannîꞌnen pe itîrîꞌpî” (Mateus 24:45a) Jeová Pemonkonoyamîꞌ Eraꞌmanenan Pata poro, toꞌ menkaꞌpî Paapaya morî yekaton wenai. Tesanonkon pe toꞌ ena kupî sîrîrî Jesus pokonpe kaꞌ po, tîîsaꞌmantakon tîpo tarî pata pona.

2. Oꞌnon yeꞌka pe seeni poitîrîya yaꞌre tuiꞌsen Paapa Maimu yapai tîrî Jeová pemonkonoyamîꞌ pia?

Jesusya taꞌpî seeni poitîrî wanî “tiaronkon teesenyakaꞌmasanon … yaꞌre ton tîînen pe itîrîpîiya.” (Mateus 24:45b) Yaꞌreya uurînîkon pîikaꞌtî meruntî ke eꞌnîtoꞌpeꞌnîkon moropai priꞌya. Mîrîrî panpe wanî seeni yaꞌre tuiꞌsen Jeová piapai (mîîkîrî yenupantoꞌkon), mîrîrîya uurînîkon kupî meruntî ke Jeová yawîrî uurînîkon koꞌmantoꞌpe, moropai esenyakaꞌmantoꞌ kuꞌtoꞌpe tîrîꞌpî Jesusya uurînîkon pia. (1 Timóteo 4:6) Seeni yaꞌre yapisî uurînîkonya emurukuntîntoꞌkon ta, kureꞌnan emurukuntîntoꞌkon ta, kaaretakon moropai pantonkon Paapa Maimu yapai. Tamîꞌnawîrî seenikonya uurînîkon pîikaꞌtî epuꞌtoꞌpe îꞌ yuꞌse Paapa wanî moropai tonpa pe eꞌnîtoꞌpeꞌnîkon inîꞌ panpîꞌ.

 ESENUPAKÎ INÎꞌ PANPÎꞌ

3. Seꞌ tapairî eꞌpai pra Jeová pemonkonoyamîꞌ wanî

Jesus taasaꞌ manni yawîrî, Jeová Pemonkonoyamîꞌ Eraꞌmanenanya Jeová Maimu Ekaremeꞌnenan pîikaꞌtî morî pe toꞌ esenyakaꞌmatoꞌpe. Mîrîrî panpe eꞌkupîꞌpî pena Paapa poitîrîtonon yarakkîrî. PANTON eraꞌmatî.

Eraꞌmatî 1 Coríntios 14:33, 40. Tarîpai seeni itoꞌkoꞌ manni pî eseurîmatî:

• Oꞌnon yeꞌka pe seeni Paapa Maimu imenukasaꞌya ekaremekî tîmurukun pe tîpemonkonoyamîꞌ eꞌtoꞌpe yuꞌse Jeová wanî?

4. Seeni poitîrîya Jeová Maimu Ekaremeꞌnenan pîikaꞌtî Paapa Maimu ekaremetoꞌpe morî pe

Paapa Maimu ekaremeꞌtoꞌ wanîꞌpî ipîkku pe pena Jeová poitîrîtonon pia. Eraꞌmatî Atos 8:14, 25. Tarîpai seeni itoꞌkoꞌ manni pî eseurîmatî:

• Anîꞌya penaronkon Paapa poitîrîtonon esenyakaꞌmantoꞌ eraꞌmapîtîꞌpî?

• Jesus naipontîꞌsanya panamatoꞌ tîrîꞌpî Pedro moropai João pia. Mîrîrî naka yapisîꞌpî toꞌya?

Jeová Maimu Ekaremeꞌnenan pîikaꞌtî Jeová Pemonkonoyamîꞌ Eraꞌmanenanya, morî pe Paapa Maimu ekaremeꞌtoꞌpe toꞌya. Seeni esenyakaꞌmantoꞌ wanî ipîkku pe puꞌkuru toꞌ pia. PANTON eraꞌmatî.

 Jesusya taꞌpî ipîkku pe wanî Paapa Maimu ekaremetoꞌpe. Eraꞌmatî Marcos 13:10. Tarîpai seeni itoꞌkoꞌ manni pî eseurîmatî:

• Îꞌ waniꞌ awanî yeꞌnen Paapa Maimu ekaremeꞌtoꞌ wanî ipîkku pe Jeová Pemonkonoyamîꞌ Eraꞌmanenan pia?

• Îꞌ waniꞌ awanî yeꞌnen eꞌpîikaꞌtîntoꞌ yuꞌse uurînîkon wanî toꞌ winîpai, Paapa Maimu ekaremeꞌtoꞌpe uurînîkonya pata poro?

5. Seeni poitîrîya uurînîkon yenupa

Jeová Pemonkonoyamîꞌ Eraꞌmanenanya panamatoꞌ tîrî Paapa poitîrîtonon pia pata poro. Oꞌnon yeꞌka pe epuꞌtî toꞌya îꞌ yeꞌka panamatoꞌ tîrî? Eraꞌmakî oꞌnon yeꞌka pe Jeová Pemonkonoyamîꞌ Eraꞌmanenanya mîrîrî konekapîtîꞌpî pena. Eraꞌmatî Atos 15:1, 2. Tarîpai seeni itoꞌkoꞌ manni pî eseurîmatî:

• Îꞌ waniꞌ awanî yeꞌnen penaronkon Paapa poitîrîtonon esiyuꞌpîtîꞌpî?

• Anîꞌ yuwaꞌpî Paulo, Barnabé moropai tiaronkonya, toꞌ pîikaꞌtîtoꞌpe inîꞌrî toꞌ esiyuꞌpîtî namai?

Eraꞌmatî Atos 15:12-18, 23-29. Tarîpai seeni itoꞌkoꞌ manni pî eseurîmatî:

• Îꞌ rîꞌ menka iraurî, Jeová Pemonkonoyamîꞌ Eraꞌmanenan Jesus naipontîꞌsan weiyu yai, Paapa winîpai eꞌpîikaꞌtîntoꞌ yuwapîtîꞌpî toꞌya. Oꞌnon yeꞌka pe mîrîrî konekapîtîꞌpî toꞌya? — Eraꞌmatî imenukasaꞌkon 12, 15, moropai 28.

Eraꞌmatî Atos 15:30, 31 moropai 16:4, 5. Tarîpai seeni itoꞌkoꞌ manni pî eseurîmatî:

• Penaronkon Paapa poitîrîtononya panamatoꞌ Jeová Pemonkonoyamîꞌ Eraꞌmanenan nîtîrîꞌpî yapisîꞌpî naka toꞌya?

• Îꞌ morîkon yapisîꞌpî toꞌya Jeová piapai imaimu yawîrî toꞌ eꞌsaꞌ yeꞌnen?

Eraꞌmatî 2 Timóteo 3:16 moropai Tiago 1:5. Tarîpai seeni itoꞌkoꞌ manni pî eseurîmatî:

• Îꞌ koneka Jeová Pemonkonoyamîꞌ Eraꞌmanenanya morî pe imenkatoꞌpe toꞌya sîrîrîpe?

 Îꞌ PÎ ESENUPA PÎ NAN?

“Mîîkîrî tîkaraiwarî maimu yawîrî tîweꞌsen yairon moropai epuꞌnen” imenkaꞌpî Jesusya. Inkamoro wanî Jeová Pemonkonoyamîꞌ Eraꞌmanenan pata poro. Paapa poitîrîtonon yenupa toꞌya moropai yaꞌre tîrî toꞌya toꞌ pia Paapa Maimu yapai pata poro.

Enpanatapaiꞌnîkon

• Anîꞌya “mîîkîrî tîkaraiwarî maimu yawîrî tîweꞌsen yairon moropai epuꞌnen” imenkaꞌpî?

• Oꞌnon yeꞌka pe uurînîkon eraꞌma Jeová Pemonkonoyamîꞌ Eraꞌmanenanya sîrîrîpe?

• Inna taa pî nan Jeová Pemonkonoyamîꞌ Eraꞌmanenan wanî “mîîkîrî tîkaraiwarî maimu yawîrî tîweꞌsen yairon moropai epuꞌnen” pe?