Paapa poitîrîtonon pokonpe uurînîkon koꞌmanpîtî yai, Davi panpe uurînîkon ena: “Morî pe puꞌkuru wanî, anna tausinpasaꞌ man îꞌ pensa uyonpakon pokonpe koꞌmanî ya tîmurukun pe!”, taꞌpîiya. (Salmo 133:1) Tîîse, mîrîrî panpe aweꞌtoꞌpe, tiwin pî siꞌma îꞌ rî koneka eꞌpai tamîꞌnawîronkon wanî tîmurukun pe koꞌmanîtoꞌpe.

1. Îꞌ wanî morî pe puꞌkuru Jeová pemonkonoyamîꞌ pia?

Tiaron pata pona attîsaꞌ ya emurukuntîntoꞌ ya, toꞌ maimu epuꞌtîya rîn taise moroni. Tîîse, morî pe esepuꞌtî moroni! Îꞌ waniꞌ awanî yeꞌnen mîrîrî eꞌkupî? Maasa pra Paapa Maimu pî uurînîkon esenupa mîrîrî rî kaaretakon wenai tamîꞌnawîrî pata poro. Saꞌnamatoꞌ yenpo annaya nîrî tamîꞌnawîronkon pî. Îꞌ wani pra man oꞌnon pata aakoꞌmamî ya, ‘Jeová eseꞌ yenkama pîꞌ uurînîkon man, moropai Jeová winîpai eꞌpîikaꞌtîntoꞌ esaꞌtî uurînîkonya mîîkîrî yapurîtoꞌpe tîmurukun pe.’ — Sofonias 3:9, TNM, nota.

2. Îꞌ koneka uurînîkonya eꞌpainon tîmurukun pe koꞌmannîtoꞌpe tiaronkon pokonpe?

“Mîrîrî warantî aweꞌsaꞌnamatoꞌkon yuwatî inîꞌ panpîꞌ, tamîꞌnawîrî ayewankon ke.” (1 Pedro 1:22) Oꞌnon yeꞌka pe mîrîrî konekaya eꞌpainon? Imakuiꞌpî koneka tiaronkonya manni, mîrîrî pî teesenumenkai pra eꞌkî, tîîse morî toꞌ yeserukon pî esenumenkakî. Îꞌ wanî awakîri pe, mîrîrî wanî nîrî ayonpakon wakîrî pe taise. Toꞌ yonpa pe eꞌnî îꞌ wani pra man, tîîse tiaronkon ayonpakon yuwakî nîrî awarainon pepîn. Tiaron pataꞌseꞌ tawonkon yonpa pe eꞌkî. Tamîꞌnawîronkon kupî eꞌpai uurînîkon wanî seꞌ kaisarî. — Eraꞌmakî 1 Pedro 2:17. a

3. Îꞌ konekaya eꞌpainon esiuꞌpîtî ya tiaronkon yonpa yarakkîrî?

Tîmurukun pe tîweꞌsanonkon uurînîkon, tîîse imakuiꞌsan pe uurînîkon wanî nîrî, imakuiꞌpî konekasaꞌ Adãoya wenai pena. Tiaron pensa, tiaronkon yewankonoꞌma uurînîkonya. Mîrîrî yeꞌnen, Paapa Maimuya taa pî man: “Îꞌ rî tiaronkon nîkupî awinîkîiꞌnîkon yapîtanîꞌtî, moropai îꞌ taꞌpî toꞌya kuꞌtî aawanmîraꞌnîkon. Tîwanmîra Uyepotorîkonya ankupîꞌpîkon imakuiꞌpî kupîꞌpî warantî ikuꞌtî.” (Eraꞌmakî Colossenses 3:13.) Aasîrî Jeová yewankonoꞌmaꞌpî uurînîkonya tuꞌke iteꞌka. Tîîse mîrîrî panpe rî, imakuiꞌpî kupîꞌpî uurînîkonya manni, mîrîrî kupîiya tîîwanmîra. Mîrîrî yeꞌnen, imakuiꞌpî kupîꞌpî yonpakonya manni uurînîkon winîkîi, mîrîrî kupî eꞌpai uurînîkon wanî tîîwanmîra. Mîrîrî yuꞌse Jeová wanî! Tiaronkon yewankonoꞌmasaꞌ amîrîya ya, attîkî iipia ayeseru konekapa. — Eraꞌmakî Mateus 5:23, 24. b

 ESENUPAKÎ INÎꞌ PANPÎꞌ

4. Tamîꞌnawîronkon eraꞌmakî seꞌ kaisarî

Tamîꞌnawîronkon yonpakon saꞌnama yuꞌse uurînîkon man. Tîîse, saꞌme wanî taise tiaronkon saꞌnamatoꞌpe tiaron pe toꞌ wanî tanne. Îꞌ ya uurînîkon pîikaꞌtî eꞌpainon? Eraꞌmatî Atos 10:34, 35. Tarîpai seeni itoꞌkoꞌ manni pî eseurîmatî:

• Tamîꞌnawîronkon kupî Jeováya seꞌ kaisîrî, esentai pra; mîîkîrî yapurî tamîꞌnawîronkonya eꞌpainon. Oꞌnon yeꞌka pe Jeová ipatakaya eꞌpainon tiaronkon eraꞌmapa, toꞌ eraꞌma Jeováya manni panpe?

• Oꞌnon pata aakoꞌmamî manni, imakuiꞌpî pe pemonkonyamîꞌ esenumenka tiaronkon pî, seꞌ kaisîrî pra toꞌ wanî yeꞌnen? Îꞌ waniꞌ awanî yeꞌnen toꞌ panpe esenumenka eꞌpai pra wanî?

Eraꞌmatî 2 Coríntios 6:11-13. Tarîpai seeni itoꞌkoꞌ manni pî eseurîmatî:

• Oꞌnon yeꞌka pe tamîꞌnawîronkon yonpakon saꞌnamaya eꞌpainon inîꞌ panpîꞌ?

5. Tiaronkon imakuiꞌpî nîkupîꞌpî awanmîra kuꞌkî moropai ayeseru konekata

Imakuiꞌpî kuꞌnen rîn mîîkîrî Jeová. Tîîse imakuiꞌpî kupîꞌpî uurînîkonya manni, kuꞌnen mîîkîrî tîîwanmîra. Eraꞌmatî Salmo 86:5. Tarîpai seeni itoꞌkoꞌ manni pî eseurîmatî:

• Îꞌ yenupa seeni Paapa Maimu imenukasaꞌya oꞌnon yeꞌka pe imakuiꞌpî uurînîkon nîkupîꞌpî kuꞌnen mîîkîrî Jeová tîîwanmîra?

• Morî pe man taa amîrîya Jeová pî imakuiꞌpî kupîꞌpî amîrîya manni, kupîꞌpîiya yeꞌnen tîîwanmîra?

• Morî pe koꞌmanpai uurînîkon man tamîꞌnawîronkon pokonpe. Tîîse, îꞌ ya uurînîkon yakaꞌma eꞌpainon mîrîrî kuꞌtoꞌpe?

Oꞌnon yeꞌka pe Jeová ipataka uurînîkonya eꞌpainon tîmurukun pe koꞌmantoꞌpe uyonpakon pokonpe? Eraꞌmatî Provérbios 19:11. Tarîpai seeni itoꞌkoꞌ manni pî eseurîmatî:

• Sokoroꞌ pe amîrî kuꞌsaꞌ anîꞌya ya, îꞌ konekaya eꞌpainon morî pe aakoꞌmamîpa mîîkîrî pemonkon yarakkîrî?

 Tiaron pensa imakuiꞌpî pe kupî uurînîkonya tiaronkon pî. Mîrîrî eꞌkupî yai, îꞌ koneka eꞌpai uurînîkon wanî? PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:

• Seeni panton ya, oꞌnon yeꞌka pe yonpaya teseru konekaꞌpî itonpa yarakkîrî?

 Îꞌ PÎ ESENUPA PÎ NAN?

Paapa poitîrîtonon pîikaꞌtîya eꞌpainon tîmurukun pe toꞌ koꞌmantoꞌpe. Mîrîrî konekaya eꞌpainon, saꞌnamatoꞌ yenpoya ya moropai imakuiꞌpî kupîꞌpî toꞌya manni kupîya ya awanmîra.

Enpanatapaiꞌnîkon

• Oꞌnon yeꞌka pe imakuiꞌpî pe teesenumenkai pra amîrî wanî tiaronkon pî, seꞌ kaisarî pra toꞌ wanî yeꞌnen?

• Îꞌ konekaya eꞌpainon esiyuꞌpîtî ya ayonpa yarakkîrî?

• Îꞌ waniꞌ awanî yeꞌnen Jeová ipataka yuꞌse awanî, imakuiꞌpî kupîꞌpî tiaronkonya manni kuꞌtoꞌpe awanmîra?