Paapa poitîrîtononya itîrî pepîn tiwin kin, tiaronkonya toꞌ yarima Jeová piapai. Mîrîrî panpe amîrî esenumenka nîrî! Jeová atausinpa imaimu yawîrî tîweꞌsen pe awanî yeꞌnen. (Eraꞌmakî 1 Crônicas 28:9.) Îꞌ ya ayakaꞌma eꞌpainon Jeová yawîrî awanî namai? Moropai îꞌ ya apîikaꞌtî eꞌpainon?

1. Oꞌnon yeꞌka pe tiaronkonya uurînîkon yakaꞌma eꞌpainon Jeová maimu yawîrî eꞌnî namai?

Jeová rumaka uurînîkonya yuꞌse tiaronkon wanî. Tîîse, anîꞌya mîrîrî koneka eserîke wanî? Jeová rumakatîponkon eseurîma seruꞌyeꞌ pe Paapa pemonkonoyamîꞌ pî, innape Paapa kuꞌtoꞌ toꞌya enatoꞌpe aꞌtuꞌmîra. Paapa yewanmîrînenan pe toꞌ wanî (taatoꞌ mîrîrî, apóstatas/apostates). Tiaron pensa, seruꞌyeꞌkon soosikon esa tîweꞌsanon eseurîma seruꞌyeꞌ pe uurînîkon pî, moropai yairon rumaka uurînîkonya yuꞌse toꞌ wanî. Nariꞌ pe wanî uurînîkon eseurîma uurînîkon yewanmîrînenan yarakkîrî, nariꞌ pe wanî toꞌ kaaretakon erenka uurînîkonya ya, toꞌ site ya eraꞌma uurînîkonya ya moropai toꞌ pantonkon eraꞌma uurînîkonya ya nîrî. Eraꞌmakî îꞌ taꞌpî Jesusya mannankan Jeová rumaka tiaronkonya emapuꞌtînenan pî: “Inkamoro yeꞌkakon tîpîinamai pra eꞌtî. Maasa pra toꞌ wanî enkaruꞌnankon warantî. Mîrîrî yeꞌnen tiaronkon yenupa toꞌya eserîke pra toꞌ wanî. Enkaruꞌne siꞌma enkaruꞌnanya tiaron yarî eserîke pra awanî. Yarî yuꞌse tîwanî ya toꞌ eꞌsoroka ituꞌnakan yaꞌ saꞌnîrî.” — Mateus 15:14.

2. Oꞌnon yeꞌka pe Jeová maimu yawîrî uurînîkon wanî îꞌ menka uurînîkonya manni wenai?

Jeová saꞌnama uurînîkonya yeꞌnen, seruꞌyeꞌ soosikon koreꞌta uurînîkon wanî rîn. Îꞌ taa yuꞌse mîrîrî wanî? Uurînîkon wîtî rîn seruꞌyeꞌ soosikon ta. Uurînîkon esenyakaꞌmatoꞌ moropai tamîꞌnawîrî îꞌ kupî uurînîkonya manni, mîrîrîkon kupî uurînîkonya pepîn seruꞌyeꞌ soosikon yarakkîrî. Jeováya uurînîkon panama seꞌ warantî: “Epaꞌkatî upemonkonoyamîꞌ [Kureꞌnan Babilônia koreꞌtapai].” — Apocalipse 18:2, 4.

 ESENUPAKÎ INÎꞌ PANPÎꞌ

3. Tîwarî eꞌkî seruꞌyeꞌ yenupatoꞌkon pîꞌ

Îꞌ koneka eꞌpai uurînîkon wanî imakuiꞌpî pe tiaronkon eseurîma ya Paapa pemonkonyamîꞌ pî? Eraꞌmatî Provérbios 14:15. Tarîpai seeni itoꞌkoꞌ manni pî eseurîmatî:

• Îꞌ waniꞌ awanî yeꞌnen aka taa eꞌpai uurînîkon wanî inna taa namai tamîꞌnawîrî uurînîkon netaꞌpî pî?

Eraꞌmatî 2 João 9-11. Tarîpai seeni itoꞌkoꞌ manni pî eseurîmatî:

• Oꞌnon yeꞌka pe Paapa yewanmîrînenan kupî eꞌpai uurînîkon wanî?

• Epuꞌtî pî uurînîkon man morî pe pra wanî eseurîma Paapa yewanmîrînenan yarakkîrî. Tîîse oꞌnon pata toꞌ yenupantoꞌkon eporî uurînîkonya eꞌpainon moropai îꞌ waniꞌ awanî aka taa eꞌpai uurînîkon wanî?

• Oꞌnon yeꞌka pe Jeová esepuꞌtî imakuiꞌpî yekare eta uurînîkonya ya tîwinîkîi, moropai tîpemonkonoyamîꞌ winîkîi?

4. Jeová yawîrî eꞌkî tîwîrî imakuiꞌpî ipîra kuꞌsaꞌ ayonpaya tanne

Epuꞌsaꞌ uurînîkonya ya imakuiꞌpî ipîra kuꞌsaꞌ anîꞌya Paapa pemonkonoyamîꞌ koreꞌta, îꞌ koneka eꞌpai uurînîkon wanî? Eraꞌmakî îꞌ taꞌpî Paapaya penaron Israel ponkon pî. Eraꞌmatî Levítico 5:1.

Îꞌ taasaꞌ seeni Paapa Maimu imenukasaꞌya panpe, epuꞌsaꞌ uurînîkonya ya imakuiꞌpî ipîra kuꞌsaꞌ uyonpakonya ya, mîrîrî ekaremekî eꞌpai uurînîkon wanî soosi esanon pî. Tîîse morî pe wanî eseurîmantoꞌpe yarakkîrî, mîîkîrî ekaremeꞌtoꞌpe soosi esanon pîꞌ eꞌmaiꞌpe imakuiꞌpî tînkupîꞌpî manniꞌ pî. Moriya, mîrîrî kuꞌsaiꞌya pra wanî ya, soosi esanon pî ekaremekî eꞌpai uurînîkon wanî, îꞌ epuꞌtî uurînîkonya manni, Jeová maimu yawîrî uurînîkon wanî yeꞌnen. Oꞌnon yeꞌka pe mîrîrîya yenpo . . .

• Jeová saꞌnama uurînîkonya?

• imakuiꞌpî konekatîpon pemonkon saꞌnama uurînîkonya?

• tiaronkon Paapa poitîrîtonon saꞌnama uurînîkonya?

 5. Aminke eꞌkî Kureꞌnan Babilônia winîpai

 Îꞌ PÎ ESENUPA PÎ NAN?

Jeová maimu yawîrî koꞌmanpai uurînîkon wanî. Mîrîrî yeꞌnen, uurînîkon atarima Jeová yawîrî tîweꞌsanon pepîn winîpai.

Enpanatapaiꞌnîkon

• Îꞌ waniꞌ awanî yeꞌnen Paapa yewanmîrînenan yekarekon eta eserîke pra uurînîkon wanî?

• Epuꞌtî uurînîkonya ya imakuiꞌpî ipîra kuꞌsaꞌ uyonpakonya ya, îꞌ koneka eꞌpai uurînîkon wanî?

• Oꞌnon yeꞌka pe Paapa Maimu panamatoꞌ yawîrî uurînîkon wanî seruꞌyeꞌ soosikon koreꞌtapai epaꞌkatoꞌpe?