ESENUPANTOꞌ 59
Saꞌmankon yapîtanîꞌkî aranneꞌ pe pra tiaronkon oꞌmaꞌta tanne apî
Tiwin weiyu yai, tamîꞌnawîron Paapa poitîrîtonon esuwaꞌka saꞌmankon pî, moropai tiaronkon oꞌmaꞌta toꞌ pî. Yai pra naka aranneꞌ pe eꞌpai uurînîkon wanî mîrîrî pî?
1. Îꞌ waniꞌ awanî yeꞌnen tiaronkon oꞌmaꞌta uurînîkon pî inîmîkî uurînîkonya eꞌpainon?
Paapa Maimuya taa pî man: “Tamîꞌnawîronkon Jesus Cristo maimu yawîrî ikoꞌmanpaiꞌnîkon koꞌmamî kupî sîrîrî tîweꞌtarumaꞌtîi, Jesus pemonkono pe tîwanîkon yeꞌnen.” (2 Timóteo 3:12) Jesus pî toꞌ oꞌmaꞌtaꞌpî, non po tîîkoꞌmansenon yonpa pe pra aweꞌsaꞌ yeꞌnen. Jesus ipataka uurînîkonya. Mîrîrî yeꞌnen, mîrîrî pî uurînîkon esiꞌnîpî pepîn, pata esanon moropai seruꞌyeꞌ soosi esanon oꞌmaꞌta ya uurînîkon pî. — João 15:18, 19.
2. Oꞌnon yeꞌka pe uurînîkon ekoneka eꞌpainon tiaronkon oꞌmaꞌta ya uurînîkon pî?
Innape Jeová kupî uurînîkonya eꞌpai wanî meruntî ke sîrîrîpe. Epîremakî moropai Paapa Maimu erenkakî wei kaisîrî. Emurukuntîntoꞌkon ta attîkî tîkoꞌnarî. Tamîꞌnawîrî mîrîrîkonya akupî meruntî ke, aranneꞌ pe pra awanîpa tiaronkon moropai ayewîꞌ tawonkon nîrî oꞌmaꞌta ya apî. Paulo pî toꞌ oꞌmaꞌtaꞌpî mararî pra, mîrîrî yeꞌnen taꞌpîiya: “Paapa wanî sîrîrî upîikaꞌtînen pe. Mîrîrî yeꞌnen eranneꞌ pe eꞌtoꞌ ton pra man.” — Hebreus 13:6.
Uurînîkon ekoneka aranneꞌ pe pra eꞌnîtoꞌpe, Paapa Maimu ekaremekî uurînîkonya ya tîrumakai pra. Mîrîrî koneka uurînîkonya ya, inna taa uurînîkonya inîꞌ panpîꞌ Jeová pî moropai mîrîrîya uurînîkon pîikaꞌtî aranneꞌ pe pra eꞌnîtoꞌpe tiaron pemonkon pî. (Provérbios 29:25) Aranneꞌ pe pra uurînîkon wanî ya sîrîrîpe moropai Paapa Maimu ekaremekî uurînîkonya, Paapa Maimu ekaremekî uurînîkon koꞌmamî, tîwîrî uurînîkon mîꞌpamî yuꞌse pata esanon wanî yai. — 1 Tessalonicenses 2:2.
3. Îꞌ waniꞌ awanî yeꞌnen saꞌmankon yapîtanîpî eꞌpai uurînîkon wanî tiaronkon oꞌmaꞌta ya uurînîkon pî?
Uwakîrikon pe pra wanî tiaronkon oꞌmaꞌta ya uurînîkon pî. Tîîse, mîrîrî yapîtanîpî uurînîkonya ya, innape Paapa kupî uurînîkonya meruntî ke. Inîꞌ panpîꞌ uurînîkon erepamî Paapa pia, eraꞌmaꞌpî uurînîkonya yeꞌnen Paapaya tîmeruntîri tîrîꞌpî uurînîkon pia saꞌmankon yapîtanîtoꞌpe. (Eraꞌmakî Tiago 1:2-4.) Jeová esewankonoꞌma, uurînîkon eꞌtarumaꞌtî eraꞌma tîuya ya. Tîîse mîîkîrî atausinpa saꞌmankon yapîtanîpî uurînîkonya eraꞌma tîuya ya. Paapa Maimuya taa pî man: “Tîîse anîꞌ eꞌtarumaꞌtî ya, îꞌ rî imakuiꞌpî kuꞌsaiꞌya wenai pra, moropai mîrîrî yapîtanîpîiya morî pe, teesewankonoꞌmai pra, mîrîrî yapîtanîꞌsaiꞌya tîpo, Paapaya mîîkîrî koneka morî pe.” (1 Pedro 2:20) Paapaya ipatîkarî koꞌmantoꞌ tîrî Morî Pataꞌseꞌ ya, moro oꞌmaꞌtantoꞌ ton pra wanî inîꞌrî, ikîꞌpî tîpose saꞌmankon yapîtanîpîtîponkon pia. — Mateus 24:13.
ESENUPAKÎ INÎꞌ PANPÎꞌ
Jeová maimu yawîrî eserîke uurînîkon wanî, tiaronkon oꞌmaꞌta tanne uurînîkon pî. Eraꞌmakî oꞌnon yeꞌka pe mîrîrî kupîya eꞌpainon. Eraꞌmakî nîrî îꞌ morîkon yapisîya eꞌpainon mîrîrî konekasaꞌya ya.
4. Ayewîꞌ tawonkon oꞌmaꞌta ya apî, yapîtanîꞌkî
Jesusya epuꞌtîpîtîꞌpî Jeová poitîrî pe uurînîkon ena yuꞌse pra uyewîꞌ tawonkon wanî. Eraꞌmatî Mateus 10:34-36. Tarîpai seeni itoꞌkoꞌ manni pî eseurîmatî:
-
Paapa poitîrî pe tîwanîpa imenka anîꞌya ya, îꞌ taa itewîꞌ tawonkonya eꞌpainon moropai îꞌ kupî toꞌya taise?
Eraꞌmakî inîꞌ panpîꞌ mîrîrî pî. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Îꞌ konekaya eꞌpainon Paapa poitîrî pe eꞌtoꞌpe ituꞌse pra ayewîꞌ tawonkon wanî ya moropai ayonpakon wanî ya?
Eraꞌmatî Salmos 27:10 moropai Marcos 10:29, 30. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe seeni imenukasaꞌkonya apîikaꞌtî eꞌpainon ayewîꞌ tawonkon oꞌmaꞌta yai apî?
5. Jeová poitîrî pe akoꞌmankî tiaronkon oꞌmaꞌta tanne apî
Aranneꞌ pe pra eꞌpai uurînîkon wanî Jeová poitîrî pe eꞌnîtoꞌpe, mîrîrî kupî uurînîkonya yuꞌse pra tiaronkon wanî yai. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Oꞌnon yeꞌka pe seeni pantonkonya innape akupî meruntî ke Paapa pîꞌ?
Eraꞌmatî Atos 5:27-29 moropai Hebreus 10:24, 25. Tarîpai seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen ipîkku pe wanî Jeová poitîrî pe koꞌmannîtoꞌpe, pata esanonya uurînîkon yaipontî yai Paapa Maimu ekaremekî namai moropai emurukuntîntoꞌ ta wîtî namai?
6. Jeováya apîikaꞌtî mîrîrîkon yapîtanîpa
Jeová Maimu Ekaremeꞌnenanya Jeová yapurî koꞌmannî pî, tiaronkon oꞌmaꞌta tanne tîpîꞌnîkon. Eraꞌmakî îꞌ ya Paapa poitîrîtonon pîikaꞌtîꞌpî, mîrîrî kuꞌtoꞌpe. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Seeni panton ya, îꞌ ya seeni yonpakon pîikaꞌtîꞌpî saꞌmankon yapîtanîꞌtoꞌpe toꞌya?
Eraꞌmatî Romanos 8:35, 37-39 moropai Filipenses 4:13. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe seeni Paapa Maimu imenukasaꞌkonya ekaremekî saꞌmankon yapîtanîpî eserîke wanî?
Eraꞌmatî Mateus 5:10-12. Tarîpai seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen taatausinpai aakoꞌmamî eꞌpainon tiaronkon oꞌmaꞌta tanne apî?
Tuꞌkankon Jeová poitîrîtononya saꞌmankon yapîtanîpîꞌpî tiaronkon oꞌmaꞌtapîtîꞌpî tanne toꞌ pî. Yapîtanîpîya nîrî eꞌpainon!
TIARONKONYA TAA: “Tiaronkon oꞌmaꞌta tanne upî, mîrîrî yapîtanîpîuya eserîke pra wai.”
-
Oꞌnon yeꞌka Paapa Maimu imenukasaꞌkonya mîîkîrî pemonkon pîikaꞌtî eꞌpainon aranneꞌ pe pra aweꞌtoꞌpe?
Îꞌ PÎ ESENUPA PÎ NAN?
Jeová poitîrî pe uurînîkon koꞌmamî ya tiaronkon oꞌmaꞌta tanne uurînîkon pî, mîrîrî pî Jeová atausinpa. Jeová pîikaꞌtîntoꞌ wenai, mîrîrîkon yapîtanîpî uurînîkonya eꞌpainon!
Enpanatapaiꞌnîkon
-
Îꞌ waniꞌ awanî yeꞌnen tiaronkon oꞌmaꞌta tîpîꞌnîkon inîmîkî Paapa poitîrîtononya eꞌpainon?
-
Oꞌnon yeꞌka pe amîrî ekoneka eꞌpainon tiaronkon oꞌmaꞌta ya apî?
- Îꞌ waniꞌ awanî yeꞌnen inna taaya eꞌpainon Jeová maimu yawîrî eserîke uurînîkon wanî, tiaronkon oꞌmaꞌta tanne uurînîkon pî?
INÎꞌ PANPÎꞌ ESENUPAPAI NAN?
Eraꞌmakî oꞌnon yeꞌka pe Jeováya tîpoitîrî pîikaꞌtîꞌpî saꞌmankon yapîtanîꞌtoꞌpeiya atarakkantoꞌ ta, epîntoꞌ ta attîsaꞌ pra awanî yeꞌnen.
Saꞌmankon yapîtanîpîꞌpîiya tiaronkon oꞌmaꞌtaꞌpî tanne ipî (2:34)
Eraꞌmakî îꞌ ya eꞌmaritîmaꞌsan pîikaꞌtîꞌpî Paapa poitîrîkon pe toꞌ koꞌmantoꞌpe mararî pra konoꞌ kaisarî tiaronkon oꞌmaꞌtaꞌpî tanne toꞌ pî.
Eraꞌmakî oꞌnon yeꞌka pe yapîtanîpîya eꞌpainon aranneꞌ pe pra tiaronkon oꞌmaꞌta tanne apî.
“Sîrîrî ekonekakî tiaronkon oꞌmaꞌta yai apî” (A Sentinela, Julho kapoi pî, 2019 konoꞌpî)
Eraꞌmakî îꞌ waniꞌ awanî yeꞌnen uurînîkon esiꞌnîpî rîn uyewîꞌ tawonkon oꞌmaꞌta yai uurînîkon pî. Eraꞌmakî oꞌnon yeꞌka pe tîwanmîra aakoꞌmamî eꞌpainon moropai Jeová maimu yawîrî awanî, mîrîrî eꞌkupî ya amîrî yarakkîrî.
