ESENUPANTOꞌ 01

Oꞌnon yeꞌka pe Paapa Maimuya apîikaꞌtî eꞌpainon?

YE'NUNPA

Tuꞌke pemonkonyamîꞌ esenumenka eꞌtarumaꞌtîntoꞌ pî, saꞌmantantoꞌ pî moropai îꞌ aaipî manni. Uurînîkon nîrî! Esenumenkan esenyakaꞌmantoꞌ pî, yareꞌkon eꞌtoꞌpe moropai taatausinpai upemonkonoyamîꞌ koꞌmantoꞌpe. Mararî pra pemonkonyamîꞌya yuꞌtoꞌ eporî Paapa Maimuya. Paapa Maimuya yuntonon pîikaꞌtî mararî pra panamatoꞌ wanî yeꞌnen, mîrîrî wenai taatausinpai toꞌ wanî. Paapa Maimuya naka ayonpa pîikaꞌtî eꞌpainon?

1. Oꞌnon yeꞌkakon ekaranmaposaꞌ yuuku Paapa Maimuya?

Seeni ekaranmaposaꞌkon yuuku Paapa Maimuya. Oꞌnon yeꞌka pe koꞌmantoꞌ esippiaꞌtîꞌpî? Îꞌ tonpe uurînîkon esenpoꞌpî? Îꞌ wani awanî yeꞌnen eꞌtarumaꞌtîntoꞌ wanî? Îꞌ eꞌkupî saꞌmantantoꞌ tîpo? Îꞌ wani awanî yeꞌnen mararî pra wîîntoꞌ wanî tîwanmîn yuꞌse eꞌnî tanne? Îꞌ eꞌkupî Pata yarakkîrî? Îꞌ wani pra wanî seeniꞌkon ekaranmapo uurînîkonya. Mararî pra pemonkonyamîꞌya yuꞌtoꞌ eposaꞌ man Paapa Maimuya, mîrîrî yeꞌnen taatausinpai toꞌ wanî.

2. Oꞌnon yeꞌka pe Paapa Maimuya apîikaꞌtî taatausinpai awanîpa wei kaisarî?

Paapa Maimuya morîkon panamatoꞌkon tîrî. Paapa Maimuya wîttî tawonkon nîrî pîikaꞌtî taatausinpai toꞌ eꞌtoꞌpe. Aweꞌtarumaꞌtî tanne Paapa Maimuya pîikaꞌtî moropai apîikaꞌtîiya nîrî esenyakamantoꞌpe taatausinpai. Seeni kaaretaya apîikaꞌtî Paapa Maimu epuꞌtîpa manni ekaranmaposaꞌkon pî. Paapa Maimu pî amîrî esenupa tîpo, mîrîrî epuꞌtîya e’painon Paapa Maimu wanî ‘tamîꞌnawîrî morî pe’. — 2 Timóteo 3:16.

Seeni kaareta wanî pepîn Paapa Maimu yentai. Seeni kaaretaya amîrî yenupa inîꞌ panpîꞌ Paapa Maimu epuꞌtîpa. Seeni kaareta pî esenupaya, Paapa Maimu imenukaꞌpîsaꞌ manni eraꞌmakî inîꞌ panpîꞌ. Seeni kaareta pî esenupa manni eraꞌmakî, tîîse Paapa Maimu eraꞌmakî morî pe panpî imenukasaꞌ manni.

ESENUPAKÎ INÎꞌ PANPÎꞌ

Maasa eraꞌmakî oꞌnon yeꞌka pe Paapa Maimuya pemonkonyamîꞌya pîikaꞌtî oꞌnon yeꞌka pe awakîri pe Paapa Maimu pî esenupaya, îꞌ wani awanî yeꞌnen morî pe pîikaꞌtîntoꞌ wanî îꞌ taiya manni epuꞌtîtoꞌpe.

3. Paapa Maimuya uurînîkon yeꞌmarî kupî eꞌpainon morî pe

Paapa Maimu wanî aꞌka yeꞌka pe. Mîrîrîya pîikaꞌtîn morî imenkatoꞌpe moropai mîrîrî eseurîma îꞌ eꞌkupî.

Salmo 119:105 ya taꞌpî man: “amaimu wanî aꞌka yeꞌka pe, mîrîrîya upîikaꞌtî morî pe asarîtoꞌpe”. (TNM) Tarîpai seeni itoko manni pî eseurîmatî:

Oꞌnon yeꞌka pe seeni salmo imenukanen esenumenkaꞌpî Paapa Maimu pî?
Îꞌ taa amîrîya Paapa Maimu pî?

4. Paapa Maimuya uurînîkon ekaranmaposaꞌ yuuku eꞌpainon

Maasa eraꞌmatî yenupanen pîikaꞌtîꞌpî Paapa Maimuya yuꞌtoꞌkon eporîtoꞌpe mîîkîrîya. Panton eraꞌmatî. Mîrîrî tîpo eseurîmatî mîrîrî pî. Itoko ekaranmaposaꞌkon man:

PANTON ERAꞌMATOꞌPE: Maasa eꞌtarumaꞌtîntoꞌ iipî tanne yapîtanîꞌkî! (1:48)

Seeni pantonya oꞌnon yeꞌka ekaranmaposaꞌ wanîꞌpî yenupanen pia?
Oꞌnon yeꞌka pe Paapa Maimu pî yenupatoꞌya ipîikaꞌtîꞌpî?

Paapa Maimuya uurînîkon yausinpa ekaranmaposaꞌ eraꞌmatoꞌpe. Mateus 7:7 eraꞌmatî. Mîrîrî tîpo seeni itoko manni pî eseurîmatî:

Oꞌnon yeꞌka ekaranmaposaꞌ yuꞌse awanî awakîri pe Paapa Maimuya?

5. Awakîri pe Paapa Maimu imenukasaꞌ eraꞌmaya eꞌpainon

Paapa Maimu man pemonkonyamîꞌ wakîri pe, mîrîrî yeꞌnen imenukasaꞌ eraꞌma toꞌya moropai mîrîrîya toꞌ pîikaꞌtî. Panton eraꞌmatî. Moropai eseurîmatî mîrîrî pî. Itoko ekaranmaposaꞌkon man:

PANTON ERAꞌMATOꞌPE: Paapa Maimu Imenukasaꞌ epuꞌtîtoꞌpe (2:05)

Seeni pantonya yenpopî man, îꞌ waniꞌ awanî yeꞌnen maasaronkon wanî imenukasaꞌkon aneraꞌmapai pra?
Tîîse îꞌ wani awanî yeꞌnen Paapa Maimu imenukasaꞌ eraꞌma toꞌya toꞌ wakîri pe?

Seeni Paapa yekareya pemonkonyamîꞌ pîikaꞌtî, toꞌ esewankonoꞌma tanne. Eraꞌmatî Romanos 15:4. Moropai eseurîmatî mîrîrî pî. Itoko ekaranmaposaꞌkon man:

Inîꞌ panpîꞌ Paapa Maimu anepuꞌpai nan taatausinpai awanîpa îꞌ taasaiꞌya manni wenai?

6. Tiaronkon pemonkonyamîꞌya uurînîkon pîikaꞌtî eꞌpainon Paapa Maimu epuꞌtîtoꞌpe

Tiwinsarî siꞌma Paapa Maimu imenukasaꞌ eraꞌmaya, moropai tiaronkonya nîrî apîikaꞌtî inîꞌ panpîꞌ epuꞌtîpa. Eraꞌmatî Atos 8:26-31. Moropai eseurîmatî mîrîrî pî. Itoko ekaranmaposaꞌkon man:

Oꞌnon yeꞌka pe Paapa Maimu epuꞌtî uurînîkonya? (Maasa 30 moropai 31 eraꞌmatî.)

Atos kaaretarîya taa pî man, warayoꞌ wanîꞌpî Paapa Maimu imenukasaꞌ anepuꞌpai, mîrîrî yeꞌnen pîikaꞌtîntoꞌ yuꞌse awanîꞌpî. Sîrîrîpe nîrî mararî pra pemonkonyamîꞌ man pîikaꞌtîntoꞌ yuꞌse, mîrîrî yeꞌnen tiaronkon yarakkîrî eseurîmapai toꞌ wanî.

TIARONKONYA TAA: “Paapa Maimu pî Esenupantoꞌ wanî yairî pra.”