Pemonkon yeseru epuꞌtî tîpo, amîrî eena itonpa pe. Mîrîrî panpe awanî Jeová yarakkîrî. Jeová man amîrî yuꞌse itonpa pe. Mîrîrî yeꞌnen, iteseru epuꞌtîya yuꞌse Jeová man moropai îꞌ konekaiya amenrî amîrî tonpe. Inîꞌ panpîꞌ esenupa yuꞌse Jeová man iteseru pî, itonpa pe amîrî eena yuꞌse awanî yeꞌnen. Tîîse Paapa yonpa pe amîrî eena eꞌpainon? Salmo 25:14 ya taa pî man: “Inîꞌ panpîꞌ Jeová yonpa pe tîweꞌsenya, yapurî.” (TNM) Îꞌ koneka amîrîya eꞌpai wanî Jeová yonpa pe awanîpa? Paapa Maimuya yuuku moropai imenukasaꞌya taa pî man, Jeová yonpa pe eꞌnîtoꞌpe, mîrîrî wanî morî pe puꞌkuru.

1. Îꞌ yuꞌse Jeová wanî?

Paapa Maimuya taa pî man: “Aminke pra Paapa pia erepantî, moropai aapiaꞌnîkon aakoꞌmamî.” (Tiago 4:8) Îꞌ taa yuꞌse mîrîrî wanî? Amîrî yonpa pe eꞌpai Jeová man. Tiaronkon esenumenka: ‘Oꞌnon yeꞌka pe Paapa yonpa pe eꞌnî, mîîkîrî eraꞌma pra tîîse?’ Paapa Maimuya taa pî man iteseru epuꞌtoꞌpe uurînîkonya. Mîrîrî wenai, aminke pra Jeová pia uurînîkon erepamî eꞌpainon. Paapa Maimu imenukasaꞌ eraꞌma uurînîkonya ya, inîꞌ panpîꞌ uurînîkon eena itonpa pe, mîîkîrî eraꞌma pra tanne.

2. Îꞌ wani awanî yeꞌnen Jeová wanî morî yonpa pe anîꞌ rî yentai?

Jeováya asaꞌnama pî man mararî pra anîꞌ rî yentai. Taatausinpai amîrî wanî yuꞌse Jeová man moropai eꞌpîikatîntoꞌ yuwatoꞌpe. Îꞌ koneka amîrîya? ‘Tamîꞌnawîrî kureꞌne eesenumenkatoꞌ mîrîrî rumakakî Paapa yenyaꞌ, maasa pra mîîkîrîya neken tamîꞌnawîrî ikoneka amîrî ton pe’. (1 Pedro 5:7) Paapa wanî amîrî anpîikaꞌtîpai wei kaisarî, mîîkîrîya itonpa pe eꞌkoiꞌkon eta moropai yausinpaiya. — Salmo 94:18, 19 ya taa pî man: “Uurîya taꞌpî: “Maasa uurî eena tanne”, amîrî saꞌnamatoꞌya uurî yapisîꞌpî. ¹⁹ Kureꞌne uurî esenumenkatoꞌ eenasaꞌ yai, amîrîya uyausinpaꞌpî moropai moo uurî emaꞌpîya.” (TNM)

3. Îꞌ yuꞌse Jeová wanî itonpakon winîpai?

Tamîꞌnawîronkon pemonkonyamîꞌ saꞌnamanen mîîkîrî Jeová, tîîse itonpa pe neken, yairî tîweꞌsanon yarakkîrî awanî. (Provérbios 3:32) Îꞌ wanî yairî Jeová pia, tîpoitîrîtonon yuꞌse Jeová wanî mîrîrî yawîrî moropai îꞌ wanî yairî pra iipia, mîrîrî rumaka tîpoitîrîtononya yuꞌse wanî nîrî. Tiaronkon esenumenka: ‘Ituꞌse Jeová eꞌtoꞌ yawîrî uurî wanî, eserîke pra wai.’ Tîîse, Jeováya uurînîkon epuꞌtî pî man. Jeová saꞌnamanenan wanî eꞌpainon itonpa pe, îꞌ yuꞌse Paapa eꞌtoꞌ yawîrî eꞌpai toꞌ wanî yeꞌnen. — Salmo 147:11; Atos 10:34, 35.

 ESENUPAKÎ INÎꞌ PANPÎꞌ

4. Jeová yonpa pe Abraão eꞌpîtîꞌpî

Îꞌ taa Paapa Maimuya manni Abraão pî (tiaron iteꞌseꞌ nîrî wanîꞌpî Abrão pe) mîrîrî wenai uurînîkonya epuꞌtî pî man, Jeová yonpa pe aweꞌtoꞌ pî. Abraão pî eraꞌmatî tarî, Gênesis 12:1-4 ya taa pî man: “Jeováya taꞌpî Abraão pî: “Apata yapai epaꞌkakî. Apemonkonoyamîꞌ koreꞌtapai atîkî, apataꞌseꞌ ton ekaremekîuya manniꞌ pata ya. ² Apemonkonoyamîꞌ eena mararî pra kupî pî wai, apîikaꞌtîuya moropai awinîpai morîkon iipî pemonkonyamîꞌ pia. ³ Mannankan apîikaꞌtînenan, pîikaꞌtîuya moropai ayeyatonon pona imakuiꞌpî iipî, moropai pata po tîîkoꞌmansenon morîkon yapisî awinîpai.” ⁴ Moriya, Abraão wîtîꞌpî, Jeová maimu yawîrî tîwanîꞌpî yeꞌnen moropai Ló wîtîꞌpî nîrî. Abraão epaꞌka yai Harã yapai, ikono po wanîꞌpî 75 konoꞌ kaisarî.” (TNM) Tarîpai seeni itoꞌkoꞌ manni pî eseurîmatî:

• Îꞌ koneka Abraãoya yuꞌse Jeová wanîꞌpî?

• Îꞌ koneka taꞌpî Jeováya Abraão tonpe?

• Îꞌ konekaꞌpî Abraãoya?

5. Îꞌ nîmîkî Jeováya itonpakon winîpai?

Tiaron pensa morî nîmîkî uurînîkonya uyonpakon winîpai.

• Îꞌ koneka ayonpayamîꞌya amîrî tonpe awakîri pe?

Eraꞌmatî 1 João 5:3 ya. Mîrîrî tîpo seeni itoꞌkoꞌ manni pî eseurîmatî:

• Îꞌ nîmîkî Jeováya itonpakon winîpai?

Tiaron pensa, Jeová yawîrî eꞌnî, uurînîkon yeseru moꞌtanîꞌpî eꞌpai wanî. Isaías 48:17, 18 ya taa pî man: “Jeová, apîikaꞌtînenya taa: “Uurî, Jeová, amîrî Paapa, uurîya amîrî yenupa pî man morî pî, amîrî nîrî yenupanen uurî, morî eꞌma taawîrî aasarîpa. ¹⁸ Umaimu etanen pe awanî ya, morî pe wanî! Tîwanmîn wanî aapia iren warainon, moropai yairî wanî aapia, tuna sipa sipa panpe.” (TNM) Tarîpai seeni itoꞌkoꞌ manni pî eseurîmatî:

• Îꞌ wani awanî yeꞌnen Jeováya taa ayonpakon pî, iteserukon moꞌtanîtoꞌpîiya?

 6. Îꞌ koneka Jeováya itonpayamîꞌ pî

 Îꞌ PÎ ESENUPA PÎ NAN?

Jeová man amîrî yuꞌse itonpa pe. Aminke pra iipia awanî, mîrîrî yeꞌnen apîikaꞌtîiya.

Enpanatapaiꞌnîkon

• Oꞌnon yeꞌka pe itonpayamîꞌ pîikaꞌtî Jeováya?

• Îꞌ wani awanî yeꞌnen Jeováya taa ayonpakon pî, iteserukon moꞌtanîtoꞌpîiya?

• Îꞌ taaya, saꞌme wanî aapia Jeová yonpa pe awanîpa? Îꞌ wani awanî yeꞌnen inna taaya?