ESENUPANTOꞌ 09

Epîrematoꞌya amîrî kupî Jeová yonpa pe panpîꞌ

YE'NUNPA

Tiaron pensa morî panamatoꞌ etaꞌpîya apîikaꞌtîꞌpîiya? Ekaranmaposaꞌkon pî esenumenkaya moropai yuꞌtoꞌ anepuꞌpai nan? Yausinpantoꞌ, pîikaꞌtîntoꞌ yuwaꞌ pî nan? Jeová yonpa pe eꞌpai nan inîꞌ panpîꞌ? Epîrematoꞌya apîikaꞌtî eꞌpainon mîrîrîkon pî. Tîîse, oꞌnon yeꞌka pe epîrema yairî? Tamîꞌnawîronkon epîremantoꞌ etanen mîîkîrî Paapa? Îꞌ konekaya eꞌpainon amîrî epîrematoꞌ etatoꞌpe Paapaya? Eraꞌmapaiꞌnîkon.

1. Anîꞌ pî moropai îꞌ pî epîrema?

Jesusya yenupaꞌpî, Paapa uurînîkon yunkon kaꞌ po tîîkoꞌmansen pî neken epîrema eꞌpainon. Mîrîrî panpe konekapîtîꞌpî Jesusya. Mîîkîrîya taꞌpî: “Mîrîrî yeꞌnen tauya sîrîrî, epîrematî see warantî: “Paapa anna yunkon, amîrî kaꞌ po tîîkoꞌmansen . . .’” (Mateus 6:9) Uurînîkon epîrema yai Jeová pî, inîꞌ panpîꞌ uurînîkon wanî itonpa pe.

Uurînîkon epîrema eꞌpainon îꞌ pî rî. Tîîse ituꞌse tîweꞌtoꞌ neken yuuku Paapaya. “Îꞌ rî esatî ya ituꞌse Paapa eꞌtoꞌ yawîrî, tîwakîri pe eseurîmantoꞌ etaiya.” (1 João 5:14) Uurînîkon epîrema eꞌpainon îꞌ pî rî taꞌpî Jesusya. (Eraꞌmatî Mateus 6:9-13.) Uurînîkon epîrema eꞌpainon uurînîkon esenumenkatoꞌ pî. Tîîse tiaronkon pî epîrema eꞌpai uurînîkon wanî moropai “morî pe man” taa eꞌpai uurînîkon wanî, îꞌ tîîsaꞌ Paapaya manni uurînîkon pia.

2. Oꞌnon yeꞌka pe uurînîkon epîrema eꞌpai wanî?

Uurînîkon epîrematoꞌ eꞌpai wanî yairî uyewankon ke. Mîrîrî yeꞌnen Paapa Maimuya taa, “aminke pra erepannîpaiꞌnîkon man Paapa pia. Yairî uyewankon yaꞌ.” (Hebreus 10:22) Uurînîkon epîrema eꞌpainon nîrî esenumenkantoꞌ ke, îꞌ pensa moropai oꞌnon pata ituꞌse awanî ya. Epîrema eꞌpainon satippe, tereutai, tîweꞌsekunkai, ituꞌse awanî ya. Ayeseru wenai amîrî anepuꞌpai Jeová man ipoitîrî pe awanî.

3. Oꞌnon yeꞌka pe uurînîkon epîrematoꞌ yuuku Paapaya?

Mîrîrî yuuku Paapaya îꞌ rî ayeseru wenai. Paapa Maimuya man yuꞌtoꞌkon uurînîkon pia. Paapa Maimu imenukasaꞌ wenai esenupantoꞌ eporî moropai epuꞌnen pepînya mîrîrî epuꞌtî. (Salmo 19:7; eraꞌmatî Tiago 1:5.) Eꞌtarumaꞌtî tanne, Jeováya uurînîkon yewan kupî tîwanmîn pe moropai tîpoitîrîtonon wenai uurînîkon yausinpaiya eꞌpainon.

ESENUPAKÎ INÎꞌ PANPÎꞌ

Eraꞌmakî îꞌ konekaya eꞌpainon amîrî epîrematoꞌ ayewan ke etatoꞌpe Paapaya. Eraꞌmakî nîrî epîrematoꞌya apîikaꞌtî eꞌpainon.

4. Îꞌ koneka uurînîkonya epîrematoꞌ etatoꞌpe Paapaya?

Îꞌ kon wanî morî pe puꞌkuru uurînîkon epîrematoꞌ etatoꞌpe Paapaya? PANTON eraꞌmatî.

PANTON ERAꞌMATOꞌPE: Tamîꞌnawîronkon epîrematoꞌ etanen Paapa? — Iipiaꞌpî (2:42)

Tîpî neken uurînîkon epîrema yuꞌse Jeová man. Salmo 65:2 ya taa pî man: “Tamîꞌnawîronkon epîrematoꞌ etanen amîrî, aapia toꞌ erepamî”. (TNM) Tarîpai seeni itoꞌkoꞌ manni pî eseurîmatî:

Îꞌ taaya, ‘Tamîꞌnawîronkon epîrematoꞌ etanenya’ amîrî epîrematoꞌ eta nîrî? Îꞌ wani awanî yeꞌnen mîrîrî panpe taaya?

Îꞌ wanî yairî Paapa pia, mîrîrî yawîrî eꞌpai uurînîkon wanî, Paapaya uurînîkon epîrematoꞌ etatoꞌpe. Miqueias 3:4 ya taa pî man: “Maasa Jeová yanno toꞌya tîpîikaꞌtîtoꞌpîiyaꞌnîkon, tîîse yuukuiya pra wanî, imakuiꞌpî pe toꞌ wanî yeꞌnen.” (TNM) Eraꞌmatî nîrî 1 Pedro 3:12. Mîrîrî tîpo seeni itoꞌkoꞌ manni pî eseurîmatî:

Îꞌ wani awanî yeꞌnen inna taa uurînîkonya eꞌpainon uurînîkon epîrematoꞌ etatoꞌpe Paapaya?

Kureꞌnan ekoꞌremantoꞌ yai pemonkonyamîꞌ epîrema Paapa pî epîikaꞌtîtoꞌ ton eꞌtoꞌpe, tîîse tiaron ratai po mîrîrî panpe aweꞌkupî, toꞌ epîrema Paapa pî nîrî. Îꞌ taaya, inna taaya eꞌpainon toꞌ epîrematoꞌ yuuku Paapaya?

5. Uyewankon ke uurînîkon epîrema eꞌpai wanî

Tiaronkon esenupaꞌpî epîrematoꞌ pî tinnaꞌpopîꞌse Paapa pî. Mîrîrî panpe ituꞌse Paapa wanî? Eraꞌmatî Mateus 6:7. Mîrîrî tîpo seeni itoꞌkoꞌ manni pî eseurîmatî:

Îꞌ konekaya eꞌpainon tinnaꞌpopîꞌse pra epîrematoꞌ konekatoꞌpe?

Îꞌ taaya seeni pî? Wei kaisarî awenpanata îꞌ tîîsaꞌ Paapaya manni pî aapia moropai mîrîrî pî taaya “morî pe man” epîrematoꞌ wenai? Wei kaisarî mîrîrî konekaya ya, amîrî epîrematoꞌ wanî pepîn tinnaꞌpopîꞌse.

Îꞌ pensa iyun wakîri pe wanî inmu eseurîmaya tewan ke iipî. Mîrîrî panpe Jeová wanî. Uurînîkon epîrematoꞌ uyewankon ke wanî morî pe Paapa pia.

6. Epîrematoꞌ wanî morî pe puꞌkuru Paapaya itîîsaꞌ yeꞌnen uurînîkon pia

Oꞌnon yeꞌka pe epîrematoꞌya uurînîkon kupî meruntî ke, eꞌtarumaꞌtîntoꞌ wanî ya uupiaꞌnîkon? PANTON eraꞌmatî.

PANTON ERAꞌMATOꞌPE: Uurînîkon eꞌtarumaꞌtî yai, epîrematoꞌya uurînîkon pîikaꞌtî (1:32)

Paapa Maimuya taa pî man epîrematoꞌya uurînîkon pîikaꞌtî tîwanmîn epoꞌtoꞌpe. Eraꞌmatî Filipenses 4:6, 7. Mîrîrî tîpo seeni itoꞌkoꞌ manni pî eseurîmatî:

Yai pra tamîꞌnawîronkon eꞌtarumaꞌtîntoꞌ eꞌtîꞌka pepîn epîrematoꞌ wenai. Tîîse îꞌ wani awanî yeꞌnen mîrîrîya apîikaꞌtî eꞌpainon?
Îꞌ kon pî epîremapai nan?

Epuꞌtî pî nan?

“Amém” (Amen) taatoꞌ wanî mîrîrî panpe “inna”. Pena, Paapa Maimu imenukasaꞌ ekonekasaꞌ yai, epîreman tîpo “Amém” taa pemonkonyamîꞌya. — 1 Crônicas 16:36.

7. Epîrematoꞌ pî enpanatakî

Tiaron pensa epîrematoꞌ pî uurînîkon enpanata pepîn, mararî pra uurînîkon esenyakaꞌmatoꞌ wanî yeꞌnen. Epîrematoꞌ wanîꞌpî morî pe puꞌkuru Jesus pia? Eraꞌmatî Mateus 14:23 moropai Marcos 1:35. Mîrîrî tîpo seeni itoꞌkoꞌ manni pî eseurîmatî:

Îꞌ konekapîtîꞌpî Jesusya epîrematoꞌ tîrumakai pra?
Îꞌ konekaya eꞌpainon epîrematoꞌ tîrumakai pra?

TIARONKONYA TAA: “Morî pe pemonkonyamîꞌ ena, teepîremakon tîpo. Tîîse, mîrîrîya toꞌ pîikaꞌtî pepîn.”

Îꞌ taaya eꞌpainon?

Îꞌ PÎ ESENUPA PÎ NAN?

Morî epîrematoꞌ wenai uyewankon ke inîꞌ panpîꞌ uurînîkon erepamî eꞌpainon Paapa pia, tîwanmîn tîrîiya moropai meruntîri ton tîrîiya uurînîkonya Jeová yewan yausinpatoꞌpe.