ESENUPANTOꞌ 10
Oꞌnon yeꞌka pe Jeová Maimu Ekaremeꞌnenan emurukuntîtoꞌya apîikaꞌtî eꞌpainon?
Jeová Maimu Ekaremeꞌnenan emurukuntîtoꞌ pataꞌseꞌ ta wîtîꞌpî nan? Kaane karî, yai pra mîrîrî pî amîrî esewankonoꞌma. Amîrî ekaranmapoꞌ taise: ‘Îꞌ aweꞌkupî seeni emurukuntîtoꞌkon ta? Îꞌ wani awanî yeꞌnen morî pe wanî mîrîrî? Îꞌ wani awanî yeꞌnen uurî nîrî wîtî?’ Seeni esenupantoꞌ wenai esenupaya, emurukuntîtoꞌya amîrî pîikaꞌtî eꞌpainon Paapa pia erepamî inîꞌ panpîꞌ moropai îꞌ etaya emurukuntîtoꞌ ta suntaka kaisarî (semana/week), mîrîrîya apîikaꞌtî eꞌpainon tîkoꞌnarî.
1. Îꞌ wani awanî yeꞌnen Jeová Maimu Ekaremeꞌnenan wanî emurukuntîi?
Paapa Maimu imenukanenya taꞌpî: “Emurukuntîtoꞌ ta, Jeová yapurîuya.” (Salmo 26:12, TNM) Mîrîrî wenai, mîîkîrîya yenupaꞌpî îꞌ eꞌkupî emurukuntîtoꞌ ta: Jeová yapurîtoꞌpe. Mîrîrî yeꞌnen, Jeová Maimu Ekaremeꞌnenanya pata poro suntaka kaisarî emurukuntî Jeová yapurîtoꞌpe, toꞌ eserenka moropai toꞌ epîrema. Tiaron pensa nîrî konoꞌ kaisarî, emurukuntîi toꞌ wanî kureꞌnan emurukuntîtoꞌ ta. Jeová Maimu Ekaremeꞌnenan wakîri pe wanî mararî pra, toꞌ wîtîtoꞌpe emurukuntîtoꞌ pataꞌseꞌ ta.
2. Îꞌ pî esenupa emurukuntîtoꞌ ta?
Emurukuntîtoꞌ ta, Paapa Maimu imenukasaꞌ pî anna esenupa. Pena, Paapa Maimu imenukasaꞌ eraꞌmapîtîꞌpî Paapa poitîrîtononya moropai “îꞌ taasaꞌ mîrîrîya, yenupaꞌpîtîꞌpî toꞌya”, mîrîrî panpe ikoneka annaya sîrîrîpe. Neemias 8:8 ya taa pî man: “Paapa kaareta imenukasaꞌ pî, toꞌ eseurîmapîtîꞌpî meruntî ke tiaronkonya etatoꞌpe moropai îꞌ taasaꞌ mîrîrîya yenupaꞌpîtîꞌpî toꞌya; mîrîrî wenai pemonkonoyamîꞌ pîikaꞌtîpîtîꞌpî toꞌya imenukasaꞌ epuꞌtoꞌpe toꞌya.” (TNM) Emurukuntîtoꞌ ta esenupa Jeová yeseru pî. Inîꞌ panpîꞌ esenupaya Jeová saꞌnamatoꞌ wanî aapia moropai inîꞌ panpîꞌ amîrî erepamî iipia. Esenupaya nîrî Jeováya apîikaꞌtî eꞌpainon taatausinpai aakoꞌmamîpa. — Isaías 48:17, 18.
3. Îꞌ wani wanî yeꞌnen morî pe wanî aapia tiaronkon epotoꞌpe emurukuntîtoꞌ pataꞌseꞌ ta?
Paapa Maimu imenukasaꞌya taa pî man: “morî pe eꞌnî yuwapaiꞌnîkon tiaronkon yarakkîrî. Tiaronkon pîikaꞌtîpaiꞌnîkon tamîꞌnawîrî morî pe toꞌ saꞌnama wenai moropai tiaronkon nîrî saꞌnamatoꞌpe toꞌya.” (Hebreus 10:24, 25) Emurukuntîtoꞌ pataꞌseꞌ ta eraꞌmaya, tîmurukun pe siꞌma toꞌ wanî moropai toꞌ esewankonoꞌma tiaronkon pî. Eraꞌmaya nîrî, morî pe neken taa toꞌya Paapa Maimu pî. (Eraꞌmakî Romanos 1:11, 12.) Amîrî yeꞌka pe, inîꞌ panpîꞌ esenupa yuꞌse toꞌ wanî Jeová pî. Moropai, tiaronkon pemonkonyamîꞌ epuꞌtîya, toꞌ eꞌtarumaꞌtî tanne taatausinpai toꞌ wanî. Mîrîrî yeꞌnen uurînîkon emurukuntîi yuꞌse Jeová wanî!
ESENUPAKÎ INÎꞌ PANPÎꞌ
Îꞌ eꞌkupî Jeová Maimu Ekaremeꞌnenan emurukuntîtoꞌ pataꞌseꞌ ta eraꞌmakî. Esenupakî nîrî îꞌ wani awanî yeꞌnen morî pe wanî emurukuntîtoꞌ ta.
4. Jeová Maimu Ekaremeꞌnenan emurukuntîtoꞌ epuꞌkî.
Jesus nenupaꞌsan weiyu yai, Paapa poitîrîtonon emurukuntîpîtîꞌpî Jeová yapurîtoꞌpe. (Romanos 16:3-5) Eraꞌmatî Colossenses 3:16 ya. Mîrîrî tîpo seeni itoꞌkoꞌ manni pî eseurîmatî:
-
Jesus nenupaꞌsan weiyu yai, oꞌnon yeꞌka pe Paapa poitîrîtononya Jeová yapurîpîtîꞌpî?
Sîrîrîpe nîrî, Jeová Maimu Ekaremeꞌnenan wanî emurukuntîi Jeová yapurîtoꞌpe. Oꞌnon yeꞌka pe emurukuntîtoꞌ wanî epuꞌtoꞌpe, PANTON eraꞌmatî. Mîrîrî tîpo, yekaton eraꞌmatî kaareta ya emurukuntîtoꞌ ta, moropai seeni itoꞌkoꞌ manni pî eseurîmatî:
-
Amîrîya eraꞌma pî man panton eraꞌmatoꞌ ya, îꞌ eꞌkupî emurukuntîtoꞌ ta. Îꞌ wanî mîrîrî panpe îꞌ taasaꞌ Colossenses 3:16 ya manni?
-
Îꞌ wanî awakîri pe emurukuntîtoꞌ ta, panton ya moropai yekaton ya?
Eraꞌmatî 2 Coríntios 9:7 ya. Mîrîrî tîpo seeni itoꞌkoꞌ manni pî eseurîmatî:
-
Îꞌ wani awanî yeꞌnen Jeová Maimu Ekaremeꞌnenanya, pîrata esaꞌtî pepîn emurukuntîtoꞌ pataꞌseꞌ ta?
Amîrî yenupanen yarakkîrî, eraꞌmakî îꞌ pî esenupa tiaron emurukuntîtoꞌ yai.
-
Îꞌ yeꞌka eseurîmantoꞌ wanî Paapa Maimu pî emurukuntîtoꞌ ta, awakîri pe panpîꞌ moropai mîrîrîya apîikaꞌtî eꞌpainon?
Epuꞌtî pî nan?
jw.org ya, eporîya eꞌpainon îꞌ pensa moropai oꞌnon pata emurukuntîtoꞌ wanî pata poro.
-
Emurukuntîtoꞌ ta, eseurîmantoꞌ wanîꞌpî Paapa Maimu pî uurînîkonya etatoꞌpe moropai panton eraꞌmatoꞌpe. Emurukuntîtoꞌ esippiaꞌtî moropai yaretîꞌka eserenkantoꞌ ke moropai epîrematoꞌ ke.
-
Emurukuntîtoꞌ wanî ipantakasaꞌ pe pemonkonyamîꞌ eseurîmatoꞌpe ituꞌse toꞌ wanî ya. (Emurukuntîtoꞌ mîꞌpamî mararî rî, pemonkonyamîꞌ eseurîmatoꞌpe ituꞌse toꞌ wanî ya.)
-
Morî pe erepantî: warayoꞌkon, wîriꞌsanyamîꞌ, aꞌyekeꞌtonon, noꞌsantonon moropai moreyamîꞌ.
-
Jeová Maimu Ekaremeꞌnenan emurukuntîtoꞌ ya, anîꞌya pîrata esaꞌtî pepîn.
5. Meruntî ke eꞌkî emurukuntîtoꞌ tîrumakai pra
Tarî Pata po tîwanî yai, Jesus yewîꞌ tawonkon yeseru epîtîꞌpî eraꞌmakî. Konoꞌ kaisarî toꞌ epaꞌkapîtîꞌpî Nazaré yapai toꞌ wîtîtoꞌpe Jerusalém pona. Mîrîrî wanîꞌpî saꞌme toꞌ pia, maasa pra toꞌ asarî mararî pra (100 quilômetros), eseurîwîꞌne wei kaisarî, moropai wîꞌkon pona toꞌ asarîpîtîꞌpî. Eraꞌmatî Lucas 2:39-42 ya. Mîrîrî tîpo seeni itoꞌkoꞌ manni pî eseurîmatî:
-
Saꞌme pra wanîꞌpî toꞌ pia toꞌ ataponka yai?
-
Îꞌ wani awanî yeꞌnen saꞌme wanî aapia emurukuntîtoꞌ pataꞌseꞌ ta amîrî wîtîtoꞌpe?
-
Morî pe wanî mîrîrî kuꞌtoꞌpe? Îꞌ wani awanî yeꞌnen mîrîrî taaya?
Paapa Maimu imenukasaꞌya taa pî man, morî pe wanî tiaronkon pokonpe emurukuntîtoꞌ ta Jeová yapurîtoꞌpe. Eraꞌmatî Hebreus 10:24, 25. Mîrîrî tîpo seeni itoꞌkoꞌ manni pî eseurîmatî:
-
Îꞌ wani awanî yeꞌnen emurukuntîtoꞌ pataꞌseꞌ ta wîtî eꞌpai uurînîkon wanî?
TIARONKONYA TAA: “Ayewîꞌ ta neken Paapa yapurîya. Tiwinsarî siꞌma Paapa Maimu imenukasaꞌ eraꞌma ya, morî pe wanî.”
-
Îꞌ taa Paapa Maimuya mîrîrî pî?
Îꞌ PÎ ESENUPA PÎ NAN?
Emurukuntîtoꞌ pataꞌseꞌ ta attî ya, mîrîrîya apîikaꞌtî eꞌpainon Jeová yeseru epuꞌtoꞌpe moropai inîꞌ panpîꞌ Jeová yonpa pe eꞌnîtoꞌpe. Moropai, emurukuntîtoꞌ ta awanî ya, tîmurukun pe siꞌma Jeová yapurîya tiaronkon pokonpe.
Enpanatapaiꞌnîkon
-
Îꞌ wani awanî yeꞌnen uurînîkon wîtî yuꞌse Jeová wanî emurukuntîi?
-
Îꞌ pî esenupa eꞌpainon Jeová Maimu Ekaremeꞌnenan emurukuntîtoꞌ ta?
-
Îꞌ taaya, emurukuntîtoꞌya apîikaꞌtî eꞌpainon tiaron yeseru wenai?
INÎꞌ PANPÎꞌ ESENUPAPAI NAN?
Emurukuntîtoꞌ pataꞌseꞌ ta attî, mîrîrî pî esewankonoꞌma? Mîrîrî eꞌkupîꞌpî warayoꞌ yarakkîrî. Eraꞌmakî îꞌ wani awanî yeꞌnen teesenumenkatoꞌ inkamaꞌpîiya.
Uurînîkon erepansaꞌ yai, uurînîkon yapîsîꞌpî toꞌya morî pe (4:16)
Eraꞌmakî îꞌ wani awanî yeꞌnen maasaron wakîri pe emurukuntîtoꞌ wanîꞌpî moropai îꞌ konekapîtîꞌpîiya tîkoꞌnarî mîîkîrî wîtîtoꞌpe.
Eraꞌmakî îꞌ taa tiaronkonya, îꞌ pensa toꞌ wîtî ya emurukuntîtoꞌ pataꞌseꞌ ta.
Eraꞌmakî sokoroꞌ pe warayoꞌ pantoni eꞌtoꞌ pî, imakuiꞌsan pemonkonyamîꞌ pokonpe awanîꞌpî. Eraꞌmakî oꞌnon yeꞌka pe tîîkoꞌmantoꞌ etinyakaꞌmaꞌpî, emurukuntîtoꞌ ta attîꞌpî tîpo Jeová Maimu Ekaremeꞌnenan koreꞌta.
“Uurî epaꞌka eꞌpîtîꞌpî rakusaꞌ yarakkîrî” (A Sentinela, 1.º julho kapoi pî, 2014 konoꞌ pî)
