Tamîꞌnawîronkon saꞌnamanen pe Paapa wanî ya, îꞌ wani awanî yeꞌnen imakuiꞌpî koneka soosikonya, ipoitîri pe siꞌma taa toꞌya? Yairî pra seeni soosikon wanî yeꞌnen. Yairî pra yenupa toꞌya Paapa pî. Oꞌnon yeꞌka pe soosikonya pemonkonyamîꞌ yakaꞌma? Oꞌnon yeꞌka pe mîrîrî eraꞌma Paapaya? Moropai îꞌ koneka Paapaya?

1. Oꞌnon yeꞌka pe yairî pra soosikonya pemonkonyamîꞌ yakaꞌma teesenupatoꞌkon wenai?

Yairî pra soosikonya “yairî Paapa yapurîtoꞌ kuꞌsaꞌ tîwî seruꞌ pe”. (Romanos 1:25) Mîrîrî pî esenumenkakî, tuꞌke soosikonya Paapa eseꞌ yenupa pra man. Tîîse, Paapa Maimuya taa pî man Paapa eseꞌ ekaremekî eꞌpai wanî. (Romanos 10:13, 14) Imakuiꞌpî eꞌkupî yai, tiaronkon soosi esanonya taa: “Mîrîrî yuꞌse Paapa wanî” taa toꞌya. Tîîse, yairî pra wanî mîrîrî. Imakuiꞌpî koneka Paapaya pepîn tiwin kin. (Eraꞌmakî Tiago 1:13.) Mîrîrî yenupatoꞌkon pî pemonkonyamîꞌ atakaꞌma mararî pra, moropai Paapa rumaka toꞌya.

2. Oꞌnon yeꞌka pe yairî pra soosikonya pemonkonyamîꞌ yakaꞌma tînkupîkon wenai?

Paapa Maimuya taa pî man yairî pra soosikonya “kureꞌne imakuiꞌpî kuꞌsaꞌ toꞌya man Paapa winîkîi”. (Apocalipse 18:5) Pena patapai sîrîrî tîpose, tuꞌke soosikon esenyakama pata esakon pokonpe moropai îꞌ pensa pata esanon eseyaꞌnama tiaronkon pata esanon yarakkîrî, morî pe man taa toꞌya. Yairî pra soosikon yeseru wenai, tuꞌke pemonkonyamîꞌ saꞌmanta pî man sîrîrî tîpose. Tuꞌke pîrata esaꞌ pe soosi esanon wanî, ipoitîrîtonon pîrata wenai. Yairî pra soosikonya, pemonkonyamîꞌ eraꞌma eserîke pra wanî Jeová yeseru panpe. “Paapa naipontîsan anna” taa toꞌya, tîîse toꞌ yeseru wanî pepîn morî pe. Paapa epuꞌtî toꞌya pra man. — Eraꞌmakî 1 João 4:8.

3. Îꞌ pî Paapa esenumenka yairî pra tîweꞌsen soosikon pî?

Sokoroꞌ pe amîrî wanî ya, yairî pra soosikon yeseru eraꞌmaya yeꞌnen, esenumenkakî nîrî, oꞌnon yeꞌka pe Paapa wanî, mîrîrîkon eraꞌmaiya ya! Yairî pra tîweꞌsen soosikonya pemonkonyamîꞌ yakaꞌma Paapa piapai moropai ipoitîrîtonon eraꞌma toꞌya pra man morî pe. Pemonkonyamîꞌ saꞌnamanen mîîkîrî Jeová, mîrîrî yeꞌnen îꞌ koneka soosikonya manni yairî pra, mîrîrî wanî Jeová wakîri pe pra. Amenrî, yairî pra tîweꞌsen soosikon tîꞌka Paapaya, moropai ‘inîꞌrî eeseraꞌma pe pra man’. — Apocalipse 18:8, 21.

 ESENUPAKÎ INÎꞌ PANPÎꞌ

4. Paapaya tamîꞌnawîronkon soosikon yapisî pra man

Tuꞌke pemonkonyamîꞌ esenumenka pî man, soosikon wanî tuꞌke eꞌma panpe, mîrîrî wenai pemonkonyamîꞌ erepamî Paapa pia. Yairon naka mîrîrî? Eraꞌmatî Mateus 7:13, 14. Mîrîrî tîpo seeni itoꞌkoꞌ manni pî eseurîmatî:

• Îꞌ taa Paapa Maimuya, eꞌma ipatîkarî koꞌmantoꞌpe pî?

PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:

• Yai pra naka Paapa Maimuya taa pî man, tamîꞌnawîron soosikon wanî Paapa wakîri pe?

 6. Yairî pra tîweꞌsen soosikon yapai, pemonkonyamîꞌ moꞌka yuꞌse Paapa wanî

Eraꞌmatî Apocalipse 18:4. a (Imenukasaꞌ itoꞌkoꞌ eraꞌmakî - Nota). Mîrîrî tîpo seeni itoꞌkoꞌ manni pî eseurîmatî:

• Yairî pra tîweꞌsen soosikonya pemonkonyamîꞌ yenkuꞌtî pî man. Oꞌnon yeꞌka pe amîrî esepuꞌtîꞌpî, îꞌ pensa epuꞌtîsaꞌya ya, Paapa wanî pemonkonyamîꞌ imoꞌkapai, yairon pepîn soosikon yapai?

7. Inîꞌ panpîꞌ yairon pe Paapa pî esenupakî akoꞌmankî

Yai pra naka imakuiꞌpî yairî pepîn soosikon nîkonekaꞌpîya amîrî yarima Paapa piapai? Esenumekakî tinmu wanî tîyun maimu yawîrî pra. Mîrîrî tîpo tîyun yewîꞌ tapai epaꞌkaꞌpî moropai imakuiꞌpî koneka ippiaꞌtîꞌpîiya. Mîrîrî yuꞌse pra itun wanî moropai iwakîri pe pra wanî. Yairî pra itun wanî, taa uurînîkonya tînmu yeseru pîkînsaꞌ?

• Jeová rumaka uurînîkonya, yairî pra tîweꞌsen soosikon nîkonekaꞌpî wenai, mîrîrî wanî yairî?

 Îꞌ PÎ ESENUPA PÎ NAN?

Yairî pra tîweꞌsen soosikonya pemonkonyamîꞌ atarima Paapa piapai emapuꞌtî. Mîrîrî eꞌkupî yairî pra iteseru winîpai moropai yairî pra teesenupantoꞌ winîpai. Yaironkon pepîn soosikon tîꞌka Paapaya.

Enpanatapaiꞌnîkon

• Îꞌ taaya yairî pra tîweꞌsen soosikonya yenupantoꞌ pî moropai iteseru pî?

• Îꞌ pî Paapa esenumenka yaironkon pepîn soosikon pî?

• Îꞌ koneka Paapaya yaironkon pepîn soosikon pî?