Esenupantoꞌ 13 ya uurînîkon esenupaꞌpî, tamîꞌnawîronkon soosikon yapisî Paapaya pepîn. Tîîse Paapa yapurî uurînîkonya eꞌpainon yairî, seruꞌye ton pra. Îꞌ yuꞌse Paapa wanî uurînîkon piapai, mîîkîrî yapurîtoꞌpe uurînîkonya yairon pe? (Tiago 1:27, nota) Îꞌ taa Paapa Maimuya eraꞌmapaiꞌnîkon.

1. Îꞌ yawîrî eꞌpai uurînîkon wanî Paapa yapurîtoꞌpe?

Paapa Maimu yawîrî eꞌpai uurînîkon wanî mîîkîrî yapurîtoꞌpe. Jesusya taꞌpî Paapa pî: “Amaimu wanî yairon pe.” (João 17:17) Tuꞌke soosikonya Paapa Maimu yenupantoꞌ irumakaꞌpî man, maasa pra pemonkonyamîꞌ yenupantoꞌ yapisî toꞌya moropai toꞌ atamokon rîꞌsan yeserukon nîrî. Mannankan Jeová maimu yawîrî pra tîweꞌsanon, yapisî Paapaya pepîn. (Eraꞌmakî Marcos 7:9.) Tîîse, tîmaimu yawîrî uurînîkon wanî ya, mîîkîrî atausinpa.

2. Oꞌnon yeꞌka pe Jeová yapurî eꞌpainon?

Jeová neken yapurî eꞌpai uurînîkon wanî, uurînîkon konekatîponpe awanî yeꞌnen. (Apocalipse 4:11) Mîrîrî yeꞌnen, miaꞌ ke ikonekasaꞌ yenkaꞌma eꞌpai pra uurînîkon wanî, Jeová saꞌnama moropai yapurî eꞌpai uurînîkon wanî neken. — Isaías 42:8 ya taa pî man: “Jeová uurî. Uyeseꞌ mîrîrî; Ipîkku puꞌkuru wai tiaronkon yentai, uurî yapurîtoꞌ tîrîuya pepîn miaꞌ ke ikonekasaꞌ pia.” (TNM)

Yairon pe Paapa yapurîtoꞌ eꞌpai wanî, Paapaya yapitoꞌpe. (Romanos 12:1) Mîrîrî yeꞌnen, imaimu yawîrî eꞌpai uurînîkon wanî uyewankon ke. Îꞌ taasaꞌ Jeováya eꞌmarîtîmantoꞌ pî, mîrîrî yawîrî eꞌpai tîsaꞌnamanenan wanî. Kawayu, drogas (drugs) yenkaꞌma moropai eꞌtari pe ena eserîke pra inkamoro wanî nîrî. a — Imenukasaꞌ itoꞌkoꞌ eraꞌmakî - Nota.

3. Îꞌ wani awanî yeꞌnen Jeová yapurî eꞌpai uurînîkon wanî tiaronkon pokonpe?

Jeováya taa uurînîkon pî emurukuntîtoꞌ pataꞌse ta wîtîntoꞌpe, mîrîrî taiya uurînîkon saꞌnama tîuya yeꞌnen moropai mîrîrî epuꞌtî tîuya yeꞌnen, uurînîkon pîikaꞌtîiya tausinpantoꞌ epotoꞌpe. Tiaronkon pokonpe nîrî Jeová yapurî uurînîkonya eꞌpainon emurukuntîtoꞌ ta. Eserenkantoꞌ wenai mîrîrî kupî uurînîkonya eꞌpainon. (Eraꞌmakî Efésios 5:19.) Eserenkantoꞌ wenai, Jeová yapurî uurînîkonya ipoitîrîtonon koreꞌta. (Salmo 111:1, 2) Moropai, îꞌ pensa uurînîkon wîtî ya emurukuntîtoꞌ ta, tiaronkon yausinpa uurînîkonya moropai uurînîkon yausinpa toꞌya nîrî.

 ESENUPAKÎ INÎꞌ PANPÎꞌ

4. Miaꞌ ke ikonekasaꞌ yenkaꞌma eꞌpai pra uurînîkon wanî Jeová yapurîtoꞌpe

5. Jeová neken yapurî uurînîkonya ya, uurînîkon eꞌpîikaꞌtî nîrî yairî pra yenupantoꞌkon pe esenkuꞌtî namai

 6. Paapa yapurî uurînîkonya emurukuntîtoꞌ pataꞌseꞌ ta

Jeová yapurî uurînîkonya eserenkantoꞌ ke emurukuntîtoꞌ ta moropai uurînîkon yuꞌtoꞌ wanî morî pe, mîrîrîya tiaronkon yausinpa. Eraꞌmatî Hebreus 2:11. Mîrîrî tîpo seeni itoꞌkoꞌ manni pî eseurîmatî:

• Tiaronkonya yuuku tanne emurukuntîtoꞌ ta, yuꞌtoꞌ toꞌya wanî awakîri pe?

• Mîrîrî panpe yuꞌtoꞌ kuꞌtoꞌpe ya eꞌpainon emurukuntîtoꞌ ta?

7. Jeová tausinpai mararî pra tiaronkon yeurîmaya esenupaꞌpî pî

Yairon ekaremekî uurînîkonya eꞌpainon tiaronkon pî. Eraꞌmatî Hebreus 13:15. Mîrîrî tîpo seeni itoꞌkoꞌ manni pî eseurîmatî:

• Mararî pra amîrî esenupaꞌpî yairon Paapa Maimu pî. Oꞌnon yeꞌka itekare ekaremeꞌpai nan tiaron pî?

 Îꞌ PÎ ESENUPA PÎ NAN?

Paapa atausinpa îꞌ pensa mîîkîrî neken yapurî uurînîkonya ya, emurukuntîtoꞌ ta mîîkîrî yapurî uurînîkonya moropai ipî uurînîkon eseurîmasaꞌya tiaronkon pî.

Enpanatapaiꞌnîkon

• Oꞌnon yeꞌka pe esenupa eꞌpainon, Jeová yapurîtoꞌpe yairon pe yapitoꞌpe mîîkîrîya?

• Îꞌ wanî awanî yeꞌnen Jeová neken yapurî?

• Îꞌ wanî awanî yeꞌnen Jeová maimu yawîrî tîweꞌsen yarakkîrî, Jeová yapurî eꞌpai uurînîkon wanî?