ESENUPATOꞌ 15
Anîꞌ mîîkîrî Jesus?
Tuꞌke pemonkonyamîꞌya etaꞌpî Jesus yekare pî. Tîîse, mîîkîrî epuꞌtî toꞌya pra wanî moropai tiaron pe toꞌ esenumenka ipî. Îꞌ taa Paapa Maimuya ipî?
1. Anîꞌ mîîkîrî Jesus?
Jesus mîîkîrî meruntî inserî kaꞌ po tîkoꞌmansen. Îꞌ koneka Jeováya irawîrî, Jesus konekaꞌpîiya. Mîrîrî yeꞌnen “eꞌmaiꞌnon” mîîkîrî Paapa nîkonekaꞌpî Jesus, taasaꞌ Paapa Maimuya. (Hebreus 1:6) Tiwinan Paapa munmu mîîkîrî Jesus taasaꞌ Paapa Maimuya nîrî. Pena tiwinsarî siꞌma Jeováya, tînmu Jesus konekaꞌpî. (João 3:16) Jesus esenyakamaꞌpîtîꞌpî tîyun yarakkîrî. Jesusya tînyun pîikaꞌtîꞌpî tamîꞌnawîrî konekakonpa. (Eraꞌmakî João 1: 2, 3.) Jeováya Jesus saꞌnama moropai Jesusya Jeová saꞌnama nîrî, kureꞌne. Jesus wanî Jeová maimu ekaremenen pe, mîrîrî yeꞌnen Paapa Maimuya taa pî man Jesus wanî “Mai” pe. — João 1:14.
2. Îꞌ wani awanî yeꞌnen tarî pata pona Jesus iipîꞌpî?
Pena 2.000 konoꞌ esuwaꞌkaꞌpî tanne, Jeováya tîmeruntîri yenkamaꞌpî. Morî yekaton yenkaꞌmaꞌpîiya Jesus yarimatoꞌpe kaꞌ poi wîriꞌ roꞌta ya, iteꞌseꞌ Maria. Mîrîrî wenai, Jesus esenpoꞌpî warayoꞌ pe. (Eraꞌmakî Lucas 1:34, 35.) Jeováya Jesus yarimaꞌpî tarî pata pona Messias pe (Messiah) esenpotoꞌpe, tiaron iteꞌseꞌ wanî Cristo pe (Christ). Jesus enatoꞌpe tamîꞌnawîronkon pemonkonyamîꞌ pîikaꞌtînen pe, mîrîrî yuꞌse Jeová wanîꞌpî. a (Imenukasaꞌ itoꞌkoꞌ eraꞌmakî - Nota.) Îꞌ taasaꞌ Paapa Maimuya manni Messias pî, mîrîrî konekaꞌpî Jesusya tamîꞌnawîrî. Mîrîrî wenai pemonkonyamîꞌya epuꞌtîꞌpî, Jesus mîîkîrî “Paapa nîmenkaꞌpî, Cristo. Ipatîkarî tîîkoꞌmansen Paapa munmu pe”. — Mateus 16:16.
3. Oꞌnon pata Jesus wanî?
Tîsaꞌmanta tîpo moropai tîweꞌmîꞌsaꞌka tîpo inserî pe enaꞌpî, moropai kaꞌ pona enapoꞌpî. Moro, “ipîkku pe Paapaya ikupîꞌpî, tamîꞌnawîronkon yentai”. (Filipenses 2:9) Tarîpai, meruntî ke inserî pe Jesus wanî. Jeová neken wanî meruntî ke Jesus yentai.
ESENUPAKÎ INÎꞌ PANPÎꞌ
Inîꞌ panpîꞌ esenupakî anîꞌ pe Jesus wanî, moropai epuꞌkî îꞌ wani awanî yeꞌnen ipî uurînîkon esenupa.
4. Meruntî puꞌkuru tamîꞌnawîron yentainon mîîkîrî Jeová, mîîkîrî panpe Jesus wanî rîn
Paapa Maimuya taa pî man, Jesus wanî meruntî ke inserî pe kaꞌ po. Tîîse, tîyun maimu yawîrî aakoꞌmamî. Oꞌnon yeꞌka pe mîrîrî epuꞌtî uurînîkonya? PANTON eraꞌmatî, mîrîrî wenai epuꞌtîya eꞌpainon Paapa Maimu winîpai, Jesus wanî pepîn Paapa yeꞌka pe meruntî ke, maasa pra Paapa wanî meruntî ke puꞌkuru tamîꞌnawîron yentai.
Paapa Maimu imenukasaꞌkon man itoꞌkoꞌ, mîrîrîya uurînîkon pîikaꞌtî eꞌpainon Jesus epuꞌtoꞌpe, Jeová moropai Jesus wanî tiaron pe kaiꞌma, tiwinan pe toꞌ wanî pepîn. Paapa Maimu imenukasaꞌ pî eraꞌma tîpo, ekaranmaposaꞌkon pî eseurîmakî:
Eraꞌmatî Lucas 1:30-32 ya.
-
Oꞌnon yeꞌka pe inserî maimu wenai epuꞌtî uurînîkonya eꞌpainon, Jesus wanî pepîn ‘Paapa yeꞌka pe tamîꞌnawîron yentaiꞌ?
Eraꞌmatî Mateus 3:16, 17 ya.
-
Jesus esenpatakona tanne, îꞌ taꞌpî maiya kaꞌ poinon ya?
-
Îꞌ taaya, anîꞌ maimu pe wanîꞌpî?
Eraꞌmatî João 14:28 ya.
-
Yewîꞌ taawonkon ta, anîꞌ wanî aꞌyekeꞌton pe panpî moropai tiaronkon esaꞌ pe: Yun karî, inmu karî?
-
Jesusya Jeová esaꞌpîtîꞌpî tîyun pe. Îꞌ pî uurînîkon esenupa pî nai mîrîrî pî?
Eraꞌmatî João 12:49 ya.
-
Yai pra naka Jesus esenumenkaꞌpî tîyun panpe tîwanî pî? Îꞌ taaya, tiwinan pe toꞌ wanî?
5. Jesus mîîkîrî Paapa nîmenkaꞌpî (Messias/Messiah)
Paapa Maimu imenukasaꞌkon winîpai, pemonkonyamîꞌya epuꞌtî eꞌpainon, anîꞌ wanî Paapa nîmenkaꞌpî pe, tamîꞌnawîronkon pemonkonyamîꞌ pîikaꞌtînen pe. PANTON eraꞌmatî, epuꞌtîpa îꞌ taasaꞌ Paapa Maimuya manni Jesus pî, mîrîrî eꞌkupîꞌpî.
Îꞌ taasaꞌ Paapa Maimuya Jesus pî eraꞌmatî, mîrîrî tîpo seeni itoꞌkoꞌ manni pî eseurîmatî:
Mateus 2:4-6 ya eraꞌmatî, epuꞌtîpa oꞌnon pata Paapa nîmenkaꞌpî (Messias/Messiah) esenpotoꞌpe. b — Imenukasaꞌ itoꞌkoꞌ eraꞌmakî - Nota.
-
Seeni imenukasaꞌ eꞌkupîꞌpî? — Mateus 2:1.
Paapa Maimuya taꞌpî pena, oꞌnon yeꞌka pe Paapa nîmenkaꞌpî saꞌmanta. Salmo 34:20 ya taa pî man: “Mîîkîrîya amîrî yeꞌpî rîꞌpî eraꞌma; tiwin iteꞌpî waikîpîtî toꞌya pepîn tiwin kin.” (TNM) moropai João 19:37 ya eraꞌmatî mîrîrî epuꞌtoꞌpe inîꞌ panpîꞌ.
-
Îꞌ taasaꞌ Paapa Maimuya manni eꞌkupîꞌpî? — João 19:33-37.
-
Tiaronkonya taa, î eꞌkupîꞌpî Jesus koꞌmantoꞌ ya, mîrîrî menkasaiꞌya warantî kuꞌtoꞌpe irawîrî, îꞌ taasaꞌ Paapa Maimuya manni Paapa nîmenkaꞌpî pî mîrîrî warantî kuꞌtoꞌpeiya. Yairî pe mîrîrî wanî naka?
-
Mîrîrîkon wenai, îꞌ pî uurînîkon esenupa pî nai Jesus pî?
6. Morî pe puꞌkuru wanî uurînîkon tonpe Jesus pî esenupatoꞌpe
Paapa Maimuya taa pî man, morî pe puꞌkuru wanî uurînîkon esenupatoꞌpe Jesus yeseru pî moropai ituꞌse Paapa eꞌtoꞌ pî Jesusya ikonekatoꞌpe. Eraꞌmatî João 14:6 moropai 17:3 ya. Mîrîrî tîpo seeni itoꞌkoꞌ manni pî eseurîmatî:
-
Îꞌ wani awanî yeꞌnen morî pe puꞌkuru wanî Jesus yeseru pî esenupatoꞌpe?
Jeová yonpa pe uurînîkon wanî eꞌpainon, Jesus wanî yeꞌnen eꞌma pe. Innarî mîîkîrî, yairî eseurîma yeꞌnen Jeová pî, moropai Jesus wenai, ipatîkarî uurînîkon koꞌmamî eꞌpainon, koꞌmannîtoꞌ pe awanî yeꞌnen.
TIARONKONYA TAA: “Jeová Maimu Ekaremeꞌnenanya inna taa pra man Jesus pî.”
-
Îꞌ taa amîrîya?
Îꞌ PÎ ESENUPA PÎ NAN?
Meruntî inserî mîîkîrî Jesus. Paapa munmu pe mîîkîrî wanî moropai Paapa nîmenkaꞌpî pe nîrî.
Enpanatapaiꞌnîkon
-
Îꞌ wani awanî yeꞌnen Paapa Maimuya taa pî man, Jesus wanî ‘eꞌmainon Paapa munmuꞌ pe?
-
Îꞌ konekaꞌpî Jesusya tarî pata pona mîîkîrî iipî rawîrî?
-
Oꞌnon yeꞌka pe epuꞌtî uurînîkonya eꞌpainon Paapa nîmenkaꞌpî pe Jesus wanî?
INÎꞌ PANPÎꞌ ESENUPAPAI NAN?
Tiaronkon esenupantoꞌ wenai epuꞌtîya eꞌpainon Paapa nîmenkaꞌpî pe Jesus wanîꞌpî.
Eraꞌmakî, îꞌ wani awanî yenen Paapa Maimuya taa pî man Jesus wanî Paapa munmu pe?
“Îꞌ wani awanî yeꞌnen Paapa munmu pe Jesus wanî taasaꞌ Paapa Maimuya?” (jw.org eseurîmantoꞌ pî)
Eraꞌmakî Paapa Maimu wenai îꞌ wani awanî yeꞌnen Paapa, Jesus moropai morî yekaton wanî pepîn tiwinan pe.
“Paapa wanî naka mîîkîrî Jesus?” (A Sentinela, 1.º abril kapoi pî, 2009 konoꞌ pî)
Eraꞌmakî oꞌnon yeꞌka pe wirîꞌ komantoꞌ etinyakaꞌmaꞌpî Paapa Maimu teesenupasaꞌ tîpo Jesus pî.
“Wîriꞌ Judia eseurîma innape tîweꞌtoꞌ pî” (Tîwarî Eꞌkî!, maio kapoi pî, 2013 konoꞌ pî)
a Nota: Esenupantoꞌkon 26 moropai 27 ya, eraꞌma uurînîkonya îꞌ wani awanî yeꞌnen pîikaꞌtîntoꞌ yapisî eꞌpai pemonkonyamîꞌ wanîꞌpî moropai oꞌnon yeꞌka pe Jesusya uurînîkon pîikaꞌtîꞌpî.
b Nota: Îꞌ taasaꞌ Paapa Maimuya manni Messias pî, îꞌ pensa mîîkîrî esenpo yai tarî pata pona, eraꞌmakî Morî pe Panpîꞌ Epuꞌkî 2.
