ESENUPATOꞌ 20

Oꞌnon yeꞌka pe Paapa pemonkonoyamîꞌ wanî?

YE'NUNPA

Yairî eꞌtoꞌ esaꞌ pe Jeová man, seꞌ tapairî pe pra. (1 Coríntios 14:33, 40) Mîrîrî yeꞌnen, ipemonkonoyamîꞌ eꞌpai man seꞌ panpe. Tîîse oꞌnon yeꞌka pe Paapa pemonkonoyamîꞌ wanî? Moropai îꞌ koneka anepuꞌpai toꞌ wanî tiwin pî siꞌma?

1. Anîꞌ wanî Paapa pemonkonoyamîꞌ puꞌpai pe?

“Tîpemonkonoyamîꞌ puꞌpai pe Cristo wanî.” (Efésios 5:23) Kaꞌ poi, Jesusya Jeová pemonkonoyamîꞌ eraꞌma pata poro. Jesusya “tîkaraiwarî maimu yawîrî tîweꞌsen yairon moropai epuꞌnen” menkaꞌpî — inkamoro wanî mararonkon warayoꞌkon esenupanenan, toꞌ eseꞌ wanî nîrî Jeová Pemonkonoyamîꞌ Eraꞌmanenan Pata poro (Corpo Governante/Governing Body). (Eraꞌmakî Mateus 24:45-47.) Pena, Jerusalém po, Jesus naipontîꞌsanya, soosi esanonya Paapa pemonkonoyamîꞌ panamapîtîꞌpî toꞌ mai wenai. (Atos 15:2) Sîrîrîpe, Jeová Pemonkonoyamîꞌ Eraꞌmanenan Pata poro, inkamoroya panamatoꞌ tîrî Paapa pemonkonoyamîꞌ pia. Toꞌ wanî pepîn Paapa pemonkonoyamîꞌ puꞌpai pe. Paapa Maimu imenukasaꞌ pî toꞌ esenupa, ituꞌseꞌ Paapa eꞌtoꞌ konekatoꞌpe, moropai Jesus mai yawîrî toꞌ wanî.

2. Anîꞌkan inkamoro soosi esanon tîweꞌsen, moropai îꞌ kupî toꞌya?

Soosi esanon (Anciãos/Elders) wanî Jesus mai yawîrî, Paapa pemonkonoyamîꞌ yenupa toꞌya. Oꞌnon yeꞌka pe mîrîrî kupî toꞌya? Paapa Maimu imenukasaꞌ wenai. Paapa poitîrîtonon anpîikaꞌtîpai toꞌ wanî, toꞌ yausinpapai toꞌ wanî. Mîrîrî koneka toꞌya teꞌmai pra, yeꞌma toꞌya pepîn. Paapa Maimuya taa pî man oꞌnon yeꞌka pe toꞌ esenyakaꞌma, “kîsenyakaꞌmatî tîniru yuꞌse awanîkon pîꞌ pra tîîse toꞌ pîꞌ esenyakaꞌmatî kureꞌne toꞌ anpîikaꞌtîpai awanîkon yeꞌnen”. (1 Pedro 5:1, 2) Tiaronkon man nîrî toꞌ pîikaꞌtîtoꞌpe, inkamoro wanî soosi esaꞌ pe tîweꞌsen pîikaꞌtînen pe, îꞌ taasaꞌ Paapa Maimuya soosi esaꞌ pe tîweꞌsen yeseru pî, mîrîrî yawîrî konekasaꞌ toꞌya ya, inkamoro ena eꞌpainon soosi esaꞌ pe.

Jeová Pemonkonoyamîꞌ Eraꞌmanenan Pata poro, inkamoroya tiaronkon soosi esanon menka tiaron esenyakamantoꞌ kuꞌtoꞌpe, toꞌ wanî emurukuntîtoꞌ pataꞌseꞌ eraꞌmanen pe (Superintendentes de circuito/ Sircuit overseers). Inkamoro wîtî emurukuntîtoꞌ pataꞌseꞌ kaisarî, Paapa poitîrîtonon yausinpai. Inkamoroya, Paapa Maimu imenukasaꞌ wenai eraꞌma, anîꞌ wanî eꞌpainon soosi esaꞌ pe tîweꞌsen pe moropai soosi esaꞌ pe tîweꞌsen pîikaꞌtînen pe. — 1 Timóteo 3:1-10, 12; Tito 1:5-9.

3. Îꞌ koneka eꞌpai Jeová Maimu Ekaremeꞌnenanya tiwin pî siꞌma?

Paapa poitîrîtononya ‘Jeová eꞌse yapurî’ eꞌpainon. Oꞌnon yeꞌka pe? Ekaranmaposakon yuuku tamîꞌnawîronkonya eꞌpainon emurukuntîtoꞌ ta moropai Paapa Maimu ekaremekî toꞌya. — Salmo 148:12, 13 ya taa pî man: “Maasaronkon, aꞌyekeꞌtonon moropai noꞌsantonon tîmurukun pe siꞌma, Jeová eseꞌ yapurî toꞌya. Maasa pra iteꞌseꞌ wanî ipîkku pe. Kureꞌnan mîîkîrî Paapa, kaꞌ Esaꞌ, pata Esaꞌ.”

ESENUPAKÎ INÎꞌ PANPÎꞌ

Eraꞌmakî oꞌnon yeꞌka pe Jesus yeseru puꞌpai pe wanî moropai oꞌnon yeꞌka pe soosi esanonya yuwa iteseru ipatakatoꞌpe. Eraꞌmakî nîrî oꞌnon yeꞌka pe Jesus mai yawîrî uurînîkon wanî moropai soosi esanon pîikaꞌtî.

4. Morî puꞌpai pe Jesus wanî

Tîsaꞌnamatoꞌ wenai Jesusya taꞌpî uurînîkon pî. Eraꞌmatî Mateus 11:28-30. Tarîpai seeni itoꞌkoꞌ manni pî eseurîmatî:

Jesus wanî puꞌpai pe. Oꞌnon yeꞌka pe iteseru wanî? Oꞌnon yeꞌka pe uurînîkon eꞌtoꞌpe yuꞌse Jesus wanî?

Oꞌnon yeꞌka pe soosi esanonya Jesus yeseru ipataka? PANTON eraꞌmatî.

PANTON ERAꞌMATOꞌPE: Soosi esanonya yonpakon pîikaꞌtî Nepal po non eserentîkîꞌmaꞌpî tîpo (4:56)

Arone Paapa Maimuya taa pî man, oꞌnon yeꞌka pe soosi esanon esenyakaꞌma eꞌpai wanî.

Eraꞌmatî 1 Pedro 5:1-3 moropai Atos 20:28. Mîrîrî tîpo seeni itoꞌkoꞌ manni pî eseurîmatî:

Oꞌnon yeꞌka pe amîrî wanî, soosi esanon wanî morî pe eraꞌmaya yai Jesus panpe?
Oꞌnon yeꞌka tiaronkon yeserukon wenai, soosi esanonya Jesus yeseru ipataka eꞌpainon?

5. Soosi esanonya yenupa morî iteserukon wenai

Soosi esanon esenyakaꞌma, oꞌnon yeꞌka pe seeni esenyakamantoꞌ eraꞌma toꞌya, yuꞌse Jesus wanî? PANTON eraꞌmatî.

PANTON ERAꞌMATOꞌPE: Soosi esanon ayeꞌmaiꞌnorîkon pe tîwesanon (7:39)

Jesus eseurîmaꞌpî, oꞌnon yeꞌka pe soosi esanon esenyakaꞌma eꞌpai man. Eraꞌmatî Mateus 23:8-12. Tarîpai seeni itoꞌkoꞌ manni pî eseurîmatî:

Oꞌnon yeꞌka pe Paapa Maimuya taꞌpî, soosi esanon yeseru eꞌpai wanî? Îꞌ taaya, tiaronkon soosikon eraꞌmanenanya koneka mîrîrî panpe?

Jeová yonpa pe eꞌpai soosi esanon wanî moropai itewîꞌ taawonkon pîikaꞌtî yuꞌse toꞌ wanî nîrî, mîrîrî panpe toꞌ eꞌtoꞌpe
Soosi esanonya emurukuntîtoꞌ taawonkon pîikaꞌtî
Soosi esanonya Paapa Maimu ekaremekî tîkoꞌnarî
Soosi esanonya yenupa Paapa Maimu winîpai. Emurukuntîtoꞌ pataꞌseꞌ rona toꞌya moropai tiaronkon esenyakamantoꞌkon koneka toꞌya.

6. Soosi esanon pîikaꞌtî uurînîkonya eꞌpainon

Paapa Maimuya taa pî man, îꞌ wani awanî yeꞌnen soosi esanon pîikaꞌtî yuꞌse eꞌpai uurînîkon wanî. Eraꞌmatî Hebreus 13:17. Tarîpai seeni itoꞌkoꞌ manni pî eseurîmatî:

Îꞌ wani awanî yeꞌnen Paapa Maimuya taꞌpî, soosi esanon maimu yawîrî eꞌpai uurînîkon wanî? Îꞌ taaya mîrîrî pî?

Eraꞌmatî Lucas 16:10. Tarîpai seeni itoꞌkoꞌ manni pî eseurîmatî:

Îꞌ wani awanî yeꞌnen soosi esanon maimu yawîrî eꞌpai uurînîkon wanî?

TIARONKONYA TAA: “Soosi ta atîtîi pra Paapa yapurîtoꞌpe. Ayewîꞌ siꞌma Paapa yapurîkî.”

Îꞌ wani awanî yeꞌnen morî pe wanî uurînîkon pia, Paapa yapurî tiaronkon Paapa poitîrîtonon yarakkîrî?

Îꞌ PÎ ESENUPA PÎ NAN?

Paapaya tînmu yarimaꞌpî tîpemonkonoyamîꞌ puꞌpai pe aweꞌtoꞌpe. Soosi esanon wanî Jeová maimu yawîrî. Taatausinpai uurînîkon wanî soosi esanon pîikaꞌtîtoꞌpe, maasa pra morî inkamoro moropai uurînîkon yenupa toꞌya iteserukon wenai.