ESENUPATOꞌ 22
Oꞌnon yeꞌka pe morî yekare ekaremekî eꞌpainon tiaronkon pî?
Mararî pra amîrî esenupaꞌpî sîrîrî tîpo see Paapa Maimu pî. Amîrî taise esenumenka: ‘Mîrîrî epuꞌtî tamîꞌnawîronkonya eꞌpai man!’ Inna, mîrîrî epuꞌtî tamîꞌnawîronkonya eꞌpai man! Tîîse, tiaron pensa aranne pe amîrî wanî taise, îꞌ pî amîrî esenupaꞌpî manni, ekaremekîpa tiaronkon pî. Sîrîrî esenupantoꞌ wenai, eraꞌmapaiꞌnîkon oꞌnon yeꞌka pe aranne pe eꞌnîtoꞌ yentai awanî eꞌpainon moropai taatausinpai amîrî eꞌtoꞌpe, morî itekare ekaremekîya yeꞌnen tiaronkon pî.
1. Îꞌ pî amîrî esenupaꞌpî oꞌnon yeꞌka pe mîrîrî ekaremekîya eꞌpainon tiaronkon pî?
Jesus nenupaꞌsanya taꞌpî: “Anna eseurîma tîrumakai pra maasa pra anna neraꞌmaꞌpî, anna netaꞌpî mîrîrî ekaremekî annaya” (Atos 4:20) Yairon Paapa Maimu saꞌnama tîuyaꞌnîkon yeꞌnen, tamîꞌnawîronkon pî anekaremeꞌpai toꞌ wanîꞌpî epuꞌtoꞌpe toꞌya. Amîrî kanan toꞌ warantî awanî? Moriya, morî yeseru wenai ayewîꞌ taawonkon yarakkîrî moropai ayonpayamîꞌ yarakkîrî eseurîmakî îꞌ pî eesenupaꞌpî manni pî. — Eraꞌmakî Colossenses 4:6.
Uurînîkon esenumenka
-
Apemonkonoyamîꞌ eseurîma ya, mîrîrî panpe eseurîma eꞌpainon: “Seeni weiyu yai, morî pî uurî esenupaꞌpî.”
-
Imenukasaꞌ Paapa Maimu pî ekaremekî ayonpa pî atausinpatoꞌpe, neꞌneꞌ pe tîwanî yeꞌnen moropai teesewankonoꞌma yeꞌnen.
-
Mannankan esenyakaꞌmaꞌsan ayarakkîrî ekaranmapo ya oꞌnon yeꞌka pe awanî pî, ekaremekî toꞌ pî îꞌ pî esenupaꞌpî Paapa Maimu esenupantoꞌ pî moropai îꞌ pî esenupaꞌpî manni pî emurukuntîtoꞌ ya.
-
Site jw.org ekaremekî ayonpakon pî.
-
Paapa Maimu pî esenupa ya, tiaronkon yannokî Paapa Maimu pî esenupatoꞌpe amîrî yarakkîrî moropai toꞌ yenupakî esenupantoꞌ esatîtoꞌpe site jw.org wenai.
2. Îꞌ wani awanî yeꞌnen morî pe wanî Paapa Maimu ekaremekîya Paapa poitîrîtonon yarakkîrî?
Jesus nenupaꞌsanya morî Paapa yekare ekaremepîtîꞌpî tiaronkon tonpakon pî. Tîîse, inîꞌ panpîꞌ ikupîꞌpî toꞌya. Seꞌ tapairî pra Paapa Maimu ekaremekîpîtîꞌpî toꞌya. Jesusya toꞌ yaipontîꞌpî “asakîꞌneꞌne . . . patakon kaisarî.” (Lucas 10:1) Mîrîrî wenai, inîꞌ panpîꞌ morî Paapa yekare etaꞌpî pemonkonyamîꞌya. Moropai, Paapa Maimu ekaremekîꞌpî toꞌya tiaronkon pokonpe, mîrîrîya toꞌ kupîꞌpî taatausinpai. (Lucas 10:17) Amîrî naka esenyakaꞌma eꞌpainon, Paapa poitîrîtonon yarakkîrî?
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe aranne pe eꞌnîtoꞌ yentai awanî eꞌpainon, Paapa Maimu ekaremekî yai moropai taatausinpai awanîpa, mîrîrî kuꞌsaꞌya ya yeꞌnen.
3. Aapia Jeová wanî
Tiaronkon wanî Paapa Maimu anekaremeꞌpai, tîîse mararî pra toꞌ esenumenka, îꞌ taa tiaronkonya manni pî.
-
Aranne pe awanî Paapa Maimu ekaremekîya tiaronkon pî? Îꞌ wani awanî yeꞌnen?
PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Oꞌnon yeꞌka pe maasaronkon Jeová Maimu Ekaremeꞌnenan enaꞌpî aranne pe pra?
Eraꞌmatî Hebreus 13:6. Mîrîrî tîpo seeni itoꞌkoꞌ manni pî eseurîmatî:
-
Oꞌnon yeꞌka pe epîremantoꞌya apîikaꞌtî eꞌpainon, aranne pe awanî ya, Paapa Maimu ekaremekîya ya?
Epuꞌtî pî nan?
Mararî pra Jeová Maimu Ekaremeꞌnenanya taapîtîꞌpî: “Paapa Maimu ekaremekîuya eserîke pra wai!” Sergey pantoni pî eraꞌmakî, Rússia pon mîîkîrî. Imakuiꞌpî pe eesenumenkapîtîꞌpî tîpîꞌrî moropai saꞌme wanîꞌpî iipia tiaronkon yarakkîrî eseurîma ya, mîrîrî wanîꞌpî saꞌme iipia. Tîîse, Paapa Maimu pî tesenupa iippiatîꞌpîiya. Mîîkîrîya taꞌpî: “Aranne pe uurî wanîꞌpî, tîîse tiaronkon yarakkîrî uurî eseurîmaꞌpîtîꞌpî, îꞌ pî uurî esenupaꞌpî manni pî. Mîrîrîya uurî kupîꞌpî taatausinpai moropai mîrîrî wenai, îꞌ pî uurî esenupaꞌpî manni pî uyewan ke, innataꞌpîuya.”
4. Morî yeseru wenai eseurîmakî
Morî Paapa yekare pî eseurîma ya tiaronkon pî, esenumenkakî îꞌ pî eseurîma moropai oꞌnon yeꞌka pe eseurîma. Eraꞌmatî 2 Timóteo 2:24 moropai 1 Pedro 3:15. Mîrîrî tîpo seeni itoꞌkoꞌ manni pî eseurîmatî:
-
Paapa Maimu pî eseurîma ya tiaronkon pî, oꞌnon yeꞌka pe îꞌ taasaꞌ imenukasaꞌya yawîrî wanî eꞌpainon?
-
Tiaron pensa îꞌ taaya manni pî, inna taiya pra ayonpakon wanî. Mîrîrî eꞌkupî yai, îꞌ kupîya eꞌpainon? Îꞌ kupî eserîke pra wanî?
-
Îꞌ wanî morî pe panpîꞌ: eseurîman morî pe toꞌ pî karî, toꞌ pî ekoꞌrema karî, ituꞌse aweꞌtoꞌ kuꞌtoꞌpe toꞌya?
5. Tiaronkon pî eseurîma morî Paapa yekare pî, mîrîrîya uurînîkon kupî taatausinpai
Jeováya Jesus yaipontîꞌpî morî itekare ekaremetoꞌpe. Oꞌnon yeꞌka pe mîrîrî esenyakaꞌmantoꞌ eraꞌmaꞌpî Jesusya? Eraꞌmatî João 4:34. Mîrîrî tîpo seeni itoꞌkoꞌ manni pî eseurîmatî:
-
Enen uurînîkon wanî uyekkarikon wanî yeꞌnen, mîrîrîya uurînîkon kupî nîrî taatausinpai, uurînîkon wakîri pe. Îꞌ wanî awanî yeꞌnen Jesusya taꞌpî, ituꞌseꞌ Paapa eꞌtoꞌ yawîrî (morî itekare ekaremetoꞌpe), mîrîrî wanî yekkarikon panpe?
-
Îꞌ wani awanî yeꞌnen îꞌ pensa Paapa Maimu ekaremekî uurînîkonya, mîrîrîya uurînîkon kupî taatausinpai?
Panamatoꞌkon
-
Emurukuntîtoꞌ ta, eraꞌmakî morî pe oꞌnon yeꞌka pe tiaronkon pî Paapa Maimu ekaremekîpa.
-
Ayeseꞌ tîîkî emurukuntîtoꞌ ta esenupapa. Mîrîrîya apîikaꞌtî eꞌpainon, îꞌ pî esenupaꞌpî manni pî eseurîmapa tiaronkon pî aranne pe pra.
-
Seeni “Tiaronkonya Taa” moropai “Anîꞌya Ekaranmapo ya” iteseꞌ yenkaꞌmakî, esenupapa oꞌnon yeꞌka pe ekaranmaposakon yuukuya moropai îꞌ taaya eꞌpainon, îꞌ pensa îꞌ taasaꞌya yapisî toꞌya pra wanî ya.
ANÎꞌYA EKARANMAPO YA: “Morî pe nan, oꞌnon yeꞌka pe awanî?”
-
Oꞌnon yeꞌka pe eseurîma eꞌpainon îꞌ pî esenupaꞌpî manni pî Paapa Maimu esenupantoꞌ pî?
Îꞌ PÎ ESENUPA PÎ NAN?
Tiaronkon yarakkîrî eseurîma morî Paapa yekare pî, tausinpantoꞌ ton tîrîiya moropai mîrîrî wanî saꞌme pra.
Enpanatapaiꞌnîkon
-
Îꞌ wani awanî yeꞌnen morî Paapa yekare pî uurînîkon eseurîma eꞌpai wanî?
-
Oꞌnon yeꞌka pe mîrîrî kupîya eꞌpainon morî ayeseru pî?
-
Oꞌnon yeꞌka pe aranne pe eꞌtoꞌ yentai awanî eꞌpainon, Paapa Maimu ekaremekîpa?
INÎꞌ PANPÎꞌ ESENUPAPAI NAN?
Eraꞌmakî oꞌnon yeꞌka pe morî asakîrîron iteseru ekaremekîya eꞌpainon simonkokon kaareta pî site jw.org pî (cartão de visita/card presentation).
Seꞌ panpe eseurîman: simonkokon kaaretakon site jw.org ya (1:43)
Eraꞌmakî asakîrîrî iteseruya, apîikaꞌtî eꞌpainon morî itekare pî eseurîmapa.
Seeni panton Paapa Maimu yapainon pî eraꞌmakî, mîrîrîya uurînîkon pîikaꞌtî eꞌpainon aranne pe pra eꞌnîtoꞌpe, Paapa Maimu Ekaremeꞌnen pe, maasaron pe siꞌma.
Esenupakî oꞌnon yeꞌka pe eseurîma Paapa Maimu pî, mannankan apemonkonoyamîꞌ pî Jeová epuꞌnenan rîn pî.
