ESENUPATOꞌ 23
Esenpatakonatoꞌ — Morî pe puꞌkuru mîrîrî wanî!
Jesusya taꞌpî pemonkonyamîꞌ esenpatakonatoꞌpe. (Eraꞌmakî Mateus 28:19, 20.) Tîîse îꞌ see mîrîrî esenpatakonantoꞌ? Îꞌ kupî pemonkonya eꞌpai wanî teesenpatakonatoꞌpe?
1. Îꞌ see mîrîrî esenpatakonantoꞌ?
“Esenpatakonantoꞌ” mîrîrî, grego maimu pe wenai iipîꞌpî, “eseuronka tuna ka” taatoꞌ mîrîrî. Mîrîrî panpe aweꞌkupîꞌpî Jesus yarakkîrî, esenpatakona yai iren Jordão ka; Jesus esaꞌ (corpo/body) tamîꞌnawîrî eseuronkaꞌpî tuna ka. Mîrîrî epuꞌtî pî uurînîkon man, maasa pra Paapa Maimuya taa pî man Jesus epaꞌkaꞌpî tuna kapai. (Marcos 1:9, 10) Jesus warantî, yairon Jesus pemonkonon esenpatakona ya, toꞌ esaꞌ tamîꞌnawîrî eseuronka tuna ka.
2. Îꞌ ekaremekî esenpatakonatoꞌya mîrîrî?
Esenpatakonatoꞌ wenai, koꞌmantoꞌ tîrî pemonkonya Jeová pia. Oꞌnon yeꞌka pe mîrîrî eꞌkupî? Esenpatakona rawîrî, Jeová pî pemonkon epîrema, “ipatîkarî apoitîrî pe eꞌpai wai” taꞌpîiya, “dedicação” taa mîrîrî (dedication). “Jeová neken yapurîuya” taꞌpîiya moropai ituꞌseꞌ Jeová eꞌtoꞌ wanî iipia tamîꞌnawîronkon yentai, mîrîrî yeꞌnen imaimu yawîrî eꞌpai wanî ipatîkarî. Seeni pemonkonya tamîꞌnawîrî iteseru rumaka, ituꞌseꞌ Jesus eꞌtoꞌ kuꞌpîiya. (Mateus 16:24) Mîrîrî epîrematoꞌ wenai moropai esenpatakonatoꞌ wenai, pemonkon wanî eꞌpainon, Jeová yonpa pe moropai Jeová yapurînenan yonpa pe.
3. Teesenpatakonapa, îꞌ koneka eꞌpai pemonkon wanî?
Esenpatakona rawîrî, esenupa eꞌpai man Jeová pî moropai Jeová innape ikupîiya. (Eraꞌmakî Hebreus 11:6.) Inîꞌ panpîꞌ esenupasaꞌ ya moropai innape kusaꞌ ya, inîꞌ panpîꞌ Jeová saꞌnamaya. Mîrîrî wenai, ipî eseurîma eꞌpai awanî moropai imaimu yawîrî eꞌnîtoꞌpe. (2 Timóteo 4:2; 1 João 5:3) Îꞌ pensa pemonkonya ‘epuꞌtî, îꞌ kaiꞌma Uyepotorîkon eꞌtoꞌ ituꞌse yawîrî aakoꞌmamîkon, moropai tîwîrî ikupî pîꞌ aakoꞌmamîkonpa’, mîîkîrîya imenka eꞌpainon tîkoꞌmantoꞌ tîrîiya Jeová pia moropai esenpatakona. (Colossenses 1:9, 10) a — Imenukasaꞌ itoꞌkoꞌ eraꞌmakî.
ESENUPAKÎ INÎꞌ PANPÎꞌ
Eraꞌmakî îꞌ pî uurînîkon esenupa eꞌpainon Jesus esenpatakonatoꞌ pî. Eraꞌmakî nîrî îꞌ kupî pemonkonya eꞌpainon esenpatakona irawîrî.
4. Mararî pra uurînîkon esenupa Jesus esenpatakonatoꞌ wenai
Eraꞌmatî Mateus 3:13-17 ya, inîꞌ panpîꞌ epuꞌtoꞌpe Jesus esenpatakonatoꞌ pî. Tarîpai seeni itoꞌkoꞌ manni pî eseurîmatî:
-
More pe naka Jesus wanîꞌpî teesenpatakonaꞌpî yai?
-
Oꞌnon yeꞌka pe mîîkîrî esenpatakonaꞌpî? Mararî tuna ke neken ipuꞌpai pona?
Esenpatakonasaꞌ tîpo, Jesusya esenyakaꞌmantoꞌ iippiaꞌtîꞌpî mîrîrî esenyakaꞌmantoꞌ Paapa nîtîrîꞌpî. Eraꞌmatî Lucas 3:21-23 moropai João 6:38. Tarîpai seeni itoꞌkoꞌ manni pî eseurîmatî:
-
Esenpatakonasaꞌ tîpo, îꞌ esenyakaꞌmantoꞌ wanîꞌpî morî pe puꞌkuru Jesus pia, tiaronkon esenyakaꞌmantoꞌ yentai?
5. Amîrî nîrî esenpatakona eꞌpainon
Uurînîkon koꞌmantoꞌ tîrî Jeová pia moropai esenpatakona, mîrîrî pî uurînîkon esenumenka tuꞌke iteꞌka. Tîîse, inîꞌ panpîꞌ esenupasaꞌ ya Jeová pî moropai imaimu yawîrî eꞌnî, inîꞌ panpîꞌ esenpatakona yuꞌse awanî. Mîrîrî kupîꞌpî tiaronkonya, toꞌ pantoni eraꞌmakî. PANTON eraꞌmatî.
Eraꞌmatî João 17:3 moropai Tiago 1:5. Tarîpai seeni itoꞌkoꞌ manni pî eseurîmatî:
-
Îꞌ ya pemonkon pîikaꞌtî eꞌpainon imenkatoꞌpe esenpatakonatoꞌpe?
-
Îꞌ pensa taasaꞌ uurînîkonya Paapa pî epîrematoꞌ wenai, ipoitîrî pe eꞌpai uurînîkon wanî ipatîkarî, mîrîrî wanî dedicação pe (dedication)
-
Esenpatakonatoꞌ yai, tiaronkonya eraꞌma Paapa poitîrî pe eꞌpai uurînîkon wanî ipatîkarî
6. Paapa pemonkonoyamîꞌ man pata poro, uurînîkon esenpatakonasaꞌ tîpo, Paapa pemonkono pe uurînîkon ena, toꞌ pokonpe koꞌmannîtoꞌpe tîmurukun pe.
Paapa pemonkonoyamîꞌ man pata poro, uurînîkon esenpatakonasaꞌ tîpo, Paapa pemonkono pe uurînîkon ena, toꞌ pokonpe koꞌmannîtoꞌpe tîmurukun pe. Îꞌ wani pra rî man oꞌnon pata aakoꞌmamî ya, Jeová Maimu Ekaremeꞌnenan esenupantoꞌ wanî seꞌ kaisarî moropai Jeová mai yawîrî toꞌ wanî tîmurukun pe. Eraꞌmatî Tiago 2:23 moropai 1 Pedro 2:17. Tarîpai seeni itoꞌkoꞌ manni pî eseurîmatî:
-
Esenpatakona tîpo, oꞌnon yeꞌka pe pemonkon wanî Jeová yarakkîrî moropai Jeová poitîrîtonon yarakkîrî?
TIARONKONYA TAA: “Maasa eꞌkonekasaꞌ pra wai esenpatakonatoꞌpe.”
-
Mîrîrî panpe esenumenkasaꞌ ya, îꞌ taaya, mîrîrî kuꞌtoꞌpe yuwasaꞌ ya, morî pe wanî aapia?
Îꞌ PÎ ESENUPA PÎ NAN?
Jesusya tîpemonkonoyamîꞌ yenupaꞌpî, esenpatakonatoꞌpe. Mîrîrî eꞌkonekatoꞌpe, innape Paapa kupî eꞌpai pemonkon wanî, îꞌ taa Jeováya manni yawîrî eꞌpai awanî moropai tîkoꞌmantoꞌ tîrî Paapa pia epîrematoꞌ wenai.
Enpanatapaiꞌnîkon
-
Îꞌ see mîrîrî esenpatakonantoꞌ, îꞌ wani awanî yeꞌnen morî pe puꞌkuru mîrîrî wanî?
-
Îꞌ see mîrîrî dedicação, îꞌ wani awanî yeꞌnen mîrîrî kupî?
-
Îꞌ kon kupî eꞌpai pemonkon wanî tîkoꞌmantoꞌ tîrî Jeová pia rawîrî moropai teesenpatakona rawîrî?
INÎꞌ PANPÎꞌ ESENUPAPAI NAN?
Esenupakî îꞌ see mîrîrî esenpatakonatoꞌ moropai îꞌ yenupa tiaronkonya yairî pra esenpatakonatoꞌ pî.
Eraꞌmakî îꞌ kupî eꞌpai pemonkon wanî esenpatakonapa.
Warayoꞌ pantoni eraꞌmakî, mîîkîrî esenpatakonaꞌpî yairî yeseru wenai.
“Yairon eporîtoꞌpeuya ituꞌse toꞌ wanîꞌpî” (A Sentinela, 1.º fevereiro kapoi pî, 2013 konoꞌ pî)
Esenupakî îꞌ wanî awanî yeꞌnen morî pe puꞌkuru wanî amîrî esenpatakonatoꞌpe moropai îꞌ kupî eꞌpai awanî esenpatakona rawîrî.
“Esenpatakona eꞌpai uurî wanî?” (Yuꞌtoꞌkon Man Maasaronkon Tonpe, Kaareta 2, cap. 37)
a Nota: Tiaron soosi ta pemonkon esenpatakonasaꞌ ya, inîꞌrî esenpatakona eꞌpai wanî? Inna. Îꞌ wani awanî yeꞌnen? Maasa pra yairî pra mîrîrî soosiya Paapa Maimu yenupaꞌpî yeꞌnen. — Eraꞌmakî Atos 19:1-5 moropai esenupantoꞌ 13.
