ESENUPATOꞌ 27
Oꞌnon yeꞌka pe Jesus saꞌmantatoꞌya uurînîkon pîikaꞌtî eꞌpainon?
Imakuiꞌpî pe uurînîkon wanî Adão moropai Eva winîpai moropai uurînîkon eꞌtarumaꞌtî, uurînîkon saꞌmanta. Maasa pra Jeová maimu yawîrî pra toꞌ wanîꞌpî yeꞌnen. a (Imenukasaꞌ itoꞌkoꞌ eraꞌmakî.) Tîîse morî Paapa yekare man uurînîkon tonpe. Jeováya, tînmu menkaꞌpî, yarimatoꞌpe tarî pata pona aasamantoꞌpe, uurînîkon mokai imakuiꞌpî moropai saꞌmantantoꞌ yapai. Paapa Maimuya taa pî man, tîsaꞌmantatoꞌ ke Jesusya pemonkonyamîꞌ nîkupîꞌpî imakuiꞌpî yeꞌmaꞌpî. Mîrîrî kupîꞌpîiya imakuiꞌpî ton pra wanîꞌpî yeꞌnen. (Eraꞌmakî Mateus 20:28.) Ipatîkarî tîkoꞌmantoꞌ tarî pata pona menkasaꞌ Jesusya pra man, tîîse mîrîrî rumakaꞌpîiya uurînîkon epîikaꞌtîtoꞌpe. Adão moropai Evaya morî yenumîꞌpî, mîrîrî yapisîꞌpî Jesusya uurînîkon tonpe. Jesus saꞌmantatoꞌya uurînîkon pîikatî epuꞌtoꞌpe mîkîrî moropai Jeováya uurînîkon saꞌnama kureꞌne. Seeni esenupantoꞌya apîikaꞌtî amîrîya taatoꞌpe “morî pe man!” Jesus pî, maasa pra mîkîrî saꞌmantaꞌpî uurînîkon tonpe.
1. Oꞌnon yeꞌka pe Jesus saꞌmantatoꞌya uurînîkon pîikaꞌtî sîrîrîpe?
Imakuiꞌpî pe uurînîkon wanî, mîrîrî yeꞌnen mararî pra imakuiꞌpî kupî uurînîkonya, mîrîrîya Jeová kupî teesewankonoꞌmai. Tîîse, îꞌ kupîꞌpî Jesusya manni uurînîkon tonpe, imakuiꞌpî uurînîkon nîkupîꞌpî, kupî Paapaya tîwanmîra. Mîrîrî yapiꞌtoꞌpe uurînîkonya Paapa wenai, imakuiꞌpî uurînîkon nîkupîꞌpî pî enpanata eꞌpai wanî teesewankonoꞌmai, tîwanmîra eꞌnîtoꞌ esatî eꞌpai wanî Jeová pî Jesus eseꞌ wenai moropai inîꞌ mîrîrî kupî namai. Mîrîrî kupî uurînîkonya ya, Jeová yonpa pe uurînîkon wanî eꞌpainon. (1 João 2:1) Paapa Maimuya taasaꞌ man: “Maasa pra mîrîrî warantî Cristo eꞌtarumaꞌtîꞌpî tîîsaꞌmanta yai amîrîꞌnîkon ton pe. Aasaꞌmantaꞌpî tiwin iteꞌka tamîꞌnawîronkon ton pe imakuiꞌpî toꞌ nîkupîꞌpî wenai.” — 1 Pedro 3:18.
2. Oꞌnon yeꞌka pe Jesus saꞌmantatoꞌya uurînîkon pîikaꞌtî amenrî?
Jeováya ‘tiwinan tînmu yarimaꞌpî sîrîrî non pona aasaꞌmantatoꞌpe, ipatîkarî uurîꞌnîkon koꞌmantoꞌpe’. (1 João 4:9) Jesus saꞌmantatoꞌ wenai, îꞌ imakuiꞌpî iipîꞌpî Adão wenai tîꞌka Jeováya. Mîrîrî yeꞌnen, innape Jesus kupî uurînîkonya ya, uurînîkon koꞌmamî eꞌpainon ipatîkarî, tarî pata po morî pataꞌseꞌ ya! — Isaías 65:21-23.
ESENUPAKÎ INÎꞌ PANPÎꞌ
Epuꞌkî îꞌ tonpe Jesus saꞌmantaꞌpî uurînîkon tonpe, moropai oꞌnon yeꞌka pe mîrîrîya apîikaꞌtî eꞌpainon.
3. Jesus saꞌnamatoꞌya uurînîkon pîkaꞌtî
PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Paapa maimu yawîrî pra Adão wanî yai, îꞌ morî rumakaꞌpîiya?
Eraꞌmatî Romanos 5:12. Tarîpai seeni itoꞌkoꞌ manni pî eseurîmatî:
-
Îꞌ eꞌkupîꞌpî uurînîkon yarakkîrî, imakuiꞌpî Adão nîkonekaꞌpî manni wenai?
1 João 4:9 ya taa pî man: Paapaya tiwinan tînmu yarimaꞌpî sîrîrî non pona aasaꞌmantatoꞌpe, ipatîkarî uurîꞌnîkon koꞌmantoꞌpe [ipoitîrî pe]. Mîrîrî yeꞌnen taꞌnîkon: —Innape Paapaya usaꞌnamakon —taꞌnîkon. (TNM) Tarîpai seeni itoꞌkoꞌ manni pî eseurîmatî:
-
Îꞌ wani awanî yeꞌnen Jeováya tînmu yarimaꞌpî tarî pata pona?
-
Imakuiꞌpî ton pra Adão wanîꞌpî, tîîse Paapa maimu yawîrî pra aweꞌsaꞌ yeꞌnen, tamîꞌnawîronkon enaꞌpî imakuiꞌpî pe moropai uurînîkon saꞌmanta
-
Imakuiꞌpî ton pra Jesus wanîꞌpî, moropai Paapa maimu yawîrî aweꞌsa yeꞌnen, tamîꞌnawîronkon koꞌmamî eꞌpainon ipatîkarî, imakuiꞌpî ton pra
4. Jesus saꞌmantatoꞌya tamîꞌnawîronkon pemonkonyamîꞌ pîikaꞌtî eꞌpainon
PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Oꞌnon yeꞌka pe tiwinan warayoꞌ saꞌmantatoꞌ wenai tamîꞌnawîronkonya pîikaꞌtîntoꞌ yapisîꞌ eꞌpainon?
Eraꞌmatî 1 Timóteo 2:5, 6. Tarîpai seeni itoꞌkoꞌ manni pî eseurîmatî:
-
Imakuiꞌpî ton pra Adão wanîꞌpî, tîîse imakuiꞌpî mîrîrî nîkupîꞌpî, mîrîrî wenai tamîꞌnawîronkon enaꞌpî imakuiꞌpî pe moropai toꞌ saꞌmanta. Imakuiꞌpî ton pra Jesus wanîꞌpî nîrî. Oꞌnon yeꞌka pe tîsaꞌmantatoꞌ wenai, pîikaꞌtîntoꞌ ton tîrîꞌpîiya tamîꞌnawîronkon tonpe?
5. Jesus saꞌmantatoꞌ wanî, morî Jeová nîtîrîꞌpî amîrî tonpe
Jesus saꞌmantatoꞌ wanî morî pe puꞌkuru, Jeová yonpa tonpe. Eraꞌmatî Gálatas 2:20. Tarîpai seeni itoꞌkoꞌ manni pî eseurîmatî:
-
Îꞌ kupîꞌpî Pauloya, maasa pra Jesus saꞌmantatoꞌ wanîꞌpî, morî Jeová nîtîrîꞌpî mîîkîrî tonpe?
Adão wanîꞌpî Paapa maimu yawîrî pra, mîrîrî yeꞌnen tamîꞌnawîronkon saꞌmanta. Tîîse Jeováya tînmu yarimaꞌpî aasamantoꞌpe amîrî tonpe, mîrîrî wenai amîrî koꞌmamî eꞌpainon ipatîkarî.
Eraꞌmatî João 19:1-7, 16-18. Seeni imenukasaꞌ eraꞌmaya tanne, esenumenkakî oꞌnon yeꞌka pe Jeová esepuꞌtîꞌpî, tînmu eꞌtarumaꞌtî tîuya pe. Tarîpai seeni itoꞌkoꞌ manni pî eseurîmatî:
-
Oꞌnon yeꞌka pe amîrî esepuꞌtî, îꞌ kuꞌsaꞌ Jeová moropai Jesusya manni amîrî tonpe?
ANÎꞌYA EKARANMAPO YA: “Oꞌnon yeꞌka pe tiwinan warayoꞌ saꞌmantatoꞌya tamîꞌnawîronkon pîikaꞌtîꞌpî?
-
Îꞌ yuuku amîrîya?
Îꞌ PÎ ESENUPA PÎ NAN?
Jesus saꞌmantatoꞌ wenai, imakuiꞌpî uurînîkon nîkupîꞌpî manni kupî Paapaya eꞌpainon tîwanmîra. Jesus saꞌmantatoꞌ wenai uurînîkon koꞌmamî eꞌpainon ipatîkarî.
Enpanatapaiꞌnîkon
-
Îꞌ wani awanî yeꞌnen Jesus saꞌmantaꞌpî?
-
Imakuiꞌpî ton pra Jesus wanîꞌpî, mîrîrî wenai oꞌnon yeꞌka pe tîsaꞌmantatoꞌya tamîꞌnawîronkon pîikaꞌtîꞌpî?
-
Oꞌnon yeꞌka pe Jesus saꞌmantatoꞌya apîikaꞌtî eꞌpainon?
INÎꞌ PANPÎꞌ ESENUPAPAI NAN?
Jesus wanîꞌpî imakuiꞌpî ton pra, mîrîrî wenai imakuiꞌpî uurînîkon nîkupîꞌpî, yeꞌmaꞌpîiya (resgate/ranson). Mîrîrî eraꞌmakî.
Îꞌ kupî uurînîkonya eꞌpainon eꞌpîikaꞌtîntoꞌ yapiꞌtoꞌpe.
“‘Tamîꞌnawîronkon pîikaꞌtînen’ mîîkîrî Jesus, îꞌ taa yuꞌse mîrîrî wanî?” (jw.org eseurîmantoꞌ pî)
Uurînîkonya imakuiꞌpî kupîꞌpî ipîra, Paapaya naka mîrîrî kupî eꞌpainon tîwanmîra?
“Yuꞌtoꞌkon wanî Paapa Maimu winîpai” (A Sentinela, 1.º maio kapoi pî, 2013 konoꞌ pî)
Eraꞌmakî oꞌnon yeꞌka pe tiwin warayoꞌya teserukon moꞌtanîpîꞌpî Jesus saꞌmantantoꞌ pî eesenupa tîpo.
“Sokoroꞌ pe ipîra uurî wanî pepîn inîꞌrî” (jw.org eseurîmantoꞌ pî)
a Nota: Pecado (sin) taatoꞌ mîrîrî, imakuiꞌpî konekasaꞌ pî neken pepîn. Mîrîrî wanî nîrî imakuiꞌpî uurînîkon napisîꞌpî Adão moropai Eva winîpai. Mîrîrî yeꞌnen imakuiꞌpî ankuꞌpai pemonkonyamîꞌ wanî. Adão moropai Eva munkuyamîꞌ pe uurînîkon wanî yeꞌnen.
