Anepuꞌtî ayonpa saꞌmantaꞌpî nai? Mîrîrî yai awîrîrî ekaranmapoꞌ: ‘Îꞌ eꞌkupî pemonkon saꞌmantasaꞌya? Inîꞌrî mîîkîrî eraꞌmauya pepîn tiwinkin?’ Sîrîrî esenupantoꞌ ya moropai tiaron esenupantoꞌ ya, eraꞌmapaiꞌnîkon îꞌ taa Paapa Maimuya, mîrîrîya uurînîkon yausinpa.

1. Îꞌ eꞌkupî pemonkon saꞌmanta tîpo?

Jesusya taꞌpî saꞌmantantoꞌ wanî iweꞌnansaꞌ panpe. Tîweꞌtun tanne, pemonkon epuꞌtî pra man îꞌ eꞌkupî tîwoiꞌ. Oꞌnon yeꞌka pe saꞌmantantoꞌ wanî iweꞌnansaꞌ panpe? Saꞌmantasaꞌ tîpo, pemonkonya îꞌ rî epuꞌtî pra man. Neꞌneꞌ pe pra wanî moropai aweꞌtarumaꞌtî pra wanî nîrî. Paapa Maimuya taa pî man “saꞌmantaꞌsanya îꞌ rî epuꞌtî pra man”. — Eclesiastes 9:5 ya taa pî man: “Maasa pra enenankonya epuꞌtî pî man toꞌ saꞌmanta, tîîse saꞌmantaꞌsanya îꞌ rî epuꞌtî pra man, morîkon yapisî toꞌya pepîn inîꞌrî, maasa pra toꞌ enpanata pra wanî îꞌ rî pî.”

2. Yairon pî esenupa tîpo saꞌmantantoꞌ pî, mîrîrîya uurînîkon pîikaꞌtî?

Tuꞌke pemonkonyamîꞌ wanî saꞌmantantoꞌ pî aranneꞌ pe — aranneꞌ pe toꞌ wanî nîrî saꞌmantansan pî! Tîîse îꞌ yenupa Paapa Maimuya saꞌmantantoꞌ pî, mîrîrîya uurînîkon yausinpa. Jesusya taꞌpî: “Yairon epuꞌtîyaꞌnîkon kupî sîrîrî. Moropai mîrîrî wenai amoꞌkasaiꞌyaꞌnîkon, anîꞌ poitîrî pe awanîkon namai.” (João 8:32) Tiaronkon soosikonya yenupa pemonkonyamîꞌ saꞌmantasaꞌ yai, enen pe toꞌ koꞌmamî yekaton pe, tîîse Paapa Maimuya yesupasaꞌ pra man mîrîrî panpe. Anîꞌ eꞌtarumaꞌtî pepîn saꞌmanta tîpo. Saꞌmantasanya uurînîkon tarumaꞌtî eserîke pra wanî, îꞌ rî epuꞌtî pra toꞌ wanî yeꞌnen. Mîrîrî yeꞌnen, saꞌmantasan tonpe, îꞌ rî koneka toꞌ yapurîtoꞌpe moropai toꞌ yausinpatoꞌpe eserîke pra wanî.

Tiaronkonya taa saꞌmantansan yarakkîrî eseurîma eꞌpainon taa toꞌya. Tîîse mîrîrî kupî eserîke pra wanî. Uurînîkon eraꞌma pî man, “saꞌmantaꞌsanya îꞌ rî epuꞌtî pra man”. Anîꞌ eseurîma ya tonpakon saꞌmantaꞌpî yarakkîrî, yairî pra mîrîrî wanî, tonpakon yarakkîrî eseurîmasaꞌ pra awanîꞌpî, Makui poitîrîkon yarakkîrî eseurîma mîrîrî, inkamoroya pemonkonyamîꞌ yenkuꞌtî tîmaimukon pî rî. Mîrîrî yeꞌnen, yairon epuꞌtîyaꞌnîkon ya, mîrîrîya uurînîkon pîikaꞌtî, Makui poitîrîkonya uurînîkon yenkuꞌtî namai. Jeováya taa pî man uurînîkon eseurîma namai saꞌmantasan pî, maasa pra epuꞌtîꞌpîiya mîrîrî wenai uurînîkon wanî Makui poitîrîtonon pokonpe, mîrîrî wanî nariꞌ pe. — Deuteronômio 18:10-12 ya taa pî man: “Amîrînîkon koreꞌta awanî eserîke pra man tînmu ipoꞌtînen apoꞌ ya, manni aweꞌkupî kupî manni pî teeseurîmasen wanî eserîke pra wanî amîrînîkon koreꞌta, akoreꞌtanîkon piaꞌsan pe tîweꞌsen mîîkîrî wanî eserîke pra wanî, ¹¹ mîrîrîkon koreꞌta awanî eserîke pra wanî tiaron ewatînen taarumu ke, tiaronkon yekatonkon yannanan, saꞌmantasan yarakkîrî teeseurîmasaꞌnon. ¹² Mîrîrîkon konekanen yewanmîrî Jeováya, mîrîrî pîkînsaꞌ Jeováya inkamoro moꞌka akoreꞌtapaiꞌnîkon.”

3. Yairî esenupakî saꞌmantansan pî

Îꞌ eꞌkupî saꞌmantantoꞌ tîpo? Pata poro pemonkonyamîꞌ esenumenkatoꞌ wanî seꞌ kaisarî pra mîrîrî pî. Tamîꞌnawîronkon esenumenkatoꞌ wanî pepîn yairî, tiaron pe wanî yeꞌnen.

• Apataꞌseꞌ ta, îꞌ taa pemonkonyamîꞌya îꞌ eꞌkupî saꞌmantantoꞌ tîpo?

 4. Paapa Maimu wenai esenupan tîpo saꞌmantasan pî, mîrîrîya uurînîkon pîikaꞌtî

Aranneꞌ pe pra uurînîkon wanî, yairon pî uurînîkon esenupasaꞌ yeꞌnen saꞌmantasan pî. Eclesiastes 9:10 ya taa pî man: “Ayenya yenkaꞌmakî sîrîrîpe eesenyakaꞌmapa, maasa pra esenyakaꞌmantoꞌ ton pra man, îꞌ ikonekatoꞌ ton pra wanî, ipuꞌtoꞌ ton pra man, uuruwai ya attî manni pataꞌseꞌ ya.” Tarîpai seeni itoꞌkoꞌ manni pî eseurîmatî:

• Saꞌmantasanya uurînîkon tarumaꞌtî eꞌpainon?

Yairî Paapa Maimu pî esenupasaꞌ tîpo, uurînîkon epuꞌtî pî man, saꞌmantasan yapurî moropai toꞌ tonpe epîrema, eserîke pra uurînîkon wanî. Eraꞌmatî Apocalipse 21:8 moropai Apocalipse 4:11. Tarîpai seeni itoꞌkoꞌ manni pî eseurîmatî:

• Oꞌnon yeꞌka pe Jeová wanî, îꞌ pensa anîꞌya saꞌmantasan yapurî ya moropai pîikaꞌtîntoꞌ esaꞌtîya ya saꞌmantasan winîpai?

5. Morî pe wanî yairon saꞌmantantoꞌ pî epuꞌtî

Tuꞌke pemonkonyamîꞌ esenupapîtîꞌpî, sîrîrî tîpose toꞌ esenupa koꞌmannî pî, saꞌmanta tîpo toꞌ eꞌtarumaꞌtî, imakuiꞌpî toꞌ nîkupîꞌpî wenai. Tîîse, saꞌmanta tîpo anîꞌ eꞌtarumaꞌtî pepîn — ipîra makuiꞌsan konekatîponkon pemonkonyamîꞌ nîrî eꞌtarumaꞌtî pepîn. Romanos 6:7 ya taa pî man: “Maasa pra anîꞌ saꞌmantasaꞌ ya, mîîkîrî wanî imakuiꞌpî yentai. Itesaꞌ pe imakuiꞌpî wanî pepîn, yawîrî aakoꞌmamî namai.” (TNM) Tarîpai seeni itoꞌkoꞌ manni pî eseurîmatî:

• Paapa Maimuya taa pî man saꞌmanta tîpo pemonkon ena imakuiꞌpî ton pra, itesaꞌ pe imakuiꞌpî wanî pepîn, mîrîrî eraꞌma Paapaya pemonkon wanî eronasaꞌ, imakuiꞌpî ton pra. Îꞌ taaya moriya, saꞌmanta tîpo, pemokon eꞌtarumaꞌtî imakuiꞌpî tînkupîꞌpî wenai?

Inîꞌ panpîꞌ Jeová pî uurînîkon esenupa ya, inîꞌ panpîꞌ uurînîkon epuꞌtî, saꞌmantasan eꞌtarumaꞌtî nîmî Paapaya pepîn. Eraꞌmatî 1 João 4:8 moropai Apocalipse 15:4. Mîrîrî tîpo seeni itoꞌkoꞌ manni pî eseurîmatî:

• Mîrîrî imenukasaꞌkonya taa pî man, morî yeserukon esaꞌ mîîkîrî Paapa. Mîîkîrîya naka pemonkonyamîꞌ saꞌmantasaꞌ tîpo toꞌ tarumaꞌtîiya?

• Morî pe awanî, epuꞌtîsaꞌ tîpo îꞌ eꞌkupî saꞌmantantoꞌ tîpo? Îꞌ wani awanî yeꞌnen?

 Îꞌ PÎ ESENUPA PÎ NAN?

Îꞌ pensa anîꞌ saꞌmantasaꞌya, îꞌ rî epuꞌtîiya pra man. Saꞌmantasan eꞌtarumaꞌtî pepîn moropai toꞌ enapo pepîn pemonkonyamîꞌ pî oꞌmaꞌtai.

Enpanatapaiꞌnîkon

• Îꞌ eꞌkupî pemonkon saꞌmanta tîpo?

• Yairon pî esenupa tîpo saꞌmantantoꞌ pî, mîrîrîya uurînîkon pîikaꞌtî?

• Îꞌ wani awanî yeꞌnen morî pe wanî yairon saꞌmantantoꞌ pî epuꞌtî?