Saꞌmantantoꞌ wanî yeꞌnen, mararî pra eꞌtarumaꞌtîntoꞌ man. Mîrîrî yeꞌnen Paapa Maimuya taa pî man, saꞌmantantoꞌ, ituꞌse Paapa eꞌtoꞌ pepîn, inewanmarî. (1 Coríntios 15:26) Esenupantoꞌ 27 ya, amîrî esenupaꞌpî, saꞌmantantoꞌ yaretîꞌka Paapaya. Tîîse, îꞌ aweꞌkupî mannankan saꞌmantaꞌsankon pî? Seeni esenupantoꞌ wenai, îꞌ taꞌpî Jeováya manni esenupanya — mîîkîrîya tuꞌkankon saꞌmantaꞌsan pîmîꞌsaꞌka, inîꞌrî toꞌ koꞌmantoꞌpe ipatîkarî. Yairî naka mîrîrî wanî? Toꞌ eꞌmîꞌsaꞌka, tîîse oꞌnon pata toꞌ koꞌmantoꞌpe? Kaꞌ po, non po karî?

1. Îꞌ ankuꞌpai Jeová wanî uyonpakon saꞌmantasan pî?

Jeová man saꞌmantaꞌsan eꞌmîꞌsaꞌka yuꞌse. Innape Paapa kupîꞌpî Jóya, mîrîrî panpe taꞌpî mîîkîrîya: ‘Tîîwanmîra Paapaya ukupî pepîn usaꞌmantasaꞌ tîpoꞌ. Mîîkîrîya taꞌpî Paapa pî: “Uurî yannaya, amaimu yuukuuya [uuruwai ya siꞌma].” — Jó 14:13-15 ya taa pî man: ¹³ Morî pe wanî eꞌpainon uurî sononsaꞌ ya uuruwai ya, miarî unîmîya eꞌpainon sokoroꞌ pe aweꞌtoꞌ esuwaꞌka pîkîrî, moropai uupî awenpanata. ¹⁴ “Îꞌ pensa warayoꞌ saꞌmantasa ya, inîꞌrî awennapamî naka eꞌpainon? Uurî epaꞌkatoꞌ iipî pîkîrî inîmîkîuya.” ¹⁵ Uurî yannaya pe, amaimu yuukuuya. Uurî aneraꞌmapai amîrî wanî yeꞌnen inîꞌrî.

2. Îꞌ wani awanî yeꞌnen inna taa uurînîkonya eꞌpainon saꞌmantaꞌsan eꞌmîꞌsaꞌkatoꞌ pî?

Tarî pata po tîwanî yai, Jesusya tîyun meruntîri wenai saꞌmantaꞌsan imîꞌsaꞌkaꞌpî. Maasa eraꞌmakî, Jesusya maꞌnon saꞌmantaꞌpî imîꞌsaꞌkaꞌpî mîîkîrî wanîꞌpî 12 konoꞌ kaisaron moropai tiwinan yeꞌ tinyo isaꞌmantaꞌpî wîriꞌ inre imîꞌsaꞌkaꞌpîiya nîrî. (Marcos 5:41, 42; Lucas 7:12-15) Itonpa Lázaro pîmîꞌsaꞌkaꞌpîiya nîrî. Lázaro saꞌmantaꞌpî asakîrîrî wei kaisarî aakoꞌmansaꞌ tîpo, Jesusya imîꞌsaꞌkaꞌpî. Paapa pî epîrema tîpo Jesusya taꞌpî: “Lázaro, epaꞌkakî.” “Isaꞌmantaꞌpî epaꞌkaꞌpî satippe”. Enen Lázaro wanîꞌpî! (João 11:43, 44) Mîrîrî pî esenumenkakî oꞌnon yeꞌka pe Lázaro yonpayamîꞌ wanîꞌpî taatausinpai!

3. Morî Paapa yekare man, mannankan ayonpakon saꞌmantaꞌsan tonpe

Paapa Maimuya taa pî man: “Tamîꞌnawîronkon eꞌmîꞌsaꞌka kupî sîrîrî.” (Atos 24:15) Maanankan Jesus nîpîmîꞌsaꞌkaꞌsan, kaꞌ pona toꞌ wîtîsaꞌ pra man. (João 3:13) Toꞌ tausinpasaꞌ wanîꞌpî inîꞌrî tîîkoꞌmamîkon pî tarî pata po. Mîrîrî panpe, amenrî Jesusya tuꞌkankon pîꞌmîꞌsaꞌkaiya, morî pataꞌseꞌ ya toꞌ koꞌmantoꞌpe, tarî pata pona ipatîkarî. Mîîkîrîya taꞌpî: “Tamîꞌnawîronkon isaꞌmantaꞌsanya umaimu eta kupî sîrîrî. Mîrîrî yai toꞌ eꞌmîꞌsaꞌka kupî sîrîrî.” (João 5:28, 29) Toꞌ pî Paapa enpanata, mîrîrî yeꞌnen toꞌ pîmîꞌsaꞌkaiya imeruntîri ke.

 ESENUPAKÎ INÎꞌ PANPÎꞌ

4. Jesus mîîkîrî saꞌmantaꞌsan pîmîꞌsaꞌkanen

Eraꞌmakî îꞌ konekaꞌpî Jesusya itonpa Lazaro tonpe. Eraꞌmatî João 11:14, 38-44. Mîrîrî tîpo seeni itoꞌkoꞌ manni pî eseurîmatî:

• Oꞌnon yeꞌka pe uurînîkonya epuꞌtî pîꞌ man, Lazaro wanîꞌpî aasaꞌmantaꞌsa pe? — Imenukasaꞌ 39 eraꞌmatî.

• Jesusya Lázaro imîꞌsaꞌkaꞌpî inîꞌrî mîîkîrî koꞌmantoꞌpe tarî pata pona. Jesusya naka Lázaro mokaꞌpî kaꞌ poi, inîꞌrî mîîkîrî koꞌmantoꞌpe tarî pata po? Mîrîrî naka wanî yairî?

PANTON eraꞌmatî.

5. Tuꞌkankon saꞌmantaꞌsan eꞌmîꞌsaꞌka kupî sîrîrî!

Salmo 37:29 ya taa pî man: “Morîkon koꞌmamî pata po ipatîkarî.” Tarîpai seeni itoꞌkoꞌ manni pî eseurîmatî:

• Tuꞌke saꞌmantaꞌsan eꞌmîꞌsaꞌka inîꞌrî toꞌ koꞌmantoꞌpe. Oꞌnon pata toꞌ koꞌmamî?

Paapa poitîrîtonon saꞌmantaꞌsan pîmîꞌsaꞌka Jesusya moropai tuꞌkankon tiaronkon saꞌmantaꞌsan nîrî eꞌmîꞌsaꞌka. Eraꞌmakî Atos 24:15. Mîrîrî tîpo seeni itoꞌkoꞌ manni pî eseurîmatî:

• Anîꞌ eꞌmîꞌsaꞌka aneraꞌmapai nan?

• Oꞌnon yeꞌka pe saꞌmantaꞌsan eꞌmîꞌsaꞌka yekareya Phelicity yuntononya yausinpaꞌpî?

 Îꞌ PÎ ESENUPA PÎ NAN?

Paapa Maimuya taa pî man tuꞌkankon saꞌmantaꞌsan eꞌmîꞌsaꞌka inîꞌrî toꞌ koꞌmantoꞌpe. Mîrîrî yuꞌse Jeová man moropai tîmeruntîri tîrîꞌpîiya Jesus pia, mîrîrî konekatoꞌpeiya.

Enpanatapaiꞌnîkon

• Îꞌ ankonekapai Jeová moropai Jesus wanî saꞌmantaꞌsan tonpe?

• Tuꞌke saꞌmantaꞌsan eꞌmîꞌsaꞌka inîꞌrî toꞌ komantoꞌpe. Oꞌnon pata toꞌ koꞌmamî? Kaꞌ po? Pata po karî? Îꞌ wani awanî yeꞌnen mîrîrî taaya?

• Inna taa pî nan ayonpakon saꞌmantaꞌpî eꞌmîꞌsaꞌka, inîꞌrî toꞌ koꞌmantoꞌpe? Îꞌ wani awanî yeꞌnen inna taaya?