1-2. (a) Oꞌnon yeꞌka pe Jeová esenumenka imakuiꞌpî tînkupîꞌpîkon rumakasaꞌ pra pemonkonyamîꞌ wanî ya? (b) Îꞌ yuꞌse Jeová wanî imakuiꞌpî kuꞌnenanya ikonekatoꞌpe?

 Jeováya inna taa pepîn îꞌ kon rî pîꞌ, moropai tenu yenpinîkîuya rîn imakuiꞌpî eraꞌma tîuya namai. (Sal. 5:4-6) Tîmaimu yawîrî eꞌnî Paapa Maimu ya yuꞌse Jeová wanî. Tiaron pensa imakuiꞌpî kupî uurînîkonya epuꞌtî Jeováya, imakuiꞌsan pe uurînîkon wanî yeꞌnen. (Sal. 130:3, 4) Tîîse anîꞌya taa “imakuiꞌpî unkupîkon kupî Paapaya tîîwanmîra. Mîrîrî yeꞌnen îꞌ rî imakuiꞌpî kupî ya, îꞌ waniꞌ pra awanî”, tapurîtoꞌ toꞌya yapisî Jeováya pepîn. (Judas 4) Paapa Maimu eseurîma “tamîꞌnawîronkon pemonkonyamîꞌ imakuiꞌsan” tîꞌka Paapaya amenrî, Kureꞌnan Epîntoꞌ yai, iteseꞌ Armagedom.— 2 Ped. 3:7; Apo. 16:16.

² Tîîse, anîꞌ eꞌtarumaꞌtî yuꞌse pra Jeová wanî. Îꞌ kaiꞌma eraꞌmasaꞌ uurînîkonya tiaronkon esenupantoꞌkon ya, Paapa Maimuya yenpo îꞌ yuꞌse Paapa wanî: “Tîîse imakuiꞌpî teserukon pîꞌ tamîꞌnawîronkon enpenata yuꞌse awanî, moropai irumaka toꞌya yuꞌse awanî.” (2 Ped. 3:9) Oꞌnon yeꞌka pe soosi esanonya Jeová ipataka? Teesemiꞌtapai pra moo siꞌma toꞌ wanî. Imakuiꞌpî kuꞌnen anpîikaꞌtîpai toꞌ wanî, imakuiꞌpî tînkupî rumakatoꞌpeiya moropai Jeová yonpa pe aweꞌtoꞌpe inîꞌrî. Mararî pra pemonkonyamîꞌya seeniꞌ eꞌpîikaꞌtîntoꞌ yapisî, tîîse tamîꞌnawîronkon pepîn. (Isa. 6:9) Tiaronkonya imakuiꞌpî kupî koꞌmannîpî, tîwîrî ipîikaꞌtîsaꞌ soosi esanonya tanne tuꞌke iteꞌka, imakuiꞌpî teseru rumakatoꞌpeiya. Mîrîrî eꞌkupî ya, îꞌ kupî soosi esanonya eꞌpai wanî?

“MÎÎKÎRÎ WARAYOꞌ IMAKUIꞌPÎ KUPÎTÎPONOꞌPÎ YENPAꞌKATÎ AKOREꞌTAPAIꞌNÎKON”

 3. (a) Îꞌ pensa imakuiꞌpî tînkupîꞌpî rumaka anîꞌya pepîn, îꞌ taꞌpî Paapa Maimuya konekatoꞌpe soosi esanonya? (b) Mîrîrî eꞌkupî yai, îꞌ waniꞌ awanî yeꞌnen taa uurînîkonya eꞌpainon, tiwin pemonkonya imenka tîwarîrî Paapa pemonkonoyamîꞌ piapai mîîkîrî epaꞌkatoꞌpe?

³ Îꞌ pensa anîꞌya imakuiꞌpî kupîꞌpî moropai mîrîrî rumakaꞌpîiya pepîn, îꞌ taasaꞌ 1 Coríntios 5:13 ya manniꞌ yawîrî eꞌpai soosi esanon wanî: “Mîîkîrî warayoꞌ imakuiꞌpî kupîtîponoꞌpî yenpaꞌkatî akoreꞌtapaiꞌnîkon.” Taatoꞌ mîrîrî, pemonkon imenka tîwarîrî Paapa pemonkonoyamîꞌ piapai mîîkîrî epaꞌka; mîîkîrî tînpîmîꞌpî moꞌkaꞌpîiya. (Gál. 6:7) Îꞌ waniꞌ awanî yeꞌnen mîrîrî taa uurînîkonya eꞌpainon? Iteseru moꞌtannîpî yuꞌse pra pemonkon wanî yeꞌnen, tîwîrî soosi esanonya ipîikatî tanne tuꞌke iteꞌka tînkupîꞌpî rumakatoꞌpeiya. (2 Reis 17:12-15) Îꞌ kupîiya manniꞌya yenpo Jeová yenupantoꞌkon yawîrî eꞌpai pra awanî.— Deut. 30:19, 20.

 4. Îꞌ waniꞌ awanî yeꞌnen ekaremekî soosi esanonya eꞌpai wanî emurukuntîntoꞌ ta, îꞌ pensa imakuiꞌpî tînkupîꞌpî rumaka anîꞌya pepîn moropai mîîkîrî yenpaꞌka soosi esanonya Paapa poitîrîtonon koreꞌtapai?

⁴ Imakuiꞌpî pemonkon nîkupîꞌpî irumakasaꞌ pra awanî ya, mîîkîrî yenpaꞌka soosi esanonya Paapa pemonkonoyamîꞌ koreꞌtapai. Mîrîrî eꞌkupî yai, soosi esanonya ekaremekî mîîkîrî pemonkon wanî Jeová Maimu Ekaremeꞌnenan pe pra wanî inîꞌrî.  a Îꞌ waniꞌ awanî yeꞌnen mîrîrî kupî soosi esanonya eꞌpai wanî? Pemonkon aneppeꞌnîꞌpai pra toꞌ wanî. Mîrîrî eꞌkupî îꞌ taasaꞌ Paapa Maimuya kuꞌtoꞌpe yonpakonya: “Mîîkîrî yeꞌka ayonpakon yarakkîrî awanîkon eserîke pra naatîi. Ipokonpe siꞌma ayekkarikon yonpayaꞌnîkon eserîke pra naatîi.” (1 Cor. 5:9-11) Îꞌ waniꞌ awanî yeꞌnen mîrîrî taꞌpî Jeováya? Pauloya taꞌpî mîrîrî pîꞌ: “Mararon isaꞌmotoꞌ wanî ya, kîsereꞌna koreꞌta, tamîꞌnawîrî isaꞌmoiya eꞌpainon. Mîrîrî warantî imakuiꞌpî kuꞌsaꞌ tiwinanya ya, tamîꞌnawîronkon amîrîꞌnîkon tarumaꞌtîiya.” (1 Cor. 5:6) Paapa poitîrîtonon wanî Paapa yenupantoꞌkon yawîrî yuꞌse teesekaꞌnunkai, tîîse imakuiꞌpî kuꞌnenanya toꞌ yaꞌkama eꞌpainon mîrîrî kuꞌtoꞌpe toꞌya, tînkupîꞌpîkon rumakasaꞌ inkamoroya pra wanî ya.— Pro. 13:20; 1 Cor. 15:33.

 5. Îꞌ kupî uurînîkonya eꞌpai wanî, anîꞌ yenpaꞌkaꞌpî soosi esanonya ya Paapa pemonkonoyamîꞌ koreꞌtapai, moropai îꞌ waniꞌ awanî yeꞌnen?

⁵ Îꞌ kupî uurînîkonya eꞌpai wanî, anîꞌ yenpaꞌkaꞌpî soosi esanonya ya Paapa pemonkonoyamîꞌ koreꞌtapai? Mîîkîrî pemonkon yarakkîrî uurînîkon koꞌmamî pepîn, tîîse uurînîkon esenumenka rîn mîîkîrî pemonkon pîꞌ tiwin kin Jeová yapurîiya rîn inîꞌrî, tîîse atarimaꞌpî neken. Tiwin carneiro atarimasaꞌ ya, mîîkîrî ennaꞌpo eꞌpainon. Enpanatakî mîîkîrî pemonkonya tîîkoꞌmantoꞌ tîrîꞌpî Jeová pia. Tîîse tarîpai, ituꞌse Jeová eꞌtoꞌ warantî pra aakoꞌmamî, moropai mîrîrîya Jeová yausinpa pra wanî. Mîrîrî yeꞌnen, ipatîkarî aakoꞌmamî eserîke pra awanî. (Eze. 18:31) Tîîse, ikîꞌpî erepamî pra tîîse, moropai mîîkîrî aneraꞌmapai Jeová wanî tîꞌnokoꞌpî pe, mîîkîrî ennaꞌpo eserîke wanî Jeová yapurîpa. Mîrîrî yeꞌnen, oꞌnon yeꞌka pe soosi esanonya yenpo mîrîrî warantî toꞌ esenumenka, îꞌ pensa soosi esanon nenpaꞌkaꞌsan pîikaꞌtî toꞌya tanne?

OꞌNON YEꞌKA PE MANNANKAN SOOSI ESANON NENPAꞌKAꞌSAN PÎIKAꞌTÎ TOꞌYA EꞌPAINON?

 6. Îꞌ koneka soosi esanonya mannankan soosi esanon nenpaꞌkaꞌsan pîikaꞌtîpa?

⁶ Îꞌ pensa anîꞌ yenpaꞌka soosi esanonya, yai pra naka mîîkîrî rumaka toꞌya? Soosi esanonya naka ipîikaꞌtî pepîn inîꞌrî Jeová pia awennaꞌpotoꞌpe? Kanne! Îꞌ pensa pemonkon yeurîma soosi esanonya mîîkîrî yenpaꞌkasaꞌ man Paapa pemonkonoyamîꞌ koreꞌtapai, toꞌ eseurîma nîrî îꞌ kupîiya eꞌpai wanî awennaꞌpotoꞌpe. Tîîse, inîꞌ panpîꞌ ikupî toꞌya! Tiaron pensa, pemonkon yekaranmapo toꞌya iyarakkîrî toꞌ emurukuntî inîꞌrî eꞌpainon mararî kapoi tîpo, iteseru moꞌtanîsaiꞌya ya eraꞌmakonpa. Inna taa pemonkonya ya, soosi esanon emurukuntî mîîkîrî yarakkîrî tîpo. Morî pe siꞌma, mîîkîrî yarakkîrî toꞌ eseurîma teseru rumakatoꞌpeiya moropai awennaꞌpotoꞌpe Jeová pia. Mîrîrî warantî tîîse imakuiꞌpî tînkupîꞌpî esewankonoꞌma pra awanî ya, soosi esanon ennaꞌpo itewîꞌ ta inîꞌrî mîîkîrî pîikaꞌtîkonpa imakuiꞌpî tînkupîꞌpî pîꞌ rumakatoꞌpeiya.

 7. Oꞌnon yeꞌka pe soosi esanonya Jeová eꞌsaꞌnamatoꞌ ipataka îꞌ pensa pemonkon yenpaꞌka toꞌya Paapa pemonkonoyamîꞌ koreꞌtapai? (Jeremias 3:12)

⁷ Soosi esanonya Jeová eꞌsaꞌnamatoꞌ ipataka teesekaꞌnunkai, îꞌ pensa mannankan soosi esanon nenpaꞌkaꞌsan yarakkîrî toꞌ eseurîma. Esenumenkatî îꞌ eꞌkupîꞌpî pena. Jeováya Israel ponkon pîikaꞌtîꞌpî eꞌmai pe, toꞌ esewankonoꞌma irawîrî imakuiꞌpî tînkupîꞌpîkon pîkînsaꞌ. Ipîkîron esenupantoꞌ seeniꞌ kaaretarî ya, Jeová saꞌnamantoꞌ eraꞌmasaꞌ uurînîkonya aronne, îꞌ pensa Oséias yeipontîꞌpîiya tînoꞌpî yapîꞌtoꞌpeiya inîꞌrî, tîwîrî imakuiꞌpî kuꞌsaꞌiya tanne. Mîrîrî warantî, Jeováya tîsaꞌnamatoꞌ yenpoꞌpî tîpemonkonoyamîꞌ pia moropai îꞌ kaiꞌma imakuiꞌpî toꞌ nîkupîꞌpî ankuꞌpai awanî tîwanmîra. (Ose. 3:1; Mal. 3:7) Jeová warantî, soosi esanon wanî imakuiꞌpî kuꞌnen anpîikaꞌtîpai Jeová pemonkonoyamîꞌ koreꞌta awennaꞌpotoꞌpe. Saꞌme mîrîrî wanî emapuꞌtî toꞌya pepîn.— Erenkakî Jeremias 3:12.

 8. Oꞌnon yeꞌka pe tiwin warayoꞌ tîyun piapai atakaꞌmaꞌpî pantoniya uurînîkon pîikaꞌtî epuꞌtoꞌpe îꞌ kaiꞌma imakuiꞌpî kuꞌnenan eraꞌma Jeováya tîꞌnokoꞌpî pe? (Lucas 15:7)

⁸ Tiwin panton ekaremekîꞌpî Jesusya tiwin warayoꞌ tîyun piapai atakaꞌmaꞌpî pantoni. Esenumenkakî îꞌ kaiꞌma tînmu yapisîꞌpî yunya. Tînmu eraꞌma tîuya yai, îꞌ konekaꞌpîiya? “Mîîkîrî tînmu ponaya eekaꞌtumîꞌpî yapiꞌse. Yapisîꞌpîiya tîwakîri pe moropai yuꞌnaꞌpîiya.” (Luc. 15:20) Yunya inîmîsaꞌ pra man tînmu eseurîma îꞌ eꞌkupîꞌpî manniꞌ pîꞌ moropai esaꞌtîꞌpîiya tîwanmîra ikupîpa. Tîîse, mîîkîrî wîtîꞌpî tînmu pia, tînîmîꞌse pra, yun tînmu saꞌnamanen warantî. Soosi esanonya mîrîrî warantî ikupî teesekaꞌnunkai teeseurîmakon ya mannankan atarimaꞌsan yarakkîrî. Ituꞌse toꞌ wanî pemonkon atarimaꞌpî ennaꞌpo yuse Paapa pemonkonoyamîꞌ koreꞌta. (Luc. 15:22-24, 32) Imakuiꞌpî kupîtîpon esewankonoꞌmasaꞌ ya moropai tînkupîꞌpî rumakasaꞌiya ya, Jeová Jesus moropai inserîyamîꞌ atausinpa kureꞌne. Mîrîrî warantî nîrî tamîꞌnawîronkon yonpakon esepuꞌtî taatausinpai!— Erenkakî Lucas 15:7.

 9. Îꞌ taꞌpî Jeováya imakuiꞌpî kuꞌnenan pîꞌ eꞌsaꞌnamatoꞌ ke?

⁹ Eraꞌma pîꞌ uurînîkon man, Jeováya pemonkon yapisî pepîn tîpemonokonoyamîꞌ koreꞌta imakuiꞌpî koneka pîꞌ tîîkoꞌmansen tîrumakai pra. Tîîse mîrîrîya taa pra man Jeová tînpo eraꞌtî pepîn iipia. Tîîse Jeová wanî awennaꞌpo yuꞌse. Oséias 14:4 ya yenpo oꞌnon yeꞌka pe Jeová esepuꞌtî mannakan imakuiꞌpî kupîtîponkon esewankonoꞌmasaꞌ ya. Jeováya taa pîꞌ man: “Amîrînîkon yepiꞌtîuya imakuiꞌpî ankupîꞌpîkon pîꞌ. Asaꞌnamauyaꞌnîkon uyewan ke, maasa pra ekorematoꞌ atarimaꞌpî.” Soosi esanonya epuꞌtî îꞌ kaiꞌma Jeová esepuꞌtî, mîrîrî yeꞌnen îꞌ rî eꞌkupî eraꞌma toꞌya pemonkon yarakkîrî, iteseru moꞌtanîpai awanî. Mannankan Jeová rumakatîponkon pía, mîrîrîya yenpo Jeováya toꞌ saꞌnama kureꞌne moropai toꞌ ennaꞌpo yuꞌse awanî emurukuntîntoꞌ ta kaꞌneꞌ pe.

10-11. Oꞌnon yeꞌka pe mannankan soosi esanon yenpaꞌkasan pîikaꞌtî soosi esanonya aasîrî mararî pra konoꞌ esuwaꞌkasaꞌ tanne?

¹⁰ Oꞌnon yeꞌka pe mannankan soosi esanon nenpaꞌkaꞌsan pîikaꞌtî soosi esanonya eꞌpainon aasîrî mararî pra konoꞌ esuwaꞌkasaꞌ tanne? Mîîkîrî pemonkonya aasîrî imakuiꞌpî rumakaꞌpî taise, imakuiꞌpî tînkupîꞌpî pîkînsaꞌ epaꞌkaꞌpî Paapa pemonkonoyamîꞌ koreꞌtapai. Yai pra mîîkîrî enpanata rîn îꞌ wanî awanî yeꞌnen mîîkîrî yenpaꞌkaꞌpî soosi esanonya. Îꞌ wani pra man tîwîrî mararî pra konoꞌ aakoꞌmansaꞌ tanne, mîîkîrî pemonkon yuwa soosi esanonya. Mîrîrî yai, toꞌ epîrema eꞌpainon pemonkon yarakkîrî moropai yarakkîrî toꞌ eseurîmai mîîkîrî ennaꞌpo Paapa pemonkonoyamîꞌ koreꞌta. Tiwin pemonkon atarimaꞌpî ya mararî pra konoꞌ iwaꞌka tîpo, mîîkîrî wanî aꞌtuꞌmîra Paapa pîꞌ. Moriya, mîîkîrîya ennaꞌpopai wai taiya Paapa pemonkonoyamîꞌ koreꞌta, soosi esanonya yenupanen ton eporî Paapa Maimu pîꞌ mîîkîrî pemonkon, tîwîrî awennaꞌposaꞌ pra tîîse. Soosi esanonya neken imenka eserîke wanî mîîkîrî pemonkon yenupatoꞌpeiya tîîkoꞌmanse pra.

¹¹ Jeová saꞌnamantoꞌ ipataka soosi esanonya. Mararî pra pemonkonyamîꞌ anpîikaꞌtîpai toꞌ wanî. Mîrîrî yeꞌnen, Jeová rumakatîpon yuwa toꞌya moropai morî pe inîmîtoꞌya manaꞌta wanî aꞌta ke. Îꞌ pensa imakuiꞌpî kupîtîpon esewankonoꞌma ya moropai mîîkîrîya iteseru moꞌtanîꞌsaꞌ ya, mîîkîrî ennaꞌpo eꞌpainon Paapa pemonkonoyamîꞌ koreꞌta.— 2 Cor. 2:6-8.

12. (a) Îꞌ pensa aka taa eꞌpai soosi esanon wanî? (b) Îꞌ waniꞌ awanî yeꞌnen uurînîkon esenumenka eꞌpai pra wanî tiaronkon nîkupîꞌpî kupî Jeováya tîwanmîra eserîke pra awanî? (Tekaton eraꞌmakî.)

¹² Tiaron pensa, aka taa eꞌpai man pemonkon ineepî tîuyanîkon rawîrî. Mîrîrî eꞌkupî îꞌ pensa imakuiꞌpî kupîtîpon more winîkîi yarakkîrî, pemonkon seruꞌyeꞌ pe teeseurîmasen Jeová Maimu Ekaremeꞌnenan winîkîi moropai mîîkîrîya tîweꞌmarimantoꞌ atareꞌkaꞌpî ituꞌse tîwanî yeꞌnen. Mîrîrî eꞌkupî yai, soosi esanon wanî innape yairon pe esewankonoꞌmatoꞌ wanî yairon pe. (Mal. 2:14; 2 Tim. 3:6) Paapa pemonkonoyamîꞌ eraꞌma toꞌya eꞌpai wanî. Tîîse, Jeováya inna taatîpon ennaꞌpo ya imakuiꞌpî kupîtîpon mîîkîrîya innape esewankonoꞌmasaꞌ yairî îꞌ tînkupîꞌpî yairon pepîn pîꞌ, moropai mîrîrî rumakaꞌpîiya. Moriya, tîwîrî aka taa soosi esanonya tanne insenan pemonkonyamîꞌ yenkuꞌtînenan yarakkîrî, toꞌ esenumenka eserîke pra wanî tîwanmîra Jeová toꞌ nîkupîꞌpî kupî eserîke pra wanî kaiꞌma. b— 1 Ped. 2:10.

Îꞌ KONEKA EMURUKUNTÎNTOꞌ TAWONKONYA EꞌPAINON?

13. Îꞌ koneka eꞌpai uurînîkon wanî kureꞌne panamatoꞌ yapisîꞌpî anîꞌya ya? (b) Îꞌ koneka eꞌpai uurînîkon wanî anîꞌ yenpaꞌkaꞌpî soosi esanonya ya?

¹³ Eraꞌma pîꞌ uurînîkon man esenupantoꞌ 34 ya, tiaron pensa soosi esanonya ekeremekî yonpakon pîꞌ emurukuntîntoꞌ ta, tiwin pemonkon panamaꞌpî toꞌya kureꞌne. Mîrîrî pata pai, yairon konekaiya moropai imakuiꞌpî tînkupîꞌpî rumakaiya, mîrîrî yeꞌnen mîîkîrî pokonpe eꞌnî eꞌpainon. (1 Tim. 5:20) Mîîkîrî pemonkon wanî Paapa poitîrîtonon koreꞌta aakoꞌmamî. Mîrîrî yeꞌnen yonpakonya ipîikaꞌtî koꞌmannîpî eꞌpai wanî yairon koneka pîꞌ aakoꞌmantoꞌpe. (Heb. 10:24, 25) Tîîse tiaron pe wanî îꞌ pensa pemonkon yenpaꞌka soosi esanonya Paapa pemonkonoyamîꞌ koreꞌtapai. Mîrîrî eꞌkupî ya, “mîîkîrî yeꞌka ayonpakon yarakkîrî awanîkon eserîke pra naatîi. Ipokonpe siꞌma ayekkarikon yonpayaꞌnîkon eserîke pra naatîi. Atarimatî iipiapai.”— 1 Cor. 5:11.

14. Îꞌ imenka Paapa poitîrîya eꞌpainon anîꞌ yenpaꞌkaꞌpî soosi esanonya ya Paapa pemonkonoyamîꞌ koreꞌtapai? (Tekaton eraꞌmakî.)

¹⁴ Yai pra naka taatoꞌ mîrîrî uurînîkon eseurîma eserîke pra wanî soosi esanon nenpaꞌkaꞌpî yarakkîrî tiwin kin? Kanne. Tîîse mîîkîrî pokonpe uurînîkon koꞌmamî eserîke pra wanî. Tiwin pîꞌ siꞌma Jeová Maimu Ekaremeꞌnenanya imenka pemonkon anannapai awanî ya emurukuntîntoꞌ ta attîtoꞌpe, Paapa Maimu pîꞌ eesenupaꞌpî yawîrî. Yai pra mîîkîrî wanî tiwin yonpa pe, wanîyakon pe kaꞌrî. Tîîse pemonkon wîtî ya emurukuntîntoꞌ ta? Pena, eseurîman pra eꞌpînîꞌpî yarakkîrî. Tarîpai sîrîrîpe tiwin pîꞌ siꞌma Jeová Maimu Ekaremeꞌnenya imenka yai pra yarakkîrî teeseurîmakon. Yai pra tiaronkon wanî mîîkîrî yarakkîrî eseurîmapai moropai morî pe erepankî taa toꞌya ipîꞌ. Tîîse kuꞌsan pe toꞌ eseurîma rîn mîîkîrî pemonkon yarakkîrî.

15. Anîꞌkan pîꞌ João eseurîmaꞌpî 2 João 9-11 ya? (Seeniꞌ imenukasaꞌ eraꞌmakî, iteseꞌ: “ Yai pra naka João moropai Paulo eseurîmaꞌpî mîrîrî warainon imakuiꞌpî pîꞌ?”.)

¹⁵ Tiaronkon esekaranmapo taise: “Tîîse Paapa Maimuya taa pîꞌ man: “Morî pe akoꞌmankî —taa pîꞌ aakoꞌmamîkon ya, ipîikaꞌtîyaꞌnîkon mîrîrî. Mîîkîrî pokonpe imakuiꞌpî kupîyaꞌnîkon mîrîrî.”” (Erenkakî 2 João 9-11.) Irawîrî imenukasakonya yenpo imenukasaꞌ 11 eseurîma Paapa yewanmîrînenan pîꞌ (apostátas, apostates) moropai imakuiꞌpî kupî tiaronkonya emapuꞌtînenan pîꞌ. (Apo. 2:20) Mîrîrî yeꞌnen, Paapa yewanmîrînenan kaaretakon pîꞌ pemonkon eseurîma ya moropai imakuiꞌpî kupî tiaronkonya emapuꞌtîiya ya, soosi esanon eseurîma pepîn mîîkîrî yarakkîrî. Tîîse, pemonkon esewankonoꞌma moropai iteseru moꞌtanîpîiya, mîrîrî yuꞌse soosi esanon wanî. Tîîse, mîrîrî eꞌkupî tîpose, mîîkîrî yarakkîrî uurînîkon eseurîma rîn moropai mîîkîrî yanna uurînîkonya pepîn emurukuntîntoꞌ ta attîtoꞌpe.

UURÎNÎKONYA IMAKUIꞌPÎ KUꞌNENAN ERAꞌMA UꞌNOKOꞌPÎ PE MOROPAI SAꞌNAMATOꞌ KE, JEOVÁ PANPE

16-17. (a) Îꞌ yuꞌse Jeová wanî ikonekatoꞌpe imakuiꞌpî kuꞌnenanya? (Ezequiel 18:32) (b) Oꞌnon yeꞌka pe soosi esanon esenyakaꞌma Jeová yarakkîrî imakuiꞌpî kuꞌnen pîikaꞌtîpa?

¹⁶ Îꞌ pîꞌ uurînîkon esenupa pîꞌ nai seeniꞌ mia taikin esenupantoꞌ pîꞌ? Uurînîkon esenupan pîꞌ man anîꞌ saꞌmanta yuꞌse pra Jeová wanî. (Erenkakî Ezequiel 18:32.) Imakuiꞌsan ennaꞌpo yuꞌse awanî tîîpia. (2 Cor. 5:20) Mîrîrî pîkînsaꞌ, tuꞌke iteꞌka Jeováya taꞌpî tîpemonkonoyamîꞌ pîꞌ tînkupîꞌpîkon rumakatoꞌpe toꞌya moropai toꞌ ennaꞌpotoꞌpe tîipia. Mîrîrî konekaꞌpîiya Israel ponkon tonpe, moropai tiwin pîꞌ pemonkonyamîꞌ tonpe nîrî. Soosi esanon esenyakaꞌma Jeová pokonpe mannankan pemonkonyamîꞌ imakuiꞌpî kupîtîponkon esewankonoꞌmatoꞌpe moropai imakuiꞌpî iteserukon rumakatoꞌpe toꞌya.— Rom. 2:4; 1 Cor. 3:9.

¹⁷ Esenumenkakî îꞌ kaiꞌma kaꞌ pon tîîkoꞌmansenon esepuꞌtî imakuiꞌpî kupîtîpon esewankonoꞌmasaꞌ ya! Uyunkon kaꞌ po tîîkoꞌmansen Jeová atausinpasaꞌ wanî kureꞌne, îꞌ pensa atakaꞌmaꞌpî ennaꞌposaꞌ ya Paapa pemonkonoyamîꞌ koreꞌta. Îꞌ pensa uurînîkon esenumenka îꞌ kaiꞌma morî pe Jeová wanî moropai uurînîkon eraꞌmaiya tîꞌnokoꞌpî pe, tîwîrî imakuiꞌsan uurînîkon wanî tanne, mîîkîrî pîꞌ eꞌsaꞌnamantoꞌ ena kureꞌne inîꞌ panpîꞌ!— Luc. 1:78.