1. Îꞌ morî yekare wanî imakuiꞌpî kupîtîpon tonpe?

 Esenupantoꞌ 33 ya, eraꞌmaꞌpî uurînîkonya îꞌ taꞌpî Pauloya yonpakon pîꞌ Corinto pata po, îꞌ pensa tiwin warayoꞌya imakuiꞌpî kupîꞌpî ipîra. Manniꞌ warayoꞌ imakuiꞌpî kupîtîponya tînkupîꞌpî imakuiꞌpî rumakasaꞌ pra man, mîrîrî yeꞌnen mîîkîrî yenpakaꞌpî soosi esanonya Paapa pemonkonoyamîꞌ koretaꞌpai. Tîîse, îꞌ kaiꞌma Romanos 2:4 ya yenpo, anîꞌya ipîra imakuiꞌpî kupîꞌpî tînkupîꞌpî rumakaiya eꞌpainon. (Rom. 2:4) Oꞌnon yeꞌka pe soosi esanonya seeniꞌ pemonkon pîikaꞌtî eꞌpainon imakuiꞌpî tînkupî rumakatoꞌpeiya?

2-3. Tiwin yonpa ipîra imakuiꞌpî kupîtîpon epuꞌtî uurînîkonya ya, îꞌ koneka eꞌpai uurînîkon wanî, moropai îꞌ waniꞌ awanî yeꞌnen?

² Imakuiꞌpî kuꞌsaꞌ pemonkonya ipîra epuꞌtî soosi esanonya pra wanî ya, mîîkîrî pîikaꞌtî toꞌya eserîke pra wanî. Mîrîrî yeꞌnen, tiwin yonpa nîkupîꞌpî imakuiꞌpî ipîra epuꞌtî uurînîkonya ya, îꞌ koneka uurînîkonya eserîke wanî? Mîîkîrî yarakkîrî eseurîmakî soosi esanon yuwatoꞌpeiya moropai pîikaꞌtîntoꞌ esaꞌtoꞌpeiya.— Isa. 1:18; Atos 20:28; 1 Ped. 5:2.

³ Tîîse soosi esanon yarakkîrî eseurîmapai pra imakuiꞌpî kuꞌnen wanî ya? Mîrîrî eꞌkupî ya, ekaremekî eꞌpai wanî soosi esanon pîꞌ, mîîkîrî pîikaꞌtîtoꞌpe toꞌya. Mîrîrî wanî morî pe puꞌkuru, uyonpakon saꞌnama uurînîkonya yeꞌnen, moropai mîîkîrî anrumakapai pra uurînîkon wanî. Imakuiꞌpî teseru moꞌtanîiya pra wanî ya, moropai imakuiꞌpî tînkupî mîîkîrî koꞌmamî ya, Jeová piapai mîîkîrî atarima moropai mîrîrî pîkînsaꞌ imakuiꞌpî pe Jeová pemonkonoyamîꞌ winîkîi, tiaronkon pemonkonyamîꞌ eseurîma eꞌpainon. Mîrîrî yeꞌnen, aranneꞌ pe pra eꞌpai uurînîkon wanî soosi esanon yarakkîrî eseurîmantoꞌpe, tîwîrî saꞌme mîrîrî wanî tanne. Mîrîrîya yenpo uurînîkonya Jeová saꞌnama moropai uyonpakon nîrî. — Sal. 27:14.

OꞌNON YEꞌKA PE SOOSI ESANONYA IMAKUIꞌPÎ KUꞌNEN PÎIKAꞌTÎ?

 4. Îꞌ yuꞌse soosi esanon wanî imakuiꞌpî kuꞌnen yarakkîrî toꞌ emurukuntî yai?

⁴ Îꞌ koneka soosi esanonya îꞌ pensa tiwin yonpaya imakuiꞌpî kupî ya ipîra? Tamîꞌnawîrî soosi esanonya eseurîwîꞌne soosi esanon imenka toꞌ koreꞌta, toꞌ emurukuntoꞌpe pemonkon yarakkîrî. a Mîî pe toꞌ wanî pepîn. Pemonkon imakuiꞌpî kuꞌnen anpîikaꞌtîpai toꞌ wanî, imakuiꞌpî tînkupî rumakatoꞌpeiya, tîîse epuꞌtî pîꞌ toꞌ man mîrîrî ankuꞌpai pemonkon wanî. (Deut. 30:19) Soosi esanonya epuꞌtî tamîꞌnawîronkon esewankonoꞌma pepîn tînkupîꞌpîkon pîꞌ moropai mîrîrî rumaka toꞌya pepîn, îꞌ kaiꞌma Daviya ikupîꞌpî manniꞌ warantî pena. (2 Sam. 12:13) Tiaronkon pemonkonyamîꞌ wanî Jeová winîpainon panamatoꞌ anetaꞌpai pra. (Gên. 4:6-8) Tîwîrî mîrîrî eꞌkupî tanne, imakuiꞌpî kuꞌnenya tînkupîꞌpî imakuiꞌpî rumaka yuꞌse soosi esanon wanî. Îꞌ pîꞌ enpanata eꞌpai soosi esanon wanî imakuiꞌpî kuꞌnen yarakkîrî toꞌ emurukuntîsaꞌ tanne?

 5. Îꞌ koneka eꞌpai soosi esanon wanî imakuiꞌpî kuꞌnen yarakkîrî teemurukuntîi? (2 Timóteo 2:24-26) (Tekaton eraꞌmakî.)

⁵ Imakuiꞌpî kuꞌnen eraꞌma soosi esanonya carneiro warantî, mîîkîrî wanî ipîkku pe Jeová pia atakaꞌmaꞌpî. (Luc.15:4, 6) Mîrîrî yeꞌnen, pemonkon yarakkîrî toꞌ emurukuntî yai, saꞌme toꞌ eseurîma pepîn moropai itarumaꞌtî toꞌya pepîn. Îꞌ eꞌkupîꞌpî neken anepuꞌpai pra toꞌ wanî, tîîse morî yeserukon eraꞌmasaꞌ toꞌya 2 Timóteo 2:24-26 wenai (Erenkakî.), mîrîrî ankuꞌpai toꞌ wanî teesekaꞌnunkai. Tîwanmîra toꞌ koꞌmamî moropai morî pe toꞌ wanî imakuiꞌpî kupîtîpon yewan yapîkonpa.

 6. Oꞌnon yeꞌka pe tewankon koneka soosi esanonya imakuiꞌpî kupîtîpon yarakkîrî teemurukuntîkon irawîrî? (Romanos 2:4)

⁶ Soosi esanonya tewankon koneka. Îꞌ kaiꞌma Jeová wanî imakuiꞌpî kuꞌnenan yarakkîrî, mîrîrî warantî ankuꞌpai soosi esanon wanî nîrî. Toꞌ enpanata îꞌ imenukaꞌpî Pauloya manniꞌ pîꞌ: “Moropai mîrîrî wenai anîꞌ esenumenka yuꞌse awanî imakuiꞌpî tînkupîꞌpî winîpai.” (Leia Romanos 2:4.) Soosi esanon enpanata eꞌpai wanî Jesus Cristo yenya tîwanîkon pîꞌ, moropai mîîkîrîya toꞌ pîikaꞌtî morî pe yakoꞌmenkatoꞌpe toꞌya. (Isa. 11:3, 4; Mat. 18:18-20) Imakuiꞌpî kuꞌnen yarakkîrî toꞌ emurukuntî rawîrî, soosi esanon epîrema moropai toꞌ esenumenka îꞌ yuꞌse tîwanîkon pîꞌ: pemonkon anpîikaꞌtîpai toꞌ wanî, imakuiꞌpî tînkupîꞌpî rumakatoꞌpeiya. Îꞌ kaiꞌma Jeová esenumenka yuwa toꞌya Paapa Maimu, Paapa Maimu kaaretakon wenai, moropai toꞌ epîrema Paapa pîꞌ epuꞌnen pe tîwanîkonpa. Toꞌ esenumenka nîrî imakuiꞌpî esuwaꞌkaꞌpî manniꞌ pîꞌ pemonkon yarakkîrî, maasa pra mîrîrî etinyakaꞌma eꞌpainon îꞌ kaiꞌma mîîkîrî esenumenka moropai îꞌ kupîꞌpîiya manniꞌ.— Pro. 20:5.

7-8. Oꞌnon yeꞌka pe moo soosi esanon wanî eꞌpainon Jeová warantî, teesemiꞌtapai pra, imakuiꞌpî kuꞌnen yarakkîrî teemurukuntîsaꞌkon pe?

⁷ Soosi esanonya Jeová ipataka, moo toꞌ wanî Jeová warantî, teesemiꞌtapai pra. Toꞌ enpanata îꞌ kupîꞌpî Jeováya îꞌ pensa tîpemonkonoyamîꞌya imakuiꞌpî konekapîtîꞌpî pîꞌ pena. Enpanatakî îꞌ kaiꞌma teesemiꞌtapai pra Jeová wanîꞌpî Caim yeurîma tîuya yai. Eeseurîmaꞌpî îꞌ eꞌkupî imakuiꞌpî kupîꞌpî Caim koꞌmamî yai, moropai yenpoꞌpîiya îꞌ kaiꞌma morî pe wanîꞌpî teseru moꞌtanîpîiya ya. (Gên. 4:6, 7) Davi panamaꞌpî Jeováya nîrî profeta Natã wenai. Tiwin panton ekaremekîꞌpîiya esaꞌ tewan yapîꞌtoꞌpeiya. (2 Sam. 12:1-7) Moropai profetayamîꞌ yarimapîtîꞌpîiya wei kaisarî, Israel ponkon pîikaꞌtîtoꞌpe toꞌya, imakuiꞌpî konekapîtîꞌpî toꞌya tanne. (Jer. 7:24, 25) Mîrîrîkon yai, Jeováya toꞌ pîikaꞌtîꞌpî imakuiꞌpî kupîꞌ toꞌya tanne. Mîîkîrîya inîmîkîꞌpî pepîn imakuiꞌpî rumaka toꞌya toꞌ pîikaꞌtî iipiaꞌtîpa. Imakuiꞌpî kupî toꞌya tanne, Jeováya taꞌpî toꞌ pîꞌ irumakatoꞌpe toꞌya.

⁸ Soosi esanonya Jeová ipataka, îꞌ pensa anîꞌya imakuiꞌpî kupîꞌpî ipîra pîikaꞌtî toꞌya. 1 Timóteo 4:2 ya taꞌpî îꞌ kaiꞌma pemonkon yeurîma toꞌya eꞌpai wanî: “Tîîse toꞌ yausinpakî moropai inkamoro yenupakî morî pe toꞌ koꞌmantoꞌpe, teesetaꞌkai pra.” Tiwin esenupantoꞌ Tradução do Novo Mundo (New World Translation) yapai eseurîma seeniꞌ imenukasaꞌ pîꞌ, tiwin soosi esaꞌya mîrîrî kupî yawîrî: ”Mîîkîrî wanî moo, sokoroꞌ pe awanî rîn. Awenpanata ipîꞌ îꞌ wanî yairî ankuꞌpai imakuiꞌpî kupîtîpon wanî, teesemiꞌtapai pra. Sokoroꞌ pe soosi esaꞌ ena ya moropai siꞌsa pe, imakuiꞌpî kupîtîpon atarima emapuꞌtîiya eꞌpainon moropai mîîkîrî ena aꞌtuꞌmîra.”

9-10. Oꞌnon yeꞌka pe imakuiꞌpî kuꞌnen pîikaꞌtî soosi esanonya mîîkîrî esenumenkatoꞌpe tînkupîꞌpî pîꞌ?

⁹ Soosi esanon wanî anepuꞌpai îꞌ ya pemonkonya imakuiꞌpî kupî emapuꞌtîꞌpî. Aꞌtuꞌmîra naka pemonkon enaꞌpî, Paapa Maimu ekaremekî tîuya pra wanî yeꞌnen, Paapa Maimu pîꞌ mîîkîrî esenupa kaꞌrî tiwinsarî mîîkîrî emîꞌpamîꞌpî? Yai pra naka mîîkîrî epîremantoꞌ wanî morî pe pra, itewan ke epîrema pepîn? Mararî naka eepîrema sîrîrî? Yai pra naka imakuiꞌpî ituꞌse aweꞌtoꞌ arentaꞌpî itewan ya? Morî rîn naka suꞌminantoꞌ, moropai imakuiꞌpî tonpakon menkaꞌpîiya naka? Oꞌnon yeꞌka pe mîrîrîkonya mîîkîrî pemonkon esenumenkatoꞌ moꞌtannîpîꞌpî? Yai pra naka mîîkîrîya epuꞌtî îꞌ kaiꞌma tînkupîꞌpîya Jeová yewankonoꞌmaꞌpî?

¹⁰ Pemonkon yekaranmapo soosi esanonya eꞌpainon mîîkîrî pîikaꞌtîpa îꞌ waniꞌ awanî yeꞌnen atuꞌmîꞌra tîwanî Paapa pîꞌ epuꞌtoꞌpeiya moropai îꞌ waniꞌ awanî yeꞌnen ipîra imakuiꞌpî kuꞌsaiꞌya. Tîîse, mîrîrî kupî toꞌya morî pe, aakoꞌmantoꞌ ya teewonse pra (Pro. 20:5) Moropai, morî pantonkon yenkama toꞌya eꞌpainon, tînkupîꞌpî imakuiꞌpî epuꞌtoꞌpeiya, Natãya ikupîꞌpî manniꞌ panpe, Davi pîꞌ. Eꞌmaiꞌpe teemurukuntî yai soosi esanon pokonpe, yai pra ipîra imakuiꞌpî tînkupîꞌpî wanî epuꞌtîꞌpîiya, mîrîrî yeꞌnen eesewankonoꞌma mîrîrî pîkînsaꞌ. Imakuiꞌpî tînkupîꞌpî rumakaiya eserîke wanî taise.

11. Oꞌnon yeꞌka pe Jesus wanîꞌpî imakuiꞌpî kuꞌnenan yarakkîrî?

¹¹ Jesus ipataka soosi esanonya teesekaꞌnunkai. Saulo yarakkîrî Jesus eseurîma tanne, Jesus esenumenkaꞌpî îꞌ pî teeseurîma Saulo yarakkîrî îꞌ wanî itewan ya epuꞌtîpa. Ekaranmapoꞌpîiya: “Saulo, îꞌ waniꞌ yeꞌnen utarumaꞌtîya mîrîrî?” Mîrîrî warantî, Saulo pîikaꞌtîꞌpî Jesusya îꞌ imakuiꞌpî kupî tîuya epuꞌtoꞌpeiya. (Atos 9:3-6) Moropai Apocalipse 2:20, 21 eseurîmaꞌpî Jezabel pîꞌ, Tiatira ponkon koꞌreta. Jesusya taꞌpî ipîꞌ: “Teuren mîrîrî imakuiꞌpî tînkupî rumakatoꞌpeiya taꞌpîuya ipîꞌ teuren.”— Apo. 2:20, 21.

12-13. Oꞌnon yeꞌka pe soosi esanonya inîmîkî eꞌpainon pemonkonya tînkupîꞌpî rumakatoꞌpe? (Tekaton eraꞌmakî.)

¹² Jesus warantî, kaꞌneꞌ pe teesemiꞌtapai soosi esanon esenumenka pepîn pemonkon esewankonoꞌmasaꞌ pra wanî yeꞌnen tînkupîꞌpî pîꞌ. Mîrîrî eꞌkupî eꞌpainon eꞌmaiꞌnon emurukuntîntoꞌ ta, tîîse tiaronkon pemonkonyamîꞌ yarakkîrî inîꞌ panpîꞌ toꞌ eseurîma eꞌpai wanî. Mîrîrî yeꞌnen, soosi esanon emurukuntî eꞌpainon pemonkon yarakkîrî tiwin iteꞌka yentai. Eꞌmaiꞌnon emurukuntîntoꞌ tîpo soosi esanon yarakkîrî, soosi esanon eseurîmaꞌpî pîꞌ mîîkîrî esenumenka ipîra, moropai mîî pe pra Jeová pîikaꞌtîntoꞌ yuwaiya epîremantoꞌ wenai. (Sal. 32:5; 38:18) Mîrîrî yeꞌnen, tiaron emurukuntîntoꞌ tanne, imakuiꞌpî tînkupîꞌpî anrumakapai awanî saꞌme pra panpîꞌ.

¹³ Pemonkon pîikaꞌtîtoꞌpe soosi esanonya tînkupîꞌpî rumakatoꞌpeiya, morî pe soosi esanon wanî moropai mîîkîrî pataꞌpî toꞌ eꞌtîrî. Toꞌ epîrema Jeováya tîpîikaꞌtîtoꞌpeꞌnîkon moropai inîmîkî toꞌya imakuiꞌpî kupîtîpon esewankonoꞌma tînkupîꞌpî pîꞌ moropai mîrîrî rumakatoꞌpeiya.— 2 Tim. 2:25, 26.

14. Anîꞌ pîꞌ morî pe man taa uurînîkonya, imakuiꞌpî kupîtîpon iteseru moꞌtanîsaꞌ ya, moropai îꞌ waniꞌ awanî yeꞌnen?

¹⁴ Imakuiꞌpî tînkupîꞌpî rumaka pemonkonya yai, tamîꞌnawîronkon uurînîkon atausinpa mîrîrî pîꞌ! (Luc. 15:7, 10) Tîîse anîꞌya mîrîrî kupîꞌpî? Soosi esanon naka? Enpanatakî îꞌ imenukaꞌpî Pauloya manniꞌ pîꞌ: “Maasa pra mîrîrî wenai Paapaya toꞌ enpenatatoꞌ ton tîrî yai pra.” (2 Tim. 2:25) Tiwin esenupantoꞌ Tradução do Novo Mundo (New World Translation) yapai eseurîma seeniꞌ imenukasaꞌ pîꞌ: “Morî pe man taa uurînîkonya Jeová pîꞌ eꞌpai wanî, tiaronkon pemonkonyamîꞌ pîꞌ rîn, pemonkonya teseru moꞌtannîsaiꞌya yeꞌnen. Mîîkîrîya tîpoitîrîtonon atarimaꞌsan pîikaꞌtîꞌpî, teesenumenkatoꞌkon moꞌtanîtoꞌpe toꞌya moropai teserukon. Mîrîrî tîpo, îꞌ morî pîꞌ Paulo eseurîma pemonkon ennaꞌposaꞌ ya imakuiꞌpî tîrumakai: imakuiꞌpî kupîtîponya yairon epuꞌtî morî pe, eesewankonoꞌmai ena moropai Makuiya mîîkîrî yenkuꞌtî pepîn, imakuiꞌpî ituꞌse tîweꞌtoꞌ kuꞌtoꞌpeiya”.— 2 Tim. 2:26.

15. Oꞌnon yeꞌka pe soosi esanonya imakuiꞌpî kupîtîpon pîikaꞌtî koꞌmannîpî, imakuiꞌpî tînkupîꞌpî rumakaiya ya?

¹⁵ Îꞌ pensa tiwin pemonkonya tînkupîꞌpî rumaka, eseurîwîꞌnankon soosi esanon emurukuntîꞌsan pemonkon yarakkîrî, esenumenkan îꞌ pensa tuutîkon pîꞌ pemonkon yewîꞌ ta mîîkîrî yausinpai. Tiaronkon soosi esanon nîrî wîtî eꞌpainon pemonkon yausinpai. Mîrîrî wenai, pîikaꞌtîntoꞌ yapisîiya koꞌmannîpî imakuiꞌpî kupîiya namai inîꞌrî, Makuiya mîîkîrî yenkuꞌtî namai moropai morî yairon kupî pîꞌ aakoꞌmantoꞌpe. (Heb. 12:12, 13) Soosi esanonya tînkupîꞌpî ekaremekî eserîke pra wanî tiaronkon pîꞌ. Tîîse, tiaron pensa ekaremekî toꞌya eserîke naka wanî tiaronkon pîꞌ emurukuntîntoꞌ ta?

“IMAKUIꞌPÎ KUPÎTÎPONKON PANAMAKÎ TAMÎꞌNAWÎRONKONYA ETA TANNE”

16. Paulo eseurîmaꞌpî: “Imakuiꞌpî kupîtîponkon panamakî tamîꞌnawîronkonya eta tanne.” Anîꞌkan inkamoro “tamîꞌnawîronkon” taa Pauloya manniꞌ? (1 Timóteo 5:20)

¹⁶ Erenkakî 1 Timóteo 5:20. Mîrîrî imenukaꞌpî Pauloya Timóteo pia, ipîikaꞌtîtoꞌpeiya “imakuiꞌpî kupîtîponkon” panamatoꞌpeiya. Soosi esaꞌ pe mîîkîrî wanîꞌpî nîrî. Yai pra naka Pauloya taꞌpî manniꞌ “tamîꞌnawîronkon” wanî tamîꞌnawîronkon yonpakon emurukuntîntoꞌ ta? Kanne, wei kaisarî pra. Îꞌ pensa Paulo eseurîmaꞌpî “tamîꞌnawîronkon” pîꞌ, mîîkîrî eseurîmapîtîꞌpî mannankan imakuiꞌpî eꞌkuꞌsaꞌ epuꞌtîtîponkon. Mîrîrî eraꞌmaꞌpî toꞌya taise, moropai imakuiꞌpî kupîtîponya ekaremekîꞌpî toꞌ pia taise nîrî. Mannankan “tamîꞌnawîronkon” yarakkîrî soosi esanon eseurîma ama pe yenpotoꞌpe aasîrî imakuiꞌpî kuꞌnen panamasaꞌ toꞌya kureꞌne wanîꞌpî.

17. Manniꞌ tînkupîꞌpî epuꞌtî mararî pra pemonkonyamîꞌya ya, moropai mîrîrî eꞌkupî eꞌpainon amenrî, îꞌ taa soosi esanonya emurukuntîntoꞌ ya, moropai îꞌ waniꞌ awanî yeꞌnen?

¹⁷ Tiaron pensa, manniꞌ tînkupîꞌpî epuꞌtî tamîꞌnawîronkonya yonpakon koreꞌta. Mîrîrî eꞌkupî eꞌpainon amenrî taise. Mîrîrî eꞌkupî yai, mannankan “tamî’nawîronkon” Paulo eseurîmaꞌpî manniꞌ, tamîꞌnawîronkon yonpakon wanî emukuntîntoꞌ ta. Mîrîrî yeꞌnen, tiwin soosi esaꞌya ekaremekî emurukuntîntoꞌ tanne, seeniꞌ yonpa panamaꞌpî toꞌya kureꞌne. Îꞌ tonpe? Paulo eseurîmaꞌpî: “Mîrîrî wenai imakuiꞌpî ankuꞌpai pra eranneꞌ pe toꞌ yonpayamîꞌ eꞌtoꞌpe.” Taatoꞌ mîrîrî, ipîra imakuiꞌpî kupî tiaronkonya namai.

18. Îꞌ kupî soosi esanonya tiwin maasaron 18 kono po maran, ipîra imakuiꞌpî kupîꞌpîiya ya eesenpatakonaꞌpî tîpo? (Tekaton eraꞌmakî.)

¹⁸ Îꞌ eꞌkupî tiwin maasaron 18 kono po maran, ipîra imakuiꞌpî kupîiya ya, teesenpatakona tîpo? Soosi esanonya asakîꞌne soosi esanon menka toꞌ emurukuntoꞌpe seeniꞌ maasaron yarakkîrî ituntonon pokonpe. b Soosi esanonya yuntonon yekaranmapo îꞌ kupîꞌpî toꞌya aasîrî tînmu pîikaꞌtîtoꞌpe toꞌya tînkupîꞌpî rumakatoꞌpeiya. Panamatoꞌ etasaꞌ toꞌ munkîya moropai aasîrî itewan apîsaꞌ toꞌ yuntononya iteseru moꞌtannîtoꞌpe, insenan asaꞌkînankon soosi esanonya inîꞌrî ipanama rîn. Maasa pra, Jeováya taꞌpî mukuyamîꞌ panama eꞌpai yuntonon wanî saꞌnamatoꞌ ke. (Deut. 6:6, 7; Pro. 6:20; 22:6; Efé. 6:2-4) Tiaron pensa, soosi esanon eseurîma ituntonon yarakkîrî epuꞌtîkonpa tînmuya pîikaꞌtîntoꞌ yapisî koꞌmannîpî ituntonon winîpai. Tîîse, tiwin maasaron esenpatakonaꞌpî tîpo imakuiꞌpî kupî pîꞌ aakoꞌmamî ya? Mîrîrî eꞌkupî ya, eseurîwîꞌne soosi esanon emurukuntîi iyarakkîrî ituntonon pokonpe.

“PAAPA WANÎ MORÎ PE, PEMONKONYAMÎꞌ SAꞌNAMANEN PE”

19. Oꞌnon yeꞌka pe Jeová anpatakapai soosi esanon wanî teesekanunkai, tiwin pemonkonya ipîra imakuiꞌpî kupî ya?

¹⁹ Îꞌ pensa soosi esanon emurukuntî imakuiꞌpî kuꞌnen yarakkîrî, toꞌ enpanata Paapa poitîrîtonon koreꞌta ronasaꞌ yuꞌse Jeová wanî. (1 Cor. 5:7) Tîîse, imakuiꞌpî kuꞌnenya tînkupîꞌpî rumaka yuꞌse toꞌ wanî nîrî. Mîrîrî yeꞌnen, toꞌ esenumenka morî pe pemonkon pîꞌ, iteseru moꞌtannîpîiya eꞌpainon. Îꞌ waniꞌ awanî yeꞌnen? Jeová anpatakapai tîwanîkon wanî yeꞌnen, “maasa pra Paapa wanî morî pe, pemonkonyamîꞌ saꞌnamanen pe.” (Tia. 5:11) Eraꞌmakî îꞌ kaiꞌma saꞌnamatoꞌ yenpoꞌpî Joãoya itonpayamîꞌ pîꞌ. Mîrîrî menukaꞌpîiya: “Unmukuyamîꞌ, sîrîrî kaareta menukauya aapiaꞌnîkon imakuiꞌpî kupîyaꞌnîkon namai. Tîîse imakuiꞌpî kupîyaꞌnîkon ya, uurîꞌnîkon ton pe Jesus eseurîma Uyunkon Paapa yarakkîrî umakuyikon yaretîꞌkapa. Mîîkîrî Jesus Cristo, yairî puꞌkuru tîweꞌsen.”— 1 João 2:1.

20. Îꞌ eraꞌma uurînîkonya tiwinanoꞌpî esenupantoꞌ seeniꞌ kaareta ya?

²⁰ Tiaron pensa, tiwin yonpaya tînkupîꞌpî imakuiꞌpî rumaka pepîn. Mîrîrî eꞌkupî ya, mîîkîrî yenpaꞌka soosi esanonya Paapa poitîrîtonon koreꞌtapai. Oꞌnon yeꞌka pe mîrîrî koneka soosi esanonya? Mîrîrî pîꞌ eraꞌmapaiꞌnîkon tiwinanoꞌpî esenupantoꞌ seeniꞌ kaareta ya.