AASAꞌNAMA apemonkono saꞌmantasaꞌ ya, amîrî esewonkonoꞌma pîꞌ man. Epuꞌtî pîꞌ man tiwinsarî awanî. Sokoroꞌ pe taise wanî, eranneꞌ pe awanî. Ekaranmapoya: ‘Îꞌ ton pe mîîkîrî yarakkîrî uukoꞌmamî pra wanîꞌpî?’ Teuren amîrî esenumenka: ‘Inîꞌrî koꞌmamî eserîke pra wai’, taaya.

Esewonkonoꞌmantoꞌya yenpo amîrî wanî pepîn aꞌtuꞌmîra. Amîrîya mîîkîrî pemonkon saꞌnamaꞌpî kureꞌne. Tîîse, pîikaꞌtîntoꞌ eporîya eꞌpainon?

Taise esenumenkaya: ‘Seeni neꞌneꞌ pe wanî manniꞌ esuwaꞌka eserîke pra man.’ Tîîse panamatoꞌkonya amîrî pîikaꞌtî.

Îꞌ WANIꞌ PRA WANÎ AMÎRÎ KARAU YA

Anîꞌ esewankonoꞌma ya tiwinsarî siꞌma, pemonkon esewankonoꞌma mararî. Moropai tiaron esewankonoꞌma kureꞌne. Îꞌ waniꞌ pra wanî oꞌnon yeꞌka pe awanî ya. Vanessa pîꞌ enpenata pîꞌ nan, ipi saꞌmantaꞌpî pîꞌ? Mîîkîrîya taꞌpî nîrî: “Mararî pra ukaruwaꞌpî. Uyewanya neꞌneꞌ pe eꞌtoꞌ epaꞌka eꞌpai uurî wanîꞌpî.” Sofia yakon saꞌmantaꞌpî kaꞌneꞌ pe. Mîîkîrîya taꞌpî: “Mîrîrî pîꞌ esenumenkaꞌpî uurî koꞌmamî ya, kureꞌne uurî eꞌtarumaꞌtîntoꞌ ena, ereꞌ rona warantî wanî. Mîrîrî wanî neꞌneꞌ pe ipîra, tîîse mîrîrî yepiꞌtî.”

ESEURÎMAKÎ EESEWANKONOꞌMA MANNIꞌ PÎꞌ

Îꞌ waniꞌ pra wanî îꞌ pensa tiwinsarî eꞌpai wanî ya. Tîîse, îꞌ pensa anîꞌ saꞌmanta ya, neꞌneꞌ moronka  eserîke pra wanî tiwinsarî siꞌma. Maasaron Jairo yun saꞌmantaꞌpî. Mîîkîrîya taꞌpî: “Uurî eseurîmapîtîꞌpî tiaronkon yarakkîrî uurî esewankonoꞌmato pîꞌ. Uurî eseurîmapîtîꞌpî seꞌ tapairî, yairî pra. Tîîse, uurî eseurîma yai, mîrîrîya upîikaꞌtîꞌpî.” Janice nîrî eseurîma: “Uyonpayamîꞌ yarakkîrî eseurîma ya, morî pe wanî uupia. Inkamoroya uurî etaa epuꞌtîꞌpîuya morî pe. Tiwinsarî siꞌma uurî eꞌtarumaꞌtî eserîke pra wanîꞌpî.”

TIARONKONYA APÎIKAꞌTÎTOꞌ YAPIꞌKÎ

Priꞌya pra eꞌtoꞌ eraꞌmanenya taꞌpî: “Îꞌ pensa anîꞌ saꞌmantasaꞌ ya moropai pemonkonya pîikaꞌtîntoꞌ yapisî ya, kaꞌneꞌ pe morî pe awanî.” Ayonpayamîꞌ pîꞌ kaꞌkî oꞌnonꞌ yeꞌka pe amîrî pîikaꞌtîtoꞌpe toꞌya. Ayonpayamîꞌ wanî apîikaꞌtî yuꞌse, tîîse oꞌnon yeꞌka pe apîikaꞌtî toꞌya epuꞌtî toꞌya pra toꞌ wanî. — Filipenses 4:14.

PAAPA PIA APÎIKAꞌTÎTOꞌ YUWAKÎ

Tinaya taꞌpî: “Unyo saꞌmantaꞌpî kaꞌneꞌ pe cancer pîꞌ. Îꞌ kon pîꞌ eseurîmapîtîꞌpî kureꞌne mîîkîrî yarakkîrî. Mîrîrî yeꞌnen Paapa pîꞌ uurî eꞌtarumaꞌtîntoꞌ ekaremekîꞌpîuya. Tamîꞌnawîrî wei kaisîrî uurî epîremaꞌpî Paapaya uurî meruntîri ton tîîtoꞌpe. Paapaya uurî pîikaꞌtîpîtîꞌpî tuꞌke iteꞌka.” Aurînoꞌpî Tânia wanîꞌpî isan saꞌmanta yai. Mîîkîrîya taꞌpî: “Paapa Maimuya uurî pîikaꞌtîꞌpî tamîꞌnawîrî wei kaisîrî, morîkon tîrîꞌpîiya uurî esenumenkatoꞌpe.”

ESENUMENKAKÎ SAꞌMANTAꞌSAN ENNAꞌPOTOꞌ PÎꞌ

Tina eseurîma koꞌmamî: “Unyo saꞌmantaꞌpî tîpo, mîîkîrî eꞌmîꞌsaꞌka yuꞌse uurî wanîꞌpî amenrî. Mîrîrî inîmîkîuya eserîke pra uurî wanîꞌpî. Tîîse, asakîrîrî konoꞌ kaisîrî esuwaꞌkasaꞌ man. Sîrîrîpe epuꞌtî pîꞌ wai saꞌmantaꞌsan eꞌmîꞌsaꞌka kupî sîrîrî. Mîrîrîya uurî pîikaꞌtî meruntî ke uurî koꞌmantoꞌpe. Uurî esenumenka oꞌnon yeꞌka pe mîîkîrî eporîuya pîꞌ inîꞌrî. Mîrîrîya tîwanmîn pe uurî kupî moropai taatausinpai.”

Amîrî eꞌtarumaꞌtîntoꞌ taise esuwaꞌka eserîke pra wanî kaꞌneꞌ pe. Maasa Vanessa eseurîma eraꞌmakî: “Amîrî esenumenka: ‘Neꞌneꞌ moronkaya manniꞌ pîꞌ mîrîrî esuwaꞌka pepîn kaꞌneꞌ pe’, taaya. Tîîse, tînîn pîꞌ amîrî eꞌtarumaꞌtîntoꞌ ataretîꞌka. Morî pe amîrî eꞌtoꞌ ennaꞌpo inîꞌrî.”

Maasa enpenatakî. Amîrî esewankonoꞌma koꞌmamî eꞌpainon manniꞌ pemonkon pîꞌ. Tîîse amîrî tausinpa aakoꞌmantoꞌ pîꞌ. Paapa pîikaꞌtîntoꞌ man amîrî pia moropai ayonpakon nîrî. Amenrî Paapaya saꞌmantaꞌsan pîꞌmîꞌsaꞌka. Mîrîrî yairon eꞌkupî kupî sîrîrî. Paapa man amîrî yuꞌse inîꞌrî amîrî emurukuntoꞌpe mîîkîrî pemonkon saꞌmantaꞌpî yarakkîrî. Mîrîrî eꞌkupî yai, amîrîya inîꞌrî neꞌneꞌ moronka pepîn!