KUREꞌNAN konoꞌya, kureꞌnan aꞌsitunya yemannekon soroka. Mîrîrî aweꞌkupîꞌpî amîrî yarakkîrî? Moriya amîrîya epuꞌtî oꞌnon yeꞌka pe mîrîrî aweꞌkupîꞌpî pemonkonyamîꞌ yarakkîrî. Inkamoro esewankonoꞌma, toꞌ atakaꞌma, morî pe toꞌ wetun eserîke pra wanî, imakuiꞌpî pe toꞌ weꞌnepîtî. Inkamoro pemonkonyamîꞌ esewankonoꞌma kureꞌne, mîrîrî yeꞌnen inîꞌrî enen koꞌmanpai pra inkamoro wanî.

Mîrîrî warantî taise amîrî wanî nîrî. Taatausinpai enen koꞌmanpai pra taise awanî. Tîîse Paapa Maimuya pîikaꞌtî morîkon inîmîkî pîꞌ aakoꞌmamîpa.

Kureꞌnan konoꞌ moropai aꞌsitun tîpo, amîrî esenumenka: ‘Inîꞌrî uurî koꞌmantoꞌ ennaꞌpo eserîke pra wanî oꞌnon yeꞌka pe uurî koꞌmanpîtîꞌpî warantî’, taaya. Tîîse Paapa Maimuya taa pîꞌ man: “Tamîꞌnawîronkon anîꞌkan meruntî ke tîîkoꞌmansenon, taatausinpasanon.” (Tiago 5:11) Mîrîrî yeꞌnen meruntî ke ayewan konekakî! Amîrî koꞌmantoꞌ ennaꞌpo tînîn pîꞌ morî pe.

Paapa Maimuya taa pîꞌ man: “Anîꞌ karau pepîn inîꞌrî. Anîꞌrî neꞌneꞌ moronka pepîn.” Mîrîrî neken aweꞌkupî îꞌ pensa Paapa wanî pe anna esaꞌ pe tarî pata po. Pata inkamaiya morî pataꞌseꞌ pe. (Mateus 5:5) Kureꞌnan konoꞌ moropai aꞌsitun mîrîrîkon esuwaꞌkaꞌpî yeꞌnen. Tamîꞌnawîron eꞌtarumaꞌtîntoꞌ pîꞌ anna enpenata pepîn inîꞌrî. Îꞌ ton pe? Maasa pra meruntî kenan Paapaya taa pîꞌ man: “Pena îꞌ kaiꞌma koꞌmannîtoꞌ, mîrîrî esuwaꞌkaꞌpî yeꞌnen.” — Apocalipse 21:4.

Esenumenkakî: ‘Paapaya inîmîꞌtoꞌ, tausinpantoꞌ moropai tîîwanmîra aweꞌtoꞌ ton tîrîiya.’ (Romanos 15:13) Îꞌ taa pîꞌ nan mîrîrî pîꞌ? Mîrîrîya apîikaꞌtî enen aakoꞌmamîpa taatausinpai inîꞌrî. Enpenata pîꞌ nan Sally pîꞌ? Mîîkîrîya taꞌpî: “Uurî esenumenka koꞌmamî morîkon pîꞌ. Îꞌ pensa Paapa wanî ya anna esaꞌ pe, mîrîrîya upîikaꞌtî uurî eꞌtarumaꞌtîtoꞌ pîꞌ uurî enpenata namai. Mîrîrîya nîrî upîikaꞌtî sîrîrîpe uukoꞌmantoꞌpe morî pe.”

Inîꞌ panpîꞌ esenupa pîꞌ nan îꞌ morîkon koneka Paapaya îꞌ pensa anna esaꞌ pe wanî ya? Kureꞌnan aꞌsitun moropai kureꞌnan tuna wanî pepîn inîꞌrî. Mîrîrîya apîikaꞌtî inîꞌ panpîꞌ enen aakoꞌmamîpa taatausinpai. Mîrîrî wanî tanne, Paapa Maimuya morîkon panamatoꞌkon tîrî amîrî pîikaꞌtîtoꞌpe ayemannekon yenumîꞌpî kureꞌnan konoꞌya moropai aꞌsitunya wenai. Tarîpai îꞌ taa Paapa Maimuya eraꞌmakî.