AMÎRÎ esewankonoꞌma pîꞌ kureꞌne, mîrîrî yeꞌnen inîꞌrî enen koꞌmanpai pra amîrî wanîꞌpî? Mîrîrî yeꞌnen amîrîya epuꞌtî oꞌnon yeꞌka pe Adriana wanîꞌpî. Adriana esewankonoꞌmatoꞌ epîtîꞌpî ipîra, tiwin kin morî pe ena eserîke pra wanîꞌpî. Mîîkîrîya epuꞌtîꞌpî kureꞌnan paran esewankonoꞌmatoꞌ esaꞌ pe wanî.

Japão pata pon Kaoruya, neꞌneꞌ pe tîweꞌsanon isan moropai tîyun eraꞌma. Mîîkîrîya taꞌpî: “Mîrîrî yai, uurî esenyakaꞌmatoꞌ ta nîrî saꞌme wanîꞌpî. Uyare enaꞌpîuya eserîke pra uurî wanîꞌpî moropai wetun eserîke pra nîrî. Kureꞌne esenumenkatoꞌ wanîꞌpî. Aweꞌtîꞌka eserîke pra eramaꞌpîuya. Mîrîrî yeꞌnen saꞌmanta yuꞌse uurî wanîꞌpî.”

Nigéria pata pon Ojebodeya taꞌpî: “Uurî esewankonoꞌma epîtîꞌpî wei kaisîrî moropai ukaru epîtîꞌpî nîrî. Mîrîrî yeꞌnen uurî esenumenkaꞌpî: ‘Saꞌmantapai wai.’” Ojebode, Kaoru moropai Adriana inkamoroya mîrîrî konekasaꞌ pra man, toꞌ ewî pra wanîꞌpî. Tîîse tamîꞌnawîrî pata poro mararî pra pemonkonyamîꞌya mîrîrî koneka pîꞌ man konoꞌ kaisîrî.

Wîriꞌsanyamîꞌ yentai warayoꞌkon ewî pîꞌ man. Pîikaꞌtîntoꞌ esaꞌtî toꞌya pepîn, toꞌ eppepî yeꞌnen. Tîîse, Jesusya taꞌpî: ‘Priꞌya pra tîweꞌsanonya tepiꞌtînenkon ton yuwa eꞌpainon.’ (Lucas 5:31) Amîrî esenumenka ya ewîntoꞌ pîꞌ, mîrîrî yeꞌnen pîikaꞌtîntoꞌ yuwakî. Kureꞌnan paran esewankonoꞌmatoꞌ pîꞌ pemonkonyamîꞌ priꞌya toꞌ eꞌtoꞌ eraꞌmanenya toꞌ pîikaꞌtîꞌpî. Awenpenata pîꞌ nan Ojebode, Kaoru moropai Adriana pîꞌ? Inkamoroya pîikaꞌtîntoꞌ yuwaꞌpî. Moropai sîrîrîpe inkamoro koꞌmannî pîꞌ man morî pe.

Oꞌnon yeꞌka pe priꞌya eꞌnîtoꞌ eraꞌmanenanya amîrî pîikaꞌtî? Mesin tîrî toꞌya, inkamoro wanî ayarakkîrî eseurîma yuꞌse moropai inkamoroya asakîꞌne mîrîrî yenkama ayarakkîrî. Apemonkonoyamîꞌ moropai ayonpayamîꞌ apîikaꞌtî eꞌpainon nîrî. Tîîse anîꞌ wanî eꞌpainon morî ayonpa pe? Paapa Jeová neken. Mîîkîrîya morî pîikaꞌtîntoꞌ tîrî tîmaimu wenai.

Mannankan kureꞌnan paran pîꞌ esewankonoꞌmakoiꞌkon kaꞌneꞌ pe toꞌ esepiꞌtî eserîke pra wanî. Inkamoroya epuꞌtî îꞌ rî koneka toꞌya eserîke pra wanî inîꞌrî. Tîîse kureꞌnan paran esewankonoꞌmatoꞌ esaꞌ pe wanî ya, maasa îꞌ taa Ojebode eraꞌmakî: “Isaías 33:24ya taasa manniꞌ aweꞌkupî inîmîkîuya sîrîrî. Mîrîrî yai, anîꞌya ‘Neꞌneꞌ pe wai!’ taa eserîke pra wanî.” Mîîkîrî yeꞌka pe ikuꞌkî. Esenumenkakî îꞌ taa Paapaya manniꞌ pîꞌ amenan pata tîrîiya moropai inîꞌrî neꞌneꞌ pe anîꞌ wanî pepîn. Esewankonoꞌmatoꞌ kureꞌnan paran ton pra wanî kupî sîrîrî tarî. Neꞌneꞌ pe aweꞌtoꞌ etîꞌka ipatîkarî. Tiwin kin mîrîrî pîꞌ anîꞌ enpenata pepîn, “mîrîrî esuwaꞌkaꞌpî yeꞌnen”. — Apocalipse 21:1, 4.