ITEPI ton pîn paran esaꞌ pe nan? Ayonpa itepi ton pîn paran esaꞌ pe eꞌkoi moro nen? Mîrîrî wanî saꞌme epuꞌtî pîꞌ nen. Tiaron pensa pemonkonya epuꞌtî itepi ton pîn paran esaꞌ pe wanî, mîrîrî pîꞌ ipemonkonoyamîꞌ esewankonoꞌma ipîra. Saꞌme wanî inîꞌ panpîꞌ îꞌ pensa amîrî mesin toꞌ eporî pra wanî ya, îꞌ pensa mesin wanî epeꞌke pe, îꞌ pensa attî tuꞌke iteꞌka priꞌya wanî eraꞌmapa tîîse priꞌya ena eserîke pra wanî, moropai îꞌ pensa mesin enîrîya tanne priꞌya ena eserîke pra wanî.

Amîrîya, oꞌnon pata pîikaꞌtîntoꞌ eporîya? Mararî pra pemonkonyamîꞌ eporî epîremantoꞌ Paapa pîꞌ  moropai pîikaꞌtîntoꞌ Paapa Maimu wenai inîꞌrî. Tiaron kureꞌnan pîikaꞌtîntoꞌ iipî ayonpayamîꞌ wenai moropai apemonkonoyamîꞌ piapai nîrî.

Panamatoꞌ tîrîꞌpî Robertya: “Innape aweꞌtoꞌ Paapa pîꞌ mîrîrîya apîikaꞌtî paran pîꞌ wanî tanne. Epîremakî Jeová pîꞌ. Ekaremekî ipîꞌ oꞌnon yeꞌka pe awanî. Morî yekaton esaꞌkî ipîꞌ. Esaꞌkî ipîꞌ meruntî ke awanîpa moropai aakoꞌmamîpa tîwamîn pe. Moropai morîkon pîꞌ esenumenkakî. Mîrîrî wanî morî pe amîrî ton pe moropai apemonkonoyamîꞌ ton pe nîrî.”

Robert eseurîma koꞌmamî mîrîrî pîꞌ: “Morî pe puꞌkuru wanî îꞌ pensa apemonkonoyamîꞌya apîikaꞌtî ya. Amîrîya epuꞌtî pîꞌ man inkamoroya apîikaꞌtî. Uurî yarakkîrî toꞌ eseurîma wei kaisîrî. Ekaranmapo toꞌya: ‘Oꞌnon yeꞌka pe ereꞌmasaꞌ nan?’ Tiaron pata ponkon uyonpayamîꞌya uyausinpa nîrî. Inkamoroya umeruntîri ton tîrî. Mîrîrîya upîikaꞌtî enen uukoꞌmantoꞌpe.”

Lindaya panama: “Îꞌ pensa neꞌneꞌ ayonpa yewîꞌ ta attî rawîrî, esenumenkakî: ‘Îꞌ yuꞌse neꞌneꞌ pe tîweꞌsen wanî?’ Morî pe enen koꞌmanpai wanî neꞌneꞌ pe wanî tanne. Ikoꞌnoro paran pîꞌ eeseurîma eserîke pra wanî. Mîrîrî yeꞌnen îꞌ rî tîponoronkon pîꞌ eseurîmakî.”

Enpenatakî: Paapa pîikaꞌtîntoꞌ man. Ayonpayamîꞌ moropai apemonkonoyamîꞌya apîikaꞌtî moropai Paapa Maimuya ayausinpa. Tarîpai aakoꞌmamî taatausinpai itepi ton pîn paran wanî tanne.