Maasa, Estados Unidos pata pon Sally * pantoni eraꞌmakî. Mîîkîrî yemannekon yenumîꞌpî aꞌsitunya tamîꞌnawîrî. Mîîkîrîya taꞌpî: “Mîrîrî yapîtanîpî epuꞌtîuya pra uurî wanîꞌpî. Mîrîrî wenai mararî pra wei kaisîrî uurî esewankonoꞌma pîꞌ.”

Tiaron man tausinpantoꞌ moꞌkanen. Australia pata pon, Janiceya taꞌpî: “Asakîꞌne kaisîrî unmunkuyamîꞌ saꞌmantaꞌpî. Mîrîrî yeꞌnen, inîꞌrî enen koꞌmanpai pra uurî wanîꞌpî. Mîrîrî yai, Paapa yekaꞌnunkaꞌpîuya: ‘Uyewanya mîrîrî yapîtanîpî eserîke pra uurî wanî. Iweꞌnunpai neken wai! Inîꞌrî kurantapai pra wai!’, taꞌpîuya.”

Daniel nîrî esewankonoꞌmaꞌpî tiaron warayoꞌ yarakkîrî inoꞌpî eꞌsaꞌ yeꞌnen. Mîîkîrîya ekaremekîꞌpî: “Mîrîrî ekaremekî unoꞌpî yai, taura ke uyewan yaꞌsoꞌka warantî wanîꞌpî. Mîrîrî pîꞌ uurî esewankonoꞌmaꞌpî mararî pra kapoi kaisîrî.”

Mîrîrî yeꞌka pîꞌ amîrî eꞌtarumaꞌtî esuwaꞌkaꞌpî? Mîrîrî yeꞌka pîꞌ amîrî eꞌtarumaꞌtî sîrîrîpe?

• Ayemannekon eꞌsorokasaꞌ ya

• Ayonpa saꞌmantasaꞌ ya

• Inyo inoꞌpî eꞌsaꞌ ya tiaronkon yarakkîrî

• Itepi ton pîn paran wanî ya

• Esewankonoꞌmantoꞌya arumaka pra wanî ya

Seeni kaaretaya yenpo oꞌnon yeꞌka pe inîꞌrî taatausinpai enen aakoꞌmamîpa, maasa mararî pra eꞌtarumaꞌtîntoꞌ wanî tanne.