UURÎNÎKONYA eraꞌma pîꞌ man seeni kaareta ya îꞌ kon eꞌkupî manniꞌ imakuiꞌpî pe. Mîrîrî wenai enen koꞌmanpai pra pemonkonyamîꞌ man. Mîrîrî yeꞌnen tiaronkon pemonkonyamîꞌya taise ekaranmapo: ‘Anîꞌ naka esenumenka uurî pîꞌ?’ Tîîse Paapaya amîrî eꞌtarumaꞌtîntoꞌ esuwaꞌka epuꞌtîꞌ pîꞌ man. Aꞌkî, epeꞌke amîrî Paapa pia!

Salmo 86 imenukanenya Paapa kupîꞌpî innape. Mîîkîrîya taꞌpî: “Eꞌtarumaꞌtî weiyu yai, amîrî yannauya. Yairî epuꞌtî pîꞌ wai amîrîya uurî yuuku.” (Salmo 86:7) Tîîse, taise amîrî ekaranmapo apîꞌ rî: ‘Oꞌnon yeꞌka pe Paapaya uurî yuuku maasa eꞌtarumaꞌtî tanne?’

Paapaya taise kaꞌneꞌ pe amîrî eꞌtarumaꞌtîntoꞌ kupî eserîke pra man morî pe. Tîîse tîwanmîn tîrîiya aakoꞌmamîpa. Imaimuya taa pîꞌ man: “Tamîꞌnawîron yuꞌse awanîkon pîꞌ teesewankonoꞌmai pra eꞌtî. Tîîse Paapa yarakkîrî eseurîmatî. Îꞌ ituꞌse aweꞌtoꞌkon esaꞌtî Paapa pîꞌ. . . . Mîrîrî warantî epîremakon ya, ayewankon ereutanîpîiya. Moropai morî pe eesenumenkatoꞌkon konekaiya eranneꞌ pe awanîkon namai. Mîrîrî tîîwanmîra eꞌnîtoꞌ, intîrî wanî kureꞌne, esenumenkan yentai. Mîrîrî warantî uyewankon, esenumenkantoꞌ koꞌmannîpîiya morî pe.” (Filipenses 4:6, 7) Maasa eraꞌmakî oꞌnon yeꞌka pe Paapa Maimuya ekaremekî Paapa mîîkîrî uurînîkon saꞌnamanen.

“Paapaya inkamoro toronyamîꞌ epuꞌtî maasa pra iwanmînonkon pepîn inkamoro. . . . Tuꞌkankon toronyamîꞌ yentai amîrîꞌnîkon wanî Paapa pia.” — Lucas 12:6, 7.

ESENUMENKAKÎ: Paapaya simonkonkon toronyamîꞌ eraꞌma pîꞌ man. Paapa nîrî esenumenka inkamoro pîꞌ. Tîîse Paapa pia pemonkonyamîꞌ wanî toronyamîꞌ yentai inîꞌ panpîꞌ. Paapaya tamîꞌnawîrî wanî manniꞌ tarî pata pona konekaꞌpî. Pemonkonyamîꞌ man inîꞌ panpîꞌ morî pe puꞌkuru mîrîrîkon yentai. Maasa pra inkamoro yeseru wanî eꞌpainon Paapa warantî. — Tiago 3:9.

“Paapa Jeová, uyewan eraꞌmanen amîrî, uurî epuꞌnen amîrî. . . . Uurî esenumenkatoꞌ epuꞌnen amîrî. . . . Ituꞌna uurî eraꞌmakî. Uurî eꞌtarumaꞌtîntoꞌ epuꞌkî.” — Salmo 139:1, 2, 23.

ESENUMENKAKÎ: Amîrî epuꞌnen Paapa morî pe puꞌkuru. Mîîkîrîya amîrî epuꞌtî pîꞌ man îꞌ pîꞌ amîrî esenumenka moropai îꞌ pîꞌ amîrî esewankonoꞌma. Pemonkonyamîꞌya amîrî eꞌtarumaꞌtî epuꞌtî pra man. Tîîse Paapaya mîrîrî yeꞌkakon epuꞌtî. Amîrî pîikaꞌtî yuꞌse awanî. Mîrîrî wenai taatausinpai amîrî enen koꞌmamî eꞌpainon inîꞌrî.

“Paapa Jeová, uurî epîrematoꞌ etaakî. Îꞌ esaꞌtîuya manniꞌ erepamî amîrî pia. . . . Apana neekî uurî pia aminke maꞌre. Uurî yuuku kaꞌneꞌ pe ayannauya ya. . . . Epîrematoꞌ etaanen amîrî manniꞌkan îꞌ ton pra tîweꞌsanon.”  — Salmo 102:1, 2, 17.

ESENUMENKAKÎ: Pena pata pai pemonkonyamîꞌ eꞌtarumaꞌtîntoꞌ esippiaꞌtî yai, Jeováya tamîꞌnawîronkon karau eraꞌma pîꞌ man. (Salmo 56:8) Mîîkîrîya nîrî amîrî karawannîtoꞌ eraꞌma. Paapa enpenata tamîꞌnawîrî amîrî eꞌtarumaꞌtîntoꞌ pîꞌ. Îꞌ wani awanî yeꞌnen? Morî pe puꞌkuru amîrî wanî yeꞌnen iipia.

“Teesewankonoꞌmai pra eꞌkî, maasa pra uurî Ayepotorî. Amîrî kupîuya meruntî ke, inna, amîrî pîikaꞌtîuya. . . . Uurî Jeová, amîrî Paapa, . . . uurîya taa pîꞌ man see warantî: ‘Eranneꞌ pe pra eꞌkî. Uurîya apîikaꞌtî.’” — Isaías 41:10, 13.

ESENUMENKAKÎ: Paapa man wei kaisîrî amîrî pîikaꞌtî yuꞌse. Yairî maꞌre amîrî wanî ya, tîwîrî amîrî pîikaꞌtî pîꞌ aakoꞌmamî.

“Tamîꞌnawîronkon pemonkonyamîꞌ yuꞌse Paapa wanîꞌpî ipîra teesekaꞌnukai. Mîrîrî yeꞌnen tiwinan tînmu tîrîꞌpîiya, innape ikuꞌnenan wîtî namai apoꞌ ya, ipatîkarî enen toꞌ koꞌmantoꞌpe tîîpia.” — João 3:16.

ESENUMENKAKÎ: Paapaya amîrî saꞌnama pîꞌ man kureꞌne. Mîrîrî yeꞌnen tînmu Jesus tîrîꞌpîiya aasaꞌmantoꞌpe amîrî ton pe. Jesus saꞌmantantoꞌ wenai amîrî koꞌmamî eꞌpainon imakuiꞌpî ton pra ipatîkarî. *