Mararî pra panamatoꞌkon eporî amîrîya eꞌpainon îꞌ pensa amîrî nîsaꞌnama saꞌmantasaꞌ ya amîrî esewankonoꞌma, tîîse tiaronkon panamatoꞌkon wanî morî pe panpîꞌ amîrî pîꞌ yai pra. Mîrîrî eꞌkupî eꞌpainon, maasa pra tîponarî siꞌma pemonkon esewankonoꞌma. Mîrîrî yeꞌnen, îꞌ ya tuꞌke pemonkonyamîꞌ pîikaꞌtî manniꞌ, mîrîrîya tiaronkon pîikaꞌtî eserîke pra wanî.

Tîîse tiaron panamatoꞌkonya mararî pra pemonkonyamîꞌ pîikaꞌtîꞌpî. Tuꞌke iteꞌka seeniꞌ panamatoꞌkon tîrî epuꞌnenanya. Seeniꞌ panamatoꞌkon tîrî mararî pra epuꞌnenankonya, tîîse senniꞌ panamatoꞌkon wanî penaron kaaretarî see panpe nîrî. Mîrîrî kaareta wanî Paapa Maimu pe.

• Inîꞌ panpîꞌ epuꞌnenanya taa seeniꞌ panamatoꞌ wanî morî pe puꞌkuru îꞌ pensa amîrî nîsaꞌnama saꞌmantasaꞌ ya amîrî esewankonoꞌmatoꞌ yapîtanîꞌtoꞌpe. Tîîse tiaron pensa taise tiwinsarî eꞌpai awanî. Moropai tiaron pensa sokoroꞌ pe amîrî wanî îꞌ pensa tiaronkon wanî amîrî anpîikaꞌtîpai. Îꞌ wani pra rî wanî mîrîrî panpe amîrî esepuꞌtî ya.

• Tiaron pensa ituꞌse pra wanî tiaronkon pemonkonyamîꞌ amîrî yarakkîrî, îꞌ wani pra rî wanî, tîîse amîrî atarima inkamoro piapai eserîke pra man ipatîkarî. Tiaron pensa, inkamoroya amîrî pîikaꞌtî yuꞌse awanî. Tiaronkon yarakkîrî morî pe eseurîmakî îꞌ yuꞌse awanî ya moropai îꞌ yuꞌse pra awanî ya nîrî.

• Esenumenkakî îꞌ yuꞌse aweꞌtoꞌ pîꞌ, moropai morî pe imenkakî îꞌ pensa tiwinsarî eꞌpai awanî moropai îꞌ pensa tiaronkon yarakkîrî eꞌpai awanî ya nîrî.

Îꞌ TAA PAAPA MAIMUYA: “Asakîꞌne siꞌma eꞌtoꞌ wanî morî pe panpîꞌ tiwinsarî eꞌtoꞌ yentai. . . Maasa maꞌre, tiaron ena ya, tiaronya itonpa ipîikaꞌtî eꞌpainon aweꞌmîꞌsaꞌkatoꞌpe.” — Eclesiastes 4:9, 10, TNM.

• Esewankonoꞌma ya, amîrî nîsaꞌnama saꞌmantaꞌpî pîkînsaꞌ, morî pe ayekkari enaꞌkî, mîrîrîya apîikaꞌtî. Yekkarikon, yaꞌreꞌkon moropai pun mararî ikaiwano ke.

• Kureꞌne tuna enîꞌkî moropai tiaron morî iwukukon.

• Enaꞌpai pra awanî ya, mararî esekkariꞌtîkî, tînîn pîꞌ tînîn pîꞌ, tîîse tuꞌke iteꞌka. Ayaꞌreꞌ morî pe enapîpa mersin esaꞌkî doutor (doctor) pîꞌ. a

• Kaꞌneꞌ pe amîrî asarî ya moropai ekaꞌtumî ya, epînonse attî ya, bola pî amîrî suꞌmina ya, moropai ayesaꞌ yenyakaꞌma ya, îꞌ rî kon pîꞌ apîikaꞌtî esewankonoꞌma namai. Mîrîrî konekaya ya, morî pe panpîꞌ esenumenka eꞌpainon îꞌ eꞌkupîꞌpî pîꞌ taise, moropai îꞌ pensa esenumenka mîrîrî pîꞌ mîꞌpamî eꞌpai awanî taise.

Îꞌ TAA PAAPA MAIMUYA: “Anîꞌ esewanmîrî pepîn tîîwarîrî, tîîse aweꞌsaꞌnama. Mîrîrî warantî nîrî tîpemonkonoyamîꞌ saꞌnama Cristoya.” — Efésios 5:29.

• Wetun ya morî pe wanî tamîꞌnawîronkon tonpe, tîîse mîrîrî wanî morî pe panpîꞌ îꞌ pensa amîrî nîsaꞌnama saꞌmantasaꞌ ya, maasa pra anîꞌ esewankonoꞌmasaꞌ ya inîꞌ panpîꞌ tapîkaꞌse ena.

• Aka kaꞌkî mîrîrî pîꞌ kureꞌne café (coffee) enîrîya namai moropai maiꞌ enîrîya namai, maasa pra mîrîrîya awenîtoꞌ manenpa.

Îꞌ TAA PAAPA MAIMUYA: “Morî pe erîꞌkanî pe eꞌpai wanî, ipîra tapîkaꞌse teesenyakaꞌmai pra moropai mîrîrî wanî aꞌsitun yemapî pîꞌ ekaꞌtumî warantî.” — Eclesiastes 4:6.

• Anepuꞌpai eꞌkî îꞌ koneka pemonkonyamîꞌya tîponarî wanî teesewankonoꞌmasakon ya. Mîrîrî warantî epuꞌtîya eꞌpai wanî îꞌ wanî morî pe amîrî tonpe.

• Tuꞌkankon pemonkonyamîꞌ esepuꞌtî morî pe teeseurîmakon ya tiaronkon pemonkonyamîꞌ pokonpe. Tîîse tiaronkon wanî eseurîmapai pra tiaronkon pokonpe mîrîrî pîꞌ. Tuꞌke epuꞌnenan esenumenka tîponarî mîrîrîkon pîꞌ. Eseurîmapai awanî ya teesewankonoꞌmatoꞌ pîꞌ, tîîse aranneꞌ pe awanî ya, ayonpa apiawon yarakkîrî eseurîmakî tînîn pîꞌ.

• Amîrî nîsaꞌnama saꞌmantasaꞌ ya, morî pe wanî akarau taa tiaronkonya. Tîîse tiaronkon karau mararî, tîîse morî pe toꞌ esepuꞌtîꞌpî.

Îꞌ TAA PAAPA MAIMUYA: “Tiwin pîꞌ uyewankon tîîse uurînîkon esewankonoꞌmantoꞌ epuꞌtîiya.” — Provérbios 14:10, TNM.

• Tiaron pensa, tiaronkon pemonkonyamîꞌ mararî pra mersin enîrî, maiꞌ enîrî moropai drogas (drugs) yenyakaꞌma nîrî esewankonoꞌmantoꞌ ataretîꞌkatoꞌpe. Tîîse, mîrîrîkonya ipîra toꞌ manenpa. Esewankonoꞌmantoꞌ atarima eserîke toꞌ wanî taise, tîîse ipîra imakuiꞌpî pe mîrîrî wanî toꞌ pia. Morîkon konekakî esewankonoꞌmantoꞌ etîꞌkatoꞌpe.

Îꞌ TAA PAAPA MAIMUYA: “Nura kupî pîꞌ koꞌmannîtoꞌ rumakapaiꞌnîkon.” — 2 Coríntios 7:1.

• Tiaron pensa amîrî esewankonoꞌma, îꞌ wani pra rî wanî, tîîse, tiaron pensa inîꞌ panpîꞌ konekaya eꞌpainon esewankonoꞌmatoꞌ atarimatoꞌpe. Mararî pra pemonkonyamîꞌya mîrîrî konekaꞌpî, mîrîrî wanîꞌpî morî pe puꞌkuru toꞌ pia.

• Ayonpakon koreꞌta eꞌkî moropai amenankon ayonpakon yuwaꞌkî, moropai amenankon yuwasaꞌya amîrî esenupapa, mîrîrîkonya apîikaꞌtî eꞌpainon morî pe amîrî esepuꞌtoꞌpe.

• Amîrî nîsaꞌnama saꞌmantaꞌpî tîpoꞌ aakoꞌmantoꞌ etinyakaꞌma eꞌpainon tînîn pîꞌ tînîn pîꞌ. Epuꞌtîya eꞌpainon tiaron pensa morî pe amîrî esepuꞌtî, esewankonoꞌma manniꞌ yentai. Tînîn pîꞌ tînîn pîꞌ mori pe panpîꞌ amîrî ena.

Îꞌ TAA PAAPA MAIMUYA: “Moro wanî weiyu tamîꞌnawîrî ikuꞌtoꞌpe. . . Weiyu wanî moro karawannîtoꞌ moropai siranîtoꞌ; weiyu wanî esewankonoꞌmatoꞌ moropai manannîtoꞌ.” — Eclesiastes 3:1, 4.

• Morî pe inîꞌ panpîꞌ esepuꞌtî ya yai, morî pe aakoꞌmantoꞌ konekakî wei kaisarî.

• Wenunkî morî pe, esenyakaꞌmakî morî pe moropai ayesaꞌ yenyakaꞌma nîrî, mîrîrîkonya apîikaꞌtî eꞌpainon morî pe aakoꞌmantoꞌ awennapotoꞌpe inîꞌrî.

• Îꞌ rî awakîri pe konekaya manniꞌ, mîrîrî konekakî, maasa pra mîrîrîya apîikaꞌtî eꞌpainon amîrî esewankonoꞌma namai.

Îꞌ TAA PAAPA MAIMUYA: “Mîîkîrî esenumenka pepîn aakoꞌmantoꞌ weiyukon pîꞌ, maasa pra Paapaya mîîkîrî yewan kureꞌne yausinpa wei kaisarî.” — Eclesiastes 5:20.

• Kaꞌneꞌ pe imenka mararî pra pemonkonyamîꞌya toꞌ nîsaꞌnamaꞌpî saꞌmantaꞌpî tîpo, tîîse mîrîrî tîpo, morî pe pra tîmenkaꞌpîkon eraꞌma toꞌya.

• Amîrî nîsaꞌnamaꞌpî saꞌmantaꞌpî tîpo, kaꞌneꞌ peꞌ ayewîꞌ tapai amoꞌta eꞌpai pra man, amîrî esenyakaꞌmatoꞌ inyakanma eꞌpai pra man kaꞌneꞌ pe, moropai tuꞌke amîrî nîsaꞌnama saꞌmantaꞌpî itemannekon ipaꞌpî eꞌpai pra man nîrî kaꞌneꞌ pe.

Îꞌ TAA PAAPA MAIMUYA: “Morî pe esenumenka epuꞌnen pe tîwesen îꞌ konekaiya amenrî, mîrîrî yeꞌnen morî pe yapisîiya mîrîrî pîkînsaꞌ, tîîse anîꞌ kaꞌneꞌ pe esenumenka îꞌ konekaiya amenrî, îꞌ ton pra ena.” — Provérbios 21:5.

• Mararî pra pemonkonyamîꞌya imenka îꞌ koneka toꞌya toꞌ nîsaꞌnamaꞌpî saꞌmantaꞌpî toꞌ enpanatatoꞌpe, mîrîrî wanî morî pe toꞌ pia.

• Tekatonkon moꞌkapîsaꞌ yannuku amîrîya awakîri pe taise moropai amîrî nîsaꞌnamaꞌpî saꞌmantaꞌpî pantoni pîꞌ, mîrîrî pîꞌ taise imenukaya eꞌpainon nîrî awanî wei kaisarî kaareta pona.

• Morîkon yapiꞌsaꞌya amîrî nîsaꞌnamaꞌpî saꞌmantaꞌpî manniꞌ piapai, mîrîrîkon emikakî. Mîrîrî tîpo, morî pe amîrî esepuꞌtî ya, tiaron pensa mîrîrîkon eraꞌmaya eꞌpainon tiaron pensa amîrî nîsaꞌnamaꞌpî saꞌmantaꞌpî pîꞌ awenpanatapa.

Îꞌ TAA PAAPA MAIMUYA: “Penaronkon weiyu yai pîꞌ enpanatakî.” — Deuteronômio 32:7.

• Amîrî esemaꞌtî tiaron pataꞌseꞌ pona attî pîꞌ esenumenkakî.

• Mararî pra weiyukon tanne esemaꞌtî eserîke pra wanî ya, îꞌ wani pra rî wanî. Ayonpakon yarakkîrî taise awanî tiwin, asakîꞌne wei kaisarî, amenan pataꞌseꞌ ta attî eꞌpainon moropai attî eꞌpainon nîrî eꞌpîi eren ya moropai parana ya taise.

• Mîrîrî wanî tîponarî aapia taise, tîîse mîrîrî konekaya ya, mîrîrîya apîikaꞌtî eꞌpainon amîrî esewankonoꞌma namai.

Îꞌ TAA PAAPA MAIMUYA: “Aaseꞌkon see upokonpe keren pona erîꞌkaꞌseꞌnîkon.” — Marcos 6:31.

• Îꞌ pensa tiaronkon pîikaꞌtîya ya, amîrî eꞌpîikaꞌtî nîrî.

• Tiaronkon pîikaꞌtîya eꞌpainon, îꞌ pensa toꞌ esewankonoꞌma yai amîrî nîsaꞌnamaꞌpî saꞌmantaꞌpî pîkînsaꞌ. Ayonpakon moropai apemonkonoyamîꞌ eseurîma eꞌpai toꞌ wanî taise amîrî yarakkîrî, maasa pra amîrîya epuꞌtî eꞌpainon îꞌ kaiꞌma toꞌ esepuꞌtî.

• Tiaronkon pîikaꞌtîsaꞌya ya moropai tiaronkon yausinpasaꞌya ya, mîrîrîkonya apîikaꞌtî eꞌpainon nîrî amîrî atausinpatoꞌpe.

Îꞌ TAA PAAPA MAIMUYA: “Anîꞌya itîîsaꞌ ya mîîkîrî wanî taatausinpai manniꞌ intîrî yapisîꞌpîtîpon atausinpa yentai.” — Atos 20:35.

• Îꞌ pensa amîrî nîsaꞌnama saꞌmantaꞌpî yai, mîrîrîya apîikaꞌtî eꞌpainon îꞌ wanî morî pe panpîꞌ aapia epuꞌtîpa.

• Îꞌ pensa amîrî nîsaꞌnamaꞌpî saꞌmantaꞌpî pîꞌ amîrî esewankonoꞌma ya, emîꞌpamîkî moropai esenumenkakî ayeseru pîꞌ moropai îꞌ konekaya eꞌpainon aakoꞌmantoꞌ pîꞌ.

• Etinyakaꞌma eꞌpai nan? Mîrîrî konekakî, îꞌ wanî morî pe panpîꞌ aapia konekapa.

Îꞌ TAA PAAPA MAIMUYA: “Morî pe panpîꞌ wanî teesewankonoꞌmakon yewiꞌ ta wîtîn ya, toꞌ nîsaꞌnama saꞌmantaꞌpî yeꞌnen; mîrîrî wanî festarî pîꞌ tîweꞌsanon yewîꞌ ta wîtîn yentai. Maasa maꞌre tamîꞌnawîronkon warayoꞌkon saꞌmanta, moropai enen tîîkoꞌmansen esenumenka eꞌpai wanî mîrîrî pîꞌ.” — Eclesiastes 7:2.

Tamîꞌnawîrî konekaya manniꞌ ya apîikaꞌtî eꞌpainon esewankonoꞌma namai, tîîse, tiaron pensa amîrî esewankonoꞌma eꞌpainon nîrî. Tîîse, inkamoro nîsaꞌnama saꞌmantaꞌpî tîpoꞌ, seeniꞌkon 12 kaisarîkon panamantoꞌkon etaꞌpî toꞌya, mîrîrîkonya toꞌ pîikaꞌtîꞌpî moropai toꞌ yausinpaꞌpî. Seeniꞌkon 12 kaisarîkon panamantoꞌkon moropai mararî pra tiaronkon panamantoꞌkonya apîikaꞌtî eꞌpainon amîrî esewankonoꞌma namai amîrî nîsaꞌnama saꞌmantaꞌpî pîꞌ. Tîîse, seeniꞌkon 12 kaisarîkon panamantoꞌkon etasaꞌya ya, morî pe panpîꞌ amîrî esepuꞌtî eꞌpainon.