“Unoꞌpî Sophia a saꞌmantaꞌpî kureꞌne paran pîꞌ aakoꞌmanpîsaꞌ tanne. 39 konoꞌ kaisarî anna eꞌmarimasaꞌ tanne mîrîrî eꞌkupîꞌpî. Uyonpayamîꞌya mararî pra upîikaꞌtîꞌpî. Tîîse, tiwin konoꞌ koꞌmanpîsaꞌ tanne, esewankonoꞌmai koꞌmamîꞌpî. Tiaron pensa morî pe uurî esepuꞌtîꞌpî moropai tiaron pensa yairî maꞌre uurî eseputîꞌpî. Îꞌ pîꞌ uurî esepuꞌtî etinyakaꞌma eꞌpîtîꞌpî kaꞌneꞌ pe. Sîrîrî tîpose eseurîwîꞌne konoꞌ esuwaꞌkasaꞌ tanne, tiaron pensa kureꞌne yairî maꞌre uurî wanî.” — Kostas.

Saꞌnamaya manniꞌ pemonkon saꞌmantaꞌpî? Inna taꞌpî amîrîya ya, îꞌ pîꞌ Kostas esepuꞌtîꞌpî, mîrîrî epuꞌtî eꞌpai amîrî wanî. Îꞌ pensa tînoꞌpî kenan, tinyo kenan, moropai yonpakon saꞌmantasaꞌ ya, kureꞌne esewankonoꞌman. Inîꞌ panpîꞌ esenupakoikonya mîrîrîkon epuꞌtî pîꞌ man. Psicologia kaaretari wanî, Estados Unidos po (Psicologia kaaretari eseꞌ: The American Journal of Psychiatry, United States), mîrîrîya taa pîꞌ man, îꞌ pensa uurînîkonya saꞌnama manniꞌ saꞌmanta ya, mîrîrî wanî saꞌme ipîra uurînîkon pia. Seeniꞌ esewankonoꞌmantoꞌ yapîtanîpîya tanne, amîrî esenumenka taise: ‘Oꞌnon pîkîrî mîrîrî panpe uurî esepuꞌtî? Taatausinpai naka uurî wanî inîꞌrî? Îꞌ konekauya eꞌpainon morî pe uurî esepuꞌtoꞌpe?’

Seeniꞌ kaareta Tîwarî Eꞌkî! wenai, seeniꞌ ekaranmaposaꞌkon yuukusaꞌ man. Asaꞌnamaꞌpî pemonkon saꞌmantaꞌpî yeꞌnen, amîrî esewankonoꞌma pîꞌ nai? Tiaron esenupantoꞌya yenpo oꞌnon yeꞌka pe tiaronkon pemonkonyamîꞌ wanî toꞌ wakîri saꞌmantaꞌpî yeꞌnen, moropai oꞌnon yeꞌka pe saꞌme eꞌtoꞌ yapîtanîpî toꞌya. Tiaron esenupantoꞌya yenpo îꞌ konekaya esewankonoꞌma namai.

Seeniꞌ kaaretaya amîrînîkon yausinpa moropai mîrîrîya apîikaꞌtîkon maasa saꞌme wanî tanne mîrîrî yuꞌse anna man.