ESEWANKONOꞌMATOꞌ PÎꞌ EPUꞌNENAN ESENUPA KUREꞌNE, Îꞌ PENSA ANÎꞌ NÎSAꞌNAMA SAꞌMANTASAꞌ YAI. Tîîse, îꞌ kaiꞌma seeniꞌ kaareta eraꞌma pîꞌ anna man aasîrî, îꞌ taasaꞌ epuꞌnenanya manniꞌ wanî morî pe panpîꞌ, Paapa Maimuya taasaꞌ manniꞌ warantî. Mîrîrîya yenpo morî panamatoꞌkon man seeniꞌ epuꞌnen penaronkon kaaretarî ya, mîrîrî eꞌkupî pena patapai sîrîrî tîpose. Tîîse morî panamatoꞌkon naka wanî neken Paapa Maimu ya? Kanne. Mararî pra yekarekon man moroni, mîrîrîkon eporî eserîke pra uurînîkon wanî tiaron pataꞌseꞌ ta. Seeniꞌ yekarekonya anîꞌ yausinpa eꞌpainon îꞌ pensa pemonkon nîsaꞌnama saꞌmantaꞌpî ya.

• Uurînîkon nîsaꞌnama saꞌmantaꞌsan eꞌtarumaꞌtî rîn sîrîrî

  Paapa Maimuya taa pîꞌ man “îꞌ epuꞌtî saꞌmantaꞌsanya pepîn” moropai “toꞌ esenumenkatoꞌ eꞌtîꞌka” nîrî. (Eclesiastes 9:5; Salmo 146:4) Mîrîrî yeꞌnen, Paapa Maimuya taa pîꞌ man saꞌmantantoꞌ wanî uurînîkon wetun panpe. — João 11:11.

• Paapaya uurînîkon saꞌnama kureꞌne. Mîrîrî pîꞌ inna taa uurînîkonya, mîrîrîya uurînîkon yausinpa

  Paapa Maimuya taa pîꞌ man: “Paapa Jeováya a yairon kuꞌnenan eraꞌma, moropai inkamoro etaiya eꞌpîikaꞌtîntoꞌ esaꞌtî toꞌya ya meruntî ke.” (Salmo 34:15) Esenumenka eꞌpai pra uurînîkon wanî epîremantoꞌ wenai, mîrîrî wanî eserîke pra man uurînîkon esenumenkatoꞌ neken ekaremeꞌtoꞌpe Paapa pîꞌ. Tîîse, îꞌ pensa uurînîkon esepuꞌtî manniꞌ ekaremekî uurînîkonya Paapa pîꞌ, mîrîrîya uurînîkon pîikaꞌtî itonpa pe eꞌnîtoꞌpe.

• Morîkon iipî manniꞌ inîmîkî uurînîkonya

  Esenumenkakî îꞌ kaiꞌma uurînîkon wanî taatausinpai tarî Pata po, îꞌ pensa uurînîkon nîsaꞌnama saꞌmantaꞌpî eꞌmîꞌsaꞌka kupî sîrîrî! Mîrîrî ekaremekî Paapa Maimuya tuꞌke iteꞌka. Eeseurîma nîrî îꞌ kaiꞌma pemonkonyamîꞌ koꞌmamî Pata po, îꞌ pensa mîrîrî eꞌkupî yai: “Mîîkîrî Paapaya toꞌ karawatoꞌ yaꞌmananîpî toꞌ yenu parukon inîꞌ toꞌ karau namai. Tarî anîꞌ saꞌmanta pepîn. Anîꞌ esewankonoꞌma pepîn. Anîꞌ karau pepîn inîꞌrî. Anîꞌrî neꞌneꞌ moronka pepîn.”—Apocalipse 21:3, 4.

Innape Jeová kuꞌnenan man tuꞌke, seeniꞌ imenukasaꞌ kupî toꞌya innape nîrî. Mîrîrîya toꞌ pîikaꞌtî meruntî ke toꞌ eꞌtoꞌpe, toꞌ nîsaꞌnama saꞌmantaꞌpî yeꞌnen. Ann inyo saꞌmantaꞌpî, 65 konoꞌ kaisarî eꞌmaritimasaꞌ wanî tanne. Taꞌpîiya: “Paapa Maimuya taa pîꞌ man uyonpakon saꞌmantaꞌpî eꞌtarumaꞌtî rîn moropai toꞌ pîꞌmîꞌsaꞌkaiya amenrî toꞌ koꞌmantoꞌpe inîꞌrî. Îꞌ pensa unyo saꞌmantaꞌpî manniꞌ pîꞌ uurî esenumenka, îꞌ taasaꞌ Paapaya manniꞌ pîꞌ enpanata. Mîrîrîya upîikaꞌtî kureꞌne esewankonoꞌmatoꞌ pîꞌ yapîtanîꞌtoꞌpeuya!”

Tinaya taꞌpî: “Timo saꞌmantaꞌpî patapai, Paapaya upîikaꞌtî epuꞌtî pîꞌ wai. Mîrîrîya uyewankonoꞌma kureꞌne, tîîse Jeováya upîikaꞌtî mararî pra mîrîrî yapîtanîꞌtoꞌpeuya. Paapa Maimuya taa pîꞌ man saꞌmantaꞌsan pîꞌmîꞌsaꞌka Paapaya toꞌ koꞌmantoꞌpe inîꞌrî. Mîrîrî eꞌkupî epuꞌtî pîꞌ wai! Innape ikupîuya! Mîrîrîya meruntîrî ton tîrî uupia, unyo eraꞌmauya inîꞌrî, mîîkîrî pîꞌmîꞌsaꞌka Paapaya tîpose.

Mîrîrî panpe tuꞌke pemonkonyamîꞌ esepuꞌtî, Paapa Maimu pîꞌ inna taa toꞌya yeꞌnen. Amîrî esenumenka taise: “Îꞌ taasaꞌ Paapa Maimuya manniꞌ morî pe puꞌkuru wanî! Innape naka ikupîuya, kanne kaꞌrî?” Mîrîrî panpe amîrî esenumenka, eꞌmaiꞌpe amîrî esenupa eꞌpainon, eraꞌmaꞌtoꞌpe îꞌ waniꞌ awanî yeꞌnen îꞌ taasaꞌ Paapa Maimuya manniꞌ pîꞌ moropai ipanamatoꞌkon pîꞌ inna taaya eꞌpainon nîrî. Amîrîya epuꞌtî eꞌpainon Paapa Maimuya tîweꞌtarumaꞌtîsanon pîikaꞌtî morî pe panpîꞌ, toꞌ nîsaꞌnama saꞌmantaꞌpî yeꞌnen.

Pantonkon eraꞌmakî site jw.org wenai.

OꞌNON YEꞌKA PE SAꞌMANTAꞌSAN WANÎ?

MORÎ YEKARE ANETAPAI NAN?