More pata pai uyonpayamîꞌ wîtîpîtîꞌpî yuꞌ ya moropai ikuꞌpî ka anna pataꞌseꞌ Jyväskylä, Finlândia po. Oꞌmaꞌkon nîrî eꞌpîtîꞌpî uurî wakîri pe. Pisanayamîꞌ moropai arinmarakayamîꞌ yapipîtîꞌpîuya. Uurî esewankonoꞌmapîtîꞌpî oꞌmaꞌkon tekînkon tarumaꞌtî pemonkonyamîꞌya eraꞌmauya yai. Mîrîrî tîpo, uurî esenyakaꞌma iipiatîꞌpî oꞌmaꞌkon eraꞌmanenan yarakkîrî, inkamoro esenumenkapîtîꞌpî uurî panpe.

Anna esenyakaꞌmapîtîꞌpî mararî pra oꞌmaꞌkon tonpe. Anna asarîpîtîꞌpî pemonkonyamîꞌ pia, inkamoro pîꞌ taapîtîꞌpî annaya morî pe oꞌmaꞌkon eraꞌmatoꞌpe toꞌya. Mîrîrî kuꞌsa toꞌya pra wanî yeꞌnen, sokoroꞌ pe anna eꞌpîtîꞌpî toꞌ pî. Pata esaꞌnon wakîri pe pra mîrîrî wanîꞌpî, mîrîrî yeꞌnen uurî rakkamapîtîꞌpî toꞌya tuꞌke iteꞌka.

Uurî esewankonoꞌmapîtîꞌpî nîrî eꞌtarumaꞌtîntoꞌkon wanî yeꞌnen Pata po. Mîrîrî yeꞌnen esenyakaꞌmai uttîꞌpî Anistia Internacional (Amnesty International) moropai Greenpeace pokonpe. Mîrîrî wanîꞌpî morî pe puꞌkuru uupia. Uurî esenyakamapîtîꞌpî mararî pra îꞌ tonpînon tonpe.

Tîîse eraꞌmaꞌpîuya uurîya Pata inkaꞌma eserîke pra wanîꞌpî. Tiaron pensa, mararî rî neken eꞌtarumaꞌtîntoꞌ tîꞌkapîtîꞌpî annaya, tîîse kureꞌnankon eꞌtarumaꞌtîntoꞌ enapîtîꞌpî pîra tîꞌka eserîke pra. Imakuiꞌpî wanîꞌpî Pata poro moropai mîrîrî inkaꞌma yuꞌse pra pemonkonyamîꞌ wanîꞌpî. Îꞌ konekauya eserîke pra uurî wanîꞌpî.

Uurî esewankonoꞌmapîtîꞌpî. Paapa pîꞌ moropai tîmaimu pîꞌ uurî esenumenka iipiaꞌtîꞌpî. Paapa Maimu pîꞌ uurî esenupaꞌpî Jeová Maimu Ekaremeꞌnenan yarakkîrî. Morî pe inkamoro wanîꞌpî moropai pemonkonyamîꞌ pîꞌ toꞌ esenumenkapîtîꞌpî, mîrîrî wanîꞌpî uurî wakîri pe. Tîîse maasa uyeseru moꞌtanîpai pra uurî wanîꞌpî. Tîîse, mîrîrî tîpo, uurî esenumenkatoꞌ raꞌtîꞌpîuya.

Paapa Maimu yapisîꞌpîuya moropai emenukasaꞌ eraꞌmapîuya. Mîrîrîya ukupîꞌpî tîîwanmîra. Mararî pra morî imenukasaꞌkon eporîꞌpîuya, oꞌmaꞌkon, tekînkon eraꞌmatoꞌpe morî pe. Provérbios 12:10 ya taꞌpî man “morîkon pemonkonyamîꞌ tekînkon, oꞌmaꞌkon eraꞌma eꞌpai wanî”. (TNM) Eraꞌmaꞌpîuya nîrî eꞌtarumaꞌtîntoꞌkon wanîꞌ manniꞌ Pata po, mîrîrîkon kuꞌnen rîn Paapa. Tîîse, uurînîkon eꞌtarumaꞌtî Paapa maimu yawîrî pra uurînîkon wanî yeꞌnen. Jeováya uurînîkon saꞌnama moropai teesemiꞌtapai pra awanî, mîrîrî etasaꞌuya pe, uurî tausinapꞌpî. — Salmo 103:8-14.

Mîrîrî yai, mîrîrî kaareta esaꞌtîꞌpîuya Îꞌ Yenupa Paapa Maimuya? Mîrîrî tîpo Jeová Maimu Ekaremeꞌnenan iipîꞌpî uyewîꞌ ta moropai anna esenupa iipiaꞌtîꞌpî Paapa Maimu pîꞌ toꞌ yarakkîrî. Emurukuntîntoꞌ Pataꞌseꞌ ta uurî wîtîpîtîꞌpî. Yairon Paapa Maimu ewonmîꞌpî uyewan ya.

Paapa Maimuya upîikaꞌtîꞌpî uyeseru inkaꞌmatoꞌpe. Kawayu moropai mai wuku rumakaꞌpîuya. Upon inkaꞌmaꞌpîuya moropai imakuiꞌpî pe uurî eseurîmantoꞌ irumakaꞌpîuya. Uyeseru inkaꞌmaꞌpîuya morî pe Pata esaꞌnon tonpe. (Romanos 13:1) Imakuiꞌpî uyeseru rumakaꞌpîuya, nura pe awanî yeꞌnen.

Uurîya epuꞌtîꞌpî esenyakaꞌmatoꞌ wanîꞌpî morî pe pemonkonyamîꞌ tonpe moropai oꞌmaꞌkon tonpe, tîîse toꞌ eꞌtarumaꞌtîntoꞌ tîꞌkauya eserîke pra wanîꞌpî. Saꞌme wanîꞌpî mîrîrî esenyakaꞌmatoꞌ irumakauya pe. Tîîse epuꞌtîꞌpîuya tamîꞌnawîronkon pemonkonyamîꞌ esaꞌ pe Paapa wanî yai, tamîꞌnawîrî eꞌtarumaꞌtîntoꞌ tîꞌkaiya Pata poro. Mîrîrî yeꞌnen, pemonkonyamîꞌ pîikaꞌtî yuꞌse uurî wanîꞌpî toꞌ esenupatoꞌpe îꞌ koneka Paapaya inkamoronkon tonpe. — Mateus 6:33.

Uurî esenumenkapîtîꞌpî iraurî, pemonkonyamîꞌ wanîꞌpî morî pe moropai imakuiꞌsan pe. Imakuiꞌsan winîkîi ekoꞌrema yuꞌse uurî wanîꞌpî. Tîîse Paapa Maimuya upîikaꞌtîꞌpî inkamoro yewanmîratoꞌpe pra. Tarîpai, saꞌnamatoꞌ yenpouya tamîꞌnawîronkon pîꞌ. (Mateus 5:44) Mîrîrî saꞌnamatoꞌ yenpouya, îꞌ pensa uurî eseurîma yai pemonkonyamîꞌ yarakkîrî morîkon koneka Paapaya uurînîkon esaꞌpe tîwanî yai. Uurî tausinpasa man seeniꞌ esenyakaꞌmantoꞌya tîîwanmîn moropai tausinpantoꞌ tîrîiya yeꞌnen pemonkonyamîꞌ pia.

Tîîwanmîra uurî esewankonoꞌmatoꞌkon rumakaꞌpîuya yeꞌnen Jeová yenya. Epuꞌtî pîꞌ wai oꞌmaꞌkon moropai pemonkonyamîꞌ eꞌtarumaꞌtîtoꞌ ton nîmîsaꞌ anna konekatîponya pra man moropai Pata moꞌtanîpîtoꞌpe imakuiꞌsanya nîmîiya pepîn tiwin kin. (Isaías 11:1-9) Tausinpasa wai mararî pra yairî Paapa Maimu epuꞌtîuya yeꞌnen moropai tiaronkon pîikaꞌtîuya inna taatoꞌpe toꞌya nîrî mîrîrî pîꞌ. Sîrîrîpe, eraꞌma pîꞌ wai Pata moꞌtanîꞌpîuya pepîn.