Kanne. Penaron Paapa Maimu imenukasaꞌya yenpo mîrîrî yakaꞌmasaꞌ pra man, yairî imenukasaꞌ koꞌmamî, pena imenukasaꞌ pe wanî tanne, mîrîrî koꞌmamî morî pe.

 Penaron Paapa Maimu imenukaꞌpîsaꞌ eporîꞌpî toꞌya tuꞌke. Tîponarî tiaronkon wanîꞌpî, mîrîrîya yenpo, tiaron pensa morî pe Paapa Maimu imenukapîtîꞌpî toꞌya moropai tiaron pensa morî pe pra. Tiaron pensa, wani pra wanî, epuꞌtî eꞌpainon. Tîîse, tiaron pensa imakuiꞌpî pe wanî ipîra, maasa pra Paapa esenumenkatoꞌ yakaꞌmaꞌpî toꞌya yeꞌnen. Asakîꞌne kaisarî panton eraꞌmakî:

1.   1 João 5:7 pî, tiaronkon eseurîma penaron Paapa Maimu pî: “Kaꞌ po, Paapa, Imaimu moropai Morî Yekaton wanî: seeni eseurîwîꞌnankon wanî tiwinan pe”. Tîîse, mîrîrî panpe imenukasaꞌ pra wanîꞌpî, mîrîrî yeꞌnen imenukasaꞌkon wanî inna taatoꞌpe, mîrîrî imenukasaꞌ tîpo mîrîrî menukaꞌpî toꞌya mîrîrî panpe. * Mîrîrî yeꞌnen, seeni maikon imenukasaꞌ moꞌkaꞌpî toꞌya Paapa Maimu yapai.

2.   Paapa eseꞌ eraꞌma uurînîkonya, mararî pra iteꞌka pena patapai aweꞌmenukasaꞌ man Paapa Maimuya. Maasa mîrîrî panpe wanî tanne Paapa Maimu imenukanenanya iteseꞌ moꞌkaꞌpî moropai inkamaꞌpî toꞌya “Yepotîrî pe” moropai “Paapa pe”.

 Sîrîrî tîpose, imenukasaꞌkon eraꞌma uurînîkonya imakuiꞌpî pe, mîrîrî imenukasaꞌ toꞌya eporî uurînîkonya. * Îꞌ pensa seeni imenukasaꞌkon eraꞌma uurînîkonya ya, oꞌnon yeꞌka pe Paapa Maimu imenukasaꞌ epuꞌtî annaya, yairon pe wanî yairon pe pra wanî?

•   Hebraico pe Imenukasaꞌkon pî eseurîman (mîrîrî nîrî esaꞌtî “Penaroꞌ Paapa Maimu pe”), inîꞌ panpîꞌ esenupakoi William Henry Greenya taꞌpî: “Uurînîkonya taa eꞌpainon mîrîrî imenukasaꞌ wanî yairon pe puꞌkuru, tiaron kaaretakon yentai.”

•   Grego pe Imenukasaꞌkon pî eseurîman (mîrîrî nîrî esaꞌtî “Amenanꞌ pe Paapa Maimu imenukasaꞌ”), inîꞌ panpîꞌ esenupakoi Paapa Maimu pî Frederick Bruceya imenukaꞌpî: “Îꞌ kon yairon pe imenukasaꞌ manniꞌya yenpo pî man, Amenan pe Paapa Maimu imenukasaꞌ man yairî, mararî pra pemonkonyamîꞌya inna taa tiaron kaaretakon pî, tîîse Amenanꞌ pe Paapa Maimu imenukasaꞌ wanî tiaron kaaretakon yentai.”

•   Sir Frederic Kenyon, inîꞌ panpîꞌ esenupaꞌkoi Paapa Maimu pî, mîîkîrî eseurîmaꞌpî “Paapa Maimu yapisîya ayenya ke moropai eseurîma aranne pe pra yairî mîrîrî pî, pena patapai pemonkonyamîꞌya Paapa Maimu tîrîꞌpî tiaronkon pia, tîîse itekare koꞌmamî mîrîrî panpe, tiwin kin mîrîrî moꞌtasaꞌ pra man”.

•   Mannankan Paapa Maimu menukatîponkon, judeuyamîꞌ moropai Paapa pemonkonoyamîꞌya imenukaꞌpî Paapa Maimu ya, îꞌ imakuiꞌpî kupî tîponkon Paapa pemonkonoyamîꞌ pî. * (Números 20:12; 2 Samuel 11:2-4; Gálatas 2:11-14) Inkamoroya nîrî imenukaꞌpî judeuyamîꞌ pantoni pî, Paapa yawîrî pepîn tîweꞌsanon pî moropai inkamoroya nîrî imenukaꞌpî seruꞌyeꞌ pe warayoꞌkonya yenupatoꞌkon pî. (Oseias 4:2; Malaquias 2:8, 9; Mateus 23:8, 9; 1 João 5:21) Yairon menukaꞌpî toꞌya moropai Paapa Maimu saꞌnamaꞌpî toꞌya, mîrîrî yeꞌnen inna taa eꞌpai man toꞌ pî.

•   Paapaya naka tîmaimu aweꞌmenukasaꞌ manniꞌ pîikaꞌtîꞌpî yairî aakoꞌmantoꞌpe? * (Isaías 40:8; 1 Pedro 1:24, 25) Paapa Maimuya pemonkonyamîꞌ pîikaꞌtî yuꞌse Jeová wanîꞌpî pena moropai sîrîrîpe nîrî, mîrîrîya pemonkonyamîꞌ pîikaꞌtî yuꞌse man. (1 Coríntios 10:11) Mîrîrî yeꞌnen, “Pena tamîꞌnawîrî aweꞌmenukasaꞌ manniꞌ Paapa Maimu po, mîrîrî wanî uyenupanenkon pe. Inîmîkî pîꞌ eꞌnîtoꞌ ton tîrîiya. Moropai atausinpantoꞌ ton tîrîiya. Îꞌ taasaꞌ tîuya kupî Paapaya nîmîkî pîꞌ koꞌmannî. Mîrîrî yeꞌnen tamîꞌnawîrî yapîtanîpî eserîke awanî.” — Romanos 15:4.

•   Hebraico pe aweꞌmenukasaꞌkon pî Jesus eseurîmaꞌpî moropai inenupaꞌsan nîrî eseurîmaꞌpî mîrîrî pî moropai inkamoroya innape ikupîꞌpî yairî pena aweꞌmenukasaꞌ wanîꞌpî panpe. — Lucas 4:16-21; Atos 17:1-3.