Bakaleho ba Yehova mu Bulgaria banazezama na cipangi ca kulongesa bakwabo bya Njambi na Lijwi lyendi, Mbimbiliya. Ngeci, kushwa mu mwaka wa 2000, Bakaleho ba Yehova ba mu mafuti eka bakai na kukwasa bandolome na bandokazi babo mu Bulgaria. Bukalu muka bubakaliwana nabwo baje bakai na kupangela ku mafuti eka? Bika twendekela ngwetu bakalingi mwamubwa kuya na kukwasa bakwabo? Tuzibeni bibatuleka bandolome na bandokazi betu baje banakapangela ku Bulgaria.

 Darren wa ku England wendekele ngwendi: “Twalyakelele cilengo ca kukapangela ku mitambela ya mu mafuti eka kuje kwakele bujene bwa baka-kwambulula. Munjambatele Dawn twajalukilile ku London kukalongesa banu baje bakendeka ndaka ya Cirussia, Mbimbiliya. Ha bisimbu bimo twakele na kushaka kuya na kukambulwila ku lifuti lyeka, oloni kuli byuma bimo byakele na kutwonowesa. Twashakele kwonowa kushulisilila cilengo cetu, oloni kabusamba ketu umo watwanukisile ngwendi byuma byatengulukile mu buyoye bwetu, co twasa kuya.” Ndolome Darren na ndokazi Dawn bashangumukile kutonda lifuti kuje kwakele bujene bwa baka-kulongesa Mbimbiliya mangana bakakwase. Mu 2011 bajalukilile ku Bulgaria.

 Kubwahelela kubakakala nakwo baje bakai na kwambulwila ku mafuti eka kunashongangeya baje kubakele na biyongola bya kulinga ngoco, balinge ngoco. Ndokazi Giada uje wakele mu Italy na munalume wendi Luca ngwendi: “Njaliwanene na baka-kwambulula ba ntwima baje bakele na kupangela ku South America na mu Africa. Njabwahelelele manene munjabamwene banabwahelela nomwo mubanjilekele byuma bibaliwanene nabyo. Oku kwanjilingisile njilyakele bilengo byeka.”

 Ndolome Tomasz na ndokazi Veronika batundile mu Czech Republic na kuya ku Bulgaria mu 2015 hamo lika na bana babali ba Klara na Mathias. Bika byabalingisile bajaluke? Ndolome Tomasz ngwendi: “Twasinganyekesesele hali i bandolome na bandokazi hamo lika na bandokazi betu baje bajalukilile ku mafuti eka, co twasinganyekesesele ha byuma byabibwa bibaliwanene nabyo. Twabwahelelele manene mutwabamwene banabwahelela, co twasimutwiiyeho na naanga.” Ei naanga ili na kupangela ku Bulgaria mu mbonge ya Montana.

 Ndokazi Linda nendi wajalukilile ku Bulgaria. Wendekele ngwendi: “Myaka imo kunima njaile ku Ecuador, njakaliwanene na bandolome na bandokazi baje baile na kwambulwilako. Oku kwanjilingisile njisinganyeke ngwange nange tangwa njikapangela kuje kuli bujene.” Ndolome Petteri na muka-limbo lyendi Nadja ba ku Finland nabo basinganyekesesele ha myanja ya bakwabo. Bendekele ngwabo: “Mu cikungulukilo cetu mwakele bandolome na bandokazi baje bakapangelele ku myela yeka kuje kwakele bujene bwa baka-kwambulula. Bakendeka bibanalikuwu mu kwambulwila ku myela yeka.”

 Baje bashaka kukapangela ku mafuti eka banapande kulibwahesela mwamubwa. (Luka 14:28-30) Ndokazi Nele wa ku Belgium ngwendi: “Munjashangumukile kusinganyeka bya kukapangela ku lifuti lyeka, njalombelele kuli Yehova na kutondesesa biñanda bya mu mabulu etu bije byendeka ha kukapangela ku mafuti eka. Njatandele ebi biñanda na kumona binjapandele kulibwahesela simbu kanda njiye.”

 Ndolome Kristian na muka-limbo lyendi Irmina ba ku Poland banapangela mu Bulgaria ha myaka ya kutubakana 9. Banangukile ngwabo kulikwatasana na cibunga cije cakele na kupangesa ndaka ya Cibaugeliya mu Poland, kwabakwasele balibwahesele simbu kanda baye. Eci cibunga cabashongangeyeye na kubakwasa balilongese ije ndaka. Ndolome Kristian na muka-limbo lyendi Irmina bendekele ngwabo: “Twanangukile ngwetu nga tulyana kupanga cipangi, co tulimwena mwatukwasela Yehova ku mubila. Nga mulyana na kuleka Yehova ngweni ‘Yange unoye! Njitumeni!’ co amikwasa mulinge byuma bije kumwasinganyekele ngweni mwasa kubilinga.”—Isaya 6:8.

 Ndolome Reto na muka-limbo lyendi Cornelia ba ku Switzerland balyanene kwasiwisa buyoye bwabo mangana balibwahesele na kutulika bimbongo. Bendekele ngwabo: “Mwaka umo simbu kanda tujaluke, twakanengele ku Bulgaria ha calumingo cimo mangana tukamone mukwafwila. Twakaliwanene na bamishinali baje bakatulekele byuma byabibwa bitwapandele kulinga.” Ndolome Reto na ndokazi Cornelia bapangesele bibabanangwile, co banapangela ku Bulgaria ha myaka ya kutubakana 20.

 Baje bajalukila ku mafuti eka banapande kwizilila byuma byabiha, co lalo byabikalu. (Bilinga 16:9, 10; 1 Korinte 9:19-23) Bukalu bwakama bubakaliwana nabwo banu babangi bunapu kulilongesa ndaka yeka. Ndolome Luca itunabanga kusimutwiya wendekele ngwendi: “Twakele na kulikuwa kukumbulula kutundilila kwisi ya bimbunge ku biwano. Oloni kwatukaluwilile kukumbulula nambe cikumbululo cacasi mu ndaka ya Cibaugeliya. Twalingile bene ngwe banike baje balilongesa kwendeka. Nambe bikumbululo bya banike ba ku Bulgaria byakele na kuzibika mwamubwa kutubakana byetu.”

 Ndolome Ravil wa ku Germany ngwendi: “Kulilongesa ndaka yeka kwakele na kunjizeyesa. Oloni njakele na kulyendekesa ngwange, ‘Keti ulubale nga unalimbenje.’ Kunjesi kumona kulilongesa ndaka kupwa citele, oloni njananguka ngwange nayo inapu ngila ya kulemeselamo Yehova.”

 Ndokazi Linda itunabanga kusimutwiya ngwendi: “Kunjakele na cashu ca kulilongesa bindaka byeka. Ndaka ya Cibaugeliya yaikalu kulilongesayo, co ha bisimbu byabingi njasinganyekele kulikela kulilongesayo. Njakele na kuliziba buli munjakele na kwonowa kusimutwiya na banu na kuziba bibendeka. Ngeci njashangumukile kulinga cilongesa ca munu endi lika mu Ciswedishi. Mu kwita kwa simbu, bandolome na bandokazi banjikwasele njililongese ei ndaka.”

 Bukalu bukwabo bubakaliwana nabo baje bakajalukila ku lifuti lyeka inapu kulizia buli mwafwa ya kuseza babushoko na babusamba babo. Ndokazi Eva uje wajalukilile ku Bulgaria na munalume wendi Yannis wendekele ngwendi: “Hakulibanga, njakele na kuliziba manene buli. Ngeci twashangumukile ku simutwiya-simutwiya na babusamba na babushoko betu batwasezele kwimbo, co lalo twalikutile busamba na bandolome na bandokazi ba ku Bulgaria.”

 Kuli bukalu bukwabo lalo. Ndolome Robert na muka-limbo lyendi Liana baje bajalukilile ku Switzerland bendekele ngwabo: “Kulilongesa ndaka na cisemwa ca mu lifuti mutwajalukilile kwatukaluwilile, co lalo kwakele na kutonola manene.” Kumona byuma mu ngila inapande na kujeneka kwaka mana ku bukalu bwabo, kunakwasa ou ndolome na muka-limbo lyendi bapangele mu Bulgaria ha myaka 14.

 Ndokazi Lilly namwesa ngwendi kwambulwila kuje kuli bujene bwakama kwapwa kwakubwa manene. Wendekele ngwendi: “Kupangela mu lifuti lyeka kwanjikwasa njizibuke Yehova mungila ya kulitila. Kuzezama mu kukwasa bakwetu kwanjikwasa njikole ku sipilitu na kupwa wa kubwahelela mu kuyoya.” Muka-limbo lyendi Ravil wendekele ngwendi: “Kulizibuka na baka-Kristu ba mu mafuti a kuliseza-seza baje bakapanga mwamubwa cipangi ca kulongesa banu busunga bwa mu Mbimbiliya, kwapwa kwakubwa manene. Njalilongesa byabingi kuli bakebo.”

 Sipilitu ya kulyana ya bandolome na bandokazi babangi inakwasa manene mu cipangi ca kwambulula “muzimbu waubwa wa Bumwene . . . hasi hoshe.” (Mateu 24:14) Bandolome na bandokazi baje banalyana kukapangela ku Bulgaria, banalimwena Yehova mwanabanena byuma byoshe bibashaka, na kubakwasa kushulisilila matumbe abo.—Myaso 20:1-4.