Bryn uje wakala ku North Carolina, mu U.S.A., wapwa umo wa baje bali mu Komiti ya Kulizibasana na Baka-cipatela ije ikapangela hamo na baka-cipatela mu kukwasa babezi baje bapwa Bakaleho ba Yehova.

 Mu Bipatela byabingi kubakele na kutabesa banu kukobela na kukamona babezi, mwafwa ya mushongo wa COVID-19. Ngeci Bryn watuminine mukulunu wa baka-kutala bya kukwasa babezi bawane bukwasi bwa kutunda ku bulombelo bwabo oku bali ku cipatela. Walingile ngoco mangana azibuke mwakukwasela babezi baje bapwile Bakaleho omu mu cipatela.

 Bryn bamukumbulwile co wasimutwiyiye na mukwasi wa uje mukulunu. Bryn walombele ngwendi namba ya foni yendi bayane ku babezi baje bapwile Bakaleho mangana ase kusimutwiya nabo, mwafwa ha simbu ije bakele na kubindika kukobela kuje kuli babezi. Baka-cipatela batabele.

 Bryn wasinganyekele lalo bya kukwasa baje bakele na kupanga omu mu cipatela. Ngeci walekele uje mukwasi wa uje mukulunu ngwendi, ali na kukandelela manene ku cipangi cibali na kulinga baka-cipatela, co lalo ngwendi abashungwiya kukala na bukangule bwabubwa. Wendekele lalo ngwendi, natanda mizimbu yaingi ije yendeka ha banu babangi maneneni baka-cipatela mubali na kulifwitila na kwombwa, mwafwa ya mushongo wa COVID-19.

 Uje mukwasi nendi wendekele byakumwenako bije bimwesa omwo mushongo wa COVID-19 unalingisila banu babangi ku cipatela bombwe manene.

 Kutundaho, Bryn wendekele ngwendi: “Ha webusaiti yetu hali biñanda bije bikwasa baje bali na kulifwita na kwombwa. Nga muya ha jw.org na kusoneka mu kamutamba kakutondela ngweni, ‘kwombwa’ co muwana biñanda bije byasa kukwasa baje banombwa ha cipatela ceni.”

 Mubakele na kusimutwiya, uje munalume waile ha webusaiti na kusoneka ngwendi “kwombwa” mu kamutamba kakutondela, co wawanene biñanda byakele na kwendeka ha kwombwa. Wakasamene manene na kwendeka ngwendi: “Naana, njikamwesako na ba mukulunu betu. Ebi bikakwasa manene baka-kupanga ha cipatela cetu, hamo lika na banu beka. Njikabapulintila ebi biñanda na kubapangezela.”

 Munima ya byalumingo bya kupwamo, Bryn wasimutwiyiye na uje mukulunu. Uje mukulunu wamulekele ngwendi ikeye na baka-kupanga banasele kuya ha webusaiti, co banapulintako biñanda bimo byendeka ha kwombwa na kubipangezela baka-kupanga aha ha cipatela.

 Bryn ngwendi: “Uje mukulunu wakandelele manene ku cipangi cituli na kulinga na ku biñanda byabibwa binjinamutuminine. Bije biñanda byabakwasele manene.”