Njasemukilile ku Uganda mu mbongi ya Gomba. Banu babangi omu mu mbongi bapwile tuhutu. Kukwakele malaiti, ngeci butsiki twakele na kupangesa bindeya bya kwaka mazi.

 Bisemi bange bakele na kupanga cipangi ca kulima, co bajalukilile ku Uganda. Bakele na kulima kofi na makonde, co ha makonde bakele na kupangaho bwala bubatumbula ngwabo waragi. Bakele lalo na tusumbi, bimembe, bangulu na bangombe. Cisemwa cange canjilingisile njimone ngwange munakazi napande kutolilila lika ku byuma byendeka munalume wendi, co kapandele kwendeka biyongola byendi.

 Munjakele na myaka 23, njaile ku Rwanda, co njakele na kuya na bakwetu ku myela kubakele na kulandesela bwala, co twakele na kukina. Kuli mwela umo unjazemene manene. Njakele na kuyako kushwakumo, co babenya mwela banjanene kadi ije yanjitabesele kukobela kwa kujeneka kufweta. Njazemene lalo kukenga mafilimu a lwozi na bukenya. Banu banjakele na kweha nabo na mafilimu anjakele na kuyongola byanjilingisile njipwe muka-lwozi, cikwizi na muka-kunwa manene bwala.

 Mu 2000 njashangumukile kukala na munakazi wa lizina lya Skolastique Kabagwira, co twakitile bana batatu. Kwesekesa na cisemwa cetu, njamulekele ngwange napande kutsikama omwo anjindwisa nambe omwo alomba bimo. Njakele na kumuleka lalo ngwange byuma byoshe bitwakele nabyo byapwile byange, co njasa kubipangesa mwoshe munjishakela. Njakele na kutunda ha njibo butsiki, co njakele na kwiluka ha bandemba oku njinapende. Munjakele na kweta ha njibo, njakele na kutota ha cikolo, co nga Skolastique kanjishokolwela bwasi, njakele na kumupupa.

 Ha simbu oyo njakele na kupanga ha kampani ya baka-kunyunga, co yange njakele na kutwamenena bakwetu banjakele na kupanga nabo, ngeci njakele na kutambula bimbongo byabingi. Skolastique wakele na kunjisindiya kuya ku ceci yabo ya Pentekositi mwafwa wasinganyekele ngwendi nga njishangumuka kuya ku ceci hamo njitenguluka. Oloni kunjashakele kuyako. Njashangumukile kwenda bupangala na munakazi weka. Skolastique wanjisezele, co wambatele bana betu batatu na kuya ku bisemi bendi mwafwa ya bilinga byange bya bukenya na bukwizi.

 Kabusamba ketu umo wa kukola wanjilekele ngwendi bilinga byange kubyapwile byabibwa. Wanjilekele ngwendi njililwise na Skolastique. Wendekele ngwendi bana bange bapwile bababwa manene, co kubapandele kukala kwa kujeneka ishabo. Ngeci mu 2005 njalikelele kunwa bwala, co njasezele uje lipangala na kulilwisa na Skolastique. Twalyambatele mu 2006. Nameme ngoco, kunjecelele lwozi, co njakele na kuyandesa munakazi wange.

 Mu 2008, Mukaleho wa Yehova wa lizina lya Joël wezile ha njibo yetu, co njatolililile ku byuma byendekele. Joël na Mukaleho mukwabo Bonaventure banjendelele ha bingonde byabingi, co twakele na kusimutwiya manene bya mu Mbimbiliya. Njakele na kubehula bihula byabingi, maneneni ha mukanda wa Kujombolola. Njashakele kumwesa ngwange Bakaleho bapwa baka-makuli. Cakumwenako njabehwile banjileke bibakendekela ngwabo “mbunga yakama” ibanendeka ku Kujombolola 7:9 ikayoya hano hasi okuni ei vesi imwesa ngwayo “bemanene kulutwe lwa litanda [lya Njambi] na kulutwe lwa Muna Manga”? Joël wakumbulwile bihula byange mwamubwa. Cakumwenako, wanjitandelele Isaya 66:1. Oku ku mukanda Njambi natumbula kaye kupwa “bulyatelo” bwendi. Ngeci mbunga yakama banemana ku litanda lya Njambi oku bali hano hasi. Co njatandele mukanda wa Myaso 37:29 uje umwesa ngwawo baka-busunga bakayoya myaka yoshe hano hasi.

 Mu kwita kwa simbu njatabele kulilongesa Mbimbiliya. Ngeci Bonaventure washangumukile kulilongesa nange na Skolastique. Kulilongesa Mbimbiliya kwanjishongangeyeye njitengulule yoyesi yange. Njalilongesele kusingimika munakazi wange. Njecelele kumuleka ngwange anjitsikamene omwo anjindwisa nameme omwo anjilomba byuma bimo. Co lalo njecelele kwendeka ngwange byuma byoshe bitwakele nabyo byapwa byange lika. Njecelele lalo kukenga mafilimu a lwozi. Kutengulula yoyesi yange kukwapwile kwakwasi, ngeci njapandele kulikehesa na kukala na mbunge ya kulibindika.

 Myaka yaindondo kunima, njatwalele munange wa mukulunu wa lizina lya Christian kuli babushoko bwange mu Uganda. Oloni omwo njatandele mukanda wa Kwituluka mu Mashiko 6:4-7, njanangukile ngwange Njambi nana yange na munakazi wange cipangi ca kulela bana betu na kubalongesa binangulo byendi. Tubaboshe twabwahelelele manene mutwakamwambatele mangana tukale nendi, co nendi wabwahelelele.

 Njalilongesa ngwange Yehova wakala na ngozi, co njakulahela ngwange nanjikonekela ku byuma byoshe byabibi binjalingile kunima. Njabwahelela mwafwa Skolastique nendi watabele kulilongesa Mbimbiliya. Twalikundikile kuli Yehova, co lya December 4, 2010 batumbwitikile. Ano matangwa twalikulahela umo na mukwabo, co tukapangesa binangulo bya mu Mbimbiliya mu naanga yetu. Munakazi wange nabwahelela manene mwafwa munjikatundu ku cipangi, njikai lika ku njibo. Nabwahelela lalo mwafwa njikamumwesa ngozi na kasingimiko, co lalo njalikele kunwa bwala na bukenya. Mu 2015 banjangwile kupwa mukulunu mu cikungulukilo. Tuli na bana batanu, co batatu banabambwitika.

 Munjakele na kulilongesa Mbimbiliya na Bakaleho ba Yehova, kunjatabele lika ngoco bibakele na kunjilongesa, oloni njakele na kwihula bihula. Co njabwahelelele mwafwa bakele na kunjikumbulula kupangesa Mbimbiliya. Nange na Skolastique twalilongesele ngwetu baje bakapangela Njambi wa busunga banapande kwononoka mashiko endi oshe, keti kwangulaho amo. Njakandelela manene mwafwa Yehova nanjitabesa njilikute busamba nendi na bakwetu baka-kumulemesa. Munjanuka yoyesi yange kunima, njakulahela ngwange munu woshe uje ashaka kupangela Njambi, asa kutenguluka na kulinga byuma bije bizibisa Njambi kubwaha ku mbunge.