Cibunga ca Kutwamenena capwa cibunga ca baka-Kristu ba kukola ku sipilitu baje bali na cipangi ca kutwamenena Bakaleho ba Yehova mu kaye koshe. Bipangi bibakalingi binambateselela na bipangi byakama bibali binatako:

•   Bakatwamenena cipangi ca kubwahesa bilongesa bije binemana ha Mbimbiliya bije bitukatambula kwitila mu mabulu, biwano na masikola a Bakaleho ba Yehova.​—Luka 12:42.

•   Bakatwamenena cipangi ca Bakaleho ba Yehova ca mu kaye koshe ha kwangula bingila binapande mwa kulingila bipangi na kumona ngwabo milambu ili na kupanga mu ngila inapande.

 Cibunga ca Kutwamenena cili na kutembwinina mubakele na kulingila byuma “tupositolo na bakulunu mu Jelusalema” mu simbu ya baka-Kristu bakulibanga. Aba tupositolo na bakulunu bakebo bakele na kwangula byuma bya seho bicapandele kulinga cikungulukilo ca baka-Kristu. (Bilinga 15:2) Ngwe mwa baje banalume ba kulongwa, bandolome ba mu Cibunga ca Kutwamenena kubapwile bantwama ba munga yetu embwe. Mbimbiliya ikeyo ikabatwamenena mu byuma byoshe bibakalingi mwafwa bazibuka ngwabo Yehova Njambi nangula Yesu Kristu apwe Mutwe wa cikungulukilo.​—1 Korinte 11:3; Efeso 5:23.

 Mu Cibunga ca Kutwamenena muli ndolome Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, na Jeffrey Winder. Bakapangela ku cikota cetu mu Warwick, ku New York, U.S.A.

 Cibunga ca Kutwamenena cinatungu makomiti a kupwa 6, co umo na umo wa mu Cibunga ca Kutwamenena akapanga na imo yawa makomiti nambe nasa kupanga na ma makomiti a kuliseza-seza.

•   Komiti ya Kukwatasanesa: Ikatwamenena biñanda bya kukundama kuli baka-mashiko na kutala bya baje banaliwana na bukalu bwa kulizila, co lalo bakebo bakamono bya kukwasa Bakaleho ba Yehova babali na kuyandesa mwafwa ya likulahelo lyabo na biñanda bikwabo byeka bije byakundama Bakaleho ba Yehova.

•   Komiti Ikatala bya Naanga ya Betheu: Ikatwamenena byuma byoshe bije byakundama ba mu naanga ya Betheu.

•   Komiti ya Kupulinta: Ikatwamenena bya kupulinta mabulu a kukundama ku Mbimbiliya na kuwatwala ku bikungulukilo, co lalo ikatala bya kutunga myela ya biwano, maofisi a kunungulwila na mitungo ya ha minango.

•   Komiti ya Bipangi: Ikatwamene cipangi cetu ca kwambulula “muzimbu wa waubwa wa Bumwene.”​—Mateu 24:14.

•   Komiti ya Kulongesa: Ikatwamenena bya kubwahesa bilongesa bya ku sipilitu bitukatambula kwitila mu biwano, masikola, na majwi a kurekoda na mavidio.

•   Komiti ya Kusoneka: Ikatala bya kubwahesa byakulya bya ku sipilitu bije bibakapulinta na bije bili ha webusaiti yetu, co lalo ikatwamenena cipangi ca kunungulula.

 Ba mu Cibunga ca Kutwamenena bakaliwana lalo calumingo na calumingo mangana basimutwiye ha bujene bwa munga. Mubakaliwana bakasimutwiya ha Bisoneka, co bakononoka na kukabangeya kuibatwamenena sipilitu ya kujela na kweseka mubasela mwoshe kuwisila kumo omwo bangula bya kulinga.​—Bilinga 15:25.

 Aba bapwa baka-Kristu ba kuhya bakapanga mu makomiti a Cibunga ca Kutwamenena. (1 Korinte 4:2) Bali na cashu na ceke mu cipangi ca komiti mubali na kupanga, co bakakala ku ciwano ca ije komiti cikakalako calumingo na calumingo. Kubesi kwangula bya kulinga, oloni baketesa biyongola byabo na kuleka Cibunga ca kutwamenena mizimbu imo ije ibakwasa bangule mwamubwa bya kulinga. Kutundaho bakalingi biyangula komiti na kumona mubyendela byuma bije biinangula komiti. Cibunga ca Kutwamenena cikana aba bandolome cipangi ca kwendela bandolome na bandokazi mu mitambela ya kuliseza-seza ya kaye na kwendeka biñanda ha biwano bya mwaka nambe bilika bya kumanesa sikola ya Giliyadi.