Nga Mukaleho wa Yehova ecela kwambulula na kukunguluka, kutwesi kwecela kulikwatasana nendi. Oloni tukamushongangeya mangana twindule lishungu lyendi lya kupangela Njambi.

 Keti ngwabo munu acilinga lika bubi bwakama, co tumutundisa mu cikungulukilo embwe. Oloni nga muka-Kristu wa kumbwitika akala na kalingolingo ka kupokola mashiko a Njambi, co lalo katenguluka, co tumutundisa mu cikungulukilo na kwecela kulikwatasana nendi. Mbimbiliya inendeka mu kubatula ngwayo: “Tundiseni munu wamubi mukati keni.”—1 Kolinte 5:13.

 Batico nga munu banamutundisa mu cikungulukilo oloni munakazi wendi na bana bendi bacili Bakaleho ba Yehova? Kalikwatasana nabo mu kulemesa, oloni bushoko bwabo butwalelelaho. Bulo bwabo butwalelelaho, co naanga yendi nayo itwalelelaho kumuzema na kumusingimika.

 Banu baje babanatundisa mu cikungulukilo banasa kwija ku biwano byetu. Co lalo nga bashaka banasa kulomba bakulunu babanangule. Cilengo cetu cinapu ca kukwasa munu apwe lalo Mukaleho wa Yehova. Banu baje banatundu mu cikungulukilo nga becela bilinga byabo byabibi na kumwesa ngwabo bashaka lalo kutwalelelaho kukabangeya binangulo bya mu Mbimbiliya mu kuyoya kwabo, basa kwiluka lalo mu cikungulukilo.