BIBAKEHULA BABAHA
Kuma Kulilala kwa Banu ba Bushwamwa Bumo Kunabihya Ndi?
“Munjakele na kukola, njalifwitile na bukalu bumo. Njakele na kushungwiya kulilala na banu ba bushwamwa bumo. Njakele na kusinganyeka ngwange awa mashungu ahwa, oloni atwaleleleleho.”—David, 23.
Ha kupwa muka-Kilistu, David ashaka kuzibisa Njambi kubwaha. Kuma asa kulinga ngoco nga acili na mashungu a kulilala na munu wa bushwamwa bumo ndi? Njambi wamona bati kulilala kwa banu ba bushwamwa bumo?
Bika biyendeka Mbimbiliya?
Banu bamona kulilala kwa banu ba bushwamwa bumo mu ngila ya kuliseza-seza kwesekesa na cisemwa cabo nambe kwesekesa na simbu ibali na kuyoya banu. Nameme ngoco, baka-Kilistu kebesi kwecelela biyongola bya banu bibongumune nambe ‘kubapekumuna noku-noku na lihunzi lyoshe lya bilongesa.’(Efeso 4:14) Bakapangesa binangulo bya mu Mbimbiliya bije byendeka ha kulilala kwa banu ba bushwamwa bumo.
Mbimbiliya ije yapwa lijwi lya Njambi inamwesa mwamubwa mwakamwena Njambi kulilala kwa banu ba bushwamwa bumo. Ngwayo:
‘Munalume kapandele kulilala na mukwabo munalume ngwe mwakalilalela na munakazi.’—Valevi 18:22.
“Ngeci Njambi wabecelelele balinge byuma bya mazilo kwesekesa na cizango ca bimbunge byabo, . . . Mukemwo Njambi wabecelelele bakale na mashungu a kulilala a kutubakanesa, mwafwa banakazi mukati kabo batengulwile cifwa cabo ca kulilala na banalume na kushangumuka kulilala na bakwabo banakazi.”—Loma 1:24, 26, NWT.
“Kuma kumuzibuka ngweni banu ba kujeneka kusungama kubakaswana Bumwene bwa Njambi ndi? Keti bamyungumune. Baka-bupangala, baka-kulemesa tumponya, baka-kulinga bukoi, banalume bataba kubalala ku bakwabo banalume, banalume baje balala bakwabo, bezi, baka-nuna, bitakwa, baka-matuka na baka-kulyapula kubakaswana Bumwene bwa Njambi.”—1 Korinte 6:9, 10, NWT.
Mashiko a Njambi akapanga ku banu boshe, ipwe baje bali na mashungu a kulilala na bakwabo ba bushwamwa bumo nambe ba bushwamwa bweka. Munu na munu napande kulibindika nga aliwana na ceseko ca kulinga byuma byazinda Njambi.—Kolose 3:5.
Kuma oku kulumbununa ngwabo . . . ?
Kuma oku kulumbununa ngwabo Mbimbiliya ikashongangeya banu bazinde baje bakalilala mu bushwamwa bumo ndi?
Embwe. Mbimbiliya kuyesi kushongangeya banu bazinde bakwabo, ipwe baje bakalilala mu bushwamwa bumo nambe embwe. Oloni itushongangeya ngwayo ‘tukabangeye kwoloka omwo tuyoya na banu boshe,’ ipwe baka-bilinga byabibwa nambe byabibi. (Vahevelu 12:14) Ngeci kutwapandele kuzinda, kushendumuna na kuyandesa baje bakalilala mu bushwamwa bumo.
Kuma oku kulumbununa ngwabo baka-Kilistu kubapandele kwononoka mashiko aje atabesa bulo bwa banu ba bushwamwa bumo ndi?
Mbimbiliya imwesa ngwayo Njambi wabwahesele ngwendi bulo bupwe bwa munalume umo na munakazi umo. (Mateo 19:4-6) Oloni banu mubakasimutwiya ha mashiko a bulo bwa banu ba bushwamwa bumo bakawakundika manene ku biñanda bya bupolitiki keti ku futisi ya banu. Mbimbiliya ngwayo baka-Kilistu kubapandele kulikobelesa mu biñanda bya bupolitiki. (Yowano 18:36) Ngeci kubesi kukundwiya nambe kulwisa mashiko a fulumende aje atabesa bulo bwa banu ba bushwamwa bumo.
Oloni bati nga . . . ?
Oloni bati nga munu ali na kalingolingo ka kulilala na banu ba bushwamwa bumo, kuma asa kutenguluka ndi?
Eyo. Banu bamo ba mu simbu ya tupositolo batengulukile. Munima ya kwendeka ngwayo banu ba bushwamwa bumo baje balilala kubakashwana Bumwene bwa Njambi, Mbimbiliya inendeka lalo ngwayo: “Yeni bamo mukemwo mumwafwile.”—1 Korinte 6:11, NWT.
Kuma oku kulumbununa ngwabo baje becelele kulilala na banu ba bushwamwa bumo kubakele na kwanuka bya kwiluka ku futisi yabo ya laja ndi? Embwe. Mbimbiliya ngwayo: ‘Zaleni bunu bwabuha buje bubali na kupwisa bwabuha kwitila mu mangana a busunga.’ (Kolose 3:10) Banu bakatwalelelaho kutengulula futisi yabo.
Oloni batico nga munu uje ashaka kukabangeya binangulo bya Njambi anga acili na mashungu a kulilala na munu wa bushwamwa bumo?
Ngeci mwa mashungu oshe, munu asa kulyangwila kujeneka kushambeya mashungu endi na kujeneka kulinga byashungwiya. Asa kulinga bati ngoco? Mbimbiliya ngwayo: “Twaleleleniho kwenda na sipilitu, co kumulingi mwaya mashungu a situ.”—Galatiya 5:16, NWT.
Nangukeni ngweni ei vesi kuyendekele ngwayo munu kakala na mashungu a situ. Oloni nga munu azezama na byuma bya ku sipilitu bya kufwa ngwe kutanda Mbimbiliya na kulombela, co akala na zili ya kuhyana awa mashungu.
Kulinga ngoco kwakwasele David itunabanga kwendeka, maneneni munima yakulekako bisemi bendi baka-Kilistu bya bukalu bwakele na kulifwita nabwo. Wendekele ngwendi: “Kwafwile lika ngwe bananjitulu licitele lya kulema ha bitsili byange. Ngwe njalekele laja bisemi bange, ngwe njalikuwile manene myaka yange ya ku bwanike.”
Ngeci nga tukabangeya binangulo bya Yehova, co tupwa ba kubwahelela. Cili bene twakulahela ngwetu mashiko a Yehova “apwa a busunga, boshe baje bawononoka babwahelela,” co lalo ‘tutambula cikandelela ha kuwononoka.’—Myaso 19:8, 11.
