Baka-kutondesesa bamo banawanene ngwabo bakwenje na bambanda ba mu America ba kweta ku 80 pesenti bakalombela. Oloni hafu lika yobo bakalombela bakebo bakalombela ha litangwa na litangwa. Ngeci, hamo bamo bakalihula ngwabo: ‘Kuma lilombelo lyapwa lya seho bene ndi, indi lyapwa lika ngila ya kulishubulwisilamo?’

•  Kulombela kwapwa kuka?

•  Kuma Njambi akatolilila ku malombelo ndi?

•  Njasa kulombela ha byuma muka?

•  Bibakendeka bakweni

 Kulombela kwapwa kusimutwiya na Ishamatanga wa byuma byoshe. Oku kunapu kubezika kwakama! Yehova wapwa wakama manene nga tumwesekesa netu banu, oloni ‘kesi kulako na umo na umo wetu.’ (Vilinga 17:27) Mbimbiliya inendeka lalo ngwayo: ‘Shwenyeni kuyehi na Njambi, co na ikeye lalo ashwenya kuyehi neni.’—Yakomba 4:8.

 Mwasa kushwenya bati kuyehi na Njambi?

•   Ngila imo inapu kulombela. Nga mulombelo, co musimutwiya na Njambi.

•   Ngila ikwabo inapu kulilongesa Mbimbiliya. Nga mutanda Mbimbiliya, co Njambi “asimutwiya” neni.

 Ngeci, kulombela na kulilongesa Mbimbiliya kumikwasa mukanyamese busamba bweni na Njambi.

 “Kusimutwiya na Yehova—uje wapwa Wahakamwa Manene—kunapu kubezika kwakama manene.”—Jeremy.

 “Kuleka Yehova byoshe bili ku mbunge yange mu lilombelo kukanjilingisa njilizibe kushwenya manene kuyehi nendi.”—Miranda.

 Nameme mwakulahela ngweni Njambi kwakala, co lalo mukalombela kuli ikeye, hamo kunasa kumikaluwila kukulahela ngweni akamitolilila. Oloni Mbimbiliya ngwayo Yehova ‘akakumbulula malombelo.’ (Myaso 65:2) Co lalo ngwayo “akeni bukalu bweni bwoshe hali ikeye.” Mwafwa bika? Mwafwa wamyaka mbunge.—1 Petulu 5:7.

 Acisinganyekeni ha ñanda ei: Kuma mukasimutwiya na babusamba beni kushwa kumo ndi? Nga mukwemo, co na Njambi bene mwasa kusimutwiya nendi kushwa kumo. Simutwiyeni na Yehova simbu yoshe mu lilombelo na kupangesa lizina lyendi omwo mulombela. (Myaso 86:5-7; 88:9) Mbimbiliya ngwayo “lombeleni simbu yoshe.”—1 Tesalonika 5:17.

 “Kulombela kunapu kusimutwiya na Tate wa mwilu na kumuleka byoshe bili ku mbunge yange.”—Moises.

 “Njikaleke Yehova byoshe bili ku mbunge yange ngwe munjinesi kulekela banana nambe kabusamba wa ha mbunge.”—Karen.

 Mbimbiliya ngwayo: ‘Mu malombelo eni oshe lombeni Njambi byoshe bije munajeneka, simbu yoshe mulombeni na mbunge ya kukandelela.’—Filipu 4:6.

 Kuma oku kulumbununa ngwabo twasa kuleka Njambi bukalu bwetu? Eyo. Mbimbiliya ngwayo: “Kundika tuyando twobe kuli Shukulu Kalunga, co ikeye akakukwasa.”—Myaso 55:22.

 Oloni kumwapandele kwendeka lika bya bukalu bweni mu malombelo eni. Mumbanda umo wa lizina lya Chantelle ngwendi: “Busamba bwange na Yehova kubupu bwabubwa nga simbu yoshe njimulomba-lomba lika bukwasi. Njinapande tahi kumukandelela. Co kuli byuma byabingi binjinapande kukandelela kuli ikeye.”

 Acisinganyekeni ha ñanda ei: Byuma muka bimushaka kukandelela kuli Njambi? Kuma kuli byuma bitatu byanamilingila Yehova lelo bimushaka kukandelela kuli ikeye ndi?

 “Nameme byuma byabindondo bya kufwa ngwe nemo yaibwa, binapande kutulingisa tukandelele kuli Yehova.”—Anita.

 “Singanyekeseseni ha cuma cimo ca kutanga cije cikamikomokesa nambe ha vesi imo ya mu Mbimbiliya ije ikamyete manene ku mbunge, co kandeleleni kuli Yehova.”—Brian.