Briana wa myaka 15 ngwendi: “Njikeseka kutanda Mbimbiliya, oloni njikazibi lyoba munjikamono lika bukama bwayo!”

 Kuma neni mukalizibi ngoco ndi? Nga mukemwo, co ei ñanda imikwasa.

•  Mwafwa bika njinapande kutanda Mbimbiliya?

•  Njinapande kutanda bati Mbimbiliya?

•  Bibakendeka bakweni

 Kuma mukalizibi ngweni kutanda Mbimbiliya kufutula ku mbunge ndi? Nga mukemwo, co keti mulyane mulonga. Hamo mukamono ngweni Mbimbiliya yapwa libulu lije lili na mapapelo amangi-mangi, co lalo kuyesi na bikupulo. Co munasa kuliziba ngweni kuilyeseka na TV nambe mavidio.

 Oloni acisinganyekeni ha cakumwenako eci: Bati nga muwana cikasha ca laja cije cili na byuma bimo bya seho, kuma kumufukulamo mangana mumone bilimo ndi?

 Mbimbiliya yapwa ngwe cikasha cije cili na byuma bimo bya seho. Muli binangulo byabingi bya seho bije byasa kumikwasa

•   Kwangula mwamubwa byakulinga

•   Kulitombola na bisemi beni

•   Kuwana babusamba bababwa

•   Kukolesa omwo muliwana na bishoti

 Mwafwa bika eli libulu lya kusañulu lyasa kutukwasa na matangwa ano? Mwafwa “Bisoneka byoshe Njambi wahwiminininemo.” (2 Timateo 3:16) Awa majwi amwesa ngwawo binangulo bili mu Mbimbiliya bitunda kuli Njambi uje wakala manene na mana.

 Ngila ya kulibanga inapu kutanda Mbimbiliya kushangumukila ku mashangumukilo kutwala ku mamaneselelo. Kutanda mu ngila ei kumikwasa kuzibuka muzimbu wakalamo. Oloni kuli bingila byabingi bya kutandelamo Mbimbiliya. Cakumwenako:

•    Mwasa kutanda mikanda yoshe 66 ngoco bene muinalikabela, kushangumukila ku Kushangumuka kutwala ku Kujombolola.

•    Mwasa kutanda biñanda bili mu Mbimbiliya kwesekesa na simbu ibyalingiwile nambe mubyalikabelele.

 Byuma Bimikwasa: Mutamba wa Litaba Zeekelizwe A7 mu Mbimbiliya ya Toloko ya Lifasi Lelinca umwesa mubyalikabelele byuma byakama byalingiwile mu buyoye bwa Yesu mwakele hano hasi.

 Ngila yamucibali ya kutandelelamo Mbimbiliya inapu kwangula ñanda ije inalitombola na bukalu bumuli na kuliwana nabwo. Cakumwenako:

•   Kuma mushaka kuwana babusamba ba kulongwa ndi? Tandeni muzimbu wa Yonatana na Ndabiti. (1 Samwele, capita 18-20) Co omwo mutanda, nangukeni bifwa byabibwa bibakele nabyo bije byabalingisile bapwe babusamba.

•   Kuma mushaka kuwana mwakuhyanena ceseko ndi? Tandeni muzimbu uje umwesa omwo Yosefa wahyanenene ceseko cimo caliwanene naco. (Kushangumuka, capita 39) Omwo mutanda, nangukeni byamukwasele kucihyana.

•   Kuma mushaka kuzibuka mukwasa kumikwasela kulombela ndi? Tandeni muzimbu wa Nehemiya. (Nehemiya, capita 2) Omwo mutanda, nangukeni omwo kulombela kwakwaselele Nehemiya.

 Byuma Bimikwasa: Omwo mutanda Mbimbiliya, moneni ngweni muli mu mwela wa kwoloka mangana mwake mbunge ku biñanda bimutanda.

 Ngila yamucitatu ya kutandelamo Mbimbiliya inapu kwangula muzimbu nambe ñanda imo na kuitanda. Kutundaho, singanyekeseseni muimikwasela. Munima ya kutanda, lihuleni bihula bya kufwa ngwe:

•    Mwafwa bika Yehova watabesele ei ñanda baisoneke mu Mbimbiliya?

•    Ei ñanda imwesa bati bifwa bya Yehova nambe mwakalingila byuma?

•    Njasa kupangesa bati ei ñanda mu kuyoya kwange?

 Byuma Bimikwasa: Nga mushaka kutanda Mbimbiliya yoshe ya mutunu, sonekeni litangwa limushaka kushangumuka kuitanda kupangesa Cinoneko ca Kutanda Mbimbiliya (“Tomahanyo ya Kubala Bibele”) cije cimwasa kuwana ha webusaiti yetu ya jw.org.