Beya Bakai Mwilu?
Biyendeka Mbimbiliya
Njambi ali na kwangula baka-Kristu ba kulongwa ba kupwamo baje basanguka na kuya mwilu, munima ya kutsa kwabo. (1 Petulu 1:3, 4) Baje babanangula banapande kutwalelelaho kukanyamesa likulahelo lyabo na kupwa ba kulongwa, mwafwa nga kubalingi ngoco co kubakatambula buswana bwabo bwa mwilu.—Efeso 5:5; Filipu 3:12-14.
Bika bibakalinga baje baya mwilu?
Bakapangela hamo na Yesu ha kupwa bimyene na tupilistu ha myaka 1,000. (Kujombolola 5:9, 10; 20:6) Bakapwa ‘melu amaha’ nambe ngwetu fulumende ya mwilu ije ikayula “kaye kakaha,” nambe banu baje bakayoya hano hasi. Baje bakayula mwilu bakakwasa banu baje bakayoya hano hasi bayoye ngwe mwayongwelele Njambi ha kulibanga.—Isaya 65:17; 2 Petulu 3:13.
Bangahi basanguka na kuya mwilu?
Mbimbiliya inamwesa ngwayo banu ba kupwa 144,000 basanguka na kukayoya mwilu. (Kujombolola 7:4) Mu cimona cili ku mukanda wa Kujombolola 14:1-3, kapositolo Yowano wamwene ‘Muna Manga nemana ha munkinda wa Siyone ali na banu ba kupwa 144,000.’ Omu mu cimona, “Muna Manga” emanena Yesu uje wasangukile ku batsi. (Yowano 1:29; 1 Petulu 1:19) “Munkinda wa Siyone” wimanena bulemu bwali nabwo Yesu hamolika na ba kupwa 144,000 baje bakayula hamo nendi mwilu.—Myaso 2:6; Vahevelu 12:22.
Baje ‘babanasana na kwangula’ mangana bakayule hamo na Kristu mu Bumwene bwa Njambi banabatumbula ngwabo ‘butanga bwabundondo.’ (Kujombolola 17:14; Luka 12:32) Oku kumwesa ngwabo banapu babandondo kubesekesa na butanga bwoshe bwa Yesu.—Yowano 10:16.
Biyongola bya kuhenga kutalesa ku banu baje baya mwilu
Biyongola bya kuhenga: Banu bababwa boshe baya mwilu.
Busunga: Njambi nakulahesa ngwendi bwingi bwa banu bababwa bakayoya myaka yoshe hano hasi.—Myaso 37:11, 29, 34.
Yesu wendekele ngwendi: “Naumo wahi nai mwilu.” (Yowano 3:13) Ngeci, wamwesele ngwendi banu ba kufwa ngwe Abilahama, Mosesa, Yombi, na Ndabiti baje batsile te kanda aije hano hasi, kubaile mwilu. (Vilinga 2:29, 34) Oloni bali na lilabelelo lya kusanguka na kukayoya hano hasi.—Yombi 14:13-15.
Kusanguka kwa baje baya mwilu banacitumbula ngwabo ‘kusanguka cakulibanga.’ (Kujombolola 20:6) Oku kumwesa ngwabo kukakala kusanguka kukwabo kwa baje bakayoya hano hasi.
Mbimbiliya inamwesa ngwayo mu ciyulo ca Bumwene bwa Njambi, “kukukakala kutsa.” (Kujombolola 21:3, 4) Eci cikulaheso cikalishulisilila hano hasi, mwafwa mwilu kumwakele kutsa.
Biyongola bya kuhenga: Munu na munu asa kulyangwila kukayoya mwilu nambe hano hasi.
Busunga: Njambi ikeye angula bangamba bendi ba kulongwa baje bana ‘cikandelela canabasanena mwilu,” nambe lilabelelo lya kukayoya mwilu. (Filipu 3:14) Munu kasa kulyangwila kuya mwilu nambe kujeneka kuyamo.—Mateo 20:20-23.
Biyongola bya kuhenga: Lilabelelo lya kukayoya myaka yoshe hano hasi linapu lya kwisi, co linapu lika lya baje kubapandele kuya mwilu.
Busunga: Njambi natumbula baje bakayoya myaka yoshe hano hasi ngwendi “banu bange banjangwile.” (Isaya 65:21-23) Bakabezika kushulisilila biyongola bya Njambi bya kulingisa banu boshe bapwe ba kulumbunuka na kuyoya myaka yoshe mu paradaisi hano hasi.—Kushangumuka 1:28; Myaso 115:16; Isaya 45:18.
Biyongola bya kuhenga: Nambala ya 144,000 ibanatumbula ku mukanda wa Kujombolola yapwa lika ya cifwisa.
Busunga: Nameme ku mukanda wa Kujombolola kuli binambala bya cifwisa, oloni bimo byapwa bitotala bya byuma mpundu. Cakumwenako, oku ku mukanda banendekako bya ‘mazina 12 a tupositolo 12 ba Muna Manga.’ (Kujombolola 21:14) Tucisimutwiyeni ha bukaleho buje butulingisa twendeke ngwetu nambala ya 144,000 nayo yapwa nambala mpundu keti ya cifwisa.
Mukanda wa Kujombolola 7:4 ngwawo, “bungi bwa baje babakele cizibukiso ca kasateso ka Njambi ha maholo abo [nambe ngwetu babanangula kukayoya mwilu] bapwile 144,000.” Co mu mavesi anatako banendeka bya cibunga camucibali ngwabo: ‘Mbunga yakama, baje naumo wahi wasele kulaba.’ Baje ba mu “mbunga yakama” nabo batambula kwoboka kwa kutunda kuli Njambi. (Kujombolola 7:9, 10) Ngwe nambala ya 144,000 imanena cibunga ca banu ba kujeneka kulaba, ngwe kunesi kukaluwa kuzibuka bwino kulizesa kuli mukati kebi bibunga bibali. a
Aba banu ba kupwa 144,000 banabatumbula ngwabo ‘banabalanda mukati ka banu mangana bapwe bushuka bwakulibanga.’ (Kujombolola 14:4) Endekesi ya ‘bushuka bwakulibanga’ imwesa ngwayo banapu banu babandondo babanangula mangana bemaneneko bakwabo. Inalumbununa banu baje bakayula na Kristu mwilu, co bakayula banu babangi-bangi.—Kujombolola 5:10.
a Profesa Robert L. Thomas nendi wasonekele kutalesa ku nambala ya 144,000 ibanendeka ku mukanda wa Kujombolola 7:4 ngwendi: “Inapu nambala mpundu, co inaliseze na nambala ibanendeka ku Kujombolola 7:9. Nga ei nambala yapwa ya cifwisa, co kukwesi nambala mu mukanda wa Kujombolola itwasa kwendeka ngwetu yapwa nambala mpundu.”—Libulu lya Revelation 1-7: An Exegetical Commentary, liputa 474.