Banu babangi bakehula ebi bihula bakakala mu busiwa bwakama manene, co bakatondo kubazembeleka. Bamoco bamona ei nzita kupwa bubi bwakama manene kutubakanesa bubanalingi banu, co kukabakaluwila kukulahela Njambi.

 Busunga: Banu baje bakele na likulahelo lya kukanyama behwile binalingisa Njambi ecelele bubi. Cakumwenako, kapolofweto Hambakuke wehwile Njambi ngwendi: “Omwo bikajo utabesela banu ngeci balinge bubi bwa ngacije? Kulijokota na lwozi byoshe binanjizengeleka.” (Hambakuke 1:3) Yehova kapayele Hambakuke, oloni walingisile bihula byendi babisoneke mu Mbimbiliya mangana netu tubitande.

 Biyongola bya kuhenga: Njambi kesi kwaka mbunge ku tuyando tubali na kuliwana natwo banu.

 Busunga: Njambi wazinda byuma byabibi na tuyando tubikanene. (Visimo 6:16-19) Njambi mwamwene bukenya bujalakana mu kaye mu simbu ya Nowa, ‘wazibile manene kubabala ku mbunge.’ (Kushangumuka 6:5, 6) Ngeci, na ije nzita yatsiile banu babangi nayo yamuzibisile manene kubabala ku mbunge.—Malakiya 3:6.

 Biyongola bya kuhenga: Ije nzita yapwile cihiso ca Njambi kuli Bayunda.

 Busunga: Yehova watabesele Baloma banyongese Yelusalema mu cita ca myaka cakulibanga (Mateo 23:37–24:2). Oloni kutunda bene haje, Njambi kangwile muyati umo kupwa wa seho manene kutubakana ikwabo nambe kwangula muyati umo wanapande kwana kashitiko. Kuli Njambi, ‘kukwesi kuliseza mukati ka Bayunda na baje keti Bayunda.’—Loma 10:12.

 Biyongola bya kuhenga: Nga Njambi kwakala co lalo wakala na cizemo, ngwe walingisile ije nzita keti ikaleko.

 Busunga: Nameme Njambi keti ikeye akanene tuyando, simbu imo akecelela tuyando tukaleko.—Yakomba 1:13; 5:11.

 Njambi wecelelele ije nzita ikaleko ngwe mwanecelela tuyando twoshe tukaleko mangana amanese bimata byakatukile kusañulu. Mbimbiliya inamwesa ngwayo ha simbu ino Liyabolo ikeye ali na kuyula kaye keti Njambi embwe. (Luka 4:1, 2, 6; Yowano 12:31) Mbimbiliya inendeka byuma bibali bije bitukwasa kuzibisisa byalingisile Njambi ecelele ije nzita.

1.   Njambi watutangele na nzili ya kulyangwila byakulinga. Njambi walekele Adama na Eva byuma bibapandele kulinga, oloni kabasindiiye kwononoka mashiko endi. Balyangwilile kulyangwila byabibwa nebi byabibi bakebo babenya, co byuma byabibi bibangwile nebi bibanangula banu kushwa kusañulu binanenela banu tuyando twakama manene. (Kushangumuka 2:17; 3:6; Loma 5:12) Mukemwo mulyendekela na libulu lya Statement of Principles of Conservative Judaism ngwalyo: “Bwingi bwa tuyando tunatumu muno mu kaye, tuneja mwafwa ya kujeneka kupangesa bwino nzili ya kulyangwila byakulinga.” Nameme ngoco, Njambi kanyekele banu nzili ya kulyangwila byakulinga, oloni nabana simbu baliyule bakebo babenya kwa kujeneka kubakwasa kuli ikeye.

2.   Njambi asa kutundisa bukalu bwoshe buneja mwafwa ya ije nzita, co akalingamo. Njambi nakulahesa kukasangula banu babangi banatsi, kwambateselela na baje batsile muje mu nzita. Co lalo akatundisako kubabala ku bimbunge kubali na kuziba baje bobokele muje mu nzita mubakanuka byuma byabibi byalingiwile. (Isaya 65:17; Vilinga 24:15) Njambi akashulisilila ebi bikulaheso mwafwa wazema manene banu.—Yowano 3:16.

 Banu babangi baje batsisile babushoko bwabo na baje bobokele muje mu nzita bakanyamesele likulahelo lyabo na kuzibuka bibali na kuyoyela omwo bazibisisile binalingisa Njambi ecelele byuma byabibi nebi byakalinga mu kumanesa tuyando tuje tuneja mwafwa yebi byuma.