Banu babangi bakashaka kuzibuka bibali na kuyoyela. Co bakalihula bihula bya kufwa ngwe, ‘Bika binjili na kuyoyela?’ Mbimbiliya imwesa ngwayo kuyoya kwetu kunemana ha kulikuta busamba na Njambi. Tusimutwiyeniko byuma bimo biinendeka Mbimbiliya bije bimwesa ngoco.

•   Njambi ikeye Ishamatanga yetu. Mbimbiliya ngwayo: “Njambi ikeye watutangele.”—Myaso 100:3; Kujombolola 4:11.

•   Kuli bimo byatangelele byuma byoshe Njambi, kwambateselela netu.—Isaya 45:18.

•   Njambi watutangele na bujene bwa ku sipilitu, buje bunambateselela kushaka kuzibuka bituli na kuyoyela. (Mateu 5:3) Co ashaka ngwendi tuzibuke bituli na kuyoyela.—Myaso 145:16.

•   Tunapande kutwalelelaho kulikuta busamba na Njambi. Nameme bamo banasa kuliziba ngwabo kucitaba kulikuta busamba na Njambi, Mbimbiliya itushongangeya ngwayo: ‘Shwenyeni kuyehi na Njambi, co na ikeye lalo ashwenya kuyehi neni.’—Yakomba 4:8; 2:23.

•   Nga tushaka kupwa babusamba ba Njambi, tunapande kuyoya mu kulitombola nebi byatonda ngwendi tulinge. Mbimbiliya inendeka byatonda Njambi ngwendi tulinge ku mukanda wa Muka-kwambulula 12:13. Ngwayo: “Singimika Njambi, co ononoka mashiko endi, omwo ebi byoshe bikebyo bibatangelele munu.”

•   Kulutwe Njambi mwakamanesa tuyando twoshe tukalikuwa kuyoya mwamubwa ngwe mwayongwelele hakulibanga. Njambi akana kuyoya kwa myaka yoshe babusamba bendi baje bali na kumulemesa.—Myaso 37:10, 11.