Mbimbiliya inendeka bya kulisona lumolika ku mukanda wa Valevi 19:28. Inendeka ngwayo: ‘Keti mukalisone ha mibila yeni.’ Njambi wanene muyati wa Isalele eli lishiko mangana baliseze na banu babalyatele nabo baje bakele na kulisona mazina a binjambi babo nambe bikupulo bya binjambi babo ha mibila. (Kwituluka mu Mashiko 14:2) Nameme baka-Klistu kubesi mwisi ya Mashiko abanene Baisalele, oloni banapande kusinganyekesesa manene ha cinangulo cili omu mu lishiko.

Kuma muka-Klistu napande kulisona ha mubila ndi?

 Bisoneka binatako bimikwasa muzibuke bya kulinga ha ñanda ei:

•   “Banakazi banapande kuzala. . . mu kulikehesa.” (1 Timateo 2:9) Eci cinangulo cinakundama ku banalume na ku banakazi. Tunapande kusingimika mubalizibila bakwetu, co kutwapandele kulinga byuma bije binasa kubakomokesa.

•   Bamo bakalisono ha mibila mangana bamwese ngwabo banaliseze na bakwabo nambe banalimanena, bakwaboco bakalisono mangana bamwese ngwabo basa kulinga mubila wabo mwoshe mubashakela. Oloni Mbimbiliya inaleka baka-Klistu ngwayo: “Aneni mibila yeni kupwa mulambu wa kuyoya, wa kujela, uje watambula Njambi, kulumbununa cipangi ca kujela cimupanga na nzili yeni ya kusinganyeka.” (Loma 12:1) Pangeseni “nzili yeni ya kusinganyeka” mangana muzibuke bimutondela kulisona. Nga mushaka kulisona mwafwa banu babangi bali na kulinga ngoco, nambe mwafwa mushaka mumwese ngweni muli mu cibunga cimo, anukeni ngweni mu kwita kwa simbu munasala kutengulula biyongola byeni, oloni byuma bimunalisono ha mubilani kubitundu. Kwilula byuma bili na kumilingisa mushake kulisona kumikwasa mwangule mwamubwa byakulinga.—Visimo 4:7.

•   “Matumbe a munu uje apanga na nzili amunenela byuma byabingi, oloni baje bazambula kubiwana bapwa lika tuhutu.” (Visimo 21:5) Tunasa kuzambwila kwangula kulisona ha mubila, oloni, mu kwita kwa simbu kunasa kukundama busamba bwetu na bakwetu na bipangi byetu. Kutundisa byuma bitunalisono ha mubila kutondeka bimbongo byabingi, co lalo kubitundisa kubabala. Baka-kutondesesa banawana ngwabo, baje bali na mingoso ya kutundisa banu byuma bibanalisono ha mibila bali na kuwana bimbongo. Co lalo ngwabo bwingi bwa banu baje balisonene, bakalibeye.